پاکستان او نړيوال پير

متعلقه مضامين

” اېبسلوټلي يس؟ ” – سلطان خان ټکر

لانجه مار وزيراعظم

د منګي غاړه مې شنه . . . – سلطان خان ټکر

پاکستان او نړيوال پير

پۀ ۱۷ ستمبر د نيوزې لېنډ کرکټ ټيم عېن د مېچ د لمحاتو نه لږ مخکښې د سېکورټي تهرېټ پۀ بنياد د خپل ملک پۀ لوري د تګ اعلان وکړو۔ يقينا کۀ يو طرفته د پاکستان د کرکټ پۀ شائقينو د خفګان چپې راغلې، نو بل طرف ته پۀ ملک کښې د لوبو نړيواله فضا ته يوه سنګينه دهچکه ورسېده۔ د پاکستان وزيراعظم چې د صدر مملکت پۀ نزد يو نړيوال پير دے، د نيوزې لېنډ د ټيم د ايسارولو لپاره د نيوزي لېنډ وزيراعظمې سره تماس هم ونيولو، خو نړيوال پير د نيوزې لېنډ وزيراعظمه قائله نۀ کړې شوه۔ حالانکې د پاکستان حکومت د نيوزي لېنډ د ټيم د حفاظت لپاره فول پروف سېکورټي فراهم کړې وه چې د نيوزي لېنډ کرکټ بورډ د پاکستان د انتظاماتو نه مطمئن هم ؤ۔ سوال دا دے چې د ټاس پۀ وخت د نيوزي لېنډ ټيم بيا ولې د سېکورټي تهرېټ پۀ بنياد د واپس تلو فېصله وکړه۔ ايا واقعي د نيوزي لېنډ ټيم ته د تهرېټ احساس وشو او کۀ نه دا يو سازش ؤ۔ د شېخ رشيد د وېنا مطابق پۀ پاکستان کښې د سېکورټي هېڅ قسمه مسئله نشته۔ د شېخ رشيد پۀ خيال دا د هغې خلکو سازش دے چا چې دستانې اچولې دي، بلکې د سازش الزام نېغ پۀ نېغه پۀ بهارت دے۔ دې ته وئيلے شي بېن الاقوامي سازش يعنې هائبرېډ وار۔ هېڅ شک نشته چې څۀ ملکونه د پاکستان نه خوشحاله نۀ دي او د هغوي هر دم دا هڅه وي چې د پاکستان امېج پۀ بېن الاقوامي توګه خراب کړي۔ کۀ چرې پاکستان پۀ ۲۷ کښې ۲۶ پوائنټونه پوره کوي او سري لنکا پۀ ۴۰ کښې ۲۷پوره کوي، سري لنکا د ګرے لسټ نه وباسي او پاکستان د ښۀ کارکردګۍ باوجود بيا هم پۀ ګرے لسټ کښې دے نو بيا پوهه شه چې د پاکستان خلاف يو نړيوال سازش روان دے۔ برطانيه د بهارت نوم د کورونا باوجود چې پۀ هندوستان کښې ئې تباهي جوړه کړې وه د رېډ لسټ نۀ وباسې او د پاکستان نوم پۀ رېډ لسټ کښې وي، نو بيا پوهه شه چې د پاکستان خلاف يو نړي وال سازش روان دے۔ شکر دے اوس د پاکستان نوم پۀ رېډ لسټ کښې نشته بلکې د هندوستان وزير خارجه خو پۀ کهولاو وېنا سره دا هم وائي چې د مودي حکومت د وجې نه د پاکستان نوم پۀ ګرے لسټ کښې دے نو بيا خو ښکاره خبره ده چې د پاکستان مسئلې د هندوستان لۀ وجې دي۔ د امريکې وزير خارجه هم پۀ جار وائي چې د پاکستان مفادات خو زمونږ د مفاداتو خلاف دي، شائد چې مونږ د پاکستان د نان نېټو سټېټس پۀ حېثيت د پاکستان پۀ افغانستان کښې د کردار پۀ وجه غور وکړو نو بيا دا واضحه ده چې پاکستان پۀ نړيوالا پنجه کښې دے۔ د يو پاکستاني او د کرکټ د يو مينه وال پۀ حېث يقينا چې زړۀ ته زمونږه هم خفګان شته۔ د ډېرو هڅو باوجود پۀ پاکستان کښې د سختې دهشت ګردۍ پۀ وخت چې پاکستان کښې د نړيوالو لوبو کومه فضا جوړه شوې وه، د خان پۀ دور کښې هغه خوب نن دړې وړې شو۔ د شېخ رشيد صېب د وېنا مطابق هېڅ قسمه تهرېټ پۀ ملک کښې نشته نو بيا ولې دوره ختمه شوه۔ ايا دا نړيوال سازشونه مخکښې نۀ وو۔ شېخ صېب وائي پۀ ملک کښې د سېکورټي تهرېټ لۀ سره نشته، نو بيا چې کله پۀ ملک کښې د پي ډي اېم يا نورو اپوزيشن ډلو جلسه وي نو شېخ رشيد پۀ کوم بنياد وائي چې دومره خودکش پۀ کوټه کښې او دومره پېښور کښې داخل شو، لهذا اپوزيشن له پکار دي چې خپله جلسه کېنسل کړي۔ بيا ولې مونږ د پاکستان امېج خرابوو۔ سحر ماښام د افغانستان د موجوده حالاتو پۀ رڼا کښې د پاکستان تجزيه کار دا ولې وائي چې پۀ پاکستان کښې د دهشت ګردۍ امکان سېوا شو۔ ولې بيا مونږ پۀ خپله د خپل ملک خلاف د هائبرېډ وار حصه جوړېږو، اخر ولې؟ ايا مونږ د خپل ملک خلاف يو سنګين جرم نۀ کوو۔ چې تهرېټ نشته نو دا بيا مونږ پۀ حکومتي لېول فېک نيوز ولې خوروو۔ چې د فېک نيوز د مخنيوي لپاره نن د خان حکومت د اخري حد پورې ځي۔ بيا خو واضحه ده چې مقصد د فېک نيوز مخه نيول نۀ ده بلکې د ميډيا مرۍ حلالول دي چې د حکومت خلاف خبرې نۀ کوي۔ چې سېکورټي تهرېټ نشته نو بيا د پېنډۍ انتظاميې پۀ ۱۳ ستمبر باندې خط ولې هائي حکام ته ليکلے و چې د تهرېټ د خدشاتو لۀ کبله د فل پروف انتظاماتو نقشه پۀ کښې بيان شوې وه۔ شائد چې د دې خط او د حکومت پۀ ميډيا باندې دا تذکرې کول چې د افغانستان د موجوده حالاتو لۀ کبله د دهشت ګردۍ تهرېټ سېوا شوے دے او يقينا چې نيوزي لېنډ هم دا دې هرڅۀ نه اګاه وي او دا خط خو پۀ کښې پۀ تابوت کښې اخري مېخ ثابت شوے وي، لهذا دوره کېنسل۔ مونږ دا خبره کوو چې کله پۀ يو جومات کښې پۀ نيوزي لېنډ کښې د دهشت ګردۍ واقعه وشوه نو پۀ دغه وخت کښې پۀ نيوزي لېنډ کښې دا واقعه د ځاے نه يو څو کلوميټره لرې د بنګله دېش ټيم د کرکټ لوبه کوله، نو هغوي خو دوره نۀ وه کېنسل کړې ۔ کله چې پۀ کابل کښې د طالبانو غلبه راغله، نو بيا ولې د شمالي خلکو يوه جرګه پاکستان ته پۀ اقتدار کښې حصې اخستو له راغلې وه۔ د دې نه خو دا واضحه ده چې د افغانستان طالبان مجاهدين نۀ دي بلکې يو سلکټېډ ډله ده، چې د شمال خلک پۀ کښې هم خپله حصه د پاکستان نه غواړي۔ نو بيا مونږ دا الزام پۀ نورو ولې لګو چې د نورو لۀ وجې نه زمونږ دا مشکلات دي۔ مونږ له پۀ دې خبره غور پکار دے چې دنيا ولې د بهارت مني او زمونږ نۀ مني۔ هر چا ته پته ده چې بهارت پۀ کشمير کښې د ظلم انتها کوي، خو دنيا بيا هم بهارت سره ولاړه ده او مونږ ته اسلامي نړۍ هم ګيا نۀ اچوي، اخر ولې؟ اوس به دې سوال له راشو چې بنګله دېش خپله دوره ولې نۀ وه کېنسل کړې۔ دنيا ته پته وه چې دغه واقعه د کېدو سره د نيوزي لېنډ وزيراعظمې چې کوم کردار ادا کړے ؤ چې نۀ ئې صرف اسلامي نړۍ تعريف کړے ؤ بلکې د دنيا هر امن پسند قوم ئې ستائش کړے ؤ بلکې عمران خان خو ورله د نوبل انعام ورکولو مطالبه هم کړې وه۔ پۀ داسې عالم کښې به بنګله دېش خپله دوره څنګه کېنسل کړې وه۔ کۀ مونږ پۀ ځان نظر واچوو نو اسامه بن لادن دلته مري، ملا منصور دلته مري نو دنيا به پۀ مونږ اعتبار څنګه وکړي چې مونږ د دهشت ګردۍ خلاف يو۔ د يو لاکهـ خلکو د قربانو او د ۱۵۰ارب ډالرو د نقصان باوجود پۀ پاکستان د هشت ګردۍ د پرورش الزام هم دے، بيا هم مونږ دا چغې وهو چې د سري لنکا پۀ مقابله کښې د ښۀ کار کردګۍ باوجود مونږ سره امتيازي سلوک کېږي او زر د بېن الاقوامي سازش شاته پټ شو۔ سحر او ماښام پۀ ټاک شو ګانو کښې د حکومت غړي دا ډمامې وهي چې د ملک د سابقه صدر او وزيراعظم پورې مني لانډرر دي او ثابت د اوسې پورې يوه پېسه هم نۀ ده، نو سلوک چې راسره د سري لنکا نه بد نۀ وي نو څۀ به وي۔ چې بيا هندوستان ډمامې وهي چې پاکستان پۀ ګرے لسټ کښې زمونږ د وجې نه دے نو پۀ مونږ بده ولې لګي۔ بغېر ثبوت خبره کول خو فېک نيوز وي، د مني لانډرنګ دا ټول الزامات فېک نيوز نۀ شول نۀ څۀ شول۔ بې موقع چې مونږ د سفارتي ادابو خلاف ټرېږو او د “ابسلوټلي ناټ” هوائي ډزې کوو۔ حالانکې د سېکورټي امورو مشير معيد يوسف وائي چې امريکې دا تقاضا نۀ وه کړې نو بيا چې د امريکې وزير خارجه وائي چې د پاکستان پۀ نان نېټو سټېټس غور کول پکار دے نو بيا مونږ دا چغې ولې وهو چې د پاکستان خلاف سازش روان دے۔ د خپل موقف ځواب پۀ سفارتي ژبه کښې نۀ ورکولو په ځاے د سلطان راهي لهجه کښې ورکولو باندې چې بيا امريکه رد عمل کوي نو مونږ بيا ولې دا وايو چې د پاکستان خلاف يوعالمي سازش روان دے۔ معيد يوسف د امريکې پۀ ځمکه دا وائي چې مونږ سره بل اپشن هم شته۔ دنيا ته څۀ چې ټول پاکستاني عوام ته هم دا پته ده چې بل اپشن د بلېک مېلنګ يو تش کارتوس دے۔ د تاريخ نه ثابت ده چې امريکې نه علاوه مونږ بل اپشن ته تيار نۀ يو ګنې د ملک اولني وزيراعظم لياقت علي خان به اخري وقت کښې د روس دوره کېنسل کوله نه۔ د بل اپشن خو دا حال دے چې پۀ ۱۶ ستمبر د سېنېټ پۀ قائمه کمېټۍ کښې دا انکشاف وشو چې د خان حکومت راتلو سره د سي پېک بېړه غرقه ده۔ حکومت د چين کمپنيو ته د ۴۔۱ارب ډالرو نۀ ورکولو لۀ وجې نه خپل کار سټاپ کړے دے۔ وزير منصوبه بندي اسد عمر وائي چې پۀ سي پېک پۀ دې درې کالو کښې کوم کار چې پکار ؤ، هغه نۀ دے شوے، نو د بل اپشن وزن بيا څۀ دے۔ پۀ دې کښې صدر صېب وائي چې عمران خان نړي وال پير کړئ۔ د امريکې يوه تجزيه کاره دا وائي چې د عمران خان مثال د اسلام اباد د يو مئير برابر هم نۀ دے او زمونږ سپريم کورټ وائي چې د اسلام اباد پۀ ۲۴ کلوميټر دننه حکومت نشته، نو بيا به عمران خان څنګه نړي وال پير شي، حق الله!۔