Category: عبدالرؤف يوسفزے

پاکستان يو عجيبه ملک دے او خلق ئې د هغې نه هم لوې عجوبې دي. حسن نثار د پنجاب يو غټ خبريال او تجزيه نګار دے. تېر الېکشنز نه دوه کاله مخکښې ډرامې او پۀ يو نوې بيانيې “سارا ټبر چور هے” باندې کار روان ؤ چې پۀ کښې اسټبلشمنټ، عدالت او ميډيا لازم او ملزوم وو.

يو شور او غوغا وه، نوازشريف غل دے، لندن کښ ئې د مليونو ډالرو جائيداد واخستو، اصف زرداري مسټر لس پرسنټ او د اسفنديار ولي خان پۀ ملائشيا کښ جائيداد دے او هم دغه شان محمود خان اچکزي پسې هم ډرامې کېدلې او د نامعلوم سائټس او سوشل ميډيا اکاؤنټس نه به بې بنياده پراپېګنده کېده او الزام به لګولے کېدو چې دغه مشرانو غټې روپۍ وهلي دي، د کرپشن نااشنا تورونه پرې لګولے شو او دغه شان نورې ډېرې قيصې پته نۀ لګي چا راپېدا کړې او ورسره به د ميانوازشريف پۀ اړه دا خبره هم کېده چې سارا ټبر چور هے بلکې دې نعرې ته زور هم ورکړے کېدو. دا هم وئيلے کېږي چې عاصم باجوه د دې جملې مرکزي کردار ؤ خداے خبر چې رشتيا به وي کۀ دروغ خو بهر حال دروغ به ګردن راوي خو د دې نه انکار نۀ شي کېدے چې هم د دې ذاتي او خانداني حملو په مرسته اسټبلشمنټ تېر عام انتخابات د پاره يوه داسې بيانيه جوړه کړله چې ورته د کرپشن بيانيه وئيلے شو بلکې وئيل به ورته ضروري وي.

او دغه الزاماتو سره سره ئې عمران خان د ملک د ټولو مسئلو د حل د پاره يو مناسب او موزون مشر پۀ شکل کښې پۀ روايتي اخبارونو، ټيلي وژن او جرائد باندې راوچت کړلو. بيا د ملک د ټولو لوې استخباراتي ادارې د هاغه وخت د مشر پۀ ملګرتيا د اسلام اباد پۀ ډي چوک کښې پرلت يعنې دهرنه شروع شوله او مطالبه ئې دا کوله چې يو منتخب وزيراعظم دې استعفا ورکړي. بهرحال خبرې ډېرې او سر ئې يو، پنډۍ والا خلکو پۀ هر حال کښې عمران خان راوستلو. د پاپولسټو دور دے، پۀ هندوستان کښې مودي، برطانيه کښ جانسن، امريکه کښ ټرمپ او دلته عمران خان. بس د دې خلقو خو هم دغه خبرې وي چې دروغ دومره ووايه چې رشتيا خپل حېثيت ورک کړي.

بس عمران خان راغلو. په دغه ورځو کښ زما هم پنجاب کښې د مسلم ليګ ن د ټيم سره د پښتو سوشل اور روايتي ميډيا لۀ پاره ډيوټي وه. د ډېرو واقعاتو زۀ هم عېني شاهد يم. پۀ لاهور کښې سعد رفيق خپل سيټ پۀ اسانه ګټلے دے. د پولنګ نه څو ورځې مخکښې ورباندې د مذهب پۀ حوالې سره الزامات ولګېدل خو سعد رفيق ډېر تکړه انسان دے، د مسلم ليګ ن مرکزي دفتر ته راغلو او خپل کارکنان ئې هم راوپارول، دغه خبره پۀ درې ورځو کښې کښېناسته خو دغه وخت ډېر اهم ترين پۀ دې وجه هم ؤ چې پولنګ ته د شمېر څو ورځې پاتې وې.

پۀ ملتان کښې د مسلم ليګ يو اميدوار افتاب رانا ؤ. د هغۀ ويډيو راغله چې ما سره نن هم پۀ موبائل فون کښ پرته ده او کله کله ئې پۀ سوشل ميډيا هم شيئر کوم. هغه وائي چې يو د يوې لوې ادارې يو افسرراغلو او ما ته ئې ووئيل چې د ن ليګ نه الېکشن کښې حصه مۀ اخله. خو کله چې ورته ما انکار وکړو نو زۀ ئې پۀ څپېړه ووهلم او دهړکه ئې هم راکړه چې کۀ دا خبره دې ؤ نۀ منله نو ستا کاروبار به هم تباه کړم. دغه شان پۀ هر ځاے کښې زور زياتي وشو، ټګۍ ټورۍ وشوې، ووټونه پټ کړے شول او پۀ زور زياتي او پۀ سپينو او شخو سترګو عمران خان له بل چا الېکشن وګټلو چې هر چا ته معلوم دي. اليکشن خو عمران خان وګټلو خو نن پۀ کښې د دې ملک بې وسه، غريب او مزدورکار عوام شرمېږي او کړېږي. د احتساب او انصاف نعرې به ئې وهلې، چغو به ئې د خلکو د غوږونو پردې شکولې، عجيبه عجيبه خبرې به ئې کولې خو هغه د لويو لويو دعوو کوونکے او لوې لوې ويونکے ډېر پاتې انسان وختلو. عاصم باجوه به هم مني چې د دې انسان سترګې کلکې دي. صحافي احمد نوراني ارټيکل وليکلو او پۀ کښې ئې دعوې وکړه چې د جنرل صاحب ورور، بچو او د ښځې پۀ نومونو 99 کمپنيانې او 130 فرنچائز دي. دا ئې هم الزام ولګولو چې د درې کروړو روپو لېنډ کروزر ئې پۀ اثاثه جات کښې د دېرش لکهو ښودلے دے .

خو دا خبره به پرېږدو ځکه چې داسې ښکاري چې ځينې خلک د قانون او ائين نه پېدائشي بالاتر وي. بهر حال کۀ يو خوا دا حالات دي نو بلخوا ورسره نېب ګردي د روزانه پۀ حساب زياتېږي. اپوزيشن قيادت تقريبا د ن ليګ او پي پي پي پۀ جېل کښې يا د کچهرو پۀ چکرو کښې ګېر دي. او هم پۀ دې وجه پيپلز پارټۍ د ال پارټيز کانفرنس اعلان کړے ؤ چې پۀ کښې ټولو جماعتونو پۀ مينه او د زړۀ د خلاصه ګډون وکړو. ميا نواز شريف د بيمارۍ نه پس پۀ اول ځل يو داسې تقرير وکړو چې سياسي پنډتان ورته د پنجاب اليټ سياست اولنے پروګرېسيو او اګرېسيو تقرير وائي. ميا صېب د زورورو خلاف صفا صفا خبرې وکړې او خپل جماعت ته ئې داسې ډائرېکشن ورکړو چې باقي اقتدار يا جېل. او د مصلحت خبرې او بيانيه د ن ليګ د راراوان وخت د سياست نه همېشه د پاره ختمه شوه. او پکار هم داسې ده ځکه چې باقي اسټبلشمنټ ډېر اېغ پۀ نېغه سياست او نورو ادارو کښې مداخلت شروع کړے دے. د جسټس صديقي ويډيو تقرير خو پۀ رېکارډ دے کله چې هغۀ پۀ جار وئيلي وو چې څوک د عدالت پۀ فېصلو باندې اثر انداز کېږي او ملک کښې انصاف نۀ کېږي.

انصاف به څنګه وشي چې ميا نواز شريف قېدي، اصف زرداري غل، اسفنديار خان، محمود خان اچکزي او مولانا فضل الرحمن ته پۀ ميډيا بيا بيا د دوي ملګري وئيلے کېږي او تقريبا هر سړے ورباندې يقين هم کوي نو بيا خو به هم داسې کېږي چې پۀ عاصم باجوه باندې د لګېدلي تورونو به نۀ پۀ عدالت او نۀ نېب او نۀ ميډيا څۀ اېکشن اخستے شي. کله چې د احمد نوراني ارټيکل چاپ شو نو عاصم باجوه د جواب پۀ ځاے يو ټويټ وکړو چې دا ټولې خبرې دروغ دي او ټول الزامونه ئې رد کړل. د انصاف د پاره ښۀ به دا وه چې نوموړي ځان احتساب ته پېش کړے ؤ. خو داسې ؤ نۀ شوه.

ميا نواز شريف چې کله تقرير وکړو نو نېب شهباز شريف ګرفتار کړو خو مريم نواز اور نواز شريف صفا الفاظ کښې ووئيل چې غټ غل څوک دے او تپوس ئې وکړو چې اوس دغه ځاےکښې نېب ، عدالت او حکومت چرته دے. مولانا فضل الرحمن باندې هم ګواښونه کېږي.

چي کله اے پي سي وشوه نو د فوج ترجمان ووئيل چې سياست دان فوجي مشرانو سره ملاقات د پاره راځي. خو ورپسې بله ورځ د جے يو ائي ف حېدري صېب دغه ووئيل چي مونږ ته د دهرنې پۀ وخت داسې ووئيلے شو چې دهرنا مو ختمه کړئ او د نواز شريف خلاف مونږ کار ته پرېږدئ.

خبره ډېره واضحه او سپينه ده. باقي خو يا به د ائين بالادستي وي او يا به خاموشي وي. پۀ دې راراون تحريک کښې د هر زورور، طالع ازما او ائين چقوونکي خلاف خبره، واک، احتجاج کول او د وطن اکائيانې مضبوطول دي. ورسره ورسره يو شعور هم بېداروال پکار دي چې راراوان نسل ته پته ولګي چې هره محکمه او اداره د دې ملک دي او دا ټولې برابرې دي او پۀ هره اداره او معاشره کښې ښۀ او بد خلق وي. د ايوب خان نه واخله تر تښتېدلي جنرل مشرف پورې چې چا هم ائين مات کړے دے يا ئې د جنګ او امن پۀ بهانه کرپشن کړے دے، هغه د ازاد عدالت مخکښې راوستل د وخت اهم ضرورت دے.

باقي شپ شپ باندي کار نۀ کېږي. صفاوېنا پکار ده چې ملک کښې د ټولو نه غټ غل څوک دے او ائين ماتولو او بچ کولو واله کوم کوم کسان دي. دغه شان قام پرست جماعتونو باندې هم ډېره غټه ذمه واري راځي چې خپل ووټرز موبلائز کړي چې د وخت ډېر لوے او اهم ضرورت دے چې ائين سره يو ځل بيا ودريږي او د دې فاشسټ او نا اهل ترين حکومت نه خپل او راراوان نسل خلاص کړے شو.

کۀ وګورو نو نن يوه اے اېن پي ده چې پۀ مېدان ولاړه ده. هم دوي دي چې پۀ ملک کښې د ائين او اولسواکۍ خبره کوي. مونږ ګورو چې ځينې سياسي ګوندونه کله يو څۀ او کله بل څۀ وائي خو يوه عوامي نېشنل پارټي ده چې هر وخت ئې د جمهوريت، سياست، افغانستان او د سيمې حالاتو پۀ اړه غبرګون يو شان پاتې شوے دے.

سر کښې مې د پنجاب د يو غټ او مشهور تجزيه کار حسن نثار خبره کړې وه. هم دا هغه خلک وو چې د انصاف راوستلو لپاره به ئې چغې وهلې، د عمران ملګرتيا به ئې کوله او د تجزيې پۀ ځاے به ئې د مخالف ګوندونو مشرانو پسې سپکې سپورې وئېلې. خو نن هم دغه حسن نثار خپله غلطي مني او خپله خولۀ پۀ سوکونو وهي خو څۀ پرې چې نقصان خو شوے دے.

څلور کاله مخکښې کله چې ما پۀ اېکسپرېس اخبار پېښور کښ کار کولو نو يوه ورځ ټرېبون افس کښې د کشمير د ازادۍ وسله والې ډلې يو مېلمه سره زمونږ ناسته وشوه چې پۀ کښې شميم شاهد صېب هم ناست ؤ. د ډېرو خبرو اترو نه پس کله چې مېلمه سره زۀ لاندې راکوز شوم او پۀ مخه ښه مې ورته ووئيله نو تپوس ئې وکړو چې زمونږ څۀ مستقبل دے؟ نو ورته مې ووئيل چې سياسي جنګ ډېر ضروري دے ځکه چې ريجنل او بېن الاقوامي قوتونو ته وسلواله مبارزه نوره قبوله نۀ ده . هغه حېران شو او راته ئې ووئيل چي هم نن زۀ د دې وطن تکړه ادارې دوستانو سره ناست وم او هغوي راته ووئيل چې تاسو خپل کار جاري ساتئ، هېڅوک درته هم څۀ نۀ شي وئيلے.

بس اخر کښې مې ورته ووئيل چې امير صاحب چين پۀ زرګونو بلين ډالره سرمايه کاري پۀ دې وطن او نورو ګاونډي ملکونو کښې پۀ دې وجه نۀ کوي چې خپل دوست پاکستان ته دې اجازت ورکړي چې جنګي مېدان دي ګرم وساتي . اول خو چين ته قبوله نۀ ده ځکه چې جنګي اقتصاد نه خبره پرامن اقتصاد او ورسره جيو سټرېټيجکل نه اکنامک سټرېټجيکل ته روانه ده.

يو کال مخکښې پۀ لندن کښې مونږ د هندوستان، پاکستان، سري لنکا او بنګله دېش صحافيان يو سينئر انګرېز افسر سره ډنر ته ناست وو، هلته هغۀ هم دغه ووئيل چې هندوستان يو اېمرجنګ اقتصادي طاقت دے چرته چې د کاروبار ډېر لوے چانسز شته دے ولې بلخوا پاکستان د خپلو پاليسيو لۀ وجې پۀ دنيا کښې يواځې پاتې کېدو طرف ته روان دے. هم پۀ دغه وخت کښې ورته زمونږ د پنجاب يو دوست صحافي ووئيل چې د دې طالبانائزېشن بنيادونه خو هم تاسو ايښودي وو. خو انګرېز ډېر هوښيار انسان ؤ، هغۀ ورته ووئيل چې دغه کار مونږ او د پاکستان ملټري اسټېبلشمنټ پۀ شريکه کړے ؤ. بهرحال وخت ډېر تېزۍ سره تېر شو او حالات بدل شو. ترکي، ملائشيا او ايران چې کله محسوسه کړه چي ارګنائزيشن اف اسلامک کنټريز (او ائي سي) باقي صرف Oh I See پاتې شو نو پۀ دغه وجه دوي وغوښتل چې يو بل بلاک جوړ کړو چي پۀ کښې د اسلامي نړۍ مسئلو ته فوري حل پېدا کړو.

پاکستان ته هم کانفرنس کښ د وېنا او شرکت دعوت ورکړے شو خو هغه وائي کنه چې Beggars are not choosers يعنې “سوال ګري سره اپشن نۀ وي” او بس صرف به يس سر کوي. چونکې دغه وخت پاکستان شديد مالي بحران سره مخ ؤ او پاکستان ته فوري طور باندې ډالرز پکار وو نو هم دغه وجه وه چې کانفرنس نه د سعودي عرب پۀ دباؤ پاتې شو. مړ هم شو او پړ هم.

وئيلے کېږي چې دنيا امريکن، چائنيز او يا کوم بل بلاک کښې واپس تقسيمېږي، ښه نو بيا او زمونږ به پکښې سوېمه برخه جوړېږي. پښتانۀ مشران وائي چې زۀ د چا او زما څوک! پۀ دې دواړه کښې ډېر زيات فرق دے. پاکستان به بيا وائي چي زۀ د چا؟ دغه خبره هم اوس سېکنډري ده. اصل خبره بلکې سوال دا دے چې کۀ مونږ پۀ هر بلاک کښې انټري کوو، خو د موجوده پاليسۍ سره به مو ځان سره څوک پرېږدي؟ کله هم نه! امريکه خوکله هم پاکستان د وسله والو سپورټ ته نۀ پرېږدي او کۀ پۀ مستقبل کښې چرته هم داسې وشي نو دغه به زمونږ معاشي، معاشرتي، اقتصادي او سياسي خود کشي وي. امريکائي صدر هم دا وئيلي دي چې افغان شخړه زمونږ د پولې نه پۀ زرګونو کلوميټره لرې ده او دا مسئله د مقامي طاقتونو پاکستان، هندوستان، روس ، چين او ايران ده. د مسلمانې نړۍ مالدار ملکونو سعودي عرب او عرب اماراتو پۀ هندوستان کښې ډېره لويه سرمايه کاري کړې ده. تېر کال کله چې سعودي کراؤن پرنس محمد بن سلمان پاکستان او بيا هندوستان ته پۀ چکر راغلے ؤ نو هغۀ پاکستان کښې شل بلين ډالرز او هندوستان کښې د سل بلين ډالرز سرمايه کارۍ اعلان کړے ؤ او هم پۀ دغه وجه سعودي عرب، پاکستان ته وئيلي دي چې د چين او انډيا د شخړې نه ځان جدا وساتي. خبره واضحه ده، زما خوږه وروره د ملکونو تعلقات پۀ ګټه او تاوان وي، دغه ځاے کښې مذهب او ورورولي وغېره هېڅ معني نۀ لري. داسې ښکاري چې پۀ سوېلي اېشيا کښې به اوس د عرب ملکونو ښۀ او مضبوط تعلقات د هندوستان سره وي. او کله چې مودي حکومت د کشمير يو خودمختار ائيني حېثيت ختم کړو نو د دغې کارنامې نه پس سعودي حکومت مودي ته اېوارډ ورکړو. زۀ ګڼم چې دا ئې ډېر ښۀ وکړل او کېدے شي مونږ اوس د دې خام خيالۍ نه را بهر شو او يو حقيقت پسند او د ترقۍ سوچ وکړے شو.

يو اے اي ،اسرائيل تسليم کړو، خلک ورته کۀ هر رنګه ګوري خو د يو ازاد وطن مشران هم دغه شان کوي او د خپل قام او وطن د ترقۍ سوچ د مذهب نه بالاتر ګڼي. باقي دا چې غلام قومونه فېصلې پۀ خپله نۀ شي کولې ځکه چې سوالګري د پېسو د پاره لاس نورو ته نيسي. زما اميد دے چې اوس به پاکستاني پاليسي مېکرز، ميډيا، سو کالډ انټلکچولز د خپلو ذهنونو نه او هم دغه شان د نصبابونو نه به د امت مسمله او نورې دنګې دنګې دعوې اوځي. د هر چا پۀ خپل سر ده. پرونه پورې به هم دغه خبرې کېدلې چې پۀ کشمير او فلسطين کښې ډېر غټ ظلم روان دے او د ديبل (سند) نه د يوې مظلومې مسلمانې پۀ اواز حجاج بن يوسف لشکر کشي کړې وه. پته نۀ لګي چې اوس د دې وخت عربيان پۀ ګاونډ (فلسطين ) کښې د مظلومانو اوازونه نۀ اوري کۀ پۀ سترګو ړاندۀ شوي دي.

پاکستاني پاليسي مېکرز دې باقي پۀ دې خبره کليئر وي چې دنيا بدلېږي او خپل ځان له دې پۀ نړۍ کښې باقي پۀ وچتو سترګو مناسب ځاے وګوري. جنګونه او جنګونو ته د ودې ورکولو وخت ختم شو. اوس افغان طالبان دي او کۀ کشمير کښې ګوتې وهل دي او کۀ نور څۀ شخړو ته هوا ورکول وي او کۀ هر څوک ئې ورکوي، نو دا نۀ صرف ځان سره بد کوي بلکه پۀ خپل راتلونکي نسل به هم ظلم کوي. د يو سوکاله او خوشاله پاکستان د پاره دا يو څو خبرې دي چې هندوستان او افغانستان سره دې د ګاونډګيرۍ تعلق جوړ کړي . دا هم مهمه ده چې د پاکستاني پراډکټس د پاره نزدې مارکيټ هندوستان، افغانستان او يا بيا مرکزي اېشيائي رياستونه دي.

بېن الاقوامي سطح باندې مونږ چرته ولاړ يو؟ زمونږ شناخت څۀ دے ؟ د بده مرغه دا يو ډېر تريخ حقيقت دے چې کله تپوس وشي چي What is your contribution to the world in 21st Century? نو بيا دغه ځاے انسان وائي چې پۀ کوم تاخ کښې ئې واچوم. فارن پاليسي يا خارجه پاليسي باندې کار کول دي خو اول خبره دا ده چې څنګه به يو دروند او عزت دار ژوند د دې وطن باشنده ته ملاوېږي. پۀ دې لائنز کار کول ډېر ضروري شوي دي.

پاکستان کۀ چرته هم وغواړي چې د جنګي اقتصاد پۀ ځاے تجارت د پاره افغانستان او هندوستان سره تعلقات بحال کړي نو ډېر زه به ئې معاشي ستونزې هوارې شي. زمونږ تعلقات يو اے اي، امريکا، سعودي عرب او نو ډېر ملکونو سره پخوا پۀ شان نۀ دي پاتې. يو چين پاتې دے باقي سدهوم ته شين دے. کۀ حالات چرته داسې روان وي او عمران خان او ټيم ئې پاليسيانې ري وزټ نه کړلې نو بربادي او سمندر کښ ډوبېدل زمونږ قسمت دے. There is no permanent enemy and friend in international relations او هم دغه وجه ده چې حالات تېزۍ سره بدلېږي. سعودي شهزاده محمد بن سلمان يو ځوان دے، هغه تعلق جوړولو او ماتولو کښې ډېر وخت نۀ اخلي نو کۀ چرته پاکستان يوه ازاده پاليسي خپله کړله چې نۀ د چين، نۀ د امريکا او نۀ د بل او بل د خواهشاتو مطابق وي نو کله به هم زمونږ د وطن نوم پۀ منفي قصو کښې د دنيا پۀ ميډيا کښې نۀ راځي. اصل خبره بيا د معاشي ترقۍ او پرامن ګاونډګيرۍ ده.

تېرو څلوېښت کالو راهېسې افغان کډوال پۀ پاکستان کښې اوسېږي او د ورورولۍ ډېر شاندار داستانونه موجود دي خو سوال دا پېدا کېږي چې بيا هم د افغان دولت پاليسي پاکستان نه د خفګان اظهار کوي نو د دې خبرو ذمه وار اوس څوک دي؟ ايا مونږ کله پۀ دې خبره سوچ کړے دے چې دا ولې؟ ولې د يو مهم ګاونډي هېواد، چې ورسره دوه نيم زره کلوميټره نه زياته پوله لرو، سره زمونږ تعلقات مثالي نۀ دي؟ او ولې د دومره هڅو باوجود پۀ سيمه کښې امن نۀ پۀ ځاے کېږي؟

پاکستان له پکار دي چې د جنګ زپلي افغان اولس د درد دارو شي او د يو نوي افغانستان پۀ تعمير کښې خپل کردار پۀ بهترين انداز ولوبوي چې زړونه وګټلے شي، کرکې دې ورکې کړي او د امن، تجارت، سوکالۍ خبرې او سوچونه دې رامېنځ ته کړے شي. هندوستان يو غټ مارکيټ دے او چين، سعودي، يو اے اي لګيا دي خپل روزګار پۀ وړاندې بوځي نو دغه چانسز خو پاکستان ته د ټولو ملکونو نه ډېر دي، بايد شروع د افغانستان څخه وکړے شي او پۀ سميئزه توګه تجارتي هلې ځلې پېل کړے شي.

پۀ سرکاري محکمه کښې د ځوانانوضلعي افسر راته څو ورځې مخکښې وئيلي وو چې پۀ يو ميټنګ کښې مونږ ټولو پۀ دې خبره کوله چې موجوده حکومت د لوبو او ځوانانو صوبائي بجټ ډېر زيات کړے دے ځکه چې عمران خان د ځوان کهول سره دغه وعده کړې وه . پۀ دغه ميټنګ کښې هم يو دغه افسر دے چې پۀ زمکني سياست او خلقو ډېره زياته پوهه لري . هغۀ ما ته خپل نوم د نۀ ښودلو پۀ شرط ووئيل چې ميټنګ کښې ورته ما ووئيل چي مشرانو او دوستانو، دا خبره ډېره غلطه ده او پۀ دې بجټ کښې د پاکستان تحريک انصاف هېڅ کمال نشته ځکه چې دا دومره غټ بجټ او نورې صوبائي فائدې صرف د اتلسم ائيني ترميم له برکته دي . زمونږ مسئله هم دغه ده چې پۀ الزام ، دعوه او پراپېګنډه ټول سمدستي يقين کوو او د افسوس خبره دغه ده چې تعليم يافته کسان پۀ هم دغه شان پراپېګنډو کښې راشي . بهرحال پۀ خېبر پښتونخوا او نورو صوبو کښ هم دغه شان انقلابي اقدامات هم د اتلسم ترميم پۀ برکت شروع شوي دي او پۀ دې کښې هم هېڅ شک نشته چې مونږ ته نور هم ډېر سفر پاتې دے لکه هائيډرو پاور جنرېشن سره سره پۀ نورو صوبائي وسيلو باندې پۀ پوره کنټرول راوستو کښې هم لا ډېر کار پاتې دے.

اتلسم ائيني ترميم کښې داسې څۀ دي چې اسټېبلشمنټ او پي ټي ائي ئې دومره شديد مخالفت کوي ؟

پاکستان کښې مختلف الخيال، رنګ او نسل قامونه ژوند کوي، د تقسيم نه پس حالات او د ډېرو خلقو خيالات هم بدل شو. فال اف ډهاکه پۀ دسمبر 1971 کښې کېږي او د پاکستان ټول اوسېدونکي ټراما کښ لاړل او نن هم چې خلک دغه دردناکه ماتې رايادوي نو يو لوے اه کوي . دغه جدائي او شکست ولې زمونږ نصيب شو. پۀ دې اړه حمودالرحمان کمېشن جوړ شو، رپورټ هم مرتب شو خو د اوسني نسل پۀ ذهن او خلۀ کښې دغه يو سوال راوچتېږي، چي مخکښې څۀ وشو؟ دا څۀ چې وشو، دا ولې وشو، نتجه ئې څۀ شوه او صفا خبرې ولې لا تر اوسه مخې ته رانغلې؟ خبرې ډېرې وشوې او لا کېږي خو څوک هم پوهه نۀ دي او هم دا وجه ده چې د ځوان کهول پۀ ذهنونو کښې پۀ سلګونو سوالونه دي خو له بده مرغه دلته جواب کله هم نۀ دے ملاو شوے. د سزا او جزا عمل هم پۀ دې وطن کښې نۀ مخکښې ؤ او ښکاري داسې چې نۀ به بيا وي، بس شپې ورځې دي چې تېرېږي او هر سړے صرف وخت له ديکه ورکوي . د اتلسم ترميم خبره اصل کښې د جناح صېب پۀ ژوند کښې شروع شوې وه کله چې بنګاليانو اردو خپله قومي ژبه اختيار کولو نه انکار وکړو او ډېرې مظاهرې هم وشوې . عجيبه منطق ؤ چې اکثريت به د پينځۀ فيصده خلقو ژبه وائي. پکار هم دغۀ وو چي پۀ بنګال کښې دفتري او قامي ژبه هم د هغوي مورنۍ ژبه ګرځولې شوې وې او هغوي ته اجازت ورکړے شوے وے چې خپله ژبه دې پۀ دفتر کښې کاروي او صفا خبره هم دغه ده چې اردو خو زمونږ د رابطې ژبه ده . هم دغه نکته ده نه چې ترې د مغربي او مشرقي پاکستان اختلافات شروع شول او بيا نورې خبرې هم ډېرې پېدا شوې لکه سول سروسز، سپورټس، پوليس او فوج کښې ئې د بنګاليانو حصه پۀ نشت وه . د بنګله دېش جوړېدو پورې پاکستاني کرکټ ټيم کښ صرف يو لوبغاړي ته حصه ورکړې شوې وه او هغه هم پۀ اخري ورځو کښې ، مطلب چې پي سي بي دغه کار سياسي طور باندې کړے ؤ چې د بنګله دېش خلقو ته د يووالي پېغام لاړ شي.

که چرې د تقسيم نه سمدستي پس صوبو ته پوره اختيار ورکړے شوے ؤ نو داسې به کله هم نۀ کېدل . پۀ دې ضمن کښې پاکستاني پاليسي مېکرز ته دا يوه خبره بيا بيا کول او يادول ډېر زيات ضروري پۀ دې وجه دي چې دوي نه اکثر هم خپل تاريخ هېر وي .

بيا د درې اويا ائين جوړېږي، د دې نه مخکښې د قوم او ټولو ادارو ملاګانې ماتې وې او د هر چا مورال پرېوتے ؤ خو بيا بهټو او اپوزيشن پۀ شريکه يو تاريخي کار وکړو او يو متفقه ائين ئې دې ملک له جوړ کړو. پۀ دې کښې هم شک نشته چې بنګال جوړېدو کښ د بهټو هم ډېر لاس ؤ.

دغه ځاے کښې يو ځل بيا اپوزيشن د صوبائي خودمختارۍ د خبرو نه پۀ دې وجه لاس واخستل چې په دغه ورځو کښې پاکستان ډېر زخمي ؤ او پۀ شريکه دغه فېصله وشوه چې وخت سره سره به خودمختاري د ائين برخه جوړوو. څۀ څلوېښت کاله انتظار نه پس دغه خوب رښتيا شو او د پښتون اولس يو لوے ارمان هم د صوبې د نوم بدلېدو سره پوره شو او دغه شان پۀ وړومبي ځل د صوبائي خودمختارۍ ثمرات صوبو ته راتلل شروع شو. زمونږ پۀ شان وړې صوبې ته نۀ صرف خپل نوم ملاو شو بلکې نور يو شمېر خپل او جائز حقوق هم ورته ملاو شو. څنګه چي ما پۀ اول کښې ليکلي دي چې د خود مختارۍ سفر دلته ختم نۀ دے بلکه هم دغه ځاے نه شروع کېږي . خپله خاوره خپل اختيار. . . د دې نعرې مقصد ډېر واضح دے چې پۀ دې زمکه د ټولو وسيلو اصل مالکان د دې وطن بچي دي او هم دوي به فېصله کوي چې څنګه او پۀ څۀ نرخ به ئې خرڅوو. زما پۀ دې خبره سر خلاص دے چې اقتصادي طور باندې مضبوطې صوبې به فېډرېشن طاقت کښې ساتي، يعنې چې صوبې څومره زياتې مالدارې، خودمختاره او خوشاله وي نو هم دومره به مرکز هم مضبوط او قوي وي .

طاقتور فېډرېشن کله هم لاندې ښارونه کلک نۀ شي نيولے . دوه څيزونو کښې د وخت سره سره نوره هم ښکلا راځي چې پکښې يو د علم خورول او بل د پاور شيئرنګ يعنې اختيار لاندې طبقو ته ورکول دي . دا خبره هم واضحه او ښکاره ده چې بغاوت او جنګ انسان پۀ هغه وخت کښې کوي چې کله ورته خپل جائز حقونه نۀ ورکړے کېږي ۔.

اتلسم ائيني ترميم هم يوه دغه هڅه وه چې ټول سياسي ګوندونه جرګه شي او يوه داسې خبره باندې ودرېږي چې د وطن او د اوسېدونکو پکښې پرامن او سوکاله ژوند وي . پاکستان پيپلز پارټۍ ، اے اېن پي او نورو سياسي جماعتونو تقريبا پنځه دېرش ميټنګونو نه پس يو داسې ډرافټ تيار کړو چې ټولو ته قابل قبول ؤ او خاص کر پۀ دې ډېر زيات زور ورکړے شو چې پۀ دې وطن کښې د مارشل لاء ټولې لارې بندې کړې شي او هم داسې وشوه. پۀ دې لړ کښې د عوامي نېشنل ګوند هلې ځلې، کوششونه او ستړې د ستائنې وړ څۀ چې کۀ د ګوند مرکزي مشر اسفنديار ولي خان نۀ وے نو دا ترميم به هم ممکن نۀ ؤ ځکه چې څنګه د درې اويايم پۀ ائين جوړولو کښې د ولي خان کردار ډېر زيات مهم دے نو هم دغه رنګ دلته د اسفنديار ولي خان کردار ډېر مرکزي دے. د عوامي نېشنل ګوند لۀ خوا افراسياب خټک پۀ دې ټولو هلو ځلو کښې او پراسس کښې ډېر پۀ موثر انداز کښې برخه اخستې وه ۔

پۀ يو شق کښې داسې ليکنه شوې ده چې کۀ چا هم پۀ خپل اختيار کښې مارشل لاء سپورټ کړه هغه افسر (سول وي کۀ ملټري) د ائين د ارټيکل شپږ لاندې به ټرائل کېږي .

او دې سره سره صوبائي خود مختارۍ طرف ته غټه خبره دا شوې وه چې اېن اېف سي اېوارډ لاندې به صوبو ته پوره پوره حصه ورکړې کېږي ۔

پۀ دې ائيني ترميم زمونږ اسټېبلشمنټ کله هم خوشحاله نۀ دے . د دې ائيني ترميم د مخنيوي او يا بېخي د منځه وړلو لپاره مختلفې دسيسې وکارولې شوې او يو ډاکټرائن هم مخې ته راغلو. زورورو غوښتل چې هر څنګه چې وي خو چې دا ترميم رول بېک کړے شي اويو وارې بيا د صوبو خومختاري وتروړلې شي . کۀ څۀ هم دا ترميم د ملک پۀ ګټه دے خو بيا هم پته نۀ لګي چې ولې د ځينې خلقو پۀ سترګو کښې غړېږي او برداشت کولے ئې نۀ شي . واضحه خبره ده چې د عوامي نېشنل پارټۍ د سياسي مبارزې غټه حصه پۀ صوبائي خود مختارۍ اډاڼه ده . دوي قربانۍ هم ورکړې دي، سختې ئې هم ګاللې دي او د خپل زوړ او پوخ سياست لۀ وجې پۀ دې هم پوهه دي چې د دې ملک ګټه او پرمختګ صرف او صرف پۀ دې ترميم کښې پټه ده نو هم دا وجه ده چې اے اېن پي د دې ائيني ترميم پۀ شا کلکه ولاړه ده او هره هغه هڅۀ شنډه کوي کومه چې د دې ترميم خلاف مخې ته راځي . يعنې مونږ دا وئيلے شو چې نن د دې ترميم د بچاو لپاره اے اېن پي بېخي پۀ اوله مورچه ولاړه ده. او هم دا وجه ده کله چې د سياسي قيادت سره يو ناستے وشو او بېن السطور ئې هم دغه کوشش وکړو چې سياسي ډلې پۀ خپله خبره پوه کړې شي. خو سياسي ګوندونه پوهه دي چې دا ترميم د ډېر لوے کړاو او زيار نه پس ترلاسه شوے دے او د دې ملک او قام دواړو لپاره ډېر زيات ګټور او مهم دے نو هم دا وجه ده چې پاخۀ سياسي ګوندونه پۀ دې ترميم کښې هېڅ قسمه رد و بدل ته تيار نۀ دي ۔

سياسي پوهه لرونکي نظر لري چې د اتلسم ترميم حوالې سره اسټېبلشمنټ چا غلط ګائيډ کړے دے او هم دغه وجه ده چې څو ورځې مخکښې پي ټي ائي سېنېټ کښې د ترميم بل هم راوړۀ کوم چې د ناکامۍ سره مخ شو.

پاکستانے سياست په اصل کښې کله هم آزاد نۀ دے پاتې شوے البته يوڅو وختونو کښې څۀ ليډرانو د ازاد پارلېمنټ مبارزه هم کړې وه خو دغه ټولې خبرې اوس د تېرو وختونو قيصې دي ځکه چې د دې وطن فوځي اسټېبلشمنټ د دېرشو کاله نه ډېر ډائېريکټ د اسلام آباد نه حکومت کړے دے. جنرل ايوب خان، يحيٰي خان، جنرل ضياء او داسې جنرل مشرف دور به همېشه د وطن تور تاريخ ليکلے کېږي ځکه چې آئين معطل ؤ او د اولس د ووټونو پۀ ځاے ون مېن شو (يو کس بادشاهي) وه او هم د يو افلاطون اوکله ارسطو پۀ وجه د ملک معيشت منفي شو۔ پاکستانۍ معاشره کښې د ښځو کردار پۀ نيشت برابر دے خو چې کومو ښځينه ليډرانو يوځل دې سياسي مېدان ته رادنګلي دي بيا هغوي خپل نوم د تاريخ پۀ پاڼو کښې تل تر تله پاتې کړے دے. دې کښې شک نشته چې هم پۀ دغه زنانو کښې فاطمه جناح ، بېنظير بهټو او بېګم نسيم ولي خان پۀ اولني قطار کښې ولاړې دي ځکه چې دې ليډرانو پۀ هغه وخت کښې سياست کولو پۀ کوم ټائم کښې چې د وخت جابر او آمران ايوب خان، جنرل ضيا او پرويز مشرف د ملک د فېصلو مالکان وو۔ دغه زنانه او دغه شان بلها نورو د جمهوريت لپاره قربانۍ ورکړې دي او د آمرانو خلاف د نارينه ؤ سره پۀ هر مېدان کښې کلکې ولاړې وې۔ خو د ښځو سياسي کردارونه ټول داسې صفا او ښکاره هم نه دي. پاکستاني سياست کښې د ښځو لپاره لاره اصل کښې مشرف جوړه کړې ده کله چې هغه درې دېرش فيصده لازمي کړه. د دې هر څۀ نه علاوه يوه خبره ډېره واضحه ده چې پاکستاني مېن سټريم سياست کښې د غريبو کورنو د ښځو د پاره هېڅ موقع نشته. دغه يو بل بحث دے چې څنګه پۀ هندوستان، پاکستان او بنګله دېش کښې د مډل او لوئر کلاس د زنانو لپاره پاليسي مېکنګ کښې ځاے نشته۔

خبره ډېره سپينه او واضحه ده چې پاکستان کښې پۀ زور کلي کېږي خو بيا دغه علاقو کښې حالات سازګار نه وي او يو دروغو له نور او بيا نورو له نور د پېدا کولو کوششونه هم کېږي. اوس پۀ دغه سياسي کلو کښې غېر سياسي خلق همېشه ازغي اچوي او هره ورځ څۀ نه څۀ غټې او ورکوټې مسئلې خپلو خوا خوږو ته را پېدا کوي۔ داسې چرې هم نه ده چې يواځې اسامه بن لادن يا نور د القاعده مشران، ګلبدين حکمتيار او يا طالبان پۀ دې وطن کښې د رياست خاص مېلمانه پاتې شوي وي. دغه خلق خو بېخي عاجزان او د عقل نه خلاص وو چې د پردو جنګونو خشاک جوړ شول د چا چې نۀ اوس قبر يا څۀ بله نخښه ژوندۍ شته ۔

په دې ډېر ښکلي وطن کښې عجيبه عجيبه لوبې هم شوې دي. ډيوډ لائن پۀ خپل کتاب کښې ليکي چې ګلبدين حکمتيار چې کله کابل کښې سټوډنټ لائف کښې ليډرؤ نو تقريرونه به ئې کول چې شراب منع دي اوکومو ښځو چې پرده نه کوله نو پۀ مخونو ورله تيزاب دې وا چولے شي خو کله چې د افغان جنګ سوچ پېدا کولو والا چارلي ولسن سره ئې د پېښور پۀ پرل کانټيننټل هوټل کښې ملاقات کولو او د جهاد ګايئډ لائنز ئې ورنه اخستلو نو هم پۀ هغه وخت چارلي ولسن سره پۀ کمره کښې د شرابو بوتل هم پۀ مېز پروت ؤ او ورسره خپله ګرل فرېنډ هم ناسته وه بس معلومه نه ده چې دغه غازي نه هغه خپل تقريرونه ولې هېر وو۔ دغه شان يوه قصه د جنرل ضياء متعلق هم کېږي. د جنرل يحيٰي خان پۀ وخت کښې خو پاکستانۍ جنرل راني او جنرل ترانه ډېر مشهورکردارونه وو۔ خو دا اقليم اختر راني څوک وه او دا ولې د ملک پۀ يو څو طاقتورو ښځو کښې شمېرلې شي او دومره لوئې مقام ورته ولې ترلاسه ؤ۔ سړے پۀ دې خبره هم حېران پاتې شي چې نۀ خو دا محترمه سياستدانه وه او نۀ ئې د يوې سياسي کورنۍ سره څۀ تړون ؤ، نۀ خو ئې د کوم نواب يا جاګيردارې کورنۍ سره تعلق ؤ او د قلم قبيلې او يا بيا د فلمي نړۍ سره خو بيا هم دې ته پۀ سياسي کچ ډېر لوے مقام ترلاسه ؤ۔ د دې کردار خپل نوم خو اقليم اختر راني ؤ خو د ملک پۀ ګوټ ګوټ کښې د ‘ جنرل راني‘ پۀ نومل سره مشهوره وه۔ دا هم وئيلے کېږي چې د نولس سوه يو اويا د جنګ نه پس دا محترمه پۀ ګجرات کښې پۀ خپل کور کښې نظر بنده کړې شوې وه، پۀ کور ئې د پوليس پهره وه او د ټيلي فون تار ئې هم کټ کړے شوے ؤ۔ صرف دا نه بلکې دا هم خبردارے ورکړے شوے ؤ چې داسې بيا کورلو نه دې ډډه وکړي کوم چې د ملک د سالميت او خودمختارۍ خلاف وي۔

خو نن ورځو کښې ډېر اهم خبر هم د امريکائي زنانه سينتهيا حوالې سره دے۔

د 25 جون د ‘نيا دور، خبر خو بالکل د شرم ډک دے چې دې محترمې ووئيل چې زۀ خو د پاکستاني فوج شعبه تعلقات عامه (آئي اېس پي آر) لپاره کار کومه، بس چې خبره تر دې را ورسېدله نو باقي به خپل بندوبست کوو۔ امريکائي زنانه سينتهيا ډي رېچي نن سبا د پاکستان مېن سټریم ميډيا او سوشل ميډيا کښې ډېر اهم ترين خبر دے. ډي رېچي د پيپلزپارټۍ پۀ مشرانو د جنسي حملوالزام لګولے دے خو د دې نه وړاندې هم دې ښځې پۀ خداے بخښلې بېنظير بهټو باندې هم د ټوېټر له لارې ډېر پليت الزامونه لګولي وو. د دغو خبرو ځوابونه چې ورته کله د پارټۍ د ورکرانو او مشرانو له خوا هم پۀ سوشل ميډيا ملاؤ شو نو بيا ئې سنګين د جنسي حملوخبرې پۀ پاکستاني ميډيا او د خپل سوشل ميډيا د اکاؤنټ نه خپرول شروع کړل۔ محترمې ووئيل چې پخواني وزيراعظم يوسف رضا ګېلاني ، مشير داخله رحمان ملک او مخدوم صاحب ما سره پۀ زور زنا کړې ده او داسې الزام ئې هم لګولے دے چې رحمان ملک اول پۀ ما شراب وڅښکل او بيا ئې راسره زنا وکړه خو تر نن ورځ پورې دا ټول الزامات دغې بهر ملکي زنانه رښتيا ثابت نه کړے شول۔

سنتهيا ډي رېچي او دغه شان نور ډېر سوشل ميډيا اکاؤنټس نه هره ورځ د دې ملک خپلو اتلانو پسې ډرامې کېږي او داسې ښکاري چې پۀ يوه ډېره ژوره منصوبه باندې کار روان وي۔ د پاکستان سياست او سياستدانانو باندې خټې اچول او دغه اسلام آباد کښې پۀ شاهراه دستور باندې جوړ بلډنګونه بدنامول او د پاکستان آئین پۀ لاره کښې خنډان پېداکول د داسې پروپېګنډو پۀ شا باندې هم داسې عزائم دي ۔

پۀ شاهراه دستور پاکستاني اعلي عدالت، سېنېټ او د قامي اسمبلۍ ودانۍ د دې وطن د اتفاق او عوامي طاقت غټې نخښې دي خو دلته يو پټ طاقت چا چې همېشه د وطن آئين د بوټانو لاندې کړے دے او بيا هم ښۀ پۀ کلکو سترګو د وطن د تعمير او ترقۍ واکداران ځان ته وائي په اصل کښې د وطن د منفي 4.0 د ترقۍ شرح ذمه دار هم دغه خلق دي خو پته نه لګي چې دوي پۀ کومه خوش فهمۍ کښې دي۔

سينتهيا ډي رېچي نه مخکښي پاکستاني زنانو په سياسي مشرانو باندې هم ډېر پليت الزامونه لګېدلي وو کوم چې د ضيا شاهد پۀ شان بې ضمیره صحافيانو چهاپ کړي هم دي. دغه الزاماتو کښې د بيګم نسيم او بېنظيربي بي نومونه تر ډېر وخته پورې وو. د دوي غټه ګناه دا وه چې دوي او ورسره نورو ملګرو د پاکستان د آئين بالادستي غوښته او هر اداره او فرد ئې د آئين ماتحت جوړول غوښتل خو دغه خبرې د هغه وخت ډکټېټرز ته او نۀ د اوس وخت اسټېبلشمنټ ته خوښې دي۔

اوسنۍ قيصه هم څۀ ډيره عجيبه بالکل نۀ ده. سينتهيا يوه امريکائي بلاګر، فلم مېکر او سوشل مېډيا ايکټوېسټ ده څوک چې د تېرو لس کلونو راهسې پاکستان کښې اوسېږي ۔ پۀ خداے بخښلې بېنظير بهټو، رضا ګېلاني او رحمان ملک الزاماتو نه پس پېپلز پارټۍ د دې زنانه خلاف عدالت او اېف آئي اے ته د کارروائۍ درخواست هم کړے دے۔ دې امريکنۍ بلاګرې محترمې دا هم وئيلي دي چې زۀ د پاکستاني فوځ د شعبه تعلقات عامه (آئي اېس پي آر) او د خېبر پښتونخوا حکومت لپاره کار کومه خو يو څو ورځې وروستو بيا د فوځ ترجمان ووئيل چې دې امريکائي زنانه سره د فوځ داسې هېڅ قسمه معاهده نشته. البته فوج پۀ يوې ډاکومنټري، کومه چې پۀ سافټ امېج آف پاکستان جوړېده، کښې د دې مرسته اخستې۔ ولې د خېبر پښتونخوا حکومت د طرف نه هېڅ قسم بيان جاري نه شو ۔ سينتهيا چې يوه بهرنۍ ښځه ده، دا خبره ئې هم کړې ده چې دوه کاله مخکښې ما ته دا ټاسک هم حواله شوے ؤ چې د پي پي پي او پي ټي اېم د معاملاتو تحقيقات وکړي۔ بهرحال دغه ټول يو داسې ګند دے چې ورپسې لږ تحقيقات څوک هم کوي نو يو نوے ګند به را وباسي ۔ خو رياست لۀ ضرور پکار دي چې د دې خبرو او الزاماتو پوره تحقيقات دې وکړي ځکه چې سبا بل او بله ورځ بل څوک هم داسې الزامونه لګولے شي۔

پۀ دې خبرو کښې کۀ د ملک غټ نه غټ افسرکه چرته هغه فوځي وي او کۀ سول ، هغه له سزا پکار ده او د دې خبرو معلومات کول هم پکار دي چې د دې ښځې وېزه خو پۀ مارچ کښې ختمه شوې ده. دا څنګه او د چا پۀ اجازت د اسلام آباد غوندې ښار کښې بغېر د څۀ ډاکومنټ ګرځي ۔ هم دغه خو اسامه کول چې پته نه لګي چې چا ورته دغه د اېبټ آباد سټے وېزه ورکړې وه خو بدنام پکښې “مني ” شوه او اوس يو وارې بيا پۀ فوج باندې ګوتې اوچتې شوي چې دا زنانه هم د دغې غټې او طاقتورې ادارې پۀ مرسته دلته ژوند کوي. دغه يو بيان د ډي جي آئي اېس پي آر له اړخه پوره نه دے ځکه چې د پنځم جنرېشن وار دور دے او دلته خبرې کله هم پټې نۀ پاتې کېږي۔

دغه الزامونه کۀ يو طرف ته د يو څو خلقو د بدنامۍ قيصې دي نو بل اړخ ته د ملک يوتاريخي سياسي جماعت هم دېوال سره لګول دي. يوه خبره ډېره صفا ده چې د پي پي پي او اے اېن پي ختمولو لپاره خو د وخت آمرانو ډېرکوششونه کړي دي خو يو کس هم دې منصوبه کښې کاميابه شوے نۀ دے ۔

خو د داسې پليت الزامونو غټ اثر پۀ نوي نسل دا رنګه وشي چې هغوي سياست ته ګنده وائي او سياستدانانو ته مالي او اخلاقي کرپټ خلک وئېل شروع کړي. مګر دې ځوانانو ته هېڅ علم نه وي چې دا هر څۀ د يوې خاص پروپېګنډې لاندې کېږي او بيا هم دغه کسان د عمران خان پۀ شان تش د خبرو خلق وزير اعظم کړي او اصل کښې ورباندې بيا ملکي، علاقائي او بين الاقوامي کارونه مخکښي بوځي ۔

سينتهيا ډي رېچي او دغه شان پۀ درځنو بهرنۍ زنانه راغلې دي او هم دغه شان طريقو سره ئې ځان له ګټې کړې دي. د داسې سوشل مېډيا ايکټوسټو نه علاوه صحافيانو هم پۀ دغه ناز او اداګانو د طاقتورو خلکو او ادارو نه خبرونه راويستي دي ۔ خو داسې د قلم او فلم نه علاوه هم پۀ دې وطن کښې ټوپک خوښو مېلمنو لۀ هم پۀ دې رياست کښې ځاے ورکړے شوے دے۔

پۀ دغه کرکجنو کښې پۀ اول نمبر د القاعده عربي مشر اسامه بن لادن ؤ او د هغۀ نه مخکښي د هغه استاد عبدالله عزام ؤ کوم چې د پېښور پۀ يونيورسټي ټاؤن کښې بيا نامعلومو کسانو د بم له لارې ټارګټ کړو۔ خبره دغه نه ده چې څوک چرته کښې مړ شو. دغه شان خلق زمونږ نوي کهول د ځان لپاره هيروګان جوړ کړل او دا خبره زمونږ د ډېرو خلقو پۀ لاشعور کښې پرته ده چې دغه کسان پۀ حقه لاره وو. د وطن د اوسېدونکيو پۀ ذهنونو کښې دا خبره د جومات د منبر، ميډيائي او نصابي لارې مسلسل پرچار پۀ وجه داسې وشو۔ او هم د دغه مسلسل دروغو پۀ وجه پۀ دې پېښور کښې او د پاکستان پۀ نورو علاقو کښې دغه القاعده او عربيانو له خپلې تور سرې پۀ نکاح کښې هم ورکړې البته ولي خان به هم دغه وئېل چې دا عربيان فلسطين ولې نه آزادوي چې دلته راغلي دي ۔

او هم پۀ دغه وجه د پاکستان وزيراعظم عمران خان بله ورځ پۀ قومي اسمبلۍ کښې ووئېل چې د امريکائي فوځ اسامه بيا پۀ اېبټ آباد کښې شهيد کړو او دغه سوچ ته لږ فکر وکړئ چې يو خوا د پاکستان پۀ زرګونو خلق پۀ دغه جنګ کښې مړۀ شول او ورسره پۀ سوونو فوځيان او د سېکورټي د نورو ادارو ځوانان ووژلي شو نو بايد چې د دې خبرې سپيناوے وشي چې څوک شهيد ؤ او څوک نه؟

عجيبه خبره خو د ګوډاګي سپيکر ده چې دغه لفظ ئې د فاشسټ ذهنيت وزيراعظم د وېرې د کارروائۍ نه لرې هم نه کړے شو۔ عجيبه قسم پاليسيانو کښې راګير يو. يو خوا به دا وئېل کېدل چې پوره ملک د دهشت ګردو خلاف د نړۍ سره ملګرے دے او بلخوا د کاکول د فوجي ټرېننګ سره په ترخ کښې اسامه بن لادن راووتو۔ پۀ ټوله دنيا کښې په شرمونو اوشرمېدلو خو خېر زمونږ پۀ شرم څۀ ۔ شرم خو د غر د سر ګيا ده، بيا به را وټوکيږي۔ د جنګي اقتصاد عالمي لوبې دي خو دا پښتانه پته نه لګي چې کله به پوهېږي۔ د اسامه واقعه چې وشوه نو ما يوې بېن الاقوامي ادارې سره پۀ اېبټ آباد کښې د اسامه د کور مخي ته درې ورځې کورېج کړے دے۔ دے چې پۀ کومه علاقه کښې اوسېدو د هغه ځاے نوم بلال ټاؤن دے. او د دۀ پۀ کور څلور د بجلۍ او دغه شان درې د ګېس ميټرې هم لګېدلې وې ۔

د علاقې د يو مشر نه مې تپوس وکړو چې د اسامه د کور د دروازې مخې ته ئې کور ؤ چې دلته تا څوک ليدلي دي،هغه ووئيل چې دا څوک ډېر مالدارخاندان دے ځکه چې دوي بهرنه را وځي البته کله کله يو درې ماشومان را وځي خو هېچا سره خبرې نۀ کوي او نوکران ورته ولاړ وي او دغه پاکستاني نوکران ئې پۀ جيپ کښې سبزي، غوښې او نورې داسې سودا ګانې راوړي ۔ بهرحال دغه حالات دي کۀ سينتهيا وي او کۀ اسامه دے خو دواړه قسمه خلقو پاکستان ډېر بدنام کړے دے او چې بهر دنيا کښې چرته هم لاړ شئ نو پۀ کلک انداز د پاکستان پۀ حق کښې خبره کول ډېر ګران کار وي- خو دا داسې هم نه ده چې ګينې د بهر ملکونو زنانه راغلې دي او داسې کارونه ئې کړي دي بلکې دلته خو پخوانۍ د اطلاعاتو مشیرې فردوس عاشق اعوان څه موده وړاندې په یوې بلې سیاستیدانې په روانه ټاک شو کښې تور ولګولو چې زه ستا غوندې نۀ یم چې د خلقو د بېډ رومونو نه به د خپل سیاست اغاز کوم. بس نوره اندازه تاسو په خپله لګولې شي.