پښتنو زنانو ته! “پښتون” – پینځلسم اګست 1945 – عبدالغفار

ما د”پښتون” پۀ پخوانو پرچو کښې هم خپلو پښتنو خوېندو ته ليکلي وو او دا ځل ئې بيا هم ليکل ضرور ګڼم چې د يو قوم د ترقۍ د پاره کوشش يواځې د نارينو فرض نۀ دے بلکې دا فرض پۀ زنانو او نارينو يو شان عائد کېږي. مګر د بد قسمتۍ نه زمونږ پښتنې زنانه پۀ دې مېدان کښې هېڅ حصه نۀ اخلي. دا صحيح ده چې د دې ذمه واري زياته پۀ نارينو ده؛ ولې چې نارينه خپلو زنانو ته د قومي خدمت موقع نۀ ورکوي – مګر څۀ نا څۀ زنانه هم ملامته دي چې کۀ نور څۀ نۀ وي نو قلمي امداد خو دوي کولے شي. لکه د “پښتون” پۀ تېر شوي دور کښې زمونږ يو دوه درې خوېندې داسې وې چې څۀ اشعار او مضمونونه به ئې را لېږل او د هغې نه به پۀ پښتنو زنانو کښې ډېره بېداري پېدا کېدې شوه، نو کۀ دا ځل بيا پښتنې زنانه توجه وکړي او د “پښتون” د پاره څۀ قلمي سلسله شروع کړي نو دا به د خپل قوم يو لوي خدمت ګڼلے شي. زۀ به خپلو پښتنو خوېندو ته دا هم عرض وکړم چې تاسو لږ د دنيا د قومونو د حالاتو نه ځان خبر کړئ چې زنانه د نارينو سره اوږه پۀ اوږه د قوم د ترقۍ کوشش کوي او د هېڅ يو قوم ترقي تر هغې نۀ شي کېدې تر څو چې د هغې قوم نر ښځې يو شان د ملک د ابادولو او ترقۍ د پاره کوشش ونۀ کړي. نو کوم کار چې مونږ شل کاله پس شروع کوو نو ولې نن پۀ هغې عمل شروع نۀ کړو. د نورو قافله اګر چې زمونږ نه ډېره مخکښې لاړه خو کۀ نن مونږ راپاڅو او ورپسې د تلو کوشش وکړو نو نور خو به وروستو پاتې نۀ شو – او کۀ دغسې مونږ اودۀ يو او زمونږ زنانه غافلې او بې خبره وي نو هېڅ اميد نشته چې مونږ به د دنيا قومونو سره د سيالۍ قابل شو.

 

 

 

 

دا هم ولولئ

د حضرت باچا خان (رح) وېنا – پښتون

(دا تقرير باچا خان پۀ 29 ستمبر 1939 د سويلي چارسدې يوې درنې غونډې ته …