سوات سی نام کے ہُم مُھوئے بُود او مُھون ذہن می نیل زنگلا سی، ہیِم اے دے مالا کھن آ سی آں نیِل اُو سی نھید او کھأرا سی خیال ئیے دُو۔ خُو مے شیوچا سی پأشکے مھال اے دُونیئی ہُم آباد چھی تیِسی عام خلگ آئے پتا نہ ہوئی۔ ہے دونیئی تھأ پوران خلگ آ سی چھی کامیک مھید پیڑیا ما دھرَدی۔ ہأ خلگ آ سی تنُو اے جیِپ، تنُو کلتُور آں تنُو رسم و رواج تھی۔ توروالی قوم ہأ پوران قوم آ می اے قوم تُھو۔ ہے خلگ سوات می پیڑیا ما آباد تھی آں تنُو جیِپ توروالی بنَدی۔
توروالی صرف اے جیِپ نی چھی بلکہ ہے پورا اے کلتور سی نام تُھو آں ہے سوات سی پوران تاریخ سی اے پہچان چھی۔ لیکن أ مھون بدقسمتی چھی کہ اے جیِپ کے آں توروالی خلگ آئے سے توجہ دیا نہ گا کامیک ہیِن حق آشُو۔ اَئں ہے وجہ چھی کہ دُونیئی می کے یأبینے لیؤ جیِپ آ سی بات ہؤ سأدو، توروالی سی ذکر کُوا بئیدُو۔
توروالی کام تھی؟
توروالی بھیم سوات سی علاقہ تحصیل بحرین می بنا بَیئی۔ توروالی جیِپ سی تعلق جیِپ آ سی گھن شاخ ”ہند اریائی“ ما تعلق تُھو۔ توروالی خلگ آ سی گھأنڈی کالام او کمراٹ می گاؤری جیِپ بنَدی۔ ای ما علاوہ توروالی چیل درہ می ہم بنا بیئی۔ چیل درہ می توروالی ما علاوہ اوݜوجو آں بدیشی جیِپ ہم بنا بیَیئی۔ بدیشی جیِپ مھیرے تقاریباً ختم ہیِئی۔
حیرانی سی بات أ چھی کہ توروالی خلگ آمن گے کوہستینی (کوہستانی) بنَدی۔ خُو کوہستینی نام ہأئے پختون ئے دیِد تُو۔ کے یأ پختون اے سوات زید قبضہ کیدا تھئے توروالیا سی علاقہ زید قبضہ کیدے ہأ مسلمان کی۔ توروالیا سی گھأنڈی مے پورا علاقہ آئے توال بنَدی۔ ای ما علاوہ مھون تنُو قصہ می مے پورا علاقہ ئے توال بنَا گودُو۔
1956 می ناروے سی مشہور ماہر بشریات فریڈرک بارتھ تے وَخ می تورولیا سی تعداد دُو زر کلاݜ اے پرکے بنُوشُو۔ تے وخا سے کامے توروالی خلگ آ سید میلاؤ ہُوشُو دا سے توروالی ما علاوہ پشتو جیِپ ہم بنُودُود۔ مھیرے توروالی یام ڇا جیِپ بنَدی آں یام ڇا جیِپ آ ما ہوم زیاد بنَدی۔ توروالی اَمن سوات سی ٹولا ما پوران خلگ حساب کودی آں تواریخ ما ہے بات ثابت ہم ہوئی۔
جغرافیہ/وطن
توروالی خلگ کھید دھرَدی دا ہے اے علاقہ ئے وطن بنَدی۔ بھیم سوات سی علاقہ مدین ما بھائے توروالی علاقہ شروع ہودو۔ ہے علاقہ ہندوکش سی کھن آ سی علاقہ می ییدُو۔ بحرین تورولیا سی مرکزی پوت تھو۔ بحرین سی پوران نام برانیال آشُو خو والی سوات تنُو وخ می اے نام بدل کیدے بحرین تھؤ کئی کے بحرین می دو نھید تھی، ایک درال آں دھوئم گھین نھد۔ بحرین میلأݜ آ می ہُم چیر مشہور تھو کئی کہ بحرین سی بازار چیر شیؤ آں ہید ہر قسم سی شیئی خلگ آئے میلاؤ ہو دی۔ بحرین بازار سی ہوٹل آ سی کھؤ پُو پورا پاکستان می مشہور تھو۔
روزگار می توروالی خلگ مختلف کم کو دی۔ اِیمی نمایاں کم زراعت، ساروئی ساتو، سیاحت آں موسم سی مطابق میزدی ہوم شامل چھی۔ پوران وخ می توروالی خلگا سی بنیادی خوراک جوراٹ سی گیل یا یو ہؤدود۔ یو یا جوراٹ زید اکثر خلگ شا یا ڇھی سی کا ٹگون کھؤدُود۔ موجودہ وخ می بحرین سی بازار می ہر قسم خوراک میلاؤ ہودو۔
توروالی خلگ آ سی تاریخ
توروالی خلگ آ سی تاریخ سی بارا می مختلف بأت کوا بیَدی۔ توروالی خلگ امینے ہم تنو تاریخ سی حوالا دے کی صحیح معلومات نہ پادی۔ مُوٹھا گن خلگ امن گے عربی بنُودُود۔ ہے تھأ وخا سی بأت تھی کے یأمینے پختون اے توروالی خلگ آ سی دھریِنا زید قبضہ کیِدے ہأئے ”کوہستانی“ نام دید۔ لیکن مھیرے تحقیق آں آثار قدیمہ سی بنیاد تے أ بات ثابت چھی کہ توروالی سوات سی اصل آں چیر پوران دھرو والا خلگ تھی۔ دھوئم صدی می کے یأمینے سوات زید حملہ ہیِدا ، توروالی خلگ تیما مُوش سوات می دھرُودُود۔ سن 2012 می سوات می اٹلی سی حکومت سی آثار قدیمہ سی ماہرین آئے مھال ثبوت میلاؤ ہوئی کہ تھیِن بنیاد تے آ بات لائی پوخ ہی کہ توروالی سوات سی اصل باشندہ تھی۔
توروالی علاقہ یا توال 1922 می ریاست سوات سی باقاعدہ حصہ سوا گا۔ ای ما مُوش أ علاقہ یاغستان ییدا بیُودُود کئی کہ مھید کی حکومت یا قانون نہ آشُو۔ آثار قدیمہ سی مشہور ماہر آں محقق اوریل سٹائن تنو کتاب ”الیگزینڈرز ٹریک ٹُو اِنڈس“ می چِرڑئی یعنی مدین ما بھائے پورا علاقہ ئے کوہستان یا توروال لیگُودُو۔
توروالی جیِپ
توروالی جیِپ داردی جیِپ آ سی گروپ ما تعلق ساتئی۔ ہأ سوات سی سے پوران جیِپ چھی کامیک تھامُو بنا بیئی۔ جیِپ آ سی ماہرین اکثر مے بات کودی کہ داردی جیِپ تاریخی لحاظ تے بغیر لیگُو ما دھری دی آں پوران وخ می ہے جیِپ اکثر لیِگ می نہ آشی۔
داردی جیِپ آ می توروالی ما علاوہ کالام او دیر کوہستان می گاؤری، انڈس کوہستان می انڈس کوہستانی، بٹیری، چیلیسو، چترال می دمیلی، پلولہ، گوارباتی، کلاشہ، کھوار آں گلگت بلتستان می شیِنا جیپ شامل تھی۔ توروالی سی چھلے ہأ جیِپ آئے ہم دأل گھن جیِپ آ ما خطرہ تھو ۔ مشہور جیِپ آ سی ماہر گریئرسن توروالی جیِپ کے مھأ ٹول جیِپ آ می زیاد سوچا داردی جیِپ بنَدُو۔
توروالی بنُو والا سی کل تعداد مھیرے ایک لکھ دُّبیش زرے پرکے ہونین۔ سن 2008 می ادارہ برائے تعلیم و ترقی (ا ب ت) سی سروے سی مطابق تقریباً تیس فیصد توروالی پاکستان سی دأل خارہ می آباد تھی۔ آں ستر فیصد توروالی وطن می مطلب تحصیل بحرین می دھرَدی۔
توروالی خلگ آ سی ہے ہجرت توروالی جیِپ سی کیا خطرہ چھی کیئکہ اکثر کامے خلگ خارہ می آباد تھی دا تھین لؤ توروالی نہ بنَدی آں توروالی سی پوت اکثر پختو، پنجابی یا اردو بنَدی۔ اسی وجہ دے تھأ کیا تنُو جیِپ ہموݜہ بیئی۔
توروالی جیِپ سی دُو لہجہ تھی، اے لہجہ سنکیان سی یعنی بحرین می بنا بیئدو آن دوئی لہجہ ئے چیل سہ لہجہ بندی۔ ہے چیل درہ می بنا بیئدو۔
یونیسکو توروالی جیِپ خطرہ سی شکار جیِپ آ سی گروپ می شامل کیئی۔ اگرچہ گن محقق اے بأت زید اتفاق نہ کودی خو بھی ہم توروالی جیِپ کاں نہ کاں صورت می خطرہ سی شکار جیِپ آ می شامل چھی۔
توروالی جیِپ سی لیگو (Documentation)
سن 2005 ما مُوش توروالی جیِپ می لیِگو سی کی باقاعدہ تحریری نظام نہ آشُو۔ توروالی جیِپ صرف زبانی بنا بیودُود۔ ادارہ برائے تعلیم و ترقی توروالی جیِپ سی حروف تہجی باقاعدہ جیِپ سی ماہرین ما تربیت گھیِن دے سوأد۔ بھی بعد می ادارہ برائے تعلیم و ترقی توروالی جیِپ می ”مھون سکول“ سی نام دے اے سکول شروع کی۔ اے سکول می لوائے تعلیم تھین تنُو جیِپ، توروالی می شروع کوا بیُودود بھی اردو او انگریزی شامل کؤدُود۔ ای ما علاوہ آئی بی ٹی توروالی جیِپ او کلتور سی کیا گن کم کی۔ ہأ کما می توروالی جیِپ می کتاب چاپ کؤ، رسالا شائع کؤ، ڈکشنری لیگو، موبائل سی کیا توروالی کیبورڈ سی سوَؤ تھو۔ ای ما علاوہ سیِمام سی نام دے توروالی ثقافت او موسیقی سی جشن مناؤ کؤ آں ٹولا ما گھین بات توروالی خلگ آ می تنُو جیِپ سی حوالا دے احساس پیدا کؤ اں تنُو آمن آں تنُو جیِپ آں تنُو ثقافت سید فخر کؤ شامل تھو۔
مھیرے چونکہ ڈیجیٹل آں سوشل میڈیا او یوٹیوب سی زمان تھو۔ مھیرے کوشش أ چھی کہ توروالی خلگ نہ صرف جیِپ بنَن او لیِگن بلکہ خلگ تنُو جیِپ می آڈیو آں ویڈیو سوأدے بووَن۔ آئں ہے وجہ چھی مھیرے مھو پشَدی کہ چیر خلگ توروالی می ٹک ٹاک او فیسبک زید ویڈیو سوأدے شیئر کودی ای ما علاوہ توروالی می ایک دوئی گے میسیج آں فیسبک زید پوسٹ ہم توروالی جیِپ می لیِگَدی۔ مھیرے مھو میس بن بھادی کہ توروالی جیِپ پوران حالادا ما غورا حالات می چھی۔ مھیرے توروالی خلگ تنو پہچان نہ بورا دی آں تنُو جیِپ آں تنُو ثقافت زید فخر کودی ۔