باچا خان سکولونه او انجمن – ارباب الطاف قادر

د باچاخان ټرسټ سي اي او اېمل ولي خان د جون پۀ اتمه نېټه ٢٠٢٠ دا فېصله وکړه چې ډاکټر سهېل خان بۀ د باچاخان ټرسټ اېجوکېشنل فاونډېشن اعزازي منېجنګ ډائرېکټر او ارباب الطاف قادر بۀ ډپټي ډائرېکټر وي. پۀ وړومبي ځل چې مونږ د اېمل ولي خان سره ناسته وکړه نو پۀ هغې کښې مو دا فېصله وکړه چې د باچاخان سکولونه چې کومو مالي ستونزو سره مخ دي د هغې حل دا دے چې د هر يو باچاخان سکول دې خپل انجمن وي. څنګه به چې د باچاخان جوړکړے شويو ازادو مدرسو انجمن ؤ. هم دغه خبرې لۀ اېمل ولي خان عملي شکل ورکړو. پۀ دې لړکښې د عوامي نېشنل پارټۍ د صوبې صدر او د باچاخان ترسټ سي اي او اېمل ولي خان د ټولې پښتونخوا د پارټۍ د ضلعو کابينې اجلاس باچاخان مرکز ته را وغوښتو. پۀ هغه اجلاس کوم چې د ستمبر پۀ درېمه نېټه ٢٠٢٠ شوے ؤ،اېمل ولي خان د ټولې صوبې د ضلعو کابينو ته دا خبره پۀ څرګنده ټکو سره وکړه چې اوس ما ته پارټۍ د باچاخان سکولونو انتظام چلول حواله کړي دي، زۀ دا غواړم چې د دې سکولونو انتظام پۀ هغه ډول وچلوم پۀ کوم ډول چې د ازادو مدرسو انتظام د باچاخان پۀ وخت کښې چلېدو. هغۀ پۀ دغه غونډه کښې پۀ صفا ټکو سره ووئيل چې زۀ د اېن جي او پۀ پېسو باندې باچاخان سکولونه چلول نۀ غواړم ځکه چې د هغوي پېسو ورکولو سره سم خپل شرائط هم وي.

اېمل ولي خان دا هم ووئيل چې دا سکولونه مونږ د پښتنو بچو د سياسي او تعليمي روزنې لپاره پرانستي دي او زۀ غواړم چې ترڅو پورې مونږ د دې سکولونو مالي مرسته پۀ خپله شروع نۀ کړو تر هغه وخته دا سکولونه د قام د بچو پۀ سياسي ،تعليمي او تاريخي روزنه کښې چرې هم پرمختګ نۀ شي کولے. هغۀ ووئيل چې زۀ دا غواړم چې پۀ کومو ضلعو کښې باچاخان سکولونه شته، د هغه ضلعو د پارټۍ پۀ تنظيمونو باندې دا لازم ده چې د هر يو باچاخان سکول لپاره به د دېرش کسانو انجمن پۀ يو مياشت کښې جوړوي. دې انجمن کښې به د هغه کسانو نومونه اچولے شي څوک چې د باچاخان سکول پۀ انتظام چلولو کښې برخه او درس تدريس سره شوق لري، او ورسره لس زره روپۍ د مياشتې باچاخان سکول ته چنده هم ورکولې شي.

دا خبره اېمل ولي خان پۀ اجلاس کښې ښۀ پۀ تفصيل سره وکړه. د هغې نه پس د اېمل ولي خان پۀ وېنا د پارټۍ عوامي سېکتر سردار حسېن بابک لۀ خوا پۀ دستخط شوي کاغذ دا هدايات د صوبې د صدر لۀ طرفه ټولو ضلعي تنظيمونو ته واستولے شو. د دې عمل دا اثر وشو چې اوس د پښتونخوا د ټولو ضلعو پۀ تنظيمونو کښې پۀ دې خبره باندې خبرې کېږي چې باچاخان سکول لپاره انجمن پۀ کوم ترتيب جوړکړو. زياتو ضلعو کښې انجمن تر اوسه پورې جوړ نۀ دے. خو ولې د ټولو ملګرو پۀ ذهن کښې دا خبره پرېوته چې د باچاخان سکول لپاره څۀ بندوبست پۀ کار دے. زما اميد دے چې اېمل ولي خان د ټولو ملګرو ذهن ته کومه خبره واچوله هغه به رنګ را وړي.

دې ټولو خبرو هغه وخت رنګ راوړو چې تقريباً يوه مياشت پس دا کتوبر دمياشتې پۀ ١٤ تاريخ٢٠٢٠ز پۀ باچاخان سکول چارسده کښې وړومبے د انجمن غونډه را وبللې شوه چې صدارت ئې اېمل ولي خان پۀ خپله وکړو. پۀ دې غونډه کښې اېمل ولي خان د انجمن پوره خدو خال ښۀ پۀ تفصيل سره بيان کړل. د صوبائي صدر اېمل ولي خان د تفصيلي خبرو لنډيز څۀ دا رنګ دے:

1. هر باچاخان سکول لپاره به کم نه کم د ٣٠ کسانو انجمن وي.

2. دا انجمن به د ٥ کسانو د بورډ انتخاب کوي، چې پۀ هغې کښې به چيئرمېن ،سېکرټري ،خزانچي او دوه ممبران وي.

3. داد پينځو کسانو بورډ به د دې عهدو انتخاب کوي.

4. د بورډ دفتر به پۀ باچاخان سکول کښې وي.

5. د بورډ اجلاس به پۀ مياشت کښې يوځل کېږي.

6. د انجمن اجلاس به پۀ کال کښې درې ځل کېږي.

7. د سکول اډټ به انجمن کوي.

8. د انجمن معياد به درې کاله وي.

9. انجمن به د سکول د ماشومانو د والدېنو سره پۀ يو کال کښې درې غونډې کوي.

10. پۀ باچاخان سکولونو کښې بۀ د کېبمرج سلېبس وي.

11. باچاخان سکول کښې به تعليم فري وي.

12. د سکول د بلډنګ ذمه وار بۀ انجمن وي.

13. د سکول اکادميا او ټېکنيکل کار به د باچاخان ټرسټ اېجوکېشنل فاونډېشن پۀ ذمه وي.

14. د سکول تنخواه ګانې، د بلډنګ کرايه ورکول به د انجمن ذمه واري وي.

15. د سکول بۀ خپل جائنټ بېنک اکاونټ وي.

16. د سکول پرنسپل به د غونډې د سېکتر پۀ توګه کار کوي.

17. د انجمن د غونډو ټول رېکارډ به د سکول پرنسپل ساتي.

د دې نه پس د باچاخان سکول چارسدې لپاره د ٣٣ کسانو انجمن جوړ شو. انجمن د ٥ کسانو انتخاب وکړو څوک چې د انجمن د بورډ ممبران شو. د بورډ ممبرانو چې غونډه وکړه نو حاجي قيوم خان د بورډ چئيرمېن او شاه خالد ورسره سېکرټري شو. شهزاد الدين، اعظم جان او افتاب حسېن ورسره ممبران شول. د بورډ جوړېدو نه پس د بورډ غونډه هم وشوه چې زۀ او ډاکټر سهېل خان هم پۀ کښې شامل وو.

بيا د باچاخان سکول چارسدې د بورډ غونډه پۀ ٢٨ اکتوبر ٢٠٢٠ هم وشوه. چې پۀ کښې د سکول لپاره مهمې فېصلې وشوې.د باچاخان سکول سوات لپاره د انجمن غونډه د اېمل ولي خان پۀ صدارت کښې د دسمبر پۀ پينځويشتمه نېټه کال ٢٠٢٠ پۀ باچاخان سکول سوات کښې وشوه. غونډې ته اېمل ولي خان د باچاخان سکول سوات ته د پېښو ستونزو تفصيل کېښودو او ورته ئې ووئيل کۀ پۀ سوات کښې باچاخان سکول غواړئ نو ما سره دا تجويز دے . کۀ راسره ملګرتيا کوئ چې مخ پۀ وړاندې لاړ شو. د دې خبرې نه پس اجلاس مخ پۀ وړاندې لاړو. د باچاخان سکول سوات پۀ انجمن کښې هم درې دېرش ممبران شامل شو او اېمل ولي خان سره ئې دا عهد وکړو چې مونږ د دې سکول د ټولې مرستې ذمه وار يو. بلکې ډېر زر به د باچاخان سکول لپاره بل بلډنګ وګورو او سکول به هلته منتقل کړو، او راتلونکي وخت کښې به ورله خپل بلډنګ هم جوړوو.

د هغې نه پس پۀ اجلاس کښې د ٥ کسانو د بورډ انتخاب وشو. چې هغه څۀ دارنګ دي ؛ واجد علي خان، جعفرشاه خان، خواجه محمد خان، عاصم الله خان، ظاهرشاه خان.

د انجمن اجلاس نه پس دبورډ غونډه وشوه. اېمل ولي خان ، ډاکټر سهېل خان او ما هم پۀ کښې شرکت وکړو. پۀ غونډه کښې متفقه طور عاصم الله خان چيئرمېن، ظاهر شاه خان سېکتر، خواجه محمد خان خزانچي، واجد علي خان او جعفرشاه خان ورسره ممبران شول.

د بورډ چيئرمېن عاصم الله خان پۀ مشرۍ کښې د بورډ غونډه د جنورۍ پۀ پينځمه نېټه ٢٠٢٠ پۀ باچاخان سکول سوات کښې وشوه. د بورډ پۀ غونډه کښې دا فېصله وشوه چې سکول لۀ مو بل بلډنګ کتلے دے. سکول به زر هغې بلډنګ ته منتقل کوو. نورې هم ډېرې اهمې فېصلې وشوې .

د باچاخان سکول د انجمن دوېمه غونډه د جنورۍ پۀ شپاړسمه نېټه ٢٠٢١ باندې دانجمن د سېکتر ظاهرشاه خان پۀ ګېسټ هاوس قاسم باغ ….. ګرام کښې وشوه. د انجمن پۀ دې غونډه کښې ډېرې ګټورې فېصلې وشوې. دوه نوي ممبران پۀ انجمن کښې شامل شو. پۀ سکول ډېرې تفصيلي خبرې وشوې او پۀ غونډه کښې ډېرو ممبرانو خپله چنده هم ورکړه.

اميد دے چې څۀ رنګه د باچاخان سکول چارسدې او سوات انجمن روان دي نو انشاء الله هغه ورځ لرې نۀ ده چې دا دواړه سکولونه به پۀ خپلو ضلعوکښې ځانته ډېر لوے ځاے ومومي.

اوس د باچاخان سکول پابېنۍ صوابۍ ا و باچاخان سکول متهرا او نوتهيه کوم چې دواړه پېښور کښې دي، د پاره د انجمن جوړولو هلې ځلې روانې دي. زۀ پر اميد يم چې دې اقداماتو سره به ټول باچاخان سکولونه ډېر زر ښۀ طرفته روان شي. مالي مسئلې به هم حل شي او تعليمي معيار به هم مخ پۀ وړاندې روان شي.

د نن نه پوره سل کلونه وړاندې لوے بابا باچاخان چې کوم قدم وچت کړے ؤ نن بايد د هغې د سر څڼې لپاره کار او هلې ځلې وکړې شي ۔ باچاخان بابا دا هر څۀ د خپل غريب قام د روزنې، تعليم، روښانه سباوون او غلامۍ نه ازادۍ لپاره کړي وو ۔ نن مونږ لۀ بس صرف دومره کول پکار دي چۀ دغه سفر هم هغه شان جاري وساتو۔ راځئ چې سترګې پرانيزو، ځان وپېژنو، د بابا خوب رښتيا کړو، خپل قام د تعليم او کتاب پۀ کاليو ښائسته کړو او د باچاخان سکولونو ستونزې ختمې کړو.

دا هم ولولئ

د پښتون سټوډنټس فېډرېشن د 2021 د کال نوې کابينه – علي يوسفزے

د عوامي نېشنل ګوند ذيلي تنظيم پښتون سټوډنټس فېډرېشن د 2021ء کال د اګست د …

ځواب دلته پرېږدئ

ستاسو برېښناليک به نه خپريږي.