Pakhtoon | The Magazine Publishing Since 1928
متعلقه مضامين
January 22, 2020, Russia
د باچا خان او ولي خان تلين پۀ روسيا کښې
پۀ دوه ويشتمه (22) جنورۍ د روس پۀ ورونش ښار کښې د باچا خان او د ولي خان تلين ونمانځلے شو. د ورونش ښار حکومتي هال “کور د دوستي” ” کښې د ښار د لر بر افغانانو روسيانو شرکت وکړو.
د غونډې شروع د روس د پښتون تنظيم مشر نويد محمد خان وکړه او د روس او افغانستان د ملي سرود نه پس د پښتون تنظيم او باچا خان مرکز مشترکه جوړ شوے ډاکومنټري فلم وښودلے شو. بيا د ورونش پوهنتون د خارجي څانګې مشر رديونف ولاديمير ولينتينوچ د باچا خان پۀ ژوند او د عدم تشدد د فلسفې ذکر وکړو او څرګنده ئې کړه چې د باچا خان فلسفه د هر قوم د خوشحالۍ او د امن باعث جوړېدلې شي.
د ورونش پوهنتون د تاريخ څانګې مشر پروفېسر ميروشنيکوف الېکسندر وېکتروېچ پۀ خپل بيان کښې د باچا خان فلسفه يوې تکنيکي طريقې سره تشبيه کړه چې باچا خان خپل جدوجهد نه کاميابۍ سره خپل قام ته نۀ صرف شعور بلکې يوه بېداري ورکړه چې اوس ټول عالم ته ئې ضرورت دے.
پۀ غونډه کښې د پښتون تنظيم څانګې مشر حيات الله توخي باچا خان ته خپل اشعار وړاندې کړل کوم کښې چې دۀ ټول خپل اتلان ياد کړل. د جنوبي پښتونخوا د مشهور مصور نصيب خان لۀ اړخه د باچا خان بابا جوړ شوے انځور د ورونش ښار د فني پوهنتون مشر او د روس قامي مصور شپاکوفسکي ولاديمير يفګينوچ ته ډالۍ شو.
د ورونش پوهنتون طالب علمه ماروزوه جوليانا پۀ غونډه کښې د ملګرتيا او د دوستۍ اشعار بيان کړل.
د ورونش د حکومتي چارواکو لۀ اړخه الېکسندر وېکترويچ د باچا خان د فلسفې اهميت بيان کړو. پۀ غونډه کښې افغانانو مشرانو فضل هادي او غلام مهيدين د باچا خان فخر افغان بابا پۀ ژوند رڼا واچوله.
