ماٞں کاٞلماۤں جھوؤ تھاکہ ران کہ مالوم تھو اوں مِیڄو موں لاٞمہ سنگاں رواج آش۔ کاٞں دو خاٞندان یا دو ماٞنوڄ آٞکدی ما تھی خوش ہوش تہ آٞکدی رہ سنگ گِراٞنش۔
یاٞ اوں یہ تھاکہ سنگاٞں باراٞ مئی اٞ قصہ چُنڑم۔ مِڄوگ زماٞنہ دو کلماٞں جھوؤ مِلی گِرنش۔ آکاں نام خوشوٹ تے اسیں اِیساں نام بلقیسہ آش۔ دیاں نام ارنگ تے ایساں نام ملالئی آش۔
ارنگ خوشوٹ کہ ارو یہ تھکہ تانی سالو گو دم ماں تھئی رہ سنگ ہو۔ ہیماٞ سوئے کہ مالوم اوں ائی ہلہ لکہ پھتیر بچاں۔ اوں بو دور اتیک مکہ پا مالوم ہوں ایں چھلاں آٞکاٞک گو ہواٞں۔
راٞن راٞن جھوؤ ایں تہ ہو سالو گواں سنگ امی دویہ آٞکدی رہ کیر۔ پرہ ان تھی پت کہ ہوان یاٞ اوں ان رہ اٞ نظاۤر تلی۔ خداٞیاٞں کاٞر کہ بِیراٞ خوشوٹ مُور اساٞں چور لُکوٹور تے دو لِکیٹیر دری۔ گھاٞن پواں نام لشکروٹ، تاٞس پتاں پو آں نام سمندروٹ، دیاں نام مُکوٹ تے نیلوکاں جوبوٹ تے گھین بیریاں نام زلیخہ تے لیکاں نام ڈیانہ آش۔
کتیک وخت گاش تے امی جھوؤ اٞ بابہ کیر۔ گھاٞن پوئیں اِیساں نام ڈِلیٹ تے سمندروٹیں ایساں نام زرسانگہ آش۔ زرسانگہ شارئی گھیئے ہمنہ اسوں بوب مور۔ دی بریݭ آمہ تانی گھین اِشپو زلیخاں خوڑہ کیر۔ ارنگ کہ شید ہی ان امی لوکوٹور کہ جرگہ تلو اوں ماں تھوں بوب رہ سنگ آش۔ تھہ مئی ما تھی باٞ تپوس تانی گھین اِشپو دیت۔ مُٹو ران کار اِینو تھہ تانی لیک اِشپو ماٞں نیلوک پو پرتول کہ دیت تہ۔ خاٞر جرگہ گا تے یائے آخرہ ییہ بِرے دیت۔ بابہ لا نہ ہوش تے اساں شُشر ارنگ مور۔ میہ دو کاٞل گاٞ تھوکو مو اساں بابہ ہو۔
ڈیانہ نیم شیکہ گھیئے تے چیشہ آٞس کہ کٹو تے بکاٞر حوالہ کیر۔ خاٞر ڄھاٞن سٞہ تہ ائی ہیلی پرہ جھیم ریتہ داٞر باٞریں اِسال آٞس سٞہ آنگ ݭینش اوں چھیں کیر سنگ گات تو اپان ما سہ مو گݭ۔ ایں چھلہ ڈیانہ سوئے کہ اِبیٹ آش اوں ائی سنگ مئے ییت۔ ائی پا کاٞ بیتہ پِھݭیل کرینش ہوں سواٞ اٞچھلیں اِسال۔ مِیش کٞہ پا ائی باٞر باٞ مولازہ آش۔ پرتولاٞں مویو مئی بھی ایں بھاٞش اوں یہ کتیک باٞقدر آش اوں مکہ سنگ مئی ایس گھییت۔ ان تھوکو تانی ییو جھوؤ کہ ارو مکہ دی اِیس گھٹاٞ۔ خاٞر ایس آٞس کہ گٹی بابہ لا نہ کیش تے اسیں ڈیاٞناٞ ما تھی اٞ بِرے ہی نام ای تساں گُلیری تھائے۔
ناٞم بابہ کیر تے تھُکو تہ ڈیاٞناٞ ما تھی کہ اٞ تروٹہ چیئے۔ جیم ریتہ آٞس رہ ڈانڑ تھاݭت۔ آخیرہ آٞس جھوؤ کہ پھݭیئے۔ ہمان لنگی بسان یائے اساں مِیشیں مئیڄ جیئے۔ مئیڄ دی کاٞس کہ دھوؤکہ نہ بھیوݭیت۔ تھُکو مو اساٞں میشہ جرگہ تلو ھوں میں اِیس پھݭادہ۔ شاٞشوراٞلہ جرگاٞ کہ ایں منو اوں جاماݪ اپینہ یاٞ تانی جاۤن گھیچودہ۔ دی دوسہ میش تانی اِیس پتہ گا۔ تاتہ اسیں چیشہ کہ نصیات وصیات کیر پرہ اساٞں مویو مئی تہ تتھی سنگ باݭت۔ تھُکو مو اساں شاشور لشکروٹ ارو سنگ گی تھکہ دم ہیماٞک تھی چو آٞس گڑی تلو۔
ائی شیکٞہ یائے نیم ایس ارو ائے کناں ہو مئیڄیں ڄھیر چراۤڈ دہ یئی۔ ان جیمہ جرگہ سمائے پرہ اساٞں جھوؤ چراغ تے شرنگ ارو تو دِگیراں اپینہ چو۔ تاٞتہ چو شاٞشور سمندروٹ سہ جھار ہی۔ ڈیاٞناٞ تہ جھاٞ گس پرہ بلقیساٞ ای جاماݪ نہ درابائی تن داٞ سمندروٹاں تھوس پھوٹا تلو۔ تھُکو اساٞں دی جھوؤ اٞ ݪی دوسہ اساں دی جھاٞ شرنگاں تھوس پھوٹائے۔ جرگہ شورو ہو۔ جرگاٞ باٞر زورہ ڈیانہ نی۔ مئیڄ دھوؤگاں کار تہ ہو پرہ آٞکدی کہ ݭُکُوݭت۔ چراغ تے پرتول تہ باٞر تپیجین ہوں اٞ څریک تھوس پھوٹاگاں بداٞل پا مارہ گھین۔ ایس رہ تہ لاݪ سات تھائے اوں اولہ پا چھاٞں جھوؤ اٞ موں باٞر کڑاٞش۔ مُٹو بی دِگیراں ما رہ بداٞل گھی موں تھوس پھوٹائے۔
دی شارئی مئیڄ شیِک تے آمہ ڈیانہ جھوؤ کہ پھݭیئے۔ ہمان لنگی بسان یائے تھوکو مو بوباٞں لاٞرہ اساں اٞ پو ہو۔ اسوں میم بلقیساٞ اساں نام مسافر تھائے۔ پرتول تے چراغ بھاگوبھاٞ آم کہ پن گِھنوݭت۔ تھُکو مو آمہ پا ایں صلاح کیر اوں اولہ جاماݪیں داٞجینت۔ اٞ دوس لشکروٹ تے جوبوٹ باٞناٞل تھی واٞنش چراغ تے پرتولہ اوم کہ پن گھین آکدی ایں توبیکہ دیت میہ سیچ کہ جاماݪ پرتولیں ݭیت۔ لشکروٹ تے جوبوٹہ ماٞنگشور شی دیت تے آم نہ پشوݭت اوم تن تھی ڈیبی دی پن دہ وس۔ پرتولی لی دہ والو۔ اٞ کال سٞہ کڑی تئی مور۔ تاٞتہ پت اساٞں دی جھوؤ شرنگ تے چراغ ارو ایچھاٹ تہ اسوں دو ماٞرجن۔ امی غریباٞناٞنہ اشپو سمان گھاٞل چھوری مونہ۔
اتیک مودہ گا اوں ڈیانہ او پرتولیں شیرینڑ گلیری بابیں ہی۔ پو پا دش باٞ کالاں ہو۔ اٞ دوس چراغہ تے شرنگہ چو لشکروٹیں توبیکہ دیت تے مسافروٹ پا تانی پِݪیو ایں توبیکہ دیانش تے جھاٞر مئی گلیریہ چکاٞر دیت ارو موٹ تہ تلوت پرہ بوبُو مو ماٞر۔ او بوب مار منی آٞس گس۔ چراغ تے شرنگ تہ گاٞ۔ لشکروٹ ای بھاۤگ رہ مور۔ کتیک ماٞ اٞ پت اسوں میم بلقیسہ پا میر تے آٞس کہ کن قصہ کیر اوں تو فلانکیاں پو۔ تھوں بوب چھاٞں موٹ لشکروٹہ ماروش۔ مُٹو تھوں بوباں گٹہ کیر۔ دی موٹو اٞ تے ان ایں صلاح کیر اوں پتکہ تانی لاٞر کہ چوئے۔ اٞ مرگ اٞ پیݭ تھی ہو آٞک دی پیݭ تھی۔ آم تانی لار کہ یاٞئے۔ جاٞماݪاٞں جھوؤ اٞ توبیکہ داٞ لُکُوٹ جوبوٹیں جینگ پھوٹا تلی۔ تاٞس نائیلاج شاٞل کاٞ تلو۔اٞ مہ گاش ڈیانیں چیش تے مسافریں دید ملالئی بیلاگ ہی۔ تھُکو مو تانی نوسئی مسافریں تے گلیریں ارمان کروݭیت۔ تے ایں چِکاٞر داݭیت اوں مئی تانی ایڄ دہ تانی نوسیو لیش تہ۔ کہ جرگاٞ مناٞت کیر پرہ نوسئی کوم ناٞئے، مسافر تہ ارو یہ سیچاں مسافر آش۔ دیدہ تہ ارماٞن گھی گیر کہ لا نہ گیش تے آم جرگاٞ اٞ شیداٞل جناٞز رہ نو۔
تیہ پت اساٞں موٹُو سمندروٹ تے مُکوٹ اساٞں پڷیو آٞں مرگ پتہ گروݭت۔ اٞ چھاٹ دو توبیکہ پا دیت پرہ کۤسینی نہ ݭیت۔ خورئی مسافرہ میہ جرگہ شورو کیر۔ جرگاٞ آخیرہ ایں فیصلہ کیر اوں شل جوبوٹ کہ چور گو تے دو ای گاٞئے داٞدہ۔ جوبوٹ خوشال ہو تے جرگہ گھین۔ تھُکو اسوں روغ ہو۔ خورئی اٞ تانی یئی ڈیانہ تے اشپو گلیری پا گھی چو تانی دئیر یئی نیم جامی سہ تے تسیں بیرے پھٹوئی سہ تانی بوباٞں ڈاٞ رہ بھاٞݭ۔ مساٞفروٹہ میہ گھور گھی مکہ دیت مئی تاس پلینی یائی گو تے گائے ای زکیت مئی بگیشو۔
مُٹو تھہ کن پرو تہ توم مناٞ اوں سنگ کتی ران اٞ کار آشو، کن کیش تامہ کتیک مزاٞ کیر۔ سالو گو آٞں ݭینگ پا ݪاق ہو۔ پرہ آم ارمان دہ گیر کہ گاٞ۔ کتیک مرگ تے جوبل ہو۔ کوم ارمان دہ مور۔ کساٞں جناٞز گوکو چونڑاٞلہ گاٞ۔ کن کن جننیہ آٞکدی نہ لیݭ۔ کاٞس رہ باٞر کڑا لنگوت۔ اساں جواب تھہ ایں پتا دہ لاڑا۔
نورالامین، نبلاں عبدالمجید مولناں گھاٞن پو۔