موں کالامیں خلق باٞر لیݪ زندگی لنگاٞنت۔ موں حالات باٞر ہاٞمولیݪ تھی۔ موں خلق کے حکومتیں دِیش تھی کئی ہہاٞموسہولاٞت نا تھی۔ ماکہ حکومات کئی توجہ ہہاٞمونہ دئینت۔ حکومیتہ کالام اٞموݭہ ہہاٞموتٞلوت۔ اینچھلہ جاٞنٞنت اوں کالام پاکستاناں حصّہ ہہاٞمونات۔ حکومتاں ماں سہ کئی ہہاٞموفکر نات۔ ماں سہ کافر ما پا لاݪ سلوک وانت۔
کالاماں سول ہسپتال ناماں تہ سول ہسپتال تُھو۔ پرہ خو ڈسپنسری آں براباٞر پا نات۔ ہسپتال مئی کئی قسمیں سہولات نات۔ علاج معالجیں کمی تھی۔ ایکسرے ایں مشین (پلانٹ) کشکاں زمان تھی پیٹئی مئی بند تھی۔ ایکسریں مشین پراجیکٹہ (کے، آئی، ڈی، پی) علاقائیں خلقیں مددیں کیر دِیش۔ موں ہسپتالیں مشینری ایں چھلیں قیمتی مشینری سیدوآٞں ہسپتال مئی پا نات۔
لیکن افسوس ہوں محکمٞہ صحتیں غفلتاٞں وجاٞ تھی لکھونہ روپئی ایں مشینری باکار بچیل تھی۔ معمولی ٹیسٹیں تے ایکسرے ایں کیر پنج بِیش کلومیٹر دور منگور وا بچوگ وانت۔ اکثاٞر مریضاٞن یا زخمیاٞن پنو پنہ جنون ما تھیر دواٞنت۔ ڈاکٹرین، اپریشناں مانوڄ (سرجن)، دٞناں ڈاکٹر، ایل ایچ وی، نرس تے ایمبولینس وغیرہ نات۔
پاکستاناں مِڄوگ صدر فاروق لغاری اٞ ہسپتالیں کیر داٞش لکھ رُوپئی دِیش۔ محکمٞہ صحت والاٞ دش لکھ روپئی تھی صرف اٞ خراب جنریٹر گی دی پاٞنس ہضم کیر۔ موں مشراٞن مئی یا کالاٞمی مئی اینچھلاں اٞ مانوڄ ناتھو اوں سہ تانی حقیں تٞپوس کرئی۔
کالامیں خلقیں کیر پوگاں پاک اُو پا میلاؤ نہ ہوانت۔ مٞہ پُوگاں اُو پا نہ لاٞنت۔ اسپوجا باٞر دُور دُور تھی کوری دہ اُو گِھئینت۔ ہمن مئی اسپوجا رہ باٞر سخت تکلیف لگنت۔ کالامٞہ داٞش، باٞ فُٹ ہِیم وانت۔ موں اسپوجا پݭیلینت۔ کٞرپٹین، ہِیم مئی پورین باٞر خوئیری زیری دہ تے تکلیف دہ تے مصیبت دہ اُو گِھئینت۔ ہمن مئی اِسپوجا تہ چھور مِیشاٞل پا شیٹائی باٞر کہ نہ نِکباٞں۔
ملاکنڈیں یعنی واپڈائیں بجلئی صرف کالاٞماٞں باٞزاٞرائے تھی۔ دی نئیر نئیراٞں علاٞقاٞ (لاٞم) یعنی جِلدید، یاجگل، جائیلبنڑ، ݪاݪ تے دی دی لاٞم بجلئی ما محروم تُھو۔ ترقی اٞں اِیں دور مئی پا موں خلق ڈِیواٞ تے لاٹیناٞں جالوگ رہ مجبور تُھو۔
کالاماٞں روڈونہ تہ تٞھہ پشٞنت۔ ہاٞرہ بھاٞگہ کنداٞ کنداٞ تُھو۔ یا ݪٞپ ݪٞپ پتہ گاٞن گاٞن کنداٞ تُھو۔ اِیں تہ موں روڈیں حالات تھی۔ دی دی روڈونہ یعنی لاٞم لاٞماٞں روڈونہ آٞس ما پا لاٞݪ تُھو۔ اٞ کلومیٹریں مزاٞل گاڑی پنجاٞ مِلیٹ مئی کٞرینت۔ کالاماٞں سُواٞ روڈونہ دٞموگ زُمانیں ڈھنگیل آبیدیاٞں چھلہ اخکارہ ہواٞنت۔
تعلیماٞں میداٞن مئی کالام باٞر ہاٞموپت تُھو۔ کالام مئی تعلیم آٞٹ مئی لوناٞں براباٞر تُھو۔ آٞک تہ مٞہ سبق سٞہ شوق نہ ساٞتٞن، تعلیمیں دِیش کہ موں خلقیں ہُوب نات۔ سبقیں دِیش کہ کی توجہ نہ دیاٞنت۔ نہ ای موں خلق تانی لوکوٹور تے لِکیٹیر کہ تے تانی جوؤ کہ ہُوب کٞرٞنت۔ اوٞلہ تہ کمی اینوں سباٞق نہ منٞنت۔ کہ کم منن پا تو ییو بوب ما مجبور ہو منٞنت۔ ااسکول پٞھر چو تاٞتہ پا شوق سٞہ سباٞق نہ منٞنت۔ نہ ای اُستاٞزاٞن تام کہ ہُوب کٞرٞنت۔
پارٹ ۲
لوکوٹور اسکول تھی یاٞ بستہ اِشپاٞرن۔ ساٞرہ کِشکیں کِٹ تھی بستہ گۤٞڑی اٞن ھسہ تے ملاٞں لٞٹور کوچر ݭا اسکول پٞھر بچٞنت۔ پرہ سبقیں کہ ٹوپ تی ݭیݭئی معلوم نہ وینت۔ ییو بوب تٞپوس ہاٞمونہ کرٞنت کو تٞھہ اسکولہ کیں سباٞق منی۔ تعلیم باٞر ہاٞموران شئی۔ تعلیم حاصل کٞروگیں مطلاٞب اِیں نہ اوں تھہ تانی بچیاٞن اسکول پٞھر یا جمیت پٞھر لاڑا باٞغاٞم بھیاٞ تہ۔ ماکہ پکاٞر اوں مٞہ اسکول پھر چو استاٞزاٞن سہ میلا ہوئے۔ استاٞزاٞن سٞہ رابطہ سیتی۔ استاٞزاٞن ما تپوس کٞری اوں موں لوکوٹور اسکول پھر یٞن؟ نہ یٞن؟ سباٞق منٞنت نہ مننت؟
کون موں لوکوٹور اسکول تھی یاٞئے تہ۔ گیل تے نماز ما پت تام ما اسکولہ مٞنیل سباٞق لنگا۔ یا زوتا پا۔ تام ما تٞپوس کراٞ اوں تٞھہ آج اسکولہ کیں سباٞق منیت۔ کہ چری تٞھہ سباٞق منیت تہ تام کہ مِیڄ کہ یعنی دی سباٞق مناٞ۔ لوفری کہ کھُوش گِرو کہ مو چھوراٞ۔
ییو بوب سٞہ کئی احساس ہاٞمو نات۔ پنجیم جمیتائے لوکوٹور تانی ناماں چُنڑوگ نہ جاٞناٞں۔ ییو بوب کہ پکاٞر اوں تانی لوکوٹوررہ نظاٞر ساٞتی۔ لیکن موں کوستینی مئی کیں فکر نات باٞر ہاٞموساٞداٞ تے بگیشاٞل خلق تھو۔ اسکول تھی لوکوٹور یاٞئے تہ تام ݭا ݪم کراٞں، کٞٹو چاٞراٞں۔ نمازیں تے سبقیں ݪاٹ نہ کٞراٞں۔ آٞک تہ حکوماٞت موں علاقاٞ کہ ہوب ہاٞمو نہ کٞرینت۔ دی موں خلقیں اِیں حال تھی۔ کاٞس مئی ایں صلاحیت نات اوں تانی حقیں تپوس کٞرئی تہ۔ کہ ما مئی اِیں صلاحیت ہِیش تہ کومی موں حاق تُو نہ کٞر وانش۔ نہ ای موں اِیں حال ہوئینش۔ ماکہ پکاٞر اوں ٞۤہ سواٞ کوستینی اٞ مُوٹی ہو تئی تانی علاقیں ترقئیں کیر مِلی کوشش کٞری اوں موں اوطاٞن ترقی کرئی۔
موں خلق ترقی کاٞ مِیڄ ہوئے۔ کہ چری مٞہ تانی لیݪ تے بلیم جانی تہ، تانی علاقاں مفاد جانو تہ، دی علاقاٞں چھلہ موں علاقہ پا ترقی کٞرئی۔ حکومِتاٞں ہاٞرہ محکماٞ مئی موں علاقاں مانوڄ ہوئے۔ دی دی علاٞقاٞں ہاٞر کُوڅاٞ مئی نوم نوم داٞش داٞش افسراٞن ہُواٞں۔ لیکن موں ثاٞبٞت کالام مئی اٞ افساٞر پا نات۔ ماکہ پکاٞر اوں مٞہ تعلیمیں دِیش کہ توجہ دی۔
حضور (ص) آں حدیث شریف تُھو اوں ہاٞرہ مسلمان اِیسو مِیش رہ تعلیم حاصل کٞروگ فرض تُھو۔ تعلیم یافتہ مانوڄ تانی لیݪ تے بلیم جاناں، رین او لیݪ مئی تمیز کٞرواں۔ ماکہ پکاٞر اوں تانی لوکوٹور، لِکیٹیر ݭا تعلیم حاصل کٞرائے۔ لِکیٹیریں تعلیمیں دِیش کہ پا ہوب کٞروگ پکاٞر۔ لِکیٹیراں پا ما رہ حاق تُھو۔ ماں ما تٞسوں پا تٞپوس ویں۔ تعلیم یافتہ اسپوجا تانی اولادیں رین تربیت کٞرویں۔ اِینیں کیر اوں معصوماٞناں زیات واسطہ اِسپوجاٞ سٞہ ہواں۔ کہ مٞہ تانی لِکیٹیر ݭا تعلیم حاصل کرائے تہ اٞن مئی موں آئیندہ نسلاں فائیدہ تُھو۔
ثاٞبٞت کالاٞماٞں تحصیل مئی لِکیٹیراں صرف اٞ مڈل اسکول تُھو۔ سواٞ اُستیزاٞن بُھنائیں تھی۔ تام موں بچیاٞن کہ صحیح ہوب پا نہ کٞرینت۔ استیز اکثر غیر حاضر وینت۔ ماٞ مئی اٞ دیر یاٞ تئی حاضری ماضری ݭا واپس بٞچینت۔ کومی تپیساں نات۔ کہ چری لِکیٹیریں تعلیمیں دِیش کہ توجہ دِیت تہ آئیندہ نسل مئی سواٞ اُستیزاٞن موں تانی علاقیں ہوئے۔ کون موں علاقیں اُستیزاٞن ہی تہ تام موں بچیاٞن کہ رین ہوب کرئی۔ تے رین تربیاٞت کٞرئی۔ کہ چری مٞہ تعلیم حاصل نہ کیر تہ مٞہ تانی حقیں تٞپوس نہ کٞرواٞں۔ تھاکہ تہ ران کہ معلوم تھو اوں حکوماٞت موں علاقاٞ کہ کئی ہوب نہ کرینت۔ کئی ترقیاتی کاٞر نہ کٞرینت۔ کوکونیل، بیوں، کارگلو آں لاٞم مئی پنج ݭو کاٞلہ مِیڄ حکومیتہ اسکول چات۔ تم تھی اسکول آجوک دوسائے بند تُھو۔ امی اسکولونہ مئی استازاٞن نات۔ کوکونیل، بیوں تے کارگلواٞں لاٞمٞہ لوکوٹور تانی لامٞہ اسکول چھیری تئی دور دور دی دی اسکولونہ پھر سبقیں کیر بچٞنت۔ تم تھی معصوماٞن رہ کٞتیک تکلیف لنگنت۔ معصوماٞن شیدلہ ڈک ڈک کٞمٞنت۔ ہِیم مئی پُورٞن دو دو ݪا ݪا کلومیٹر پیدل مزاٞل کاٞ اسکول پٞھر بچنت۔
کہ ما مئی احساس ہُوش تہ مٞہ تانی حقیں تٞپوس کرویش تہ مو بچیانیں تے مو اِی حال نہ ہوش۔ اِتھائی کِشکون اومی اسکولونہ کولا ہوش۔ آٞس ما علاوہ دی دی علاقاٞ مئی اکثاٞر اسکولونہ بند تھو۔ ماکہ پکاٞر اوں اٞ منظم تنظیم چائے۔ تنظیماٞں شکل مئی تانی علاقیں حقیں کیر منڈہ ترڑہ کٞری۔ کالاماٞں تحصیل مئی لِکیٹیراں دشیم جمیتاں اسکول نات۔ اینیں کیر موں بچیاٞن ݭوئیم ستیم ما پھر کہ یا مِیڄ کہ اسکول نہ من ونت۔ موں علاقاٞ مئی لِکیٹیراں ہائی اسکول ہوش تہ موں اِشپوؤ تعلیم ما کا محروم دھرش۔
حکوماٞت موں علاقاٞ سہ دئیر یئیاں سلوک کٞرینت۔ اٞ حکومیتہ پا موں علاقیں دِیش کہ توجہ نہ دیت۔ کٞنی اٞ ٹاٞر پا مو دِیش کہ نہ دِیت۔ ہاٞرہ حکوماٞت پشاڑی کٞرینت۔ افسراٞن ماکہ لیݪ نظِر دہ بِیرن۔ مٞہ تام کہ انساٞناٞں بچئی پا اخکارہ نہ ہواٞنت۔
یاٞ اوں مٞہ سواٞ کوستینی اٞ مُوٹی ہوئے۔ آٞک دی سٞہ دی ضِد تے بغض چھیری۔ تانی تے تانی علاقاں مفادیں کیر اٞ مُوٹی ہوئے۔ تعلیمیں دِیش کہ توجہ دی۔ کم ہاٞموعلاقیں ترقئیں دِیش کہ توجہ کٞروݭات تہ ماکہ پکاٞر اوں تسیں تانی دسائی مداٞد کٞری۔ ہاٞرہ قسماں تعاون کٞری۔
مو خلقیں تتھی زوڑ قوات تے زور ختم ہیت۔ مِڄوک مزہ نات۔ ہاٞرہ مانوڄ ملیک تے مشر تُھو۔ اٞکدیاٞں جولاٞک کہ کن نہ تھاٞن۔ ہاٞرہ مانوڄیں اِیں کوشش تھی اوں یہ ملیک تے مشر ہوش تہ۔ مکہ کٞن ملیک مٞنوش تہ۔ ہارہ دوس جرگاٞ ہوانت۔ دوس دوساٞں جرگاٞں باوجود اٞ مسلہ پا اِیتھائی حل نہ ہُوت۔ دوساٞں بِیش جرگاٞ ہواٞنت۔ لیکن کئی فائیدہ نہ نِکانت۔
مِیڄ موں خلقاں باٞر گاٞن رعب تے دبدبہ وانش۔ بُنائیں خلق ما ما بِھئینش۔ بلکہ حکوماٞت پا ما ما بِھئینش۔ اینیں کیر اوں موں اتفاق آش۔ مِیڄ جرگاٞ مئی مشراٞنہ کہ فیصلہ کِیش تہ سواٞ خلق تتھیں فیصلہ رہ متفق ہواٞنش۔ آجکل ہاٞرہ شیٹ مئی داٞش داٞش بیش بیش مشراٞن تھو۔ ہاٞر آٞک دی ما مِیڄ ہوگیں کوشش یا ڈمین مئی تھو۔ مٞہ مشر کہ مشر نہ مننت۔ ایں وجاٞ تھی مٞہ دوس پہ دوس تباہئیں دیش کہ روان تھو۔ با اتفیقیاٞں وجاٞ تھی موں نام و نشان ڄھار ہوگ رہ تُھو۔ آجکل موں کوستینی کم گاٞن خاٞرہ پا حساب نہ کٞرنت۔ اینچھلاں وخت یئی اوں ما کہ کم کُچریں ایڄ دہ پا نہ بِیرئی۔ کالامیں دٞھرین پا مٞہ ݪئیری لٞس۔ ماکہ کئی ہاٞمو نہ دھروت۔ رین رین قیمتی قیمتی درین موں تھیر تھی نِیکیس۔ موں خلق موٹو باٞن دواٞ کہ دھروت۔ مٞہ دیال ہوٹلہ تمتھیں خلقیں پلیٹونہ دواٞن تے میزونہ پاک کٞرٞنت۔
کہ مٞہ اپان نہ پویانو تہ اینچھلاں وخت یئی اوں ما ݭا کم باٞن پا نہ دوآں۔ نہ ای موں کم څوکیدیری کہ چھورئی۔ موں تتھیں زیڑ بھید ڄھار ہِیت۔ اٞئی تسوں مرضی اوں ما سٞہ کھیول سلوک کٞرنش تہ۔ بنایاں خلقاں عام تاثر تے سوچ ایں تھو اوں مٞہ کوستینی جڑ، انیڑی تے شری خلق تھو۔ اٞئی حقیقاٞت پا۔ اٞن مئی کئی شاک نات۔ موں تعلیم نات۔ مٞہ تانی لیݪ تے بلیم نہ جاٞنٞنت۔ دوست او دشمن مئی فرق نہ کٞرونت۔
اٞ وخت اینچھلاں پا روان تھو مو کم کالامٞہ پا نہ چھورئی۔ وجہ اینوں مٞہ تانی رین رین درین ݪئیری ڈِھیرہ کھا لٞس۔ کالام مئی مو کئی نہ دٞرو۔ سوآ درین بھناییں خلقہ گِھین۔ ہوٹل تے دکاٞن سوآ بھنایاٞں خلقاٞں تھو۔ کاروبار سواٞ تسوں تھیر مئی تھو۔ پنج بِیش روپئی مئی صرف اٞ روپاٞئی کالاٞمٞہ دۤھرینت۔ سہ پا تتھی خلق کہ ہوں تسوں کاروبار ہُو تہ۔ باقی آٞک کٞم پنج بِیش روپئی اومی بھنائیں خلق سٞمٹی نئینت۔
اکثاٞر خلق منٞنت اوں کالاٞمیہ ترقی کیر۔ مٞہ کھیل ترقی کیت؟ مٞہ تہ تانی رین رین قیمتی قیمتی درین ݪئیری ڈھیرہ کھا لٞس۔ ما سٞہ کناں دٞرو۔ اٞئی کھیل ترقی اوں مٞہ دی خلۤق کہ کُوموچٞنت۔ موں کئی حیثیاٞت نہ دٞریت۔ تانڑہ تحصیل مئی پا باری خلقیں چلینت۔ کالاماں سواٞ کنٹرول باری خلقیں تھیر مئی تھو۔ مۤہ خوآر و زار گِیرن۔ ما کہ کم کُچریں ایڄ دہ پا نہ بِیرن۔ او ماٞں کوستینی جوؤ چونجاٞ۔ مٞہ تباھی ایں دِیش کہ روان تُھو۔ کہ موٹو پا مٞہ شِید نہ لیت تہ، مٞہ گاٞ تے یاٞئے، دنائے مئی موں کوستینیاں نام و نشان پا نہ دٞرئی۔ یاٞ اوں دی دٞرین نہ ݪئیری۔ کیں اِشتہ مٞہ ݪیاریت تہ آٞس رہ مٞہ صبر کٞری۔ نہ تے موں آئیندہ نسل ماکہ ہِیک دئی۔ ماکہ سباٞق گِھنوگ پکاٞر۔
بارائے تھی خلق یاٞ موں کالاٞمٞہ کاروبار کٞرنت۔ مٞہ تھوس پھلیکی کُھوش گِرٞنت۔ یاٞ اوں محناٞت کٞری۔ اپان جینی۔ مٞہ آلو، ٹیپر، گوپی تے دی سبزی ݪئیری تم تھی پاٞنس ڈِھیرہ کھاٞنت۔ ہاٞرہ مانوڄ شارئی دو بِیش ݪہ بِیش زِر رُوپئی گھی تساں اپانکہ پاٞݭ کٞرنت۔ تتھیں پاٞنساں آٹ تے چئی تے گُڑ گِینن۔
ہمنہ سات آٞڄ ماٞ کُھر پِھݭا کھاٞنت۔ ثاٞبٞت ہمان باٞکاٞر بھیاٞل ہُواٞنت۔ کھاٞکہ مٞہ ݪم مٞنوت۔ دی کی محناٞت مزدیری نہ کٞرٞنت۔ آلوآٞں تے ٹیپراٞں انتظار مئی ہُواٞنت۔ اٞ شارئی تے دی شارئی کُوٹھاٞرنت۔ اٞئی پا کہ جنون اٞ؟ موں ایں جنون تے زندگی کئی جنون ہاٞمو نہ۔
اولاں جولاگ تہ اِینوں اومی پاٞنس دہ ماکہ کِشکہ کاروبار کٞروگ پکاٞر۔ دویاٞم اِینوں تھوس پھلیکی کُھوش گِروگ ما دی باس کٞری۔ باٞزائے لاج تے شرم چھیری۔ کالام مئی اومی بُھناٞیاٞں خلقاٞں چھلہ محناٞت تے مزدیری کٞروگ پکاٞر۔ دی خلق یاٞ موں علاقاٞ مئی محناٞت مزدیری کٞرٞنت۔ مٞہ ای تھوس پھلیکی گِرٞنت۔
محناٞت تے مزدیری پیغمبراٞنہ نہ کِیتاٞ؟ اٞن مئی کئی لاج تے شرم نات۔ حق حلال رزق گٞھٹوگ سُنت۔ مٞہ محناٞت کٞروݭاٞت تہ مٞہ کاٞس کہ محتاج نہ ہُواٞں۔ دکانداٞراٞن ما نِیسیاٞ سودہ نیاٞنت تے کھاٞنت۔ شارئی دکاندار ڈبل پاٞنس وصول کٞرنت۔ ݪی اِینوں ثاٞبٞت ہمان مٞہ شِیٹہ بھئی کُھر پِھݭا کھاٞنت۔ باٞٞر بھیاٞل ہواٞنت۔ ماکہ پکاٞر اوں مٞہ ہمنہ شیٹائے باٞر کہ نِکی پنجاب، سندھ، بلوچستان مئی محناٞت مزدیری کٞری۔ ہاٞرہ شِیٹہ چور پنج ماٞنوڄ ہواٞں۔ اٞ مانوڄ دُو شِیٹہ چھیری دی سواٞ لاہور، کراچئی پھر محنت مزدیری ایں کیر بچوگ پکاٞر۔
کہ مٞہ تانی ایں فضول شرم تے لاج ڄھار کیر تہ مٞہ تھوکو مو کامیاب ہواٞں۔ آخر مئی یہ دِگیراں اِیں جولاگ کٞرنت اوں یا اوں مٞہ سواٞ اٞ مُوٹی ہوئے۔ آٞک دی سٞہ بغض تے ضِد چھیری۔ سواٞ ملی تانی علاقیں ترقی ایں کیر کوشش کٞری۔ دی سوئے ما اہم جولاگ اِینوں ہاٞر حالت مئی تانی بچیاٞن ݭا تعلیم حاصل کرائے۔ خدائے پاک موں اتفاق نصیب کٞرئی۔ موں ہِکور آٞکدی کہ صفا کٞرئی۔آمین، ثُمّ آمین .