مثالي پولیس او روایتي سیاست – عامـر عالم

“پۀ خېبر پښتونخوا کښې د پوليسنګ پۀ نظام کښې ښکاره بدلون راغلے دے ـــ خېبر پښتونخوا کښې د پوليس اېکټ وروستو پوليس پۀ مکمله توګه بااختياره شوي دي ـــ خېبر پښتونخوا يواځينۍ صوبه ده چې پکښې د پوليس ډپارټمنټ لپاره اصلاحات شوي دي ـــ”

دا او داسې نورې ډېرې دعوې به زما اکثر لوستونکو اورېدلې هم وي او چې څوک دا دعوې ډېرې ډېرې کوي د هغوي د نومونو نه به هم خبر وي، زۀ ئې نوم اخستل نۀ غواړم ـــ خو د دغه دعوو پۀ ترڅ کښې به د خېبر پښتونخوا زمکني حقيقتونو ته ګورو او بيا به د محترم وزير اعليٰ پروېز خټک صاحب او د پاکستان تحريک انصاف د چئېرمېن عمران خان موقف ته ګورو چې هغوي د پوليسو د کارکردګۍ د ښکاره کېدو وروستو د پوليس پۀ نظام کښې بدلون له څۀ نوم ورکوي؟

‘مثالي پولیس’ ډېر ‘غېر سیاسي’ کړے شوي دي.

د خېبر پښتونخوا د پوليسو د پوليس اېکټ د پاس کېدو وروستو ټولو نه لوے امتحان هغه وخت شروع شو کله چې پۀ مردان عبد الولي خان پوهنتون کښې د توهين رسالت پۀ تور کښې د جرنلزم د څانګې زده کوونکے مشال خان د يو هجوم پۀ لاسو شهيد کړے شو. د دغه پېښې وروستو څۀ وشو، پۀ هغې هم خبره کوو خو د ډي اېس پي پۀ موجودګۍکښې د مشال خان مرګ د ټولو نه اوله د پوليس پۀ مخ څپېړه وه. کۀ دا خبره نۀ کوو چې د مشال خان به پوره وه نو بيا د ټولو نه اول د مشال خان د مرګ ذمه وار هم د تبديلي سرکار مثالي پوليس دي، ولې کۀ يو هوائي ډز د پوليسو لۀ خوا کړے شو نو دغه غازيان چې د رحمت اللعالمین صلي الله علېه وسلم پۀ نوم ئې يو بې ګناه طالبعلم وژلو، د هغوي منډې به دې ټول پاکستان ليدلې وې، لکه نن چې څنګه د هغوي وارثان د هغوي د شهادت پۀ ځاے د هغوي ازادۍ د پاره ټول ډکي پۀ لاس کښې نیولي ځغلي ـــ خو لۀ بده مرغه د مشال خان د شهادت پۀ وخت زمونږ مثالي پوليسو تماشه کوله او بيا ئې دغه کرېډېټ هم اخستو چې پۀ ډېره ښه طريقه ئې د مشال خان مړے د پوهنتون د احاطې نه راویستے دے ـــ شاباش!!! ـــ يو يو سلوټ شئ!!! اوس راځو د مشال خان د کېس د ګرفتاریو او تفتيش اړخ ته او د مشال خان کورنۍ سره د عمران خان لۀ خوا د شوې وعدې اړخ ته ـــ د مشال خان د خور ستوريه خان پۀ قول چې هغوي سره د پاکستان تحريک انصاف د چئېرمېن لۀ خوا دا وعده شوې وه چې نۀ صرف پوليس د مشال خان قاتلان نيسي، بلکې د هغوي د تحفظ د يقيني کولو سره سره به د هغوي د تعليم هم مناسب بندوبست کولے شي خو لۀ بده مرغه دغه وعده هم لا د عمران خان صاحب لۀ خوا د مشال خان کورنۍ سره نۀ ده پوره کړې شوې او د هغې ښکاره مثال د اقبال لالا پۀ انګلېنډ کښې کړے تقرير دے. د مشال خان خوېندې اوس هم پوهنتون او سکول ته نۀ ځي.

اوس راځو د مشال خان د قتل د ملزمانو اړخ ته ـــ د خېبر پښتونخوا د مثالي پوليسو پۀ قول چې هغوي د مشال خان قتل کېس کښې پۀ نامزد يو شپېتۀ ملزمانو کښې اتۀ پنځوست ملزمان نيولي او د هغوي کېس هم منطقي انجام ته رسېدونکے دے خو ورسره دا نۀ وائي چې د مشال خان د قتل مرکزي ملزم د تور خان زوے عارف چې د پي ټي اٰئي د مردان تحصيل کونسلر دے، هغه ولې نۀ دے نيولے شوے؟ هم دا شان مثالي پوليس دا هم نۀ وائي چې د مشال خان کېس کښې د ترهګرۍ دفعې نهه مياشتې پس شاملې کړې شوې دي. پۀ هغه وخت کښې غېر سياسي پوليس د سياسيانو پۀ داسې ولقه کښې وو چې د ډېرې وېرې ئې د مشال خان کېس کښې د ترهګرۍ دفعات هم نۀ شاملول. اوس چې د مشال خان شهید د کېس فېصله د فرورۍ پۀ اووم تاریخ مخې ته راتلونکې ده، خو مونږ دې د دې حقیقت نه انکار ونۀ کړو چې د ‘تبدیلي’ سره نتي څۀ مرکزي کردارونه چې ځانونه ئې پۀ دې مقدمه کښې هیروګان کول، د رانیولو پۀ ځاے پۀ نورو سیاسي ګوندونو داسې ګوتې پورته کړې شوې لکه چې صوبه کښې د هغوي حکومت وي او یا لکه چې پۀ اسلام اباد کښې پۀ ټټ ټوټ هغوي د اېمپائر مسواکې ګوتې نېغېدو ته ناست وي.

د غېر سياسي پوليسو دوېم امتحان هغه وخت شروع شو کله چې د څو با اثره خلقو لۀ خوا شريفا بي بي نومې يوه جينۍ لوڅه پۀ لارو کښې وګرځولې شوه او پۀ ځواب کښې غېر سياسي پوليسو هم د هغه بااثره خلقو پۀ وېنا د شريفا بي بي پۀ ورور اېف اٰئي اٰر درج کړو. ولې پۀ مېډيا کښې د پرېشر جوړېدو وروستو پوليسو د جينۍ پۀ ورور درج اېف اٰئي اٰر واپس کړو او د با اثره ملزمانو خلاف اېف اٰئي اٰر درج کړے شو، ولې پۀ واقعه کښې ککړ پۀ نهه ملزمانو کښې اتۀ ملزمان هم نيولي شوي خو د واقعې مرکزي ملزم سجاول لا تر دې دمه مفرور دے او د پاکستان نمبر ون او غېر سیاسي پوليس د څو مياشتو تېرېدو باوجود هم د پټواري سجاول پۀ نيولو کښې د ناکامۍ سره مخ دي. ذرائع دا هم وائي چې غېر سياسي پوليس د صوبائي وزير علي امين ګنډاپور لۀ وېرې د سجاول پۀ نيولو کښې د ناکامۍ سره مخ دي. پۀ دې خبره کښې څومره حقيقت دے، بس دا به ووايو چې والله عالم ـــــ

د غېر سياسي پوليسو بل امتحان پۀ پنځلسمه جنورۍ هغه وخت شروع شو چې کله د نامعلومه خلقو لۀ خوا د مردان پۀ ګوجرو ګړهۍ کښې څلور کلنه عاصمه د جنسي زياتي وروستو ووژلې شوه او د هغې مړے پۀ پټو کښې وغورځولے شو. د عاصمه کېس هم د قصور د زېنب پۀ رنګ ؤ. قصور کښې هم د زېنب مړے د هغې لواحقينو پۀ خپله پېدا کړے ؤ او مردان کښې هم د عاصمه مړے د هغې لواحقينو پۀ خپله پېدا کړے ؤـــ خو بيا خېبر پښتونخوا کښې مثالي پوليسو دا ظلم وکړو چې پوسټ مارټم رپورټ ئې څو ورځې د مېډيا نه پټ ساتلے ؤ. دا خو دې خداے حمايت الله مايار ژوندے لري چې هغۀ د عاصمه کېس اوچت کړو او پۀ نړۍ ئې ومنله چې مردان کښې هم زمونږ یوې لور سره د قصور د زېنب پۀ رنګ ظلم شوے دے. د زېنب قاتل ونیولے شو، عدالت ته پېش کړے شو او کیفر کردار ته به هم ورسي.

پۀ اوولسمه جنورۍ پوليسو هم د پرېشر جوړېدو وروستو عاصمه سره د جنسي زياتي تصديق وکړو او د هغې وروستو پۀ علاقه کښې د دوه سوه نه زيات شکمن خلق پۀ دغه کېس کښې شامل تفتيش کړے شوي دي، خو لۀ بده مرغه تر اوسه د عاصمه قاتل هم د مثالي پولسيو لۀ خوا نۀ دے ګرفتار کړے شوے. هم داشان د مثالي پوليسو پۀ موجودګۍ کښې يو بل د ظلم داستان مخې ته راغے. پۀ کوهاټ کښې د پاکستان تحريک انصاف د ضلعي صدر د ورارۀ لۀ خوا د اېبټ اباد میډيکل کالج د تهرډ ائير طالبعلمه عاصمه راني صرف پۀ دې جرم ووژلې شوه چې عا صمه راني د دغه قاتل سره د رشتې نه انکار کړے ؤ. د عاصمه راني د وژلو وروستو پۀ پينځو ګېنټو کښې دننه دننه دغه قاتل د ملک نه پۀ تېښته کښې هم بريالے شو خو خداے شته کۀ مثالي پوليس د ځاے نه هم خوځېدلي وي او د عاصمه راني خاندان سره د ظلم د پاسه ظلم د صوبې وزير اعليٰ او د کوهاټ نه د پاکستان تحريک انصاف اېم اېن اے شهريار اپريدي وکړو. شهريار اپريدي پۀ خپل موقف کښې وئيل چې قاتل مجاهد اپريدې بې قصوره دے ځکه چې هغه خو د يوکال نه زيات وشو چې د ملک نه بهر دے او وزير اعليٰ صاحب وئيل چې دا رنګ کېسونه به کېږي، زۀ دا رنګ واقعات نۀ شم ودرولے. د عاصمه راني خاندان مطمئن دے؟ د عاصمه راني خاندان څومره د پوليسو د کارکردګۍ نه مطمئن دے، د هغې اندازه د عاصمه راني د خور پۀ وېډيو پېغام کښې کېږي. دا دعويٰ هم د عاصمه راني د کورنۍ لۀ خوا کېږي چې د پي ټي اٰئي د ضلعي صدر د ورارۀ پۀ ضد ‘مثالي پولیس’ ته شکایت هم شوے ؤ خو هغوي پرې د ‘غېر سیاسي’ کېدو پۀ وجه غوږ هم نۀ ؤ ګرولے او نتیجه کښې ئې یوې معصومې ژوند وبائیلۀ.

خېبر پښتونخوا کښې د پولیس پۀ نظام کښې څومره بدلون راغلے دے، اوس خو چيف جسټس اٰف پاکستان هم ومنله!!! د چيف جسټس ريمارکس به تاريخ د عمران خان د دعوو پۀ رڼا کښې ټول عمر ياد ساتي. چيف جسټس اٰف پاکستان پۀ خپل ريمارکس کښې د نمبر ون او مثالي پوليس پۀ حوالي وائي چې ‘ما خو اورېدلي وو چې د خېبر پښتونخوا د پوليسو پۀ نظام کښې ډېر بدلون راغلے دے، تاسو سره د تفتيش هېڅ طريقه کار نشته!!! د اٰئي جي موجودګي دلته ضروري وه، اٰئي جي چرته دے؟ د ملزم نۀ ګرفتارېدل د پوليسو کمي ده’، دا ريمارکس وو د هغه چيف جسټس اٰف پاکستان چا چې د نواز شريف د نا اهلۍ فېصله ورکړې وه او پي ټي اٰئي واله پرې د جشن تر حده د خوشحالو اظهار کړے ؤ.

د دعوو د رښتيا ثابېتدلو يواځينۍ طريقه دا وي چې دغه دعوو ته د زمکني حقيقتونو پۀ رڼا کښې وکتلے شي. د تېرو څو مياشتو دوران پۀ خېبر پښتونخوا کښې مخې ته راتلونکي زړۀ دردوونکي واقعاتو کښې د پوليس غفلت او غلطيانې داسې پۀ ډاګه شوې دي چې اوس ئې د پي ټي اٰئي خپل ورکران هم تائيد نۀ شي کولے. د دغه غلطيانو او کوتاهیو وروستو کۀ هم څوک د پوليس د اصلاحاتو او ښې کارکردګۍ سندرې وائي نو بيا دا فېصله هم تاسو وکړئ چې خېبر پښتونخوا کښې د پولیس پۀ نظام کښې څومره بدلون راغلے دے؟؟؟ ورسره دا فېصله هم تاسو وکړئ چې ايا د تبديلۍ پۀ نوم سياست کوونکي او حقيقتونه د پښو لاندې کوونکي هم روايتي سياست نۀ کوي؟؟؟

‘مثالي پولیس’ دومره ‘غېر سیاسي’ دي چې پۀ صوبه کښې څومره هم غټ غټ کېسونه شوي دي، پۀ هغې کښې د تحریک انصاف لیډر شپ پۀ څۀ نه څۀ حواله ملزم دے او کمال دا دے چې د خپل غېر سیاسي کېدو پۀ وجه مثالي پولیس یو هم مرکزي کردار نیولے نۀ دے. د دې کرښو لیکلو پورې د تحریک انصاف د یو بل مرکزي مشر مشتاق غني د ورور پۀ کور کښې یوې ماشومې سره جنسي زیاتے شوے. دې لړ کښې د غېرسیاسي مثالي پولیس کارکردګۍ باندې د وخت نه وړاندې بدګماني نۀ شو کولے.

دا هم ولولئ

‘احتساب کمېشن’ او د یو اویا نومونو ټوقه – عامر عالم

  لفظ احتساب داسې خوږ دے لکه شات، خو د هغه چا د پاره څوک …