د مهذبې نړۍ دعویدار د ترقۍ په بام ولاړ د انسانیت کوکارې وهي —-
د بارودو په ډېري ولاړ یو نیم ارب انسانان د هند د نیمې وچې په سینه د ډوډۍ په تکل کښې لکه د تخم د نړۍ په ګوټ ګوټ کې کرلې شوي دي ۔
د دغه خلکو د یو بل سره څۀ دښمني نشته !!! کۀ د دغه یو نیم ارب انسانانو دښمني ده نو یوازې او یوازې د لوږې سره ئې دښمني ده۔
د غرېبۍ سره ئې دښمني ده ۔۔۔۔۔۔۔۔۔۔۔۔
د بې روزګارۍ سره دښمني ده۔۔۔۔۔۔۔۔۔
خو دغه ټولې دښمنۍ ترې هېرې دي او یو بل د عقیدې په بنياد خپل دښمنانان ګڼي !
د پښتنو تر ټولو غټ هېواد د یو سزا یافته “ جرنېل “ د چايو په پیاله کښې پروت دے ۔
لکه د open air prison منظره ورکوي —
نۀ پکښې څوک د ژوند اسباب مومي او نۀ پکښې د مرګ ځاے — مکتبونو ته ئې لوي لوي قلفونه اچولي دي ۔ د لرګي جوړې د جونو د ناستې څوکۍ وېنو اوخوړې ۔۔۔۔۔۔۔۔ قلفونو زنګ نیولے دے – د ګلالو ملالو پېغلو غوږونه د خپلو مکتبونو د زنګ په غږ پسې کاڼۀ شو۔۔۔۔۔۔۔۔۔ خو ( لا اور) د پرکټو په غوږونو کښې دننه هم ګزګز ږېرې شوي دي ۔۔۔۔۔ د ( لا اور ) پرکټي نېغ د حق اه نیا ( حقانیه ) په ناحقه دعوا خپل ځان د خداے د سپېځلي دین استازي ګڼي خو لا تر اوسه ئې مازغۀ خلاص نۀ شو چې حقانیه د خپلو استاذانو په ناحقانیه مړو لا ګنډلې شونډې ګرځي او د خپل بنيادګر مرګ د “ شهادت “ په تقدس کښې رانغاړل غواړي ۔
بېچاره افغانان د ټوک ډوډۍ په تکل کښې په نړۍ کښې تیت او پرک دي ۔ څوک چې لږ لږ ښۀ دي هغه د انقلاب په طمعه دي ۔۔۔۔۔۔۔ خو په دې نۀ پوهېږي چې د وطن پۀ سینه خپور تور ښامار ته ماتې په جذباتي نعرو نۀ ورکول کېږي بلکې دا ډېرې “ سړې سینې” غواړي، پوهه غواړي، سیاست غواړي، علمي قدرونه غواړي او هغه لار غواړي کومه لار چې مزل ته نه بلکې منزل ته رسي ۔
نړۍ هسې د امن امن نعرې وهي ۔ د نړۍ مهذبین جنګ غواړي ځکه چې جنګ کاروبار دے، جنګ کښې انويسمنټ کوي ۔ خو دغه جنګونو له د لوبو مېدان بیا هم دغه د چايو پۀ پیاله کښې محصور وطن ګوري او ورته زمینه مساعدوي ۔
د دوه نیم زره کلو میټره سرحد په دواړه اړخه پراتۀ قامونه خپل زخمونه څټي ۔ چې انټرنل کنفلکټ internal conflict، نۀ ستړي شي او غصه راوستل غواړي نو د ]لا اور[ په پرکټو یې وس نۀ رسي د یو بل ګرېوانونه نيسي ۔ خپلې وینې څښي ۔ د لا اور پرکټو ترې لشې ويستي دي او غټې غټې داړې ئې ورله تېره کړي دي چې خپل عزایران پرې اوداړي ۔