Category: عامر عالم

د پاکستان د انتخابي تاريخ د متنازعه ترین الېکشن پۀ نتيجه کښې پۀ وجود کښې راتلونکي د پاکستان تحريک انصاف وفاقي حکومت پۀ ملک کښې د سلو (100) ورځو دننه دننه د بدلون راوستو اعلان کړے ؤ او دغه اعلان د پاکستان تحريک انصاف مشر او پۀ موجوده وخت کښې د ملک وزير اعظم عمران خان د خپلې پارټۍ د سل ورځني پلان سره تړلے ؤ. حکومت دا دعويٰ لري چې هغوي خپل سل ورځنے پلان عملي کړے دے او حکومت تر دې دمه کاميابۍ سره خپل سفر جاري ساتلے دے. خپل دې مضمون کښې به مونږ نۀ صرف د حکومت د سلو ورځو د کارکردګۍ جاج اخلو بلکې د حکومت لۀ خوا اعلان شوي پلان کښې به د څو وعدو جاج هم اخلو د کوم نه چې عام اولس بې خبره دے.

د تحريک انصاف حکومت خپل وړمبے سفر سر ته رسولے دے او پۀ ملک کښې ئې د حکمرانۍ سل ورځې پوره کړې دي. د پاکستان تحريک انصاف حکومت خو هسې ددغه سلو ورځو لپاره اولس سره ډېرې لویې لویې وعدې کړې وې خو سياسي، معاشي، اقتصادي، داخلي سلامتيا، خارجه تعلقاتو سره سره پۀ نورو يو شمېر اړخونو کښې د اولس پۀ خوبونو د دهوکه کولو کوشش شوے دے. نن پۀ ملک کښې ګېس، بجلي عن تر دې چې روټۍ اخستل هم د عام سړي د وس نه بهر شوي دي او چې بيا هم د پاکستان تحريک انصاف د قيادت نه پۀ دې حواله پوښتنه وکړې شي نو هغوي دغه موقف لري چې دا مسئلې هغوي ته د تېر حکومت نه پاتې دي نو هغوي ځکه ناکام دي او عام اولس له ريليف نۀ شي ورکولے. د پاکستان تحريک انصاف حکومت چې عام اولس سره کومې وعدې کړې وې، هغې کښې “دو نهین اېک پاکستان”، د تاریخ مختصر ترین کابینې ساتل، شاهي او افسر شاهي خرچې کمول، د وزیرانو او ‘صالحې نېک عملې’ کابینې د پاره د سادګۍ د خپلولو لوظ، د ملک نه لوټ شوے دولت واپس راوړل، پينځو کالو کښې د پنځوس لکهه کورونو جوړولو لپاره فرېم ورک تيارول، کليوالو علاقو له بجلي ورکول، د وزير اعظم لۀ خوامیاشت کښې دوه ځله وقفه سوالات کښې د قامي اسمبلۍ ممبرانو له جوابونه ورکول، د وړو صنعتونو حوصله افزائي کول، د لس ټيکنيکل يونيورسټیو قيام پۀ عمل کښې راوستل، د فاټا پۀ مکمله توګه انضمام، د بلوچستان مرور سياسي قيادت مېز ته راوستل او د بلوچستان د محرومیو ازاله کول، ګاونډي ملکونو سره د ښۀ تعلقاتو لپاره پاليسي وضع کول، د وړو ډېمونو جوړول، د احتساب ادارې مضبوطول، پينځو کالو کښې د لس اربه اونو د لګولو منصوبه بندي کول، د شلو نوو سياحتي مرکزونو جوړول، پينځو کالو کښې د يو کروړ نوکرو ورکولو لپاره نېټ ورک جوړول، د صحت انصاف کارډ اجراء، جنوبي پنجاب نه صوبه جوړول، کراچۍ کښې ماس ټرانزټ سروس شروع کول، قېديانو زنانو له سهولتونه ورکول، د وسل بلور قانون نافذول، د مدرسو رجسټرېشن کول، پۀ ملکي کچه د خواندګۍ پروګرام شروع کول، د کشمير د مسئلې حل راویستل، د ماشومانو جينکو لپاره تعليمي وظيفې شروع کول، د ګرلز سکولز اپ ګرېډېشن، د زنانو لپاره د ځان له پوليس سټېشنو قيام پۀ عمل کښې راوستل او داسې د نورو يو شمېر منصوبو پۀ حواله عام اولس ته غېږه کښې د ګوړې چکۍ ایښودې شوې وې.

اوس دې زما د تجزیې نه مخکښې هر سړې پۀ زړۀ لاس کېږدي او ودې وائي چې ښاغلي عمران خان پۀ خپلو دغه وعدو کښې څومره وعدې سر ته رسولې دي کۀ د رواياتو ترمخه ئې پۀ دې وعدو هم يوټرن اخستے دے، ولې چې د هغۀ پۀ نزد خو ليډر د يوټرنو نه بغېر نۀ شي جوړېدے. کۀ د ملک د امن وامان صورت حال ته ګورو او کۀ اقتصادي حالت ته نوتاسو به پۀ هر محاذ کپتان پاتې راغلے وینئ ــــ مثال ئې د هغه فېل ماشوم دے چې بيا امپرومنټ ته هم اپلائي نۀ شي کولې.

د “دو نهین اېک پاکستان” ټولو نه وړومبے کېس د خاور مانیکا پۀ سر د پاکپتن د ډي پي او د معطلۍ د پاره د وزیر اعظم زړۀ ساتلو له د پنجاب د وزیر اعليٰ کارنامه وه چې ډېره زر مخې ته راغله. ورپسې د اعظم سواتي لۀ خوا پۀ یوه بې وسه کورنۍ د تشدد کولو او بیا دغه غریبانانو باندې تهاڼه کښې د شوي ټارچر قیصه مخې ته راتلو سره د “دو نهین اېک پاکستان” وعده سر وخوري. اوس خو دغه لړ کښې د جے اٰئي ټي راغلې فېصلې دغه خبره نوره هم سپینه کړه. دا یوه واقعه نۀ ده، د عمران خان د درېمې ښځې د یوې لور پولیس سره شوې واقعې نه علاوه داسې څو رپورټونه دې سلو ورځو کښې د اخبارونو سرخیانې شوې دي چې د “دو نهین اېک پاکستان” د وعدې جنازه پکښې وتلې ښکاري.

د کومې وړې صالحې نېک عملې کابینې اعلان چې شوے ؤ، هغه کابینه کښې تر اوسه پورې درې ځله اېکسټنشن شوے او د اتۀ نوو وزارتونو قلمدانونه سپارلے شوي دي. خبر دا دے چې یو څلورم اېکسټنشن به هم کېږي اود پروېز الٰهي زوي ته به هم ډېر زر یو وزارت تفویض کړے شي!!! پۀ مختلفو محکمو کښې د مشیرانو لښکر داسې ټومبلے شوے دے او د صلاحیت او صالحیت خیال دومره ساتلے شوے دے چې د زلفي بخاري غوندې غبرګه نېشنلټي لرونکي او نېب کښې د مالي بدعنوانۍ پۀ کېس کښې ککړ او سپریم کورټ نه سزا یافته خلق هم مشیران ټاکلے شوي دي.

شاهي او افسر شاهي خرچې کمول داسې چې د ملک صدر پۀ ګلګت کښې د سرکاري خزانې پنځوس لکهه روپۍ صرف د ناشتې نه ځار کړې وې. د څلور مېښو خرڅ او د شل کروړه روپیو ګاډي پۀ نیمه بیعه د خرڅ نه علاوه پۀ رېکارډ څۀ شته؟ کۀ صرف دا وکتلے شي چې د سلو ورځو د کارکردګۍ د پاره پۀ دې نهه ویشتم نومبر اخبارونو کښې کوم اشتهارات چاپ شوي وو او پۀ وړومبۍ پاڼه د لکهونو روپیو د قیمت ځاے خالي پرېښودے شوے ؤ، نو دې نه به پته ولګي چې د ملک وسائل څومره بې دردۍ سره پۀ څومره سټوپډ اپروچ خرچ کولې شي.

د ملک د امنيت حال دا چې د اسلام اباد پۀ محفوظ ترینه پوش علاقه کښې د ‘دفاع پاکستان کونسل’ مشر او د جامعه حقاني مهتمم مولانا سمیع الحق پۀ چړو وهلے کېږي او پته ئې نۀ لګي.

يو حاضر سروس اېس پي د اسلام اباد نه بې درکه کېږي او د هغۀ تشدد زده لاش بيا پۀ افغانستان کښې موندلے کېږي!!! د اېس پي طاهر داوړ د ورکېدو خبر چې پۀ میډیا چلېږي نو د وزیر اعظم ترجمان افتخار دراني وائي چې طاهر داوړ خپل کور کښې د خپلو بچو سره دے، وزیر مملکت شهریار اپریدے وائي چې دا یوه حساسه مسئله ده او زۀ پرې خبره نۀ شم کولے، او د ملک د وزارت داخله قلمدان چې د ملک وزير اعظم لکه د محصول د چونګي ځان سره نیولے دے، هغه پرې هم صُمٌ بکمٌ!!!

پۀ ضلع اورکزئ کښې بمي چاودنه کېږي، پۀ کراچۍ کښې د چین غوندې دوست ملک پۀ قونصلګرۍ برید کېږي، د یو بل اوچت رېنک د بېوروکرېټ د اغواء خبر راځي او د امن یقیني کولو د پاره د سلو ورځو پلان بیا هم کامیاب دے؟

د سل ورځني پلان مطابق د ملک د لوټ شوي دولت د واپسۍ حال دا دے چې پلټنې وشوې نو دولت د بل چا نۀ بلکې د کپتان د خور پۀ نوم دوبۍ کښې راوځي او بيا وزير اطلاعات پۀ دغه بې نومي جائيداد موقف دا خپلوي چې دا دومره لويه مسئله نۀ ده، هغې خپل جائيداد ريګولرائز کړو. پۀ بهرنو ملکونو کښې د پاکستان د دولت د قیصې لنډ انجام دغه دے چې پۀ سوېس بېنکونو کښې کومه د دوه سوه کروړه ډالرو خبره کېدله، وزیر خزانه د هغې د واپسۍ متعلق د یو صحافي د سوال پۀ جواب کښې ووې، “دغه دروغ وو.” د سلو ورځو پۀ show کښې وزیر اعظم سره بې د دې نه هېڅ نشته چې مونږ د دومره ملکونو سره دې لړ کښې معاهدې وکړې.

د عمران خان او د هغۀ د کابینې د سقراطانو خپل منطق او د هغۀ د اعداد و شمار د ماهرینو د ‘ضربِ چلیپائي’ خپل نظر، خو کۀ پۀ یو کور لږې نه لږه خرچه د حساب ساده ساتلو د پاره لس لکهه وکړو نو د پنځوس لکهه کورونو د پاره به هندسه څۀ مخې ته راشي؟

ټول کورونه 5,000,0000

یو کور باندې خرچه 1,000,000

پۀ پنځوس لکهه کورونو خرچه 5,000,000,000,000

حال دا دے چې وزیر اعظم او د هغۀ د کابینې ټولې صالحه نېک عمله غړي چغې وهي چې مونږ سره د تنخواګانو ورکولو د پاره پېسې نشته!!!

کۀ کور د لسو لکهو هم شي نو یو دیاړیمار، یو چابړي واله، یو مزدور به د دغه کور اخستلو توان ولري؟ ځکه چې د ملک د وسائلو نه خو دغه د پنځوس کهربه روپیو لګول ناممکن دي، ښکاره خبره ده چې دې د پاره به د انوسټرانو نه مرسته اخستې کېږي ـــ اٰیا انوسټران به د ګټې سوچ نۀ کوي؟

وزیر اعظم میاشت کښې دوه ځله اسمبلۍ ته د ممبرانو د سوالونو د جوابونو ورکولو د پاره د راتلو وعده کړې وه خو د هغې ورځ نه پس ئې اسمبلۍ ته مخ قدرې ښکاره کړے نۀ دے چې کله نه ئې د سعودي عرب نه واپس تشريف راوړے دے. جمهوري رویه خو دا وه چې وزیر اعظم پارلېمنټ پۀ اعتماد کښې اخستے ؤ، ولې پۀ دغه بهرنو دورو هغه پارلېمنټ پۀ اعتماد کښې اخستل نۀ غواړي او ځکه ئې دوه میاشتو پورې اسمبلۍ یا پارلېمنټ ته د راتلو نه معذرت کړے دے. پۀ دغه معاهدو کۀ هغه پارلېمنټ اعتماد کښې اخلي نو بيا خو به دا هم وائي چې پاکستان ئې څو څو ځايه ګاڼه کړے دے، چا چا سره ئې ګاڼه کړے دے او پۀ څۀ څۀ ئې ګاڼه کړے دے.

د سلو ورځو پۀ پلان کښې د لس ټیکنیکل یونیورسټیو لاپه هم وه. پۀ دې خبره نۀ کوو. داسې خېبر پښتونخوا کښې هم ګورنر هاوس نه لائبرېري او د وزیر اعليٰ کور نه سېکرټرېټ جوړول وو. اوس هم د ګورنر هاوسز د اولس د پاره د پرانستو خبرې کېدې او کۀ اخبار کښې ئې ووینئ نو تصویرونه هم د دې راځي. سوال دا دے چې د کوم مقصد د پاره دا هر څۀ کېدل؟ ایا هغه مقصد پوره شو؟ تر دې دمه خو لا د دغه یونیورسټیو د جوړولو پۀ باره کښې د میټنګ خبره هم قدرې نۀ ده شوې.

پۀ ملک کښې د امن و امان د صورت حال حقیقي معنو کښې ښۀ کولو او د اقتصادي پرمختګ لارې پرانستلو د پاره صوبه خېبر پښتونخوا سره د قبائیلي سیمو انضمام یوه لویه ګټه وه. هر څو کۀ د صوبو، مرکز او سېنټ نه دغه انضمام بل پاس کړے شوے دے، اوس هم عملاً پۀ مېدان نۀ څۀ ښکاري او نۀ څۀ توقع کېدې شي. توقع ځکه نۀ شي کېدے چې نوي حکومت کله د صوبې د پاره انټرم بجټ پېش کولو نو دغه نوو ضلعو د پاره ئې پکښې یوه ادېله هم نۀ وه ایښې. عوامي نېشنل پارټۍ دغه بجټ هم پۀ دغه جواز مسترد کړے ؤ. پېښور هائي کورټ چې د اېف سي اٰر پۀ یو نوي شکل کښې دغه علاقو باندې د نافظ کولو د پاره کوم ‘انټرم ګورننس اېکټ’ معطل کړے ؤ، دې نوي حکومت د هائیکورټ هغه فېصله هم پۀ سپريم کورټ کښې چېلنج کړې ده او دې نه ثابتېږي چې د سلو پلان کښې یو منصوبه هم د زمکني حقائقو پۀ اساس نۀ ده.

د بلوچستان ګیلې ورځ پۀ ورځ لا پۀ زیاتېدو دي. حکومت د ففتهـ جنرېشن وار پۀ تهیوري دغه ګیلې بلېک مېل کولې نۀ شي. د حکومت ترجیحات نور څۀ دي؟ د ملک اېګزکتیو یعني وزیر اعظم پۀ قرضونو او چندو پسې لالهانده ګرځي، چیف جسټس د ډېمونو جوړولو د پاره چندې کوي، د اٰرمي هېډ کوارټر د ففتهـ جنرېشن وار تبلیغ کوي ـــ سیاسي اوازونو ته احتساب کمېشن پۀ خولۀ لاس ایښي دي. میډیا د سنسرشپ د بدترین دور نه تېرېږي. دې حالاتو کښې پۀ کراچۍ کښې د چین پۀ قونصلګرۍ د حملې قبولو سره مبینه بي اېل اے وښودل چې اوس به د بلوچستان نه بهر هم کاروایانې کېږي. پۀ راروانو څو ورځو کښې د بلوچستان نېشنل پارټۍ د اختر مېنګل لۀ خوا حکومت یو بل تناو سره مخ کېدونکے دے. یاده دې وي چې بلوچستان کښې اختر مېنګل د حکومت سره د اتحاد د پاره ‘شپږ نکات’ کښې د جبراً بې درکه شوو پینځۀ زره یو سل او درې ویشت (5,123) کسانو د معلوماتو نکته هم ایښې وه او د سلو ورځو د پلان سر ته رسېدو نه څو ورځې وړاندې اختر مېنګل خپل تحفظات څرګندولو کښې وئیلي وو چې د هغۀ د مسنګ پرنسز پۀ شمول یوې مطالبې باندې هم سنجیدګۍ سره غور نۀ دے شوے. د دې مطلب دا وځي چې د بلوچستان د سیاسي مشرانو د اعتماد ګټلو یوه بله موقع هم لۀ لاسه لاړه.

د ‘جنوبي پنجاب’ یا ‘سرائیکستان’ د پاره چې پۀ یوه ورځ کوم د مرغیو سېل تحریک انصاف ته راغلے ؤ، ایا تر نن ورځې چا دغه لړ کښې کومه یادګیرنه، کوم میټنګ یا کوم تجویز لیدلے دے؟ کراچۍ کښې د ماس ټرانزټ د پاره شوے لوظ هم هېر واخلئ. هسې هم پېښور کښې د بي اٰر ټي انجام ته چې وګوري نو د سندهـ خلق به خپله د ماس ټرانزټ منصوبې نه تېښته وکړي. د مدرسو د رجسټرېشن وعده د مولانا فضل الرحمان پۀ لاس کښې ده او د عمران خان او د هغۀ د تحریک انصاف کومه بچګانه او غېر جمهوري رویه چې مولانا صاحب هر وخت غندي، دې حالاتو کښې ګمان نشته چې روانو پینځۀ کالو کښې هم حکومت دې لړ کښې څۀ قدم پورته کړے شي.

د ‘یو ټرن’ فنامینه د یوې فلسفې پۀ حېث د متعارف کولو پۀ غېر سنجیده اقدام هم فخر کوونکي عمران خان او د هغۀ د ډلې تحریک انصاف د سلو ورځو پلان او وعدو باندې خبره کول به د وخت زیان وي. د سلو ورځو د پلان پوسټ مارټم کښې زمونږ وړاندې د حاجي کېمپ نه حیات اباد پورې اوږد د یوټرنو لسټ پروت دے. هغه ورځ لرې نۀ ده چې پۀ دې ملک عمران خان مسلط کوونکي هم د عمران خان نه وېزاره شي. تر دې هغوي د پاره هر څۀ ټیک روان دي.

لفظ احتساب داسې خوږ دے لکه شات، خو د هغه چا د پاره څوک چې خپله خاوره مخ پۀ ترقۍ ليدل غواړي او دا ګڼي چې پۀ ما کوم خلق مسلط دي؛ د دغه خلقو د بې ايمانۍ، ټګۍ، بد انتظامۍ او خرابې منصوبه بندۍ لۀ وجې زما خاوره هره ورځ پۀ شا راځي. پکار خو دا وو چې مونږ مخ پۀ ترقۍ تلي وے خو بيا هم مونږ ورځ پۀ ښکته يو. زما خپل خیال دا دې چې پۀ خصوصي توګه زمونږ د نن دور د ځوانانو او څۀ حد پورې زمونږ د مشرانو هم دا خيال دې کۀ پۀ مونږ ايماندار خلق حاکمان شي نو مونږ تر ډېره حده ترقي کولې شو او زما پۀ خيال دا سوچ ئې تر ډېره حده ټيک هم دے ځکه چې مونږ پۀ کومه خاوره ژوند کوو پۀ هغې وسائل دومره دي چې د دنيا د طاقتورو قوتونو هم نۀ هضمېږي او هم دا وجه ده چې د کله نه پاکستان جوړ شوے دے نو دنيا دلته پۀ څۀ نه څۀ شکل کښې څۀ نه څۀ ډرامه کوي او خپل غرضونه پوره کوي.

خو دلته سوال دا دے چې ايا پاکستان کښې اوسه پورې واقعي خلق د احتساب پۀ معنيٰ پوهېږي هم کۀ هسې ئې دا سندره غوږ کښې ټومبلې شوې ده چې د کرپټ بې ايمانه خلقو سره احتساب پکار دے؟ زما خو خپل نظر دا دے چې پاکستان او بيا پۀ تېره تېره د خېبر پښتونخوا خلق کله هډو د احتساب پۀ معنٰي پوهېږي نۀ او د هغې وجه دغه ده چې د دې خلقو خو د احتساب دا نعره خوښه ده خو پۀ دې نۀ پوهېږي چې احتساب به کوي څوک؟ احتساب به کېږي څنګه؟ احتساب پکار د چا دے؟ اصل کښې احتساب پۀ پاکستان کښې د خپلې معنې او نتیجې سره ‘سیاسي بلېک مېلنګ’ دے چې د سیاسي خلقو پېزواني ساتلو د پاره د یو اوزار پۀ توګه استعمالېږي. زۀ خو باور سره وایم چې د احتساب تور څومره د پښتنو مشران پۀ مخ د پورې کولو کوشش شوے دے، دومره به د يو قوم مشران هم دغه تورونو سره مخ شوي نۀ وي. د پاکستان د جوړېدو نه مخکښې چې پښتنو مشرانو سره کومې ډرامې کېدې، دا عمل تر نن ورځې روان دے خو يو پښتون قوم دے چې د احتساب د لفظ، معنې او نتیجې شعور ئې تر لاسه نۀ کړو. دا کومو خلقو باندې چې الزامونه ولګولے شي او بيا پرې څۀ ثابت نۀ شي، دا الزامونه کوم خلق او قوتونه لګوي؟ یقیناً چې هغه ریاستي غېر پارلېماني قوتونه پۀ دغه نامه خپله اټۍ چلوي چې خپله ‘ائیني طور ناقابلِ احتساب’ دي ـــ

د خېبر پښتونخوا پۀ خاوره جوړ احتساب کمېشن چې کال دوه زره څوارلسم کښې د پاکستان د ټولو نه ‘پاک، شفاف، صاف او د تحریک انصاف سړي’ جوړ کړے ؤ، د هغې پۀ نن وخت کښې پوزيشن څۀ دے او تر اوسه ئې څومره کرپټ خلق نيولي دي، څومره بُوده ئې ترې کړې ده او څومره سزاګانې ئې خلقو ته ورکړې دي؟ بيا به مونږ پۀ دغه سوالونو هم پوهه شو چې پښتانۀ د احتساب پۀ مطلب څومره پوهېږي؟

کال دوه زره اتم نه واخله تر دوه زره ديارلسم پورې صوبه خېبر پښتونخوا کښې عوامي نېشنل ګوند برسراقتدار ؤ. دې ګوند چې خپل پينځۀ کاله تر څو تېرول نو کۀ يو خوا د خپلې خاورې او خپل اولس د امن د پاره د دهشتګردۍ یو منظم تباه کن سېلاب سره مخ ؤ نو بل اړخ ته د دهشتګردۍ خلاف پۀ روان جنګ کښې د دهشتګردۍ او انتهاپسندۍ کېدونکي نقصان زورلي قوتونه هم د دې ګوند خلاف پۀ زوروره پراپېګنډه بوخت وو او د ‘کرپشن وائرس’ اثر ئې صوبه کښې خورولو. پاکستان کښې د دهشتګردۍ بنیاد هغه وخت ایښودے شوے ؤ چې کله د جهاد پۀ نامه افغانستان کښې فساد د پاره پاکستان د دغه جنګ برخه شوې وه او هغه وخت دې ته جهاد ویونکو به عوامي نېشنل پارټۍ باندې الزامونه لګول. کله چې د دهشتګردۍ دغه ناسور نېغ پۀ نېغه هم د دهشتګردۍ شکل کښې د طورخم پۀ کرښه راواوړېدو نو د جنرل پروېز مشرف دور کښې د شروع شوو ‘رد الجهاد’ عملیاتو هېڅ نتیجې نۀ وي. باجوړ، مومند، خېبر، اورکزئ او وزیرستان مکمل سقوط ؤ. سوات د بارودو ګودام ؤ او دې لړ کښې ټول اپرېشنونه ځکه کُلي طور ناکام وو چې کوم سیاسي حکومت به یا د وېرې یا د خپلو مفاداتو پۀ وجه دغه جنګ نۀ own کولو. )زۀ پوره ذمه وارۍ سره اوس هم دا خبره کوم چې دغه قوتونو لا تر دې دمه د دهشتګردۍ پۀ ضد جنګ ته خپل جنګ نۀ دے وئیلے. عن تر دې چې د اٰرمي پبلک سکول د اووۀ شلې، باچاخان پوهنتون د اتلس او زرعي پوهنتون د اتۀ ماشومانو پۀ وحشیانه قتل ئې هم دغه جنګ نۀ دے خپل کړے(.

د دغه جنګ own کولو پۀ وجه ترهګرو د عوامي نېشنل پارټۍ پۀ ضد یو خونړے مهم شروع کړو. دې خونړو حملو کښې د ګوند دولس سوه پورې غړي، کارکنان او مشران ووژل شول )دا تسلسل هم دغه رنګ د شهید هارون بلور تر وینې رارسېدلے دے او میا افتخار حسېن پسې اوس هم زین کړي اسونه ګرځي(.

د ترهګرۍ پۀ ضد جنګ کښې د عوامي نېشنل پارټۍ ډاګیز، مؤثر او مربوط فکري او عملي شرکت ته کتلو نه پس د دهشت ګردو خواخوږي غېر سرکاري تنظیمونو، ریاستي او غېر ریاستي قوتونو او سیاسي ګوندونو د ‘کرپشن’ پۀ نوم یوه مستقل پراپېګنډه د سوشل میډیا، اخبارونو او الېکټرانک میډیا تر لارې وچلوله. کۀ د ادارو لاس ئې د سر نه لرې شي نو د عمران خان د ارټیکل 62/63 لاندې نا اهلۍ د پاره د هغۀ دا ویډیو، اٰډیو او اخباري بیانونه هم کافي دي چې هغۀ به وئيل، ‘اسفندیار ولي خان دومره کرپشن کړے دے چې ملائشیا او دوبۍ کښې جائیدادونه او روزګارونه ودرولي دي.’

د خپلې بې برغولي خولې خبرو کښې د ګېر عمران خان د تحریک انصاف حکومت چې خېبر پښتونخوا کښې پۀ وړومبي ځل جوړ کړے شو نو کال 2013 کښې ئې د ‘کرپشن فري’ پاکستان نعره پورته کړه. د تحریک انصاف یو اقتداري شراکت دار ګوند جماعت اسلامي د ‘خدا کی زمین پرخدا کا نظام’ نعره پرېښوده او ‘کرپشن فري پاکستان’ بیانیه ئې خپله کړه. ورسره د مېجر رېټائرډ افتاب احمد خان شېرپاو قومي وطن پارټي هم ودرېده )چې بیا دوه ځله هم دغه تحریک انصاف د کرپشن پۀ تور د اتحاد نه دننه بهر کړل(.

خلق د دغه دعوو او پراپېګنډو دومره اثر کښې وو چې ګڼل ئې لکه د عمران خان او د هغۀ سره د راټول شوو صفا سوتره خلقو د حکومت راتګ سره به د حکومت خزانې ځکه ډکې شي چې دوي به دغه ‘لوټ شوې تالا شوې خزانه’ د کرپټ سیاستدانانو نه راوباسي. د ټولو نه وړومبے سرپرائز هغه وخت ورکړے شو چې د صوبې ټول تور سپین ئې د وزیر اعليٰ پۀ شکل کښې پروېز خټک ته ‘حلال’ کړل. څو ورځې تېرې نۀ وې چې د سرکار خپل خپلو کښې وران شول او د معدنیاتو د وزیر ضیاء الله اپریدي لۀ خوا پۀ وزیر اعليٰ پروېز خټک او د کابینې د غړو پۀ یو بل پسې د فائلونو راخستلو قیصه شروع شوه. دې خبرونو سره پۀ عمران خان چې اصل کښې De facto وزیر اعليٰ ؤ، دومره پرېشر راغلو چې کال دوه زره څوارلسم کښې ئې د ‘خېبر پښتونخوا احتساب کمېشن’ پرانسته وکړه او یو پخوانے جنرل حامد خان ئې د دغه کمېشن مشر وټاکلو. لکه څنګه چې د عمران خان پۀ یوه خبره کښې هم کمه نۀ لګي، د صوبائي احتساب کمېشن او د دې کمېشن د مشر پۀ دیانت، رښتینولۍ، غېر جانبدارۍ او خود مختارۍ ئې هم داسې مبالغو نه کار واخستو، څنګه چې ئې د کرپش کرپشن پۀ چغو کښې مبالغې کړې وې. کېدل څۀ وو؟ خو چې کمېشن ازادانه طور سره کار شروع کړو او ابتدائي څو کېسونه ئې رپورټ شول نو عمران خان لا نور هم پۀ هوا شو. دا خبره اوس ثابته شوې ده چې دغه ابتدائي مرحله کښې یو شمېر پښتانۀ افسران چې د خپل فرضِ منصبي د اهمیت او ذمه واریو نه خبر وو، هم د سیاسي انتقام پۀ توګه پۀ نخښه کړے شوي وو. بیا څۀ وشو؟ بیا د دغه کېسونو غوټې پرانستې کېدې او د صوبائي حکومت )بلکې د عمراني حکومت( د وزیر اعليٰ نه د هغه وړوکي سرکاري کارکن پورې هم پۀ خلقو کېسونه مخې ته راتلل شروع شول چې د پاکستان تحریک انصاف سره ئې تعلق ؤ.

کله چې خبرونه د ډنډورې نه عملي کاروایۍ ته شول او ښکاره کېسونو کښې د مائننګ پۀ حواله د هغه وخت وزیر اعليٰ پروېز خټک قانوني چاره جویۍ سره مخ کېدو نو پۀ احتساب قانون کښې هم دغه د احتساب احتساب رمباړې وهونکي تحریک انصاف بدلون راوستو. د ثبوتونو څۀ کمے خو د ډي جي احتساب سره ځکه هم نۀ ؤ چې د معدنیات وزیر خپله د خپل وزیر اعليٰ خلاف والنټئیر د ثبوتونو پېشکش کړے ؤ. د عمران خان د حکومت لۀ خوا د احتساب کمېشن نه اختیارات اخستو باندې د دغه کمېشن ډي جي احتجاجاً استعفٰي ورکړه. کال دوه زره شپاړسم کښې چې کله حامد خان دغه استعفٰي ليکله نو دغه موقف ئې ؤ چې هغه کار ته نۀ پرېښودلے کېږي. بيا تر کال دوه اتلسم پورې دغه احتساب کمېشن بغېر د ډي جي کار ترسره کړو. پۀ دې موده کښې هم د پروېز خټک لۀ خوا يو کوشش وکړے شو چې د خپلې خوښې يو سړے د صوبائي اسمبلۍ پۀ ذریعه د احتساب کمېشن ډي جي ولګوي خو د اپوزيشن پۀ شور شرابه پروېز خټک پۀ خپل دغه مقصد کښې کامياب نۀ شو.

دا یوه خبره دې پۀ رېکارډ وي چې کله پۀ خېبر پښتونخوا کښې د تحریک انصاف تېر حکومت د دغه احتساب کمېشن جوړولو اعلان وکړو نو د عوامي نېشنل پارټۍ پارلېماني لیډر سردار حسېن بابک پرې دا غږ کړے ؤ چې د صوبائي اېنټي کرپشن او نېب موجودګۍ کښې یوه بله داسې اداره جوړول به ډپلیکېشن پېدا کوي او د کېسونو د نوعیت پۀ حواله به کنفیوژن پېدا کېږي. بیا دغه درې څلور کاله کښې ولیدے شول چې زیاتره فائلونه د اېنټي کرپشن، احتساب کمېشن او نېب منځ کښې د یو مثلث شکل کښې چورلېدل او دا پته نۀ لګېده چې دغه فائل باندې کاروائي به څوک کوي.

خېر، کال دوه زره اتلسم کښې د پاکستان تحريک انصاف حکومت ختم شو او د نوو ټاکنو )زۀ خو ورته سلېکشن وايم( پۀ نتيجه کښې يو وارې بيا د پاکستان تحريک انصاف حکومت پۀ خېبر پښتونخوا کښې راغے. یاده دې وي چې د انتخاباتو نه یو کال وړاندې د احتساب پۀ نوم هره صوبائي او وفاقي اداره د ‘الېکټېبلز’ پۀ تحریک کښې شاملولو د پاره د یو ډانګي پۀ شکل استعمال کړې شوه. د تحریک انصاف مشر عمران خپله یو شمېر مالي، قانوني او اخلاقي کېسونو کښې ګېر ؤ نو د هغۀ د تحریک انصاف خلق او ٰالېکټېبلز’ باندې خو به هډو خبره نۀ کوم. چې څنګه د پاکستان تحريک انصاف لۀ خوا د محمود خان پۀ شکل کښې نوے وزير اعليٰ راوستلے شو نو هغۀ د کابینې پۀ ړومبني اجلاس کښې دغه فېصله وکړه چې د خېبر پښتونخوا احتساب کمېشن اوس هېڅ کردار پاتې نۀ شو او وخت دے چې دغه کمېشن ختم کړے شي. خېبر پښتونخوا احتساب کمېشن د صوبائي کابينې د يو اجلاس د فېصلې پۀ نتيجه کښې ختم کړے شو او د صفایۍ لپاره حکومت هډو ضروري ونۀ ګڼله چې دغه فېصلې باندې يا نور سياسي ګوندونه پۀ اعتماد کښې واخلي او يا پرې د خېبر پښتونخوا اسمبلي پۀ اعتماد کښې واخستلې شي. د خېبر پښتونخوا احتساب کمېشن پۀ تېرو پينځو کالو کښې د خېبر پښتونخوا د اولس يو ارب او شپږ کروړه (1,060,000,000) روپۍ خرچ کړې دي، ولې کارکردګي ئې دغه ده چې پۀ پينځۀ کالو کښې د دغه ارب د پاسه خرچه باندې د یو افسر نه شل لکهه روپۍ بودې کړې دي!!! اوس د احتساب پۀ نعره پاکستان تحريک انصاف ته ووټ ورکوونکو نه باید چې دغه سوالونه وکړے شي چې ولې پۀ ټوله خېبر پښتونخوا کښې دغه يو کرپټ افسر ؤ چې احتساب کمېشن ونيولو؟ د پاکستان تحريک انصاف د حکومت نه اګاهو چې د عوامي نېشنل پارټۍ پۀ حکومت هم عمران خان کوم الزامونه لګول، ايا هغه دروغ وو؟ کۀ دروغ وو نو عمران خان بيا دا حق لري چې د خېبر پښتونخوا او پاکستان پۀ خلقو حکمراني وکړي؟ ایا د سیاستدانانو سیاسي کېرئیر پۀ ‘تاحیات ناهلۍ’ تباه کوونکے چیف جسټس دا نۀ ویني چې عمران خان یواځې د اسفندیار ولي خان پۀ حواله دوبۍ او ملائشيا کښې د جائیدادونو او کاروبارونو لرلو پۀ الزامونو د صادق او امین نۀ کېدو او نا اهل کولو اعلان کول نۀ دي پکار؟ هغه هم عمران خان دروغ وئيل؟ خبره ډېره ښکاره او سپينه ده چې د يو سوچ د لاندې د احتساب پۀ نعره د خېبر پښتونخوا خلق دهوکه کړے شوي دي او پۀ نورو صوبو کښې چې اولسي شعور نسبتاً د خپلو سیاسي مشرانو پۀ حواله روڼ دے، هلته دغه د احتساب نعره د الېکټېبلز پۀ تحریک انصاف کښې شاملولو د پاره استعمال کړې شوې ده. دغه د احتساب احتساب پۀ نعره بازۍ کښې د تېرو شپږو کالو نه پۀ خېبر پښتونخوا کښې د ترقۍ عمل ودرولے شوے دے، ځوانان او عام خلق د خپل قامي سياست او مشرانو نه متنفر کړے شوي دي؛ کۀ احتساب کېږي نو باید چې وشي خو پاکستان کښې کۀ اصل احتساب کېږي نو اول به د فوځيانو کېږي، بيا به د هغه ججانو کېږي چې مارشل او غېر جمهوري قوتونو له ئې لارې ورکړې دي او بيا به نمبر د سياسيانو راځي. هغه هم هاغه سياسيان چې کوم د چا پۀ اوږو سوارۀ راغلي دي، تحريکونو سره تړلي سياسيان به بيا هم د احتساب پۀ دغه عمل کښې ځلنده ستوري وي ولې چې دغه سياسيانو پۀ خپل سياست کښې حکومت کله کله کړے دے او جېلونه او سختۍ ئې ټول عمر ليدلې دي.

د دې کرښو د لیکلو پورې چې د نېب لۀ خوا کوم فهرست د یو اویا (71) کسانو جاري کړے شوے دے؛ د هغې تر مخه د اسلام اباد نه درې (3)، پنجاب نه یویشت (21)، بلوچستان نه نهه (9) او د سندهـ او خېبر پښتونخوا نه نولس (19) نولس (19) نامې مخې ته راغلي دي. د اتفاق حسن ته پام وکړئ چې پۀ دې فهرست کښې د اتلسم ترمیم سره باقاعده خیانت شوے دے. د پنجاب نمائندګي پکښې ډېره کمه ده او نېب د دغه فهرست پۀ ذریعه د پنجاب د سیاسي قیادت او بیوروکراسۍ د پاک ثابتولو یو سائنسي کوشش کړے دے. سوال پېدا کېږي چې د پنجاب نمائندګي د پنجاب د ابادۍ او کارکردګۍ پۀ بنیاد دې فهرست کښې ولې نۀ ده؟ سندهـ او خېبر پښتونخوا د تحریک انصاف د نمائندګۍ باوجود نولس پۀ نولس پاتې شوي دي خو پخواني وزیر اعليٰ او اوسني وزیر دفاع پروېز خټک پۀ ‘ټاپ ټونټي’ کښې ځاے جوړ کړے دے. هغه ډېر ټېلنټډ سړے دے او مونږ ترې توقع لرلې شو چې کۀ لږ وخت نور هغه پۀ وزارت کښې پاتې شو نو پۀ وړومبي نمبر خو نۀ شي ځکه چې دغه نمبر ون د عمران خان د پاره reserve دے، البته پۀ دوېم نمبر به خامخا راځي. دې فهرست کښې کمال دا دے چې د پنځوس فیصده نه هم زیات تعداد پکښې د صاف او شفاف تحریک انصاف د خلقو دے. د تحریک انصاف شپږ دېرش (36) کسان پۀ دغه فهرست کښې شامل دي.

اوس چې مونږ د احتساب د ډرامې روان قسط وینو نو څومره خلق چې هم د تحریک انصاف د سیوري لاندې دي، هغه کۀ هر څو نېک نامي نۀ لري، محفوظ دي. تر دې چې عمران خان، د هغۀ خور علیمه خانم، علیم خان، پروېز خټک او د جنرل مشرف د کابینې ټول وزیران مشیران چې اوس د تحریک انصاف حصه ده، محفوظ دي. کۀ محفوظ نۀ دي نو هغه خلق محفوظ نۀ دي چې سیاسي فکر او سیاسي ګوندونو سره تړون لري.

د احتساب پۀ نوم چې کومه بیانیه او کوم مواد د ریاست لۀ خوا اولس ته د میډیا د سنسني خېزۍ پۀ ذریعه رسولے کېږي، وخت راتلونکے دے چې د پاکستان ریاست به پۀ دې هم راتلونکي کښې داسې ستومانه، پښېمانه او ملامته وي څنګه چې نن د ‘جهاد’ پۀ نوم شوي فساد باندې د ستومانه، پښېمانه او ملامته کېدو ‘مظاهره’ کوي.

د پاکستان دننه د احتساب لنډه قیصه د عوامي نېشنل پارټۍ د جمهوري او پارلېماني سوچ مخه نیولو د پاره د دې پارټۍ پۀ ضد د ریاست د مسلسل پراپېګنډې نه پۀ ډاګه کېږي. د حمود الرحمان کمېشن رپورټ او د مهران بېنک سکېنډل نه واخله د پانامه لیکس او تېره ورځ د نېب لۀ خوا د یو اویا (71) نومونو جاري شوي فهرست نه ثابتېږي چې د پاکستان دننه یواځې د عوامي نېشنل پارټۍ قیادت دے چې د هر ډول تور نه پاک دے. پۀ اخبارونو او ټي وي ټاک شوز کښې د اسفندیار ولي خان اوپن چېلنج ثابتوي چې د پاکستان پارلېماني سیاست کښې یواځې اسفندیار خان صادق او امین دے.

البته احتساب دلته د غېر جمهوري قوتونو یو اوزار دے او بس.