اداريه – جولائي 2019

پاکستان نېشنلیانو د پاره مېرنے دے، خو خپل د چا دے ؟

د جولائي میاشت سره تړلې درې واقعې لوستونکو ته یادوو:

28 جولائي 2017: ‘وزیر اعظم’ میا نواز شریف د خپلو اثاثو دننه ‘د دوبۍ تنخواه’ نۀ ښودلو باندې د ارټیکل 62
ترمخه نا اهله کړے شو.

29 جون 2018 : پېرس کښې د فنانشل اېکشن ټاسک فورس (FATF) لۀ خوا شوې غونډه کښې پاکستان د
ترهګرو د مالي مرستو د پاره د مني لانډرنګ لړ کښې د خامیو او کوتاهیو پۀ تور ‘ګرے
لسټ’ کښې شامل کړے شو.

10 جولائي 2018: پېښور کښې خودکش بمي چاودنه – د عوامي نېشنل پارټۍ امیدوار هارون بلور شهید.

د میا نواز شریف د ارټیکل 62 لاندې د نا اهله کولو دوه کلونه، د پاکستان ګرے لسټ کښې د راتلو او د شهید هارون بلور د شهادت یو یو کال وشو.

میا نواز شریف وئیلي وو، ‘یا خو د ترهګرۍ پۀ ضد جنګ کښې خپل کردار رڼول دي او یا نړیواله توګه باندې یواځې کېدل دي’ – بیا د ‘ډان لیکس’ نه خبره د پانامه، جوډیشل مارشل لاء انګازو پورې ورسېده او وروستو فلېګ شپ رېفرنس سره د نواز شریف د نا اهلۍ د پاره د جوړ شوي جواز حقیقت هم مخې ته راغلو.

پاکستان چې پۀ ‘ګرے لسټ کښې واچولے شو، هغې نه لس ورځې پس پېښور کښې د شهید بشیر احمد بلور چې د دهشتګردۍ پۀ خلاف د هغۀ ‘سینه ډبول’ یوه مېړنۍ او زړۀ وره بیانیه جوړه شوې وه او نن هم ده، زوے هارون بلور یکه توت پېښور کښې یو ځانمرګي برید کښې سره د یویشت نورو نېشنلیانو شهید کړے شو.

پاکستان کښې پۀ جمهوریت تر ټولو وړومبے ګزار هم پۀ دې ‘نېشنلیانو’ شوے ؤ او د ریاست لۀ خوا ټولو نه وړومبے اجتماعي قتلِ عام هم د دې ‘نېشنلیانو’ شوے ؤ. د ټولو نه وړومبي د غدارۍ الزامونه هم دې ‘نېشنلیانو’ باندې لګېدلي وو او د ټولو نه وړومبۍ کردارکشي هم جلسو او میډیا کښې د ‘نېشنلیانو’ شروع شوې وه – هغه وخت به د شنې جنډې لاندې ولاړ ‘محفوظ’ لاسونو کښې وو. بیا شنه جنډه لنګه شوه او د شین رنګ نه نور شنۀ، د ستوري شنۀ، د سپوږمۍ شنۀ، د سائیکل شنۀ، برګ، د سوباړو سرۀ شنۀ او د ‘جیپ’ شنۀ وزېږېدل. د شنې جنډې نه زېږېدلي هغه دي چې هر دور کښې د ‘ارټیکل 62/63’ ناپاک وي او هر وخت د ‘پارلېمان’ برخه وي. د هغوي مرۍ کښې پړي د هغوي پرتوغاښونه وي چې غوټې ئې د جرنېلانو، ججانو، مارشل لاګانو او جوډیشل مارشل لاګانو لاسو کښې وي. بلېک بېري او ویډیو کلپس ورته هم څۀ نۀ وائي.

پاکستان ته اکتوبر 2019 پورې د اېف اے ټي اېف شکایات ختمولو د پاره مهلت ورکړے شوے دے.

دې موده کښې پاکستان طمع لرله چې چین به لاس ورکړي. چین د BRICS )برازیل + روس + انډیا + چین + ساوتهـ افریقا( پلېټفارم باندې پاکستان نه لاس اخستي وو او پۀ نړیوال کچ نۀ شي کولے چې د BRICS اعلاميې نه پس هم د هر چا زنې نه لاس لاندې کړي. معروضي حقیقت دا دے چې د هند لۀ خوا د بالاکوټ شوشې او د ابهينندن د خوشي کولو نه پس پاکستان کۀ زرها وائي چې د کشمیر شخړه مو رڼا ته راوړه خو حقیقت دا دے چې هند پۀ سفارتي کچه اسلام اباد ته زښته ماتې ورکړې ده او ځکه خو مونږ د عمران خان غوندې ګوډاګے هم واورېدو چې د هند سره د کړکېچ ورځو شپو کښې ئې پۀ نېشنل اېکشن پلان د عمل درامد لاپې کولې –

د پاکستان لۀ خوا د سلامتي کونسل غېر مستقل رکنیت کښې د بالواسطه ووټ ورکولو یوه وجه هم دا ښودلې کېږي چې پاکستان د هند نه د ګرے لسټ پۀ حواله پاستۀ لاس غواړي – یاده دې وي چې میاشت نیمه وړاندې د هند لۀ خوا پاکستان پۀ بلېک لسټ کښې د اچولو غوښتنه شوې وه. دا چاړۀ ئې لا پۀ سر ځوړنده ده.

دا هر څۀ هسې نۀ دي، دا هر څۀ د نړیوال فشار لاندې دي. دنیا ګڼي چې ‘پاکستان پۀ حېث د ریاست د ارټیکل 62/63 لاندې دے.’

عوامي نېشنل پارټۍ پۀ 1973-74 کښې د جهاد پۀ نامه د فساد ضد بیانیه مخې ته راوړې وه. پۀ اتیایمه لسیزه کښې باچا خان بابا او رهبرِ تحریک خان عبدالولي خان دا بیانیه د ټولې اېشیاء سیاسي غوږونو ته رسولې وه چې ‘دا جنګ د اسلام نۀ دے، دا د امریکې او روس جنګ دے – دا جهاد نۀ دے، دا فساد دے.’

پۀ ‘ګرے لسټ’ کښې نامه راتلو نه پس جنرل باجوه هم ووئیل، ‘دغه جهاد نۀ فساد ؤ.’ خو څلوېښت کاله پس دغه خبره کول هم د بیان تر حده وو، نن هم دغه خبره کول د بیان تر حده دي. سرتاج خان شهید کړے شو او پۀ سوات کښې د عبدالله یوسفزي ورو او زوے ترهګر برید کښې ژوبل کړے شول.

پاکستان پرون پورې دا نۀ منل چې افغانستان کښې د جهاد پۀ نامه روان جنګ فساد دے، پاکستان پرون پورې دا نۀ ګڼل چې افغانستان کښې بل شوے اور به پۀ تورخم راوړي، پاکستان پرون پورې دا نۀ وئیل چې د دهشتګردو هېڅ مذهب نۀ وي. نن پاکستان ګڼي چې د جهاد پۀ نامه روان جنګ فساد دے، نن پاکستان ګڼي چې افغانستان کښې بل شوے اور پۀ تورخم راوړېدلے دے، نن پاکستان وائي چې د دهشتګردو هېڅ مذهب نۀ وي – خو پاکستان نن هم خپله کوي. کۀ خپله ئې نۀ کوله هارون بلور به وژل شوے نۀ ؤ، سرتاج خان به وژل شوے نۀ ؤ – کۀ خپله ئې نۀ کوله نو د سرتاج خان د کور سره د غمرازۍ جرأت به ئې کړے ؤ!!!!!

حالات دا دي چې ‘جوډیشل مارشل لاء’ نېغ پۀ نېغه مارشل لاء شوه. سونت مونت ئې سم او شرعې ته برابر کړے شول. د داخله امورو، خارجه امورو، میډیا، احتساب او عدالت لاس ته راوړلو نه پس وزارت خزانه هم فوج نېغ پۀ نېغه د ‘خېټې’ لاندې کړو. سلېکټد حکومت د ‘قومي معاشي کونسل’ نه ‘قومي ترقیاتي کونسل’ جوړ کړو او اٰرمي چیف جنرل باجوه ئې دې کښې رکن اخستو سره فوج ته دغه وزارت کښې هم ډائرېکټ لاره ورکړه. بدل کښې اٰرمي چیف د سلېکټډ حکومت د پاره د ‘اٰئي اېم اېف ټیم’ لۀ خوا د جوړ شوي بجټ منظورۍ کښې کردار ادا کړو. جنرل باجوه د بجټ وړاندې کولو نه مخکښې اخبارونو کښې لویې سرخۍ لګولې وې چې ‘فوج حکومت کے معاشی پالیسیون کے ساتهـ هے’ –

تر څو چې د سلېکټډ حکومت د مخې نیولو خبره ده، دې لړ کښې د عوامي نېشنل پارټۍ لۀ خوا شروع کړې شوې د احتجاجونو لړۍ یو مؤثر عمل دے. د جمعیت علماء اسلام لۀ خوا د مولانا فضل الرحمان رابللے شوے ټول ګوندیز کنفرانس هم پۀ ډېرو حوالو ګټور ځکه دے چې ریاست خپل ټول زور اوبۀ کړو چې ‘دوه لوي ګوندونه’ دې کښې ګډون نه ایسار کړي. میډیا باندې د ټولګوندیز کنفرانس شروع کېدو یعني د شپږویشتم جون پورې د داسې تاثر ورکولو پوره کوشش وکړے شو چې ګنې دغه دوه ګوندونه به کنفرانس کښې ګډون ونۀ کړي. کنفرانس وشو. د عوامي نېشنل پارټۍ لۀ خوا ټول وړاندیزونه ومنل شول او اوس هیله کېږي چې کۀ د ‘رهبر کمېټۍ’ مشري ‘مسئله’ نۀ شي نو د سلېکټډ حکومت او د هغۀ د امپائرانو بلکې وېمپائرانو کبر به مات شي. پۀ شراکت کښې د حصه دارۍ طمع او مقدمو کښې د ‘مسلط رژیم’ د بادارانو نه د رعایت اسره خداے مۀ کړه چې خنډ شي.

پاکستان د چاچا جواد د سائیکل نه پۀ هوا ویستلو ګرے لسټ کښې نۀ دے شامل شوے؛ پاکستان نائن الېون نه پس د ترهګرۍ پۀ ضد جنګ کښې د دوه مخۍ پۀ تور ګرے لسټ کښې دے. د پاکستان فوج، عدلیه او د احتساب اداره خپله لمن باندې د انتخابي درغلۍ او ټګۍ ټورۍ تور لري. پۀ نوو ضلعو کښې فوج ځائي خلقو له انتخاباتو کښې د شرکت لاره نۀ ورکوي. دا ټول هر څۀ د سول نافرمانۍ او ‘غدارۍ’ نوې لارې پرانیزي.

باید اپوزیشن ګوندونه د عوامي نېشنل پارټۍ پۀ پل پل کېږدي – باید د فوج، عدلیې، احتساب او الېکشن کمېشن )چې اصل کښې ‘سلېکشن کمېشن’ دے(، خلاف سیاسي ګوندونه د ‘ډور ټو ډور’ کېمپېن لاره خپله کړي. باید نېب ورټي، باید فوج وسکونډي، باید عدلیه وننګوي، باید راپاڅېدو ته چمتو اولس راپار کړي.

 

دا هم ولولئ

د باچاخان او ولي خان کليزه

پۀ باچاخان او ولي خان ډېر زيات کار شوے دے، ډېر پرې روان دے کېږي …