Pakhtoon | The Magazine

Tag: حکومت

  • عمران خان بمقابله “جانے کاکا” – سلطان خان ټکر

    عمران خان بمقابله “جانے کاکا” – سلطان خان ټکر

    د عمران خان پۀ حکومت کښې هغه څۀ کېږي څۀ چې مافيا غواړي، باقي صرف د خان چغې دي يعنې صرف د کچ ادني فارم ماسټري ده چې ماشومان پرې وېروي، خو مافيا خو مافيا وي کنه، پۀ هوائي ډوزو دوي وېرېږي نه، بلکې د خان دا ډزې ډوزې پۀ دوي خوږې لګي او ځوانان وائي چې ګنې خان به اوس ملک شړشم کړي. داسې نظارې قوم ته د چينو د نرخونو پۀ مد کښې ډېرې ښکاري، د حکومت د اعداد و شمار مطابق چيني 100 روپۍ في کلو پورې خرڅېږي. پۀ ټول ملک کښې د چينو اوسط قيمت د 100 روپۍ في کلو نه زيات دے. د تحريک انصاف حکومت کښې مل مالکانو د حکومت د اېکس مل رېټ مطابق د 9 جولائۍ 2021 پورې د عوامو د جېبونو نه 230 ارب روپۍ اضافي ويستې دي. صرف پۀ دې کال ئې د 9 جولائۍ پورې 32 ارب روپۍ اضافي ئې ګټلې دي. د خان اهليت له بيا هم ځوانان ډنګ ورکوي، اخر پۀ څۀ؟ کۀ نۀ ئې منئ نو د تاريخ صفحې به اړول غواړي. کۀ بيا هم شک کوئ نو ماهرين نفسيات پۀ هر ښار کښې ډېر دي، خو د خان د راتلو سره ئې فيسونه لوړ شوي دي. حکومت پۀ دې کال د شوګر کېن سپورټ پرائس 200 روپۍ في من مقرر کړو، نو زميدارو پۀ دې رېټ مل ته د ګنو ورکولو نه انکار وکړو. زميدارو دا موقف اختيار کړو چې مل زمونږ نه دوه کاله ګنے پۀ 190، 180 روپۍ في من اخستل او د چينو قيمت ئې د 55 في کلو نه 100 روپۍ في کلو کړے دے. پۀ دوه کالو کښې مل مالکانو 198 ارب روپۍ وګټلې او زمونږ د زميندارۍ پۀ لګښت کښې د اضافې باوجود د ګني قيمت د نشت برابر دے. د ګني قيمت اوچت کړے شو خو بيا هم دومره نه څومره چې د چينو قيمت لوړ دے. حکومت د مل مالکانو دا دعوي قبوله کړه چې دوي ګني پۀ 256 روپۍ في من اخستي دي. د مل مالکانو د دعوې مطابق د چينو اېکس مل قيمت 80 روپۍ في کلو او ريټېل قيمت 85 روپۍ في کلو پکار دے. حکومت د خپل اېډمنسټرېټيو کمزورۍ له وجې پۀ 85 روپۍ في کلو ساتلو کښې ناکامه شو، ورکه ډنګ. بيا د لاهور هائي کورټ حکم جاري کړو چې د رمضان پۀ مياشت کښې دې چيني پۀ 85 روپۍ خرڅ کړے شي. شهزاد اکبر دا حکم يو ډېر لوے ريليف وګڼو او دا ئې د حکومت د منافع خورو خلاف يوه لويه فتح وګڼله، ماشا الله، خوحکومت د عدالت د حکم باوجود د مافيا خلاف څۀ ونۀ کړے شو يعنې “مافيا جيت ګيا او حکومت ښۀ جوخته باٸيله”. د خان د فتحې دې دعوې ته به سلامي ورکول غواړي. بيا خلکو وليدل چې د يو يو کلو چينو د پاره خلک د رمضان پۀ مياشت کښې د ګرمۍ باوجود پۀ اوږدو اوږدو قطارونو کښې ولاړ وو. دا نۀ صرف د حکومت د پاره يو فنانشل سکېنډل دے، بلکې يو سياسي سکېنډل هم دے. دا وجه ده چې دوه مياشتې پس هم د کشمير پۀ انتخاباتو کښې مريم نواز پۀ خپلو جلسو کښې د پي ټي ائي حکومت باندې تند و تېز تنقيدونه وکړل چې حکومت د رمضان پۀ مياشت کښې صرف د يو يو کلو د پاره غريب دومره خوار کړو، چې د 85 روپۍ في کلو چيني ورکولو نه مخکښې به ئې ورله پۀ سياهۍ “انګهوټا” توروله، چې واپس نور وا نۀ خلي. د مل مالکانو د ډېټا پۀ بنياد د مقرر شوي رېټ نه پۀ زيات خرڅولو باندې مل مالکانو د تحريک انصاف حکومت پۀ کښې تر د 9 جولاۍ 2021 پورې 230 ارب روپۍ وګټلې او سږ کال ئې 9 ورځې د پاسه شپږ مياشتو(تر 9 جولاۍ) پورې 32 ارب روپۍ وګټلې او د خان بيا هم دعوا ده چې د مافيا خلاف د چينو انکوائري کول د ورلډ کپ د ګټلو برابر ده. د خان پۀ دې دعوي ځوانان اوس هم د خوشحالۍ نه تيندکونه خوري، څۀ به ووايو چې سوچ نۀ وي نو د ملک نه به خا مخا د “جاني کاکا” اټۍ جوړېږي چې څوک ئې څنګه ووهلو. قيصه به کتل وي چې جاني کا کا سږ کال د خلکو د جېبونو نه د 9 جولاۍ پورې مالي طور باندې اضافي 32 ارب روپۍ څنګه ګز ګمبت کړې؟ د نومبره پورې چيني پۀ 100 روپۍ في کلو وو. بيا حکومت چيني امپورټ کړل او د ګنو کرشنګ هم شروع شو نو پۀ دسمبر کښې د چينو ريټېل رېټ 85 روپۍ في کلو له راغے، وزيراعظم ډزې(ټويټ) وکړې چې د حکومت د کامياب مداخلت لۀ وجې د چينو قيمت 20 روپۍ في کلو کم شو، ځوانانو هم رقص رومي کښې ووئيل چې “واه رے واه! خان تېرے صدقے”. لس ورځې پس د چينو قيمت 81 روپۍ في کلو شو، پۀ خان دومره تادي وه چې اومبارکۍ اخستو پۀ ځاے ئې خلکو له اومبارکۍ ورکول شروع کړل، خو ځه مړه! دا به ووايو چې د ورلډ کپ د ګټې پۀ وخت دماغ پۀ ځاے نۀ وي. وزيراعظم او وزيرانو بې وخته د 23 مارچ پرېډونه د 21 توپو سلامۍ سره شروع کړل چې چيني بۀ نور هم ارزانېږي، سبحان تېري قدرت!يعني نور بۀ جانے کاکا(مل مالکان) نخرې نۀ کوي. يقيني چې مونږ باندې دغه وخت کښې چيني د ګوړې نه خواږۀ لګېدل. مونږ ته څۀ پته وه چې د حکومت دا باديوې پۀ کچه تارونو الوتې دي. باديوو ډېر زر تارونه وشلول و او د چينو قيمتونه بيا بره لاړل. د خان ټويټ داسې خاموشه شو لکه مريم نواز چې کله د پېنډۍ د طرفه څۀ اشاره ويني، نو چې بيا ترې څوک صحافي د “ووټ کو عزت دو” متعلق تپوس کوي، نو مريم نواز ورته وائي چې “کوئي اور سوال پوچهـ لو”، دغه شان اوس د خان پۀ ټويټونو د نورو څيزونو متعلق خو ډېر څۀ وي، خو د چينو د نرخونو متعلق ډزې ډوزې پۀ کښې نۀ وي يعنې زر راته مريم نواز پۀ داسې حالت کښې مخې ته شي چې کوئې اور سوال پوچهـ لو. د جنورۍ مياشت شوه، سپينه کونتره پۀ بره والوته يعنې باديوو تارونه وشلول، جانے کاکا پۀ مستو ګډاګانو سر شو. د خان ډنګ خو هسې ډنګ ؤ، خو د جاني کا کا ډنګ د خلکو سترګې وازې کړې. پۀ جنورۍ کښې د حکومت د خپلې دعوې مطابق د چينو قيمت ۲۵.۹۱روپۍ شو او پاکستان کښې د مياشتې 45 لاکه من چيني استعمالېږي يعنې د شوګر کمېشن د رپورټ مطابق د چينو قيمت کښې د يوې روپۍ اضافې سره د جاني کاکا جېب ته (سالانه) پاو باندې پينځۀ اربه روپۍ ځي، ورکه ډنګ. يعنې پۀ يوه مياشت کښې جاني کاکا څۀ د پاسه درې اربه روپۍ وګټلې، “پېر ووهه جاني کاکا”! د فرورۍ پۀ مياشت کښې سپينه کونتره نوره هم پۀ بره لاړه يعنې د چينو اوسط قيمت 93 روپۍ ته لاړو او جانے کاکا ښۀ پۀ اسانه د درې نيمو ارب روپۍ اضافي دوسه ووهله. د مارچ پۀ مياشت کښې لوبه 98 روپۍ في کلو ته لاړه او پۀ يوه مياشت کښې د جاني کاکا کور ته شپږ ارب روپۍ اضافي لاړې، پووے! د بلا بچے دے. د اپرېل پۀ مياشت کښې د 97 روپۍ في کلو د وجې نه جاني کاکا پنځ نيم اربه روپۍ اضافي وګټلې، د ظالم زوے دے پۀ مزو ئې سر دے. د مۍ پۀ مياشت کښې د 98 روپۍ في کلو له وجې شپږ ارب روپۍ اضافي ئې د غري لاندې کړې، استاد دې ته وئيلے کېږي. دغې هومره د لوند خوړ امرسې د جون پۀ مياشت کښې د جاني کاکا پۀ کچن کښې راپرېوتې، خوره خوره جاني کاکا! تپوس ئې نشته، نېب دې هسې هم د ماما زوے دے. د 9 جولاۍ پورې د حکومت د اعداد و شمار مطابق د چينو قيمت 100روپۍ او 65 پېسې دے، د جاني کاکا کورته د دوه ارب روپو اضافي حلوه راغله. د جنورۍ نه تر د 9 جولاۍ پورې د جاني کاکا د اضافي پېسو قيصې 32 ارب روپو ته ورسېدې. د تحريک انصاف حکومت کښې جاني کاکا 230 ارب روپۍ اضافي وهلې دي، پير دې ته وئيلے کېږي. دا لوبه پۀ داسې حالاتو کښې روانه ده چې وزيراعظم کله شوګر کمېټي جوړوي او د چينو د قيمتونو د کمي دعوې کوي، خو قيمتونه پۀ بره الوځي، بيا شوګر کمېشن جوړوي، نو بيا هم چيني دومره کم اصل دي چې قېمتونه ئې پۀ لوړه ځي يعنې “ځې پۀ لوړو غرونو لېلى.. وئي لېلى پۀ دنګو غرو کرلي سرۀ ګلونه”، دا تصويرونه راته د چينو قيمتونه جوړوي. د لېلى د غر د سر نه راکوزولو د پاره کمپيټيشن کمېشن اف پاکستان مېدان ته رادانګي، خو د لېلى د غر د سر نه راکوزول پۀ مېډ ان پاکستان پړو نۀ کېږي، پۀ ۲۰۲۰.۱۰.۱۷ ماما جي (عمران خان) قوم ته خطاب وکړو چې “همېن سب پته چل ګيا” اوس به څوک قوم سره انګړه دنګړه نۀ کوي، د چينو قيمتونه به اوس بې وخته بانګونه نۀ واٸي. ځوانانو چغې کړې چې ماما جي ورلډ کپ وګټلو، حالانکې خان يا ځوانانو چې کله هم د منحوس ورلډ کپ د ګټې اعلان کړے دے نو د ملک بېړي ئې چپه کړې ده. خان يو ځل د امريکې نه راغلے ؤ، چې پښه ئې پۀ پاکستانۍ ځمکه ولګېده، نو پۀ هر کار کښې به ئې شروع د بسم الله پۀ ځاے “دوسري بار ورلډ کپ جيت کر ايا هون” نه کوله، ځوانان به د خان پۀ توره بې هوشه شول، لس ورځې پس بيا ثابت شوه چي چغې خان وهلې او ورلډ کپ بڼيا(مودي) يوړو. کله چې خان د شوګر کمېشن پۀ رپورټ راتلو سره د ورلډ کپ د ګټلو اعلان وکړو نو هغه ورځ شوه او دا ورځ ده، جانے کاکا غريب سړے دمې ته نۀ دے پرېښے، باقې خو نېب صرف توره وريځ ده چې نن سبا چرته بل ځاے برېښي.

  • اداريه – اګست 2021ز

    اداريه – اګست 2021ز

    د افغانستان حالات او د وخت تقاضا

    افغانستان کښې چې څۀ روان دي نو لۀ چا هم پټ پناه نۀ دي. د امريکې لۀ پوځي قواو وتلو سره سم پۀ افغانستان کښې ناورين جوړ شوے دے او امن يو ځل بيا د لوے خطر سره مخ دے. بېلا بېلې خبرې، بېلا بېل خبرونه او بېلا بېلې غوښتنې او دعوې د روزانه پۀ حساب رامخې ته کېږي. د افغانستان دننه، ورسره ګاونډ کښې او هم داسې د نړۍ پۀ کچ د لويو ملکونو پۀ ميډيا، ډرائنګ رومز، سازمانونو او لويو لويو محلونو کښې د افغان مسئلې پۀ اړه خبرې، ګنګوسې، پېش ګويۍ او عن دا چې دسيسې هم يو ځل بيا روانې دي. دا وړومبے ځل نۀ دے چې افغانستان د داسې يوې کشالې سره مخ دے بلکې لۀ دې وړاندې د تېرې پېړۍ د اخرۍ لسيزې پۀ مېنځومانه کښې هم حالات داسې ترينګلي او خطرناک شوي وو او چې مضبوط ملکونو ئې مخنيوے ونۀ کړو نو بيا ئې نتيجه ټولې نړۍ وليده. نن يو ځل بيا حالات خراب دي، ترنيګلي دي او هم هغه شان د پروپېګنډو او دروغ رښتيا ښکار دي. يو خوا د افغان صدر ډاکټر اشرف غني جمهوري حکومت دے او بلخوا د وسله والو غوښتنې. يو خوا خوار غريب او جنګ ځپلے افغان اولس دے او بلخوا د نړۍ پنجور قوتونه دي چې خپلې لوبې له د دوام ورکولو کوششونه کوي. پنځويشت کاله مخکښې او نن حالات يو شان نقشه وړاندې کوي، دعوې او غوښتنې هم هغه شان برېښي، وېره او ترهه هم هغه شان ده، د افغان اولس مستقبل هم هغه شان پۀ داؤ دے او د جنګ خپسه هم هغه شان د غوټې وهلو لپاره پۀ سر تاوېږي، هم هغه شان زيات خلک د امن پلويان دي او ځنې د ګوتو د شمېر د يو نظام د ړنګولو اراده لري؛ کۀ څۀ توپير دے پۀ ننني او د تېرې پېړۍ پۀ ترينګلي حالاتو کښې نو بس دا چې نن نړۍ د يوشتمې پېړۍ پۀ درېمه لسيزه کښې پښۀ ايښې ده. هغه وخت نۀ خو ميډيا دومره زوروره وه او سوشل ميډيا خو لۀ سره وجود نۀ لرلو نو دسيس مارو چې څۀ دروغ رښتيا کول د هغې چا ته پته نۀ لګېده، پټې خبرې پټې وې او د ښکاره چا ته څۀ پته وه چې دروغ دي کۀ رښتيا. خو نن د سوشل ميډيا لۀ وجې ځنې رښتيا ضرور مخې ته راځي. نړۍ پۀ دې تېره يوه مياشت کښې مختلفې دعوې واورېدې؛ چا وئيل چې طالبانو نيمې نه زيات افغانستان قبضه کړو، چا وئيل چې بس د حکومت د شمېر ورځې پاتې دي او چا وئيل چې حکومت سقوط کوي خو څنګه چې مونږ ووئيل چې اوس حالات بدل دي او اسانه نۀ ده چې خلک دې صرف پۀ پروپېګنډو او دروغو وئيلو دوکه کړے شي نو نن دا دے حقيقت د ټولې نړۍ مخې ته دے چې کۀ حالات هر څومره نازک دي خو افغان حکومت پۀ ځاے ولاړ دے او اشرف غني وائي چې جهموريت به ړنګېدو ته نۀ ورکوي. کۀ څۀ هم د افغانستان تاريخ پۀ دې حواله ډېر نازک دے ځکه چې د غازي امان الله خان پۀ شان يو ځيرک، پوهه او تکړه سړے هم د نن نه نوي کاله وړاندې د پروپېګنډو ښکار شوے او پۀ جلاوطنۍ مجبور کړے شوے ؤ نو دغه پروپېګنډو خپل کار بيا د روس د وتلو نه پس د ډاکټر نجيب پۀ وخت کښې هم ترسره کړو. او بيا ئې د مجاهدين نه پس هم خپل کار وکړو او نن يو ځل بيا پروپېګنډو زور کړے دے. يو پوهه سړي وئيلي چې پۀ ترينګلي او ناسمو حالاتو کښې سوالونو ته جوابونه لټول نه بلکې سوال پوښتل لوے قابليت دے. نن هم پۀ دې روان حالاتو کښې بايد سوالونه وپوښتلے شي؛ د زورورو ملکونو ميډيا، خلک او ورسره پۀ خصوصي توګه افغانان دې سوالونه پورته کړي چې اخر ولې دا جنګ نۀ سړېږي، اخر ولې دا جنګ بيا بيا تودېږې، اخر ولې د دوي خاوره د جنګ د لمبو ښکار ده، اخر ولې پردي خلک پۀ دوي لوبې کوي، اخر ولې د امن نعرو سره سم دلته د جنګ اوازې خورېږي؟؟؟ نن وخت راغلے چې افغانان خپلو ګرېوانونو کښې وګوري، خپل کور سم کړي او خپل راتلونکے محفوظ کړي. دوي بايد پۀ دې پوهه شي چې کۀ څوک د دوي کور سمولے شي نو هغه دوي پۀ خپله دي. ورسره دا وخت د تاريخي فېصلې هم دے. د افغانستان ننني حالات افغانانو، ګاونډيانو او د نړۍ زورورو له موقع ورکوي چې پۀ افغانستان کښې د امن سره اودرېږي او خپل کردار ترسره کړي. هم دغه شان د نن حالات به هغه خلک هم پۀ ګوته او تاريخ کښې همېش لپاره محفوظ کړي څوک چې جنګ ته لمن وهي. مخکښې هم جنګ کښې چا ګټه نۀ ده کړې او وروستو هم نۀ شي کولے. او بيا دا خو يو تړلے حقيقت دے چې کۀ سل کاله هم جنګ وشي خو حل ئې اخر کښې د خبرو اترو لۀ لارې راوځي ځکه چې جنګ کله هم د مسئلې حل نۀ دے بلکې مسئلې ټول عمر د خبرو لۀ لارې هوارېدې شي. نن د عقل نه د کار اخستو موقع ده، د ماضي نه د زدکړې موقع ده، جنګ ته د مخه ښه وئيلو موقع ده، امن ته د هرکلي وئيلو موقع ده. د عوامي نېشنل ګوند د صوبائي صدر اېمل ولي خان د دې تاريخې خبرې او دريځ سره څوک هم اختلاف نۀ شي کولے چې نن د سياست نه بلکې د دې خبرې فېصله کول دي چې څوک کوم اړخ ته ولاړ دے ځکه چې دا حالات کۀ هم دغسې پاتې شو نو تاريخ به هېڅوک هم معاف نۀ کړي. د يوې مهذبې نړۍ پېژنګلو بايد دا وي چې د جنګ مخه ونيسه. بايد نړيوالې ادارې رامخې ته شي او خپل رول ولوبوي. کۀ پۀ دې حالاتو کښې هم د نړۍ ادارې خاموش پاتې کېږي نو سبا له به دوي پۀ نړۍ کښې د امن خبره پۀ کومه خولۀ کوي او ورسره د دوي پۀ وجود هم سنجيده پوښتنې ولاړېږي.

    طالبانو وئيل چې دوي جهاد د بهرني او امريکني قواو خلاف کوي او د افغان امن عمل پۀ ترڅ کښې بۀ ئې د دې پوځونو او قواو د خروج خبره کوله. نن ناټو او امريکه ووتل نو بيا د جنګ باقي څۀ جواز پاتې کېږي. سوال دا هم دے چې اخر طالبان د امن لپاره د اشرف غني د جمهوري حکومت ختمېدو شرطونه ولې وړاندې کوي؟ دوي د امن پۀ مېز بايد کښېني او د نظام برخه شي تر څو د خپل ملک پۀ ودانۍ کښې کردار ولوبوي او کۀ بيا هم واک غواړي نو بيا ئې هم دغه يوه لار ده چې د ملک ائين ومني، ټاکنو کښې برخه واخلي، خپل شعارونه افغان اولس ته وړاندې کړي او کۀ افغان اولس رايه ورکړه نو بېشکه چې خپل حکومت دې جوړ کړي. خو داسې پۀ زور زبردستۍ يو منتخب حکومت لۀ مېنځه وړل د دوي د ملک پۀ ګټه کله هم نۀ دي.

    دې سره سره بايد د افغانستان، ګاونډ او نړۍ ميډيا هم خپل پېشه ورانه کردار ترسره کړي او د پروپېګنډو، دروغ وئيلو او دعوو نه ځان وژغوري ځکه اوس خبره صرف د خبرونو نه بلکې د يو ملک او ځپلي قام د مستقبل او مرګ ژوند ده. بايد ميډيا خپل کردار پۀ ښۀ شان او حالاتو سره سم ولوبوي. ميډيا بايد دې ته هم وګوري چې افغان اولس د تېرو څلورو لسيزو دروان څومره وځپلے شو، څومره مېندې بورې، څومره ماشومان يتيمان او څومره ځوانان د جنګ خوراک شول او تر څو به دا جنګ روان وي. بايد ګاونډي هېوادونه خو د ټولې نړۍ نه زيات د امن پۀ لړ کښې زور ولګوي ځکه چې تاريخ ګواه دے بلکې د نړۍ دا يو نۀ بدلېدونکے حقيقت دے چې يو ملک هر څۀ کولے شي خو خپل ګاونډي نۀ شي بدلولے. بايد د افغانستان ګاونډي هېوادونه امن لپاره کوټلي ګامونه واخلي او د جنګ مخه ونيسي ځکه چې پۀ افغانستان کښې جنګ او بدامني نېغ پۀ نېغه پۀ ټوله سيمه اغېز کوي او بيا پاکستان او پۀ خصوصي توګه د پښتنو علاقې ئې د اغېز لاندې راځي. نن وخت راغلے چې پۀ امن مئين ملکونه څرګنده پرېکړه وکړي چې دوي د امن سره نۀ يوازې ولاړ دي بلکې د دې لپاره پۀ عملي توګه ګامونه هم اخلي. خداے مۀ کړه کۀ دا ځل هم د حالاتو ادراک و نۀ شو، د جنګ اور ته لمن ووهلې شوه او د مفاداتو جنګ تود شو نو نتائج به ئې لړزوونکې او بوږنوونکې وي ځکه چې دا ځل پۀ دې جنګ کښې د نړۍ ټول زورورغويان ښکېل دي.

    د حکومت 3 کاله؛ ملک چرته ورسېدو!!!

    څۀ ترې جوړېږي نه ځکه چې نۀ خو ئې حکومت اوري، نۀ ورته پام کوي او نۀ پرې عمل کوي بلکې زمونږ دا خبرې ورته سنجيده څۀ چې د ځان او حکومت خلاف يوه پروپېګنډه ښکاري. خو مونږ خو به خبره کوو، سپينه به کوو او پۀ جار به ئې کوو ځکه چې کۀ دوي حکومت کوي نو مونږ هم د دې ملک اوسېدنوکي يو. او خبره بلکې سوال به ځکه هم کوو چې کپتان محترم او وزيرانو، مشيرانو ئې قوم سره لوې لوې وعدې کړې وې، پۀ خلکو ئې لوې لوې تهمتونه لګولي وو، الزامونه ئې پورې کړې وو، کچکولونه ئې مات کړي وو، قسمونه ئې کړي وو بلکې د خودکشۍ ئې هم وئيلي وو. کومه داسې خبره ده چې دوي نۀ وي کړې؟ کوم داسې الزام دے چې دوي پۀ خپلو مخالفينو باندې لګولے نۀ دے، کوم داسې اسمان دے چې دوي پۀ ډانګونو نۀ دے وهلے، کوم داسې مثال دے چې دوي وړاندې کړے نۀ دے او کوم داسې ماهر دے چې دوي سره نۀ ؤ؟ کومه داسې خرابي وه پۀ ملک کښې چې دوي ته ښکارېده نه؟ پۀ ډالر به دوي ملک غوېمه کړے ؤ، د تېل پۀ قيمتونو به دوي د خلکو پوزو ته وردانګل، د ګېس پۀ نرخ زياتېدو به دوي خلک د ګرېوان نه نيول، د بجلۍ پۀ قيمت به ئې واوېلا کوله، د بجلۍ بل باندې ئې د سول نافرمانۍ اعلان کړے ؤ، د ګرانۍ خلاف به ئې هر وخت شور جوړ کړے ؤ، د کرپشن پۀ الزامونو خو به ئې سترګې پټولې او غړولې، د حکمرانانو پۀ دورو به دوي ملک پۀ سر اخستے ؤ، پۀ پروټوکول به ئې هم زګونه غورځول او د امنيت پۀ پېښو خو به ئې د خلکو خوبونه حرامول. څۀ ورک پلان ورسره نۀ ؤ خو بس تشې چغې وې. تېر اليکشن چې رانيزدې شو نو چا به ورته وئيلے وي چې تش پۀ چغو کار نۀ کېږي؛ قوم له څۀ “شنۀ باغونه” هم ښودل پکار وي نو بس د 100 ورځو پلان ئې رامېدان ته کړو، ورسره ئې د يو کروړ نوکريانو لاپه هم وکړه، ورسره ئې د 50 لکه کورونو خوشخبري هم واوروله. چونکې پۀ مخالفينو پسې ئې زمکه اسمان يو کړي وو نو يوازې پۀ دې نۀ کېده نو خوار اولس ته ئې ووئيل چې ډالر به واپس راکوزوي، تېل به هم ارزاونوي او د بجلۍ خو به ئې دا وئيل چې خپله ده نو اکثر ساده ګلو به سوچ کولو چې کېدے شي کپتان حکومت نه پس بجلي بېخي وېړيا کړي. د چينو او غنمو مافيا ته به ئې هم ګوته څنډله. د خداے کړۀ وو چې سړے حکومت ته ورسېدو، شېرواني ئې واغوسته او پۀ کرسۍ کښېناستو. اول خو يو څو ورځې خمار کښې ؤ خو بيا ورو ورو ورته پته ولګېده چې څۀ کار هم کول دي نو لاس پښه ئې خوځول شروع کړل خو کېدے شي چا ورته وئيلے وي چې ښۀ کار به دې دا وي چې کار کم او خبرې زياتې کوه… خېر ورو ورو ورته د خزانې پته لګېده. سل ورځې تېرې شوې او څۀ هم و نۀ شول. رښتيا د حکومت نه مخکښې ئې د دورو نۀ کولو، پروټوکول نۀ اخستلو سره سره د وزيراعظم هاوس، او وزرا اعلي هاوسز پۀ پوهنتون او لائبرېرو کښې د بدلولو هم وئيلي وو، کېدے شي ياد وو ورته خو چا هوښيار به ورته وئيلے وي چې بس ځان شپېلے کړه نو هډو پۀ دغه اړه ئې غږ و نۀ ختو. خو څۀ خو کول وو نو بس د وزيراعظم هاوس پۀ مېښو ورغے او ټولې ئې خرڅې کړې او قوم له ئې وښودله چې حکمران داسې وي. خېر، قوم ته ئې وئيلي وو چې راسره د معيشت د 200 کسانو ټيم دے چې اسد عمر به ئې ليډ کوي نو هغۀ ته ئې کال کښې دننه سترګې واړولې چي شابه کنه څنګه چل دے. هغۀ غريب ورته وې صېبه بس دغه حال دے نو بس خان غريب څۀ کړے وے هم هغه د “غلو” د وختونو حفيظ شېخ ئې راوستو او مسکے شو چې اوس به هر څۀ ټيک شي، خبره تر شوکت ترين راورسېده خو سمے ئې ؤ نۀ خوړو. د يو کروړو نوکرو باره کښې ئې عوام ته پۀ رڼا ورځ ووئيل چې نوکريانې ورکول د حکومت کار نۀ دے. ډالر د کپتان حکومت کښې نورې هم چې وزرې وکړې نو ښۀ پۀ ارام ئې ووئيل چې ډالر تېر حکومت پۀ چل ول ښکته ايسار کړے ؤ. بهر حال د کپتان حکومت د درې کالو شو. نوکرۍ، کورونه او احتساب دې سر وخوري خو ګراني دومره زياته شوه چې هډو څۀ حساب ئې نشته. هر شے نيم پۀ نيمه نه زيات ګران شو. دړيز د غوړو ټيمګے د اتۀ سوه نه 1400 ته، چيني د پنځوس روپۍ في کلو نه 100 ته، سرۀ زر د درې پنځوس زره نه يو لک لس زره ته، د اوړو تروړه اتۀ سوه نه 1300 ته، تېل د لېټر پۀ حساب د څلور اتيا نه 118 ته، اېل اېن جي کېن پۀ تاريخ کښې پۀ وړومبي ځل د ګرمۍ موسم کښې 2400 ته، چرګ 300 نه بره کلو او دغه شان دالونه او هر د استعمال شے ګران شو. د صحت پۀ اړه به ئې دعوې کولې خو دوايانې بېخې اسماني شوې. د حکومت درې کاله وشو، د کپتان دعوې به پوره کېږي يا نه خو د غريب سړي ټول ارمانونه تالا ترغه شو.

  • کور ته ځه!!! – سلطان خان ټکر

    کور ته ځه!!! – سلطان خان ټکر

    پۀ دې خبره اوس د دوه ورځو ماشوم هم پوهېږي چې تحريک انصاف خپل حکومت صرف د نعرو پۀ زور چلوي او پۀ ځلمي کهول د دې جماعت دا ډډې نعرې داسې اثر کوي لکه پخوا چې بۀ پېرنګي د خپل غرض لپاره چينيانو لۀ افيم ورکول او چينيان بۀ لۀ ځانه بې خبره ورته پۀ لستوڼو ګډېډل . صرف دا نا بلکې بيا بۀ چينيان پۀ ځمکه نا بلکې د خلاء نه هم چرته لرې پۀ سپوږمۍ کښې ګرځېدل او د خپل وخت او خپلې ژبې خان تحصيل او زرڅانګې د سندرو سرونه بۀ ئې پۀ نشېلي حالت کښې اړول راړول او د خپل قام د سياسي پوهانو خبرې بۀ پرې بدې لګېدې . د پي ټي ائي حکومت راتلو نه پس د دې جماعت مشر يعنې عمران خان خپله لکه د يو ډوب افيمي د خپل سوچ ملغلرې پۀ فضا کښې داسې وشيندلې چې نۀ صرف سياسي پوهان لۀ خندا شنۀ شول بلکې پوهه صحافيان هم ګوته پۀ خولۀ پاتې شول چې عمران خان اخر پۀ کومه پوله سر دے . دخان موصوف د خندا خبرې ډېرې دي خو يوه پکښې داسې ده چې د دنيا لوے رنګيلا يعنې ټرمپ ئې هم منلو ته تيار نۀ دے. د عمران خان دا لطيفه دومره عجيبه او درنه ده چې عالمي مسخره هم ورته حېرانه ده چې دا دومره وزن خو مونږ هم نۀ شو وړے . د کپتان محترم لطيفه څۀ دا رنګه ده چې ، ” ما سره دومره اوږدې منصوبې دي چې د هغې لپاره پينځۀ کاله وخت کم دے” . عمران خان هوښيار سړے دے او ما ته نۀ لګي چې دا بۀ د هغۀ خپله دعوي وي . بهر حال سياسي پوهان وائي چې حکومت هائي برېډ دے يعنې خبره برګه بروګه ده؛ د خټکو پۀ اړه خو مو د هائي برېډ اصطلاح اورېدلې ده خو د يو حکومت پۀ باره کښې مو پۀ وړومبي ځل واورېدل چې حکومت هم هائي برېډ کېدے شي . اوس دا خبره ډېره نامناسبه هم نۀ ده ځکه چې د تحريک انصاف حکومت راتلو سره د دې ګوند سره تړلي ځوانان هم برګ بروګ دي نو بس کېدے شي د خپل جماعت اثر پرې شوے وي . جاښه تارونه دي، د سر او وېخ پته ئې نۀ لګي . پاکستان نۀ دے سم د خانزادګۍ کور دے، هر سړے پکښې پۀ پېرونو دے . د ډبل شهريت خاوندان پکښې د ډبل شاه نه زيات خوشاله دي . ښکاري چې عمران ډېر ساده دے يا ئې نظر نۀ لګي ګنې کۀ لږ شانتې ئې پۀ خپلو کارنامو نظر زغلولے ؤ نو داسې خبره بۀ ئې نۀ کوله . کوم کوم کار بۀ ئې يادوو . د خپل غرض لپاره ئې يو داسې شرطيه ارډيننس جاري کړے چې مثال ئې پۀ ټوله نړۍ کښې نۀ تر سترګو کېږي. د عمران خان د مرستې لپاره د ملک لوے عدالت هم يوه داسې فېصله جاري کړې ده چې د هغې هم مثال نشته ځکه چې پۀ دغه فېصله کښې ګوذار نېغ پۀ نېغه پۀ جسټس فائز عيسي شوے دے . نو مونږ وئيلے شو چې کپتان هر څۀ کولے شي او هر قسمه رېفرنس جوړولے شي ځکه چې پۀ صدارتي محل کښې د صدر پۀ نوم يو داسې بابو ناست دے چې د خپل سوچ چشمې نۀ لري بلکې چې څوک ورته چرته هم د ګوتې لګولو ووائي نو ښۀ پۀ خندا خوشالۍ ئې ولګوي . څۀ بۀ ووايو دلته خو کال کښې مياشتې هم دولس دي . دفرورۍ پۀ پينځلسمه نېټه د سپريم کورټ ججانو د ټاکنو کمېسون ته پېغور ورکړو چې د سېنېټ ټاکنو پۀ توره لوبه کښې پۀ څلوېښت کاله کښې دوي څوک مختورن ګرځولي دي؟ کۀ د انتخاباتو کمېسون پۀ پښو کښې د چا ګونګروګان نۀ وي نو د ائينې پۀ شان صفا معامله کښې پۀ يو، دوه او درې فېصل واوډا ته د امريکې لار ولې نۀ ښائي ! د فارن فنډنګ کېس لوبه هم ښۀ څرګنده،واضحه او ښکاره ده . يو دوه درې او پي ټي ائي بۀ د ملک د سياست نه تل لپاره غائبه وي . خو هغه د چا خبره چې لالا ئې نۀ مني . بلخوا لۀ بده مرغه د ټاکنو کمېسون بغېر د اشارې داسې فېصله کولې هم نۀ شي . او کۀ چرته داسې وشي او پۀ خپله خوښه فېصله وشي نو د جسټس فائز نه بۀ مخکښې لکه د ماهي ښکار شوے وي او دا فېصله بۀ د اپيل پۀ ذريعه پۀ عدالتونو کښې د “للو للو شه” دومره اوږدې جوټې وخوري چې فېصل واوډا او عمران خان بۀ پۀ ګور شي خو فېصله بۀ پۀ کور نۀ شي . اصغر خان کېس ئې ښکاره مثال دے . د معزز عدالت خبرې او د کمېسون ګپ شپ پۀ خپل ځاے خو تر دې دمه چې د کپتان حکومت کوم کوم تحقيقاتي کمېسنونه جوړ کړي دي کۀ هغه د غنمو باره کښې دي، د چينو باره کښې يا د دوايانو باره کښې، کۀ سپريم کورټ هغه ټول راټول کړي او د هغې پۀ رڼا کښې دا کېسونه پۀ انصاف او وخت وچلولے شي نو زما پوخ يقين دے چې د کپتان حکومت بۀ پۀ څلوېښت ورځو کښې دننه دننه پۀ سياسي ميوزيم کښې د نندارو جوګه وي . ځکه چې د رپورټونو ترمخه ټول ياران د خان د غاړې ملګري دي چې د حکومت واګې ئې پۀ لاس کښې دي او کۀ سپريم کورټ داسې نۀ کوي نو دا هم دعوامو د طرفه د سپريم کورټ دپاره داسې پېغور دے کوم چې سپريم کورټ د انتخابي کمېسون باره کښې کوي. کۀ سپريم کورټ داسې وکړل، نۀ صرف زما بلکې د ټول قوم دا يقين دے چې دې سره به د ملک عدالت زمونږ د زړونو اواز شي. د بڼيا پۀ تله چې د عمران خان دا بيان وتللے شي نو دا بيان عمران خان د زړۀ د کومې نۀ دے بلکې د دې بيان پۀ رڼا کښې د ځوانانو خان د خپل باغ پۀ سخا خټکو باندې څادر اچولے. پۀ څادر خو د سخا خټکو خپل باغ پټولے شي ، خو د سخا بوئي سره به ئې څۀ کوي؟. د مشکو او سخا خټکو بوئي يو شان رفتار لري . مونږ چې کله ماشومان وو او د نېشنليانو جلسه به وه نو هغې ته به دې جټو مشرانو د سرخپوشو جلسه وئيله، پۀ هره جلسه کښې به دا وېنا کېده چې مېښه زمونږ او کچ ئې پنجاب ته ځي. چې د نواز شريف دور راغے بيا به ئې دا وې چې مېښه زمونږه ده او کچ او شوملې دواړه پنجاب وړي او چې اوس د خان حکومت ته ګورم نو زۀ د زړۀ نه پۀ دې مجبور شوم چې مېښه زمونږ ده او کچ او شوملې دواړه ائي اېم اېف او د خان ياران وړي. زمونږ پۀ کلي کښې چې کله مور مړي قرباني کوي نو تل ئې د قربانۍ څاروے د قربانۍ پۀ وخت تښتي،کله ئې ونيسي او کله ئې څاروے بېخي ورک شي . دغه شان د خان حکومت کښې هم راته پاکستان پۀ ورکېدو ښکاري. خان صاحب وائي چې زما خوبونه د جادوئي تبديلو نه ډک دي او د دې د پاره پينځۀ کاله وخت کم دے. راځئ چې د ماضي واقعاتو تله را واخلو او د ځوانانو د خان د جادوئي تبديلۍ خوبونه وتلو. د ځوانانو سقراط د چيني ماډل نه ډېر متاثره دے او وائي چې چين مخ پۀ وړاندې کېدل پۀ پينځو کالو منصوبو باندې نۀ دي شوي بلکې پۀ اوږد مهاله منصوبو باندې شوي دي. د عمران خان خولۀ نۀ ده د خان خېلې تالو دے هر وخت پۀ هندکو کښې سرودونه کوي. عمران خان في البديهه خان دے لکه د چيني افيمي ورته د جاپان او جرمني پولې يوځاے کول داسې دي لکه چې لاس کښې ئې د اله دين برانډ ستن تار دي او ځوانانو ته داسې بګتې د ابرار الحق مست مست سرودونه ښکاري. ځوانان داسې پۀ ګډا سر شي لکه حسن بن صباح چې د خپل خيالي جنت مفت تماشې پۀ ځوانانو کوي. داسې سرودونه اورېدلو نه پس ئې ځوانان پۀ پلار هم نۀ راتړي. خو پوهانو ته د شېر اګۍ سپورې ټپې ښکاري. د ګند بوئي پۀ سرودونونه نۀ پټېږي. دوه نيم کاله وشو چې ملک پۀ ريورس ګېر کښې دے خو خان وائي چې پينځۀ کاله کم دي. خان پۀ پوزه مچ هم نۀ پرېږدي. څوک هم نۀ شي وئيلے چې ستا د نوي (۹۰) ورځو هغه د اله دين چراغ څۀ شو چې اوس د اله دين چراغ پۀ پينځۀ کاله کښې هم نۀ بلېږي. دا د اله دين چراغ دے کۀ د کودرو ډيوه ده. د نرکس د دوکړو اواز د کالو خان نه هم صفا راځي او د بې غېرته لوبه هر وخت سدوم ته زېړه وي. د مشرانو خبره د کونډې زويه څۀ خو بويه کنه. کۀ دا پينځۀ کاله پۀ تا کم دي نو پي پي پي او پي اېم اېل اېن خو دمشرف د دور نه مخکښې هېچاد شلو مياشت نه زيات حکومت کولو ته نۀ دي پرېښي او بيا تۀ هغوي ولې مختورن کوې خو مسئله دا ده چې کۀ مونږ وايو نو پۀ ځوانانو بدې. اګر چې د دواړه جماعتونو پۀ دور کښې ائيني اصلاحات هم شوي دي او لوے پراجېکټونه هم شوي دي او ستا يوه بي ار ټي ده؛ او د مشرانو خبره يوه ها وه او هغه هم سخا وه. پۀ بي ار ټي خو دومره لطيفې دي چې بلها کتابونه پرې ليکلے کېږي. دا تماشې نۀ نېب ته پۀ نظر راځي او نۀ د عدالت لۀ طرفه موجوده حکومت ته چرې پېغور شوې ده. تله مخې ته ده؛ وزن شروع دے. بابر د پاني پت د جنګ نه څلور کاله پس د مرګ پۀ خوب اودۀ شو خو د مغل سلطنت يو پراخه بنياد ئې کېښودو. د شېر شاه سوري پۀ پينځو کالو کښې د جنګونو سره د جي ټي روډ، قلعه روهتاس تعمير او د لېنډ ريونيو نظام يو بې مثال بنياد کېښودو. چرچل چې يو نړيوال وار لارډ دے دا هم د پينځو کالو کمال دے د چرچل نه پس چې لېبر پارټۍ د وېلفئير کوم نظام پۀ پينځو کالوکښې پۀ برطانيه کښې رائج کړو هغه نن هم پۀ برطانيه کښې نافذ دے. دا ټول د پينځو کالو کمالات دي. ذوالفقار علي بهټو چې څۀ کړي دي ښۀ دي او کۀ بد دي د پينځو کالو ترپکې دي.

    پۀ پينځو کالو کښې نپولين د فرانس ټول سول اېډمنسټرېشن نظام بدل کړے دے چې نن هم پۀ هغسې شکل کښې نافذ دے. د ځوانانو خان شپه ورځ د چين د ترقۍ قوالي د عزيز ميا پۀ طرز کښې کوي خو دې ته نۀ ګوري چې ماوزے تنګ پۀ يونيم کال کښې د چين ټوله معاشره بدله کړې وه. بيا د امريکې پۀ سازش د کوريا جنګ تپلے شوے ؤ. پۀ ١٩١٧ز کښې روس کښې انقلاب راځي او بيا به ١٩٢٢ز کښې پۀ لېنن بيماري راځي چې تقريباً دوه کاله پۀ فلج حالت کښې ؤ خو پۀ پينځو کالو هغۀ پۀ ټول روس د انقلاب پنجه مضبوطه کړه. اګر چې د امرانو کاورنه هم شته خو بنياد د جمهوريت مضبوط وي . د ځوانانو خان هم دا غواړي چې پۀ ملک کښې دې جمهوريت پۀ کفن کښې شي. خو چې بيا درنه اوبۀ ورخ يوسي نو لاره به څۀ وي، خو کۀ بل طرف ته مونږ وګورو نو طيب اردوان ٢٠٠٢- ٢٠٠٣ز نه تر دې دمه د جمهوريت پۀ بنياد نۀ صرف د قوم حالات بدل کړے بلکې ترکيه کښې د فوځ قبله بدله کړه. نۀ صرف د ترکي نه د امريت جنازه ووتله بلکې هلته فوځ د ناکام کودتا نه پس داسې پۀ ميډيا باندې هم پرېس کانفرنس نۀ شي کولے کومه لوبه چې دلته روانه ده. بلکې چې کوم افسر د سياست سره تعلق لري نن پۀ جېلونو کښې پراتۀ دي. دا ځکه چې طيب اردوان خپل وړومبي دور کښې بې مثاله کارنامې کړې دي. چې د قوم د سترګو تور دے، مهاتير محمد څوک چې لکه د چين د خان صاحب رول ماډل دے هغوي د الېکشن ګټلو نه پس دا نۀ دي وئيلي چې پينځۀ کاله کم دي بلکې د خپل وېژن د عملي کولو پۀ زور هغوي د ملائشياء نمونه پۀ وړومبۍ دورانيه کښې بدله کړې وه. د مشرانو خبره وړومبے وخوره د ځان غوښې بيا وخوره د ښکار غوښې.د خپلې کارکردګۍ پۀ بنياد مهاتير محمد د ملائشياء ١٧ کاله حکمران پاتې شو. چې کله ئې زړۀ موړ شو نو بيا پۀ خپله خوښه کور ته لاړو، پيوټن د روس حالت د خپل حکومت پۀ وړومبنۍ دورانيه کښې ټيک کړے ؤ. تردې دمه د اقتدار پۀ کرسۍ ناست دے، دوه ځله د ملک صدر پاتې شو د ملک ائين اجازت نۀ ؤ چې د دواړو دورانيو نه پس نور د صدارت پۀ کرسۍ کښېني نو بيا د وزيراعظم پۀ کرسۍ کښېناست چې اوس هم د ملک صدر دے. مسز تهېچر چا چې د برطانيې نقشه بدله کړې وه د انتخاباتو پۀ زور لس کاله دملک حکمران پاتې شوې ده. .ټوني بلئير د لېبر پارټۍ د طرفه د انګلستان پۀ تاريخ کښې واحد وزيراعظم دے چا چې د خپلې کارکردګۍ پۀ بنياد درې ځله د انګلستان وزيراعظمي ګټلې ده. چين چې نن د دنيا پۀ مخ يو ځلنده ستورے دے اګر چې هلته بظاهره ډکټېټر شپ دے خو ټولې پاليسۍ د پولټ بيورو او د کانګرس پۀ اتفاق رايې سره کېږي.تۀ پۀ انتخاباتو راغلے يې او پارلېمنټ ته ګيا نۀ اچوې. سېنېټ ته بغېر د مشورې نه خپل ياران لېږل غواړې. چې څۀ دې زړۀ کښې راځي لکه د پوخ افيمي ئې کوې. مراد سعيد د دوه سوه اربه ډالرو خبره د غر د سوکې نه کوي، او فېصل واوډا د يو کروړ نوکرو د باران بګتې وولي. ستا پولټ بيورو غړي خو بزدار او محمودخان دي چې څوک ئې پۀ مېرټ د يو سي ناظمۍ باندې هم نۀ قبلوي، کۀ تاله څوک شل کاله درکړي هم به وائې چې دا کم دي . ملک پۀ بيانونو او مثالونو نۀ چلېږي . ځوانان بۀ تر کومې د بيانانو او مثالونو پۀ افيمومشغول ساتې. کله چې يوکشر حجرې ته راشي او د مېلمنو پۀ مخکښې بې واکې خبرې شروع کړي نو مشر ورته پۀ غصه شي چې دا څۀ بوس بادوې؛ “کور ته ځه”، او پۀ دې وېنا سړے غلے کور ته روان شي خو هغه څۀ چې ورته وائي هغوي ته به دا بوس بادول لا ښۀ ښکاري نو ځکه خو خان بېخي بې واګو شوے دے چې څوک ئې د تپوس نشته. خو نواز شريف څوک چې هغوي ته نامنظور ؤ نود کور پۀ ځاے جېل ته لاړو خو چې کله پرې د رحم يو څاڅکے وشونو د لندن مزو ته وسپارلے شو او کۀ پۀ عمران خان دا اواز ونۀ شو چې “کور ته ځه”؛ نو خداے ناخواسته ملک پۀ ډوبېدو واخله.