تہ بیخ نیسیکو یارا
تائیت کورا کو نسہ ای داربت نیشی مہ کپال چھومیتائے ژنوتے ضرور ہوئے سلام دعا کوری بشار حوالار اچی تائیت کورا کو سار ہتو علاجو چے اپرشینو خبارو گنی لہازیار نیسیکو بچے بمبارک کوری استم ہرونیہ ای بیچی بیریار ہائے سلام کوری تائیت کوراکو ہوستہ بہہ کوری پھوک پھارو بی نیشیتائے تائیت کوراک پھار غیری کیانی مہ کائے کیہ کورمہ ہاؤ رے گویا کی مشینو بٹنو یو پرائے بیچی ریتائے کھیو لوو دوم متے کا سحر کوری اسونی مہ شیرین استاذئے مہ بوتی اسونی قالیپ انگارو موژو ، اورارو حرام ، اپاکہ خل نکی ، دنیا متے غیری گویان ، مہ ہتے ژاو مہ نویسو علاجو بچے ہسپتالہ بکو افوتے بندیتانی وام خلص کوری جو لاکھ روپیہ بڑاچھے ہتو گنی بی اسیتائے مشینہ دیتی لوڑی آپریشن بندیرو ، ہتو سم مہ ژان ہایو نکی وسواس بیتی اسوم ای لوسنوک شاپیک مہ آف نو بیران ، شوتارو لوٹ نانو چیق نویس بریکو ہتو بشار دویو بی استم جوہچور 14 لاکھ روپیہ اپریشنہ خرچہ گیرو بیرائے۔ زمین بزیمی کیہ وامان چھینیاتے لئے کیڑینیان ، دوش ٹھینگو گوچار مہ توخمیران گیتی استائے لوٹھورو ژورو ہسے موژغیشٹی ژاؤ تان بوکو لاکیرو ، جو دیوش جاموژار اژیلیان اچی گنی بلاہا چھونی اسونی طلاقو وختہ مہروچے نفقہ ایغو ٹیکہ دیتی بیشیر لاکھ روپیہ بیرو ، شویو بیرو کا مدد نو کوریکو چور تھویکان ، جو استوران ، جو ریشووان سوم بازارہ لوٹ دوکانو بیزیمی تروئے بوختان ہتو پیٹیکو پھورہ مڑاغ کوری تان ژانو خلص کاردو۔
مہ شیرین استاذئیے متے کیاغ کوری اسونی تو کتاب لوڑی جم تائیت کو چے کی ہمیرار کیہ خلص بوما مہ ہتے چیرو ژاؤ پشاورہ تان دورو بیزیمی چور بشیر لاکھ روپیاں تان گومیتو دستہ لکھی اسیتائے ہتو دور انگار چوکی درست مال اسبابان سوم مہ ژاؤ ہتے نولالو روپیہ دی پھیرو بیتی بوغدو ، نہ نوغ دور گانیکو بوین نہ تان ژورو علاجو بچے کراچیو الیکو بوین ، میانہ راہ بیتی بہچی اسور آسمان ژانگ زمین ڈانگ مہ شیرین استاذئے مہ سور غیری گویان ژانوتے قبال بویان متے کتاب لوڑے کی۔ بیچی لو دیاوا مہ ژانوتے قبال بیتی پھاری ئیری لوڑی بمبوریتو ملنگ مہ یادی ہائے البت ہیہ قسمہ کنولین پروشٹہ گیکو ہسے ریران ٫٫ تہ بیخ نیسیکو یارا ،، دیہو سبق نو راردو نن واوو زبانہ سحروتے سبق راردو روئے ٹینشن رینیان مگم سبق نو راردو نن گینیان اوچے کائے گینیان لو دیکو طریقہ جدید دورو موٹیوشینل سپیکرو سار دی توری سریتائے۔ ہیہ کمیونی کیشن سیکل ایم بی اے کاردو پروفیشنیل رویان سوم دی نو بوئے وکیلو ، ڈاکٹرو چے تائیت کوراکو نسہ گیتی تان غمان سوم جوستہ تروئے چور خور کوشونو غموچے مصیبتان ہموش روانیو سورہ بیان کوراک رویوتے کار کوریکو بچے وختو سوم جوستہ صبروچے برداشت دی ضرورت ، وقت نیزی صبرو سورہ کار کی ارو ہیس درست دیہو غمان اوچے مصیبتان تہ کھکہ درے تان غونہ تہ دی ٹینشن کوئے ملنگو ہتے لوو غون ٫٫ تہ بیخ نیسیکو یارا ،