د خېبر پښتونخوا نازولے احتساب کمېشن – عامر عالم

د خېبر پښتونخوا د احتساب کمېشن د نوم اورېدو سره سم ما ته د خپل پلار هغه ملګرے راياد شي کوم چې د غېر قانوني کار د نوم نه پۀ خوب کښې هم وېرېدو، خو پۀ اخري وخت کښې ورته خداے پۀ قهر شو او ایډيشنل سېکرټري تعينات شو. د خداے کړۀ وو، سېکرټړي صاحب خپلو بچو له هېڅ هم ونۀ کړل بلکې تر اوسه پۀ پېښور کښې د کرایه پۀ کور کښې ژوند کوي،د ريټائرمنټ نه وروستو د احتساب کمېشن نېک نظر پرې پرېوتو او د روژې پۀ بابرکته مياشت کښې هېڅ بې هېڅه ونيولے شو. يوه مياشت احتساب کمېشن ځان سره وساتو خو هېڅ رېفرنس ئې پرې تيار نۀ کړے شو او پېښور هائيکورټ د اختر نه يوه ورځ وړاندې با عزته پۀ ضمانت خوشے کړو. زما د پلار هغه ملګرے يوه مياشت پس خپل کور ته راورسېدو خو پۀ خپل خوشي کېدو دومره خفه نۀ ؤ څومره چې پۀ خپلو نيولو خفه و، خو بيا څۀ کېدے شو؟ هغه خو د عمران خانۍ بدلون پۀ خپله ولقه کښې اخستے ؤ خو ځه يره! د خپل پلار دغه ملګرے به پرېږدم ـــ خپلې مقصدي خبرې ته به راشم او د خپل قام پۀ وړاندې به د خېبر پښتونخوا احتساب کمېشن د کارکردګۍ جاج واخلم.

احتساب څنګه کېږي او څوک ئې کوي، دا خبرې به د خېبر پښتونخوا د خلقو پۀ وړاندې کېږدم.

د خېبر پښتونخوا اسمبلۍ احتساب کمېشن د خېبر پښتونخوا موجوده صوبائي حکومت پۀ کال دوه زره څوارلسم کښې د يو اېکټ لاندې د دغه نعرې سره پۀ وجود کښې راوستے دے چې د خېبر پښتونخوا د هغه ټولو کرپټ خلقو احتساب به پرې کوي کوم چې د سرکاري وسائلو پۀ غلط استعمال کښې ککړ وي. دغه اېکټ هم لکه د خېبر پښتونخوا اسمبلۍ د نورې قانون سازۍ دومره پۀ تادۍ کښې جوړ شوے دے چې تر اوسه پکښې د صوبائي اسمبلۍ لۀ خوا بې شمېره تراميم راوړے شوي دي. د دغه ترميمونو سره کۀ هر څو د خېبر پښتونخوا اسمبلۍ اپوزيشن ګوندونو پۀ يو وخت کښې هم ملګرتيا نۀ ده کړې خو بيا هم د پاکستان تحريک انصاف کهلاړيانو،د جماعت اسلامي غازيانو )خېبر بېنک کښې د شوې غزا( او د قومي وطن پارټۍ وزيرانو او ممبرانو )د خپلو نیمچه وزارتونو او ممبرشپونو د بحال ساتلو پۀ هیله( د خپل عددي اکثريت پۀ بنياد د اپوزيشن ګوندونو ترميمونه بلډوز کړي او د خېبر پښتونخوا لپاره ئې احتساب اېکټ کله پۀ يو شکل او کله پۀ بل شکل کښې مخې ته راوړے دے.

د خېبر پښتونخوا احتساب کمېشن کارکردګي څۀ ده؟ دا جاج کۀ وروستو واخلو نو ښه به وي. اول به د خېبر پښتونخوا احتساب کمېشن صحافتي احتساب وکړو چې دومره واضحه شي چې دغه اداره چې د احتساب لپاره جوړه ده، اٰیا د احتساب جوګه هم ده کۀ نه؟

د خېبر پښتونخوا احتساب کمېشن احتساب مونږ نۀ د ضياء الله اپريدي د الزامونو نه شروع کوو او نۀ د اپوزېشن ګوندونو د سياسي خبرو نه، بلکې دغه جاج مونږ پۀ هغه وائټ پېپر اخلو کوم چې د خېبر پښتونخوا احتساب کمېشن خپل يو افسر برېګېډئير طارق جوړ کړے دے. د بر يګېډئير طارق دغه وائټ پېپر چې پۀ يو سل او درې صفحو اډانه دے، پکښې ځاے پۀ ځاے دغه انکشافونه کېږي چې احتساب کمېشن کښې د ډي جي احتساب کمېشن نه واخله تر د ډائرئکټرانو، اېډيشنل ډائريکټرانو او انوسټي ګېشن افسرانو پورې خلق پۀ غېر قانوني طريقې سره بهرتي کړے شوي دي. بريګېډئير طارق پۀ خپل دغه وائټ پېپر کښې دا انکشاف هم کړے دے چې احتساب کمېشن کښې صوبائي حکومت او نورو متعلقه خلقو د اهل خلقو پۀ ځاے خپل خپل خلق بهرتي کړي دي او د هغوي پۀ ذریعه د احتساب پۀ نوم د جعلي تبدیلۍ روزګار روان دے. هم دا شان پۀ دغه وائټ پېپر کښې دا انکشاف هم شوے دے چې د احتساب کمېشن يو شمېر افسران پۀ جعلي دستاوېزاتو هم بهرتي کړے شوي دي. هم دا شان داسې افسران هم پۀ احتساب کمېشن کښې پۀ سفارش بهرتي کړے شوي دي د چا چې يا عمر د مطلوبه عمر نه زيات دے او يا ئې تجربه د نيشت برابر ده، ولې د هغې باوجود هم دغه افسران د چا د خوشحالۍ لپاره پۀ احتساب کمېشن کښې بهرتي کړے شوي دي. هم دا شان د بريګېډئير طارق د وائټ پېپر نه دا انکشاف هم کېږي چې يو شمېر افسران بغېر د څۀ درخواسته پۀ احتساب کمېشن کښې بهرتي کړے شوي دي، يعني کۀ چا د يو پوسټ لپاره اپلائي هم نۀ وي کړې او د وزيرا عليٰ صاحب يا عمران خان منظورِ نظر وي نو هغه به د احتساب کمېشن برخه وي.

د بريګېډئير طارق پۀ دغه وائټ پېپر کښې پۀ دېرشمه پاڼه د قائم مقام ډي جي برېګېډئير سجاد احمد پۀ تعيناتۍ کښې د بې ضابطګۍ نشاندهي شوې ده. د برېګېډئير سجاد احمد پۀ حواله بريګېډئير طارق ليکلي دي چې قائم مقام ډي جي برېګېډئير سجاد احمد د ډائريکټر انوسټي ګېشن پۀ پوسټ هم د اهليت پۀ لحاظ نۀ ؤ پوره، ولې د هغې باوجود هم هغه د ډائريکټر اېچ اٰر پۀ څوکۍ تعينات کړے شو او اوس پۀ موجوده وخت کښې د احتساب کمېشن د ډي جي پۀ حېث خپلې ذمه وارۍ تر سره کوي. د برېګېډئير سجاد احمد د تعيناتۍ پۀ حواله پۀ دغه وائټ پېپر کښې دا انکشاف هم شوے دے چې احتساب کمېشن سره د هغۀ د تعيناتۍ هم هېڅ قسمه رېکارډ نشته، ولې د هغې باوجود هم هغه نۀ صرف تعينات دے بلکې ورځ پۀ ورځ ورته ترقۍ هم ورکولې کېږي. هم دا شان د وائټ پېپر پۀ اوومه پاڼه د ډائرېکټر انويسټي ګېشن کرنل (ر) سردار علي پۀ تعيناتۍ اعتراضونه شوي دي او د هغۀ پۀ حواله هم دا وئيلے شوي دي چې د هغۀ تعيناتي هم پۀ غېر قانوني لار شوې ده. د وائټ پېپر پۀ څوارلسم مخ د احتساب کمېشن د ليګل اېکسپرټ پۀ تعيناتۍ هم اعتراضونه شوي او د هغۀ پۀ حواله د دستاوېزاتو د نيشت والي او کمې تجربې الزام لګولے شوے دے. د ډي جي د پي اېس او د تعيناتۍ پۀ حواله هم وئيلے شوي دي چې د دستاوېزاتو هېڅ قسمه رېکارډ ئې موجود نۀ دے، ولې د هغې باوجود هم حضرت پۀ لویه څوکۍ تعينات کړے شوے دے. يا خو ورته مور پلار ښه ډېره دعا کړې ده او يا پرې د ملک د ټولو نه د "پاک" سړي نظر پروتے دے.

د احتساب کمېشن پۀ حواله دغه وائټ پېپر کښې د اېګزېکټېو پوسټونو سره سره پۀ نورو پوسټونو هم اعتراضات شوي دي، ولې تر اوسه پۀ دې حواله صوبائي حکومت هېڅ قسمه رد عمل نۀ دے څرګند کړے او چې څنګه ئې پۀ نورو محکمو کښې د باکرداره خلقو سپکاوے کړے دے، هم دا شان ئې برېګېډئير طارق هم د دغه وائټ پېپر د شائع کولو وروستو د خپلو ذمه واریو نه لرې کړے دے.

دا د خېبر پښتونخوا حکومت هغه احتساب کمېشن دے کوم چې د نورو خلقو د احتساب لپاره جوړ کړے شوے ؤ او صرف شريف خلق ئې تر اوسه ګېر کړي او د هغوي احتساب ئې کړے. لۀ بده مرغه نۀ خو احتساب کمېشن تر اوسه چا ته سزا ورکړې ده او نۀ ئې پۀ اصل معنو کښې غلا کوونکي رانيولي دي.

د احتساب نعرې لګوونکي حکومت پۀ احتساب کمېشن صرف خپل سياسي حريفان دباو کړي دي او يا ئې صرف د خېبر پښتونخوا د اولس د پېسو ضياع کړې ده. احتساب کمېشن اوس دومره نيازبين شوے دے چې نۀ خو صوبائي حکومت د هغوي پۀ حواله څۀ موقف ورکوي او نۀ د هغوي څۀ کارکردګي پۀ ګراونډ ښکاري ـــ بيا هم احتساب زنده باد،بيا هم عمران خان زنده باد، بيا هم تبديلي سرکار زنده بادـــــ

سوال دا دے چې د خېبر پښتونخوا د نيازبين احتساب کمېشن احتساب به څوک کوي؟

تحریک انصاف پۀ تېر الېکشن کښې د خپل نوم سره د قافیو پۀ بندش کښې د "صاف چلي شفاف چلي" اضافه کړې وه. احتساب پسې د تحریک انصاف د ملنډې نه پس او د ضیاء الله اپریدي د الزامونو، پۀ بیلیون ټریز سونامي کښې د بدعنوانۍ د تازه رپورټونو، د اثاثو پۀ حقله د عمران خان او د پي ټي اٰئي هره ورځ نوې بهانه او داسې نورې ډېرې خبرې چې رایوځاے شي نو هغې نه ثابتېږي چې د "څلورو پنچرو" خلاف د "ازادي مارچ" کوونکې پي ټي اٰئي د هر اندام نه هوا وتلې ده.

المیه دا ده چې د تحریک انصاف "جعلي" تبدیلي سرکار د هغه احتساب نه هم د خلقو باور پورته کړو چې ووټ ئې پرې غوښتو.

دا هم ولولئ

‘احتساب کمېشن’ او د یو اویا نومونو ټوقه – عامر عالم

  لفظ احتساب داسې خوږ دے لکه شات، خو د هغه چا د پاره څوک …