Category: نهار خان تنګيوال

 

 

 

• September 5

International Day of Charity

د خېر ښېګړې کارونو د پاره د نغدې مرستې نړیواله ورځ د ‘مدر ټریستا’ د مړینې پۀ یاد نمانځلې شي چې تر خپل مرګه )پینځم ستمبر 1997ز( ئې کلکته کښې د لوږې، نېستۍ، بې وزلۍ او بېلابېلو ناروغیو پۀ ضد نۀ ستړېدونکې مبارزه کړې ده. نولس سوه نهه اویایم (1979) کښې نوموړې ته نوبل جائزه هم ورکړې شوې وه.

دا یو ډېر پیاوړے اقدام دے چې شتمن خلق د لوږې، نېستۍ، بې وزلۍ او بېلابېلو ناروغیو پۀ ضد ‘پۀ خپله خوښه’ مالي مرستې کوي – خو لۀ ده مرغه، دې ملک کښې دغه مرستې هم د یو ډول ریاستي ګوتې بڼه اخستې ده. هندوستان نه راتلونکو ‘مهاجرین’ د پاره چندې نه د فساد کولو د پاره د جهاد پۀ نامه چندو پورې. چې د کشمیر د روایت تقلید کښې پرې د بوسنیا، فلسطین، افغانستان او برما پورې مختلفو شکلونو کښې چندې جمع کېدې او لا اوس هم جمع کېږي. د “قرض اتارو ملک سنوارو” نه د علیمه خان جېب ته تلونکو پېسو پورې او دا اوس اوس د “ډېم فنډ” پورې – دا هر څۀ نۀ احتسابېږي او نۀ حسابېږي. څلور اوسني مثالونه به ئې پینځۀ کرښو کښې وکړو:

1. ‘برما’ د پاره اوس اوس شوې چندې څۀ حساب لري؟
2. د ‘ختم نبوت’ دهرنا کښې ورکړې شوې “لفافې” لۀ کومه وې؟
3. “اېف اے ټي اېف” کښې د Charity لاس شته؟
4. د پخواني چیف جسټس ثاقب نثار او اوسني “وزیر” عمران خان لۀ خوا د جاري کړي “ډېم فنډ” شماریات څۀ وائي؟

پاکستان کښې د پینځم ستمبر د ورځ نمانځلو کوم سرکاري روایت ځکه نشته چې کۀ د خلقو دې ته پام شي نو ممکنه ده تپوس وکړي چې زمونږ نه پۀ ویړ شوو کټونو، خورو کړو دسمالونو او موبائل مسېجونو شوې چندې چرته تلې دي؟ پام کښې دې وي چې دغه پۀ اربونو روپۍ د Utitlity bills مد کښې پۀ چیو بسکټو دوړه شوې دي.

• September 8

International Literacy Day

د زدکړې او لیک لوست نړیواله ورځ نمانځلو ته پۀ وړومبي ځل تهران کښې شوې یوه نړیواله غونډه کښې پۀ اتم ستمبر 1965 پام اوړېدلے ؤ. د دې غونډې اعلامیه کښې وئیل شوي وو چې نړۍ کښې پۀ ملیونو نالوستي وګړي تر دې ساه شته چې سیاسي، اقتصادي او ټولنیزو سرګرمیو کښې د نالوستۍ لۀ کبله رول لوبولے نۀ شي؛ دا نو زمونږ ذمه واري ده چې نالوستي ماشومان، ښځې نر او لوي واړۀ د لوست او زدکړې پله راولو.

د لوست د پاره تر ټولو مهمه او بنسټیزه خبره مورنۍ ژبه کښې د زدکړو اسانتیا ورکول دي چې د ملل متحد پۀ چارټر کښې دا د هر انسان بنیادي حق دے. پاکستان کښې د وړومبۍ ورځ نه اردو ته قومي ژبه وئیلې شوې ده او انګرېزي دفترونو کښې د پېرنګي بادار د مقدسې نخښې پۀ توګه ساتلې شوې ده. دې منځ کښې بیا عربۍ ته د مذهبيت د نفسیاتو ژوندي ساتلو د پاره هم ځاے ورکړے شوے دے – مورنۍ ژبې اګرچې د پاکستان د غېر فطري “قومیت” جوړولو د پاره وژل ضروري وو نو ځکه یوې مورنۍ ژبې ته هم لاره ورنۀ کړې شوه. د یوې اوږدې او ستړې سیاسي مبارزې نه پس د اتلسم ائیني ترمیم تر مخه مورنیو ژبو کښې د تعلیم حق ومنلے شو خو ورپسې د فوج د ګوډاګي حکومت لۀ خوا عملاً دغه ائیني حق تروړلے شوے دے او د “یکسان نظامِ تعلیم” پۀ نعره د ملل متحد قرارداد او د ملک ائین باندې پښې ایښودې شوې دي. د مختلفو ادارو د سروے راپورونو تر مخه، سرکاري ادارو کښې د حکومت لۀ خوا د لویو لویو لاپو پۀ ځاے د تعلیم شرح ورځ تر ورځ پرېوځي. حکومت د یو سستیماتیک پروسې لاندې د سرکاري ښونځو پۀ ځاے پرائیوېټ سېکټر ته زیات ځاے ورکوي او دا د یوې داسې مرحلې پله خاموش تګ دے چې بیا به د غریب د بچي نه بیخي د تعلیم حق واخستلے شي.

• September 10

World Suicide Prevention Day

دا ورځ د ځانمرګۍ د مخنیوي د ورځ پۀ توګه د یو نړیوال تنظیم (IASP) لۀ خوا نمانځلې کېږي چې د روغتیا د نړیوال جوړښت (WHO) ئې پۀ ملاتړ ولاړ دے. دوي ګڼي چې کۀ کار پرې وکړے شي نو د ځانمرګۍ مخه نیول امکان لري.

یو خوا د نړیوالې تجارتي انارکۍ لۀ خوا د ډالر پۀ زور د نورو هېوادونو معیشتونه کنټرول کېږي او بل خوا پۀ مختلفو حوالو د وړو قامونو د وسائلو تالان هم کوي. دې منځ کښې د حالاتو نه د تنګ شوو د ځان-وژنې مخنیوي نه زیات خطرناک صورت د ځان-مرګي بریدونو کوونکو دے.

• September 15

International Day of Democracy

د اولسواکۍ/ جمهوریت نړیواله ورځ نمانځل د دې احساس ورکولو یو کوشش دے چې یوې )انتخابي( سیمه کښې ژوند کوونکي اولس، ښځې نر، شل ګوډ، ړوند چاړا؛ هر چا د پاره ضروري ده چې پۀ خپل ځان د حکمرانۍ حق استعمالولو سره یوې خاص مودې د پاره واکمن وټاکي – یا کولے شي چې خپله انتخاباتو کښې ودرېږي.

د انساني حقوقو نړیوال ډکلېرېشن وائي:

د حکومت د اختیار بنیاد د عوامو پۀ رایې ولاړ پکار دے. باید چې د عوامو دغه رایې پۀ ټاکل شوو وختونو/ مودو کښې ووینو چې خلق د خپلې خوښې او مرضۍ پۀ بنیاد پۀ “اصلي” ټاکنو حکومت وټاکي. دې لړ کښې خلقو ته د ووټ/ رایې ازادي ورکول چې یقیني وي.

مونږ د جمهوریت د روایتي تعریفونو لکه “د اولس، د اولس پۀ ذریعه او اولس د پاره” نه چې راتېر شو نو وینو چې پاکستان کښې کله هم جمهوریت ته لاره نۀ ده ورکړې شوې. څنګه چې دلته امن د دوو حادثاتو تر منځ وقفې ته وئیلے شي، دغسې جمهوریت هم پۀ پانچ سو پچپن بیټریانو چلېدونکي ګوډاګي ته وئیل کېږي.

د فاطمه جناح د ورور نه د علیمه خان د ورور پورې – پۀ توقل ورکړې شوې فتوې، وچ زور نه جوړ شوي قوانین، د مخالف غږ نۀ اورېدل، مخالف جېل ته لېږل، یرغمال شوې عدلیه او د بلېک مېلنګ tool پۀ توګه استعمالېدونکے احتساب – یوه نخښه به پۀ دې کښې څوک د جمهوریت وښائي؟

دا ورځ هم نۀ نمانځلې کېږي او وجه ئې سره د نتیجو څرګنده ده. دا وګورئ چې د ووټونو د پولنګ شرح څومره ده؟ دا ووینئ چې پۀ دې دور کښې هم پۀ شپږ شلې ووټ خرڅېږي!!! دا به کوم قوم ومني چې د څلور لکهه مسلح فوجیانو “نګرانۍ” کښې انتخابات کېږي؟ دا به څوک ومني چې فارم 45 نۀ وي؟

یو ډېر ساده مثال ئې دا اوس د خېبر پښتونخوا پۀ نوو ضلعو کښې شوي انتخابات دي. د ریاست پۀ زور جوړه شوې پارټي، “باپ”، چې انتخاباتو کښې ئې یو امیدوار د جنډې لاندې نۀ ؤ، د انتخاباتو نه پس ئې صوبائي اسمبلۍ کښې “درې+یو” کالتوس راغلل او یو شین ناسور سېنټ کښې هم کنفرم شو!!!

بېن الاقوام کښې لوي طاقتونه نۀ صرف پاکستان کښې بلکې د نړۍ نورو هېوادونو کښې هم پۀ قدرتي وسائلو قبضې، یا د دغه وسائلو پۀ لوټ تالان یا کمه بیعه تر لاسه کولو، د هغه ځاے د فطري جغرافیې خپلو فوجي، غېر فوجي او اقتصادي ګټو د پاره د استعمالولو پۀ ترڅ کښې هلته د جمهوري قوتونو پۀ ضد د غېر جمهوري ادارو پټې څرګندې مرستې کوي. دې لړ کښې لۀ هر څۀ زیات کومک پۀ غېر جنګي سرګرمیو مثلاً میډیا کنټرول، ادارتي انارکي او د غېر ریاستي عناصرو د ملاتړ تر لارې تر سره کېږي. د جمهوریت پۀ اولس کښې جرړې نۀ نیولو د پاره هلته پۀ سیاسي خلقو، سیاسي عمل او سیاسي نتیجو همېشه اولس شکمن ساتلو د پاره کار کېږي. پۀ دوه اویا کلن تاریخ کښې ئې یو ښکاره جاره اثر دا دے چې تر اوسه د ورکړے شوو ووټونو شرح د نیمې پۀ نیمه وي. هسې خو چې کله نه دلته انتخابات شوي دي نو د هغې ورځ نه انجینئیرډ الېکشنز کېږي خو پۀ پینځویشتمه جولایۍ 2018 شوو انتخاباتو نور ټول تورونه تت کړل. د دې سره پاکستان پۀ “ګرے لسټ” کښې هم شامل دے چې تېرو ورځو کښې ئې د بلېک لسټ کېدو افواه هم خوره شوې وه – د دې باوجود دنیا پاکستان سره کومک کوي او دا کومک د یو غېر جمهوري (Selected) حکومت د جسټیفائي کولو د پاره کېږي. دې کومک سره دا تاثر ورکړل کېږي چې ګنې جمهوري (!) حکومت داسې پالیسۍ لري چې نړیواله ورورولي ورسره مرسته کوي. حالانکې دا ډېره ښکاره خبره ده چې د چین نه سعودي عرب او امریکې نه د اېشین ډوېلپمنټ بېنک پورې دا ټول پاکستان له مدد نۀ ورکوي، د پاکستان سره تجارت کوي – پاکستان د دې تجارت بدل کښې د ملک لارې، اډې، وسیلې او جغرافیې خرڅوي. کشمیر ئې بیخي اوسنۍ بېلګه ده.

• September 16

International Day for the Preservation of Ozone Layer

د ‘اوزون’ د تهې خوندي کولو ورځ پۀ دې نیت نمانځلې کېږي چې د کاربن لرونکو مختلفو کېمیکلو پۀ وجه ‘اوزون’ ته کومه خطره پېښه ده، د هغې پۀ اړه خلقو کښې شعور پېدا کړے شي او دغه تهه خوندي شي. پۀ وړومبي ځل پۀ دې اړه دوه ویشتم مارچ 1985 کښې پۀ ویانا کښې یو کنونشن کښې اتۀ ویشت هېوادونو دا لاسلیک کړه. بیا دې معاهدې د ‘مونټریال پروټوکول’ (Montreal Protocol) نامه واخسته او پۀ شپاړسم ستمبر 2009 د نړۍ ټول ملکونه د دې برخه شول.

پاکستان کښې اوزون لکه د نورو ډېرو مهمو څیزونو څوک پۀ شړق هم نۀ وولي. د خپلې لکۍ لاندې ځاے نۀ څنډي نو پۀ اسمان کښې د یوې تهې به څۀ غم وخوري. د حکومت لۀ خوا هم د داسې کارونو د پاره د اٰن-ډیوټي او رېټائرډ فوجیانو او ججانو ښځو او لوڼو ادارې پرانستې وي، څاربۀ څاربۀ فنډونه پرې اخلي او بې ډرقي ئې هضموي. د فوج سیاسي ونګ ‘پي ټي اٰئي’ د ‘بلیون ټري سونامي’ پۀ نامه پراجېکټ پرانستو چې پکښې لکه د دوي د نورو پراجېکټونو د بدعنوانۍ او غبن د سونامۍ نشاندهۍ وشوې. هر څو د دوي د پراجېکټونو ټهېکې د فوج سره وي نو سوال نۀ پېدا کېدو چې اٰډټ یا محاسبه ئې وشي. پښتونخوا کښې چې کومو دولس ځنګلونو کښې د بلیون ټري دعويٰ شوې وه، هلته ځنګلونو ته اور ورته کړے شو. د پلاسټکي ګوتیو خلاف چې کوم اعلانونه شوي دي، هغه پۀ خپل ځاے پاتې دي. د اورېدو خبره ده چې ‘زورور’ د یوې خاص مارکې سره خپلې عادي د پلاسټک ګوتې بازار ته راوړي چې د دعوې مطابق ‘کال کښې دننه به خپله ختمېږي’ خو دغه فیلډ سره تړلي خلق وائي ‘دغه مارکه هسې ډګوسله ده او منځ کښې هېڅ نشته’.

• September 21

International Day for Peace

د امن نړیواله ورځ پۀ وړومبي ځل 1981 کښې د ملل متحد لویې جرګې منځ ته راوړه. دا بیخي هاغه موده وه چې افغانستان کښې فساد ته د جهاد پۀ نامه لاره پرانستې شوې وې او پاکستان کښې د دې جهاد اقتصاد د پاره پنجاب کښې ټرېننګ سنټرونه او اکاونټونه پرانستے شوي وو. پخوانۍ ‘فاټا’ د فساد لانچنګ پېډ ؤ چې د مذهب پۀ نامه ترې د امریکې جنګ له جنګیالي لېږلے کېدل.

پاکستان کښې ‘اسلام ته خطره’ وه نو ځکه د الباکستان مارکه امیر المؤمنین ضیاء الله افغانستان کښې جهاد سره ولاړ ؤ. هاغه وخت صرف عوامي نېشنل پارټي چې وه دغه جنګ ته ئې د روس او امریکې جنګ وئیلو )نن خو ورته د پاکستان ډیفېکټو حکمران جنرل باجوه هم پۀ خولۀ ‘فساد’ وائي(.

پاکستان همېشه د دې جنګ نه پۀ ډډه پاتې شوے دے. دې جنګ کښې د کابل سره پېښور او کوئټه یو شان سوزېدلي دي. پاکستان چې کله دې جنګ کښې د خپل تاوان خبره کوي نو د بېنظیر بهټو شهیدې نامه هم اخلي – بیا خو د جنرل ضیاء نامه هم ورته اخستل پکار دي.

پۀ اٰرمي پبلک سکول د شوې حملې شا ته د فوج او اٰئي اېس اٰئي پۀ وېنا اسلام اباد کښې د پي ټي اٰئي د کېدونکې دهرنې شوشه او یوه کنسپائرېسي هم شته، خو دغه واقعه اګر کۀ پۀ “اٰرمي” پبلک سکول وه نو ځکه ئې د زیات شدت احساس خلقو ته ‘ورکړے’ شو. د دې نه پس د “نېشنل اېکشن پلان” پۀ نامه یو شل نکاتي پروګرام مخې ته کېښودے شو چې د ترهګرۍ پۀ ضد روان جنګ ختم کړي. نن مونږ د نېشنل اېکشن پلان پۀ مړي ولاړ یو. پروسکال چې د جي اېچ کیو لۀ خوا د مختلفو “جهادي” ډلو او تنظیمونو مشرانو ته د اٰئي اېس پي اٰر لۀ خوا د وزیرستان “چکر” ورکړے شو نو د نېشنل اېکشن پلان پۀ مړي خاورې هم واړولې شوې. اوس چې پخوانۍ “فاټا” کښې د اوږدو څڼو جنګیالي ارتې تڼۍ ګرځي، جوماتونو کښې چندې کېږي او افغانستان کښې د امن د پاره د روانو مذاکراتو پۀ حواله کومې بګتۍ مخې ته راځي، دې نه یوه خبره څرګندېږي او هغه د ملګري افتخار ساحل پۀ دې شعر کښې ده چې:

د چا چې ګټې پۀ جنګونو کښې دي

امن د ۀاغه خلقو لاسو کښې دے

دنیا خپلو کورونو کښې امن غواړي، پاکستان کشمیر کښې امن “غواړي”؛ د افغانانو لۀ غمه څوک هم بې خوبه نۀ دي. د افغانانو پۀ کور کښې امن د پاره باید افغانان سره یو غږ یو ګام شي.

• September 23

International Day of “Sign Languages”

دا ورځ پۀ درې ویشتم ستمبر 1951 د نړۍ د کڼو د فیډرېشن جوړېدو پۀ یاد کښې نمانځلې شي. دا ورځ د 1958 نه د دغه فیډرېشن پۀ غړو هېوادونو کښې نمانځلې کېده او پروسکال (2018) نه پۀ نړیوال کچ نمانځلې کېږي.

پاکستان کښې د اشارو ژبو نمانځل داسې دي لکه کاڼۀ چې د ړندو پۀ ښار کښې د لاسونو پۀ اشارو احتجاج کوي. دلته د زرګونو کلونو نه شته قامي ژبې د اردو ژبې پۀ چاړۀ غوڅې کړې شوې او د ملل متحد د چارټر اٰف هیومن رائټس او د پاکستان د خپل ائین ورکړے شوي حق نه انکار کېږي.

• September 26

International Day fot toal Elimination of Nuclear Weapons

پۀ 1945 کښې د امریکا لۀ خوا د جاپان دوه ښارونه ناګاساکي او هېروشیما باندې اېټمي بمونو 213,000 خلق پۀ یو څپه کښې وژلي وو. پۀ ورپسې کال جنرل اسمبلۍ کښې د نړۍ اېټمي وسلو نه پاکولو د پاره وړومبے وړاندیز مخې ته راغلو او اوس د ملل متحد د جنرل اسمبلۍ لۀ خوا شپږویشتم ستمبر د اېټمي وسلو د نړۍ د پاکولو د ورځ پۀ توګه پۀ 2013 کښې اعلان شوې ده.

نړۍ ولې غوښتنه کوي چې د اېټمي وسلو نه پاکه شي؟ دا یوه ساده وجه لري – خو مونږ دې نۀ هېروو چې دنیا کښې د وېرې کومه څپه خوره ده، د اېټمي وسلو وېرې خوره کړې ده. هر ملک دا هڅه کوي چې اېټمي وسله تر لاسه کړي. پاکستان کښې دننه د اېټمي وسلو موجودګي د دنیا یو لوے تشویش دے او پۀ حقه دے خو؛ اٰیا د نورو هېوادونو سره دا تشویش خبره نۀ ده؟ امریکا خو دا وسله استعمال کړې هم ده – پۀ جاپان خو استعمال شوې هم ده.

د دې وسلې د لرلو پۀ شا نفسیات ډېر خطرناک دي. دا اوس چې د هند او پاکستان تر منځه حالات ترینګلي شول، پاکستان کښې د اېټمي وسلې پۀ وړه پېمانه د استعمال ګنګوسې روانې دي. دا خو مونږ ته پته ده چې د هند او پاکستان تر منځه کله هم جنګ نۀ شي کېدے؛ هند د یو اقتصادي طاقت جوړېدو پله روان دے او چې څوک اقتصاد لري نو جنګونه نۀ کوي. دا هم مونږ ته پته ده چې د پاکستان “عالمِ اسلام” ټول د هند سره ولاړ دے. دغه خوب د مغالطۀ پاکستان پۀ نصابونو کښې پروت دے، عملاً نشته.

بیا هم، باید نړۍ د خونړیو اېټمي وسلو نه پاکه شي او د انسانیت پۀ سر ځوړنده دغه وېره ورکه کړې شي.

• September 26

World Maritime Day

د سمندر تر لارې د سامانونو د نقل و حرکت دا ورځ یو مهم تجارتي صنعت ته پام راړولو د پاره نمانځلې شي.

د پاکستان د تجارت پښې د کراچۍ پۀ پورټ ټینګې دي او اوس د ګوادر بندرګاه ممکنه وه چې دغه لړ کښې کردار ادا کړي. لۀ بده مرغه د “گرم پانی” پۀ نامه پاکستان خپل دواړه پورټونه جوړوي او چلوي هم خو د هغې نه زیات ملک تاواني کوي.

د پورټونو اجازتنامو نه دلته تر د کېدونکو تجارتي ټرانزېکشنو پۀ هر څۀ د سیکورټۍ زور خور دے. اختیاراتو کښې د ځائي اولس برخه پۀ نیشت ده. د “روس گرم مانگتا هے” بیانیه ګوادر د پاره هم استعمالېږي چې یوه نتیجه ئې د ایران د چار بهار صورت کښې مخې ته راغلې ده. د تودو اوبو لار روس هم غوښتله او چین هم وا خستله. کنسپائرېسۍ ئې ملک د یو جنګ څپې نه راتېر کړو او بله څپه ئې شروع کېدونکې ده.

کۀ پښتون وطن کښې امن راغلو، ګوادر به د پښتنو او بلوچو پۀ اقتصاد کښې مثبت کردار ولوبوي او د نړۍ نه شلېدلې دا برخه به د نړۍ سره کونېکټ کړي.

• September 27

World Tourism Day

د سېلګرۍ نړیواله ورځ ملل متحد پۀ وړومبي ځل پۀ اووۀ ویشتم ستمبر 1980 کښې ونمانځله. کال 2017 هم د سېلګرۍ پۀ نامه ؤ.

د دې ورځې د نمانځلو پۀ شا د نړۍ د فطري منظرونو د سماجي، کلتوري، سیاسي او اقتصادي ارزښت مخې ته راوړل دي. د نړۍ یوه لویه برخه سېلګري پۀ حېث د یو صنعت لري.

پاکستان کښې د ریاست د پراکسي جنګ خونخوارې بلا اویایمه لسیزه کښې پۀ پښتنه خاوره پۀ سېلګرۍ کښې سیخ ټومبلے ؤ. دې نه زیات “دوه پاکستانان” څۀ کېدے شي چې “مَري” کښې دا پمفلټونه پۀ هوټلونو او رستورانو کښې وېشلے کېدل چې تاسو سوات او دیر ته مۀ ځئ، هلته بد امني ده؛ دلته راځئ چې مونږ درته اسانتیاوې درکوو؟

د سېلګرۍ د ودې پۀ نامه یو شمېر ځایونه چې پۀ نخښه شوي وو، هلته د سېلګرۍ پۀ نامه د ځائي خلقو زمکې لېلام کړې شوې او د نورو سیمو نه کاروباریانو ته هلته ځاے ورکړے شو. د تحریک انصاف د حکومت پۀ شا کۀ فوج ولاړ نۀ ؤ، صرف د مالم جبې د سېلګرۍ د ځاے کرپشن سکېنډل کافي ؤ چې د ډېرو مخونو نه ئې هغه نقاب لرې کړے ؤ چې عدالت او احتساب لاس نۀ ور وړي.

دنیا د 2030 پورې د سېلګرۍ د پاره یو جامع پلان لري. کۀ پښتون وطن ته پاملرنه وکړې شوه او دلته د امن د پاره سنجیدګي وښودلې شوه؛ دا سیمه به د خپل تاریخي، سماجي او کلتوري رنګونو سره د نړۍ سېلګرو د پاره وړومبۍ ترجیح وي.

• September 28

International Day for Universal Access to Information

نړۍ دوه زره شپاړس نه معلوماتو ته د لاس-رسي دغه ورځ نمانځي او د 2030 نړیوال پلان کښې دې ته مهم نظر کېږي. د دې تر مخه، دا د یو ریاست ذمه واري ده چې هغه معلوماتو د لاس-رسي حق ومني او د هغوي بنیادي حقونه د ځائي ائین او نړیوالو معاهدو نتیجه کښې خوندي کړي.

د یادونې وړ ده چې اتلسم ائیني ترمیم کښې Right to Information د اولس د بنیادي حق پۀ توګه منل شوے دے. د تحریک انصاف پۀ تېره دوره کښې دغه ائیني بنیادي حق پسې ملنډې وکړې شوې او دې کښې پۀ مختلفو وجوهاتو مختلفو معلوماتو ته اسثنٰي ګانې ورکړې شوې. د ترهګرۍ پۀ ضد مبینه “جنګ” کښې زرګونه خلق، سیاسي کارکنان او مدني فعالین ورک کړے شوي او دا قانون د هغې پۀ حقله ځکه غلے دے چې ګڼي “ملک خطرے مین هے اور یه حساس معلومات نهین دئیے جا سکتے”. اوس خو پۀ هر څۀ دومره سنسر دے چې د انتخاباتو پۀ ورځو کښې به پۀ هر سکرین د بشريٰ مانیکا انټریوګانې او د هغې متعلق خبرونه چلېدل، نن سبا ئې پته هم نۀ لګي چې پۀ کوم رنګ مصله ناسته کومه وظیفه کوي او پاکستان د اٰئي اېم اېف او کشمیر د هند نه خلاصوي. دې حالاتو کښې به مونږ اٰئي اېم اېف سره د شوي ډیل، د عرب ملکونو نه د اخستے شوي “امداد” او داخله خارجه امورو پۀ حقله کومو معلوماتو ته د رسایۍ غوښتنه وکړو.

• September 28

World Rabies Day

د رېبیز مخنیوي د پاره دا نړیواله ورځ د نوموړي فرانسوي کېمسټ او مائیکرو بائيولوجسټ لوئس پاستیور د تلین پۀ یاد نمانځلې کېږي چې پۀ وړومبي ځل ئې د رېبیز وېکسین جوړ کړي وو.

زمونږ خو اوس پېښور کښې د یو تور سرې لۀ خوا د کوڅه ډپ سپو د پاره د ساتنې ځان له ځاے پۀ نظر راغلو. میډیا باندې راغلي راپور نه څرګندېږي چې زر به دا هم یوه اېن جي او شي او مونږ به دغه سپي بیا لارو کوڅو کښې وینو. د دې وجه دا ده چې د حکومت ذمه وارۍ د فنډ رېزنګ د پاره افراد پۀ خپله غاړه واخلي او بیا چې کله فنډ رېزنګ وشي نو اېن جي او هم ختمه شي. اېن جي اوز باندې زیاته خبره دلته ځکه نۀ کېږي چې پۀ اولسي کچه دا غېر سرکاري ادارې دومره بد نامې کړې شوې دي چې د دوي مرسته اخستو د پاره خو قطارونو کښې پۀ ګېنټو ودرېږي خو ځان کښې ئې جرړه نۀ پرېږدي.

د رېبیز خبرې نه یو اړخ ته، دلته خو “د انسانانو بچو” د پاره شلټر هاوسز صرف کاغذونو کښې وي، لا “د انسانانو بچو” د پاره جوړ شوي وېکسینونه “کافران” دي نو رېبیز ته خبره رسېدو کښې به لا زمانې لګي. دا اوس اوس چې د پولیو وېکسینېشن پۀ اړه کوم راپور راغلے دے، څومره بد ترین دے.

• September 30

International Traslation Day

دا ورځ پۀ دېرشم ستمبر 420ز د مړ شوي سېنټ جیروم (St. Jerome) د تلین پۀ ورځ نمانځلې شي. جیروم د انجیل مقدس نوې عهدنامه د یونانۍ نه لاطیني ته ژباړلې وه. د کال 2005 نه ملل متحد تسلسل سره پۀ دې ورځ عربۍ، چینۍ، انګرېزۍ، فرانسوۍ، روسۍ، سپېنش او جرمن ژبو کښې د ژباړو مقابله کوي.

ژباړه د یوې ژبې نه بلې ژبې ته د یو قام د ژوند، کلتور، نفسیاتو، تاریخ، اقتصاد او د هغوي د عقیدو او وهمونو د نقل کولو لاره ده چې ډېر ارزښت لري. دا د نړۍ پۀ مختلفو براعظمونو کښې د مېشته خلقو تر منځ د مشترک قدرونو مخې ته راوړلو او د انسانانو تر منځ د کلتوري فاصلې ختمولو یوه اغېزمنه لاره ده.

پښتو کښې لۀ بده مرغه د علمونو او فکرونو د نورو ژبو نه د نقل روایت زیاتره د اردو ژبې تر لاره وي )اوسمهال پکښې ډېره اضافه شوې ده(. د دې لوے زیان دا دے چې اردو د خپل تفهیم، خپلې محاورې او خپلې روزمرې تر مخه دغه ژباړه کړې وي او بیا چې پښتو ته راځي نو تر منځه ئې دغه اردو کوره تفهیم، محاوره او روزمره هم حائل شي.

زۀ خو ګڼم چې اردو نه هډو پښتو ته ژباړه پکار نۀ ده، البته کۀ د پښتو نه اردو ته کېږي نو ښه خبره ده.

]”پښتون” ښاغلي نهار خان تنګیوال ته خواست کوي چې دا لړۍ دې نۀ ودروي او د هرې میاشت نړیوالې ورځې دې د پاکستان پۀ شالید کښې دغسې مخې ته راوړي.

دې سره به د دغه نړیوالو ورځو تاریخ هم لوستونکو ته برڅېره شي او پاکستان کښې د روانو حالاتو سره د دې د تقابلي لوست اساني به هم پېدا شي.[

 

خېبر بېنک، بلین ټري سونامي، احتساب، دوست ممالک کا پېکج، BRT

نېشنل اېکشن پلان، ایران دور، کابینه ادل بدل

د صاف شفاف انصاف پوسټ مارټم

• خېبر بېنک:

‘بېنک اٰف خېبر’ دې صوبې له د اے اېن پي د حکومت یوه ورکړه ده. کله چې مسلم لیګ سره “صوبه سرحد” کښې اتحاد ؤ او “بېنک اٰف پنجاب” جوړېدو نو د عوامي نېشنل پارټۍ لۀ خوا مطالبه وشوه چې دې صوبې له هم یو بېنک پکار دے او ‘بېنک اٰف خېبر’ د هغې مطالبې نتیجه کښې جوړ شوے ؤ.

د عوامي نېشنل پارټۍ تېر حکومت کښې د صوبائي واک لاس ته راوړلو نه پس د صوبې زیاتره مالي مرستې چې د مختلفو پراجېکټونو د پاره وې، د خېبر بېنک تر لارې وې او د قامي حکومت دغې پالیسۍ سره دا بېنک د صوبې یوه ګټه کوونکې اداره شوه.

د تحریک انصاف تېر حکومت کښې د کراچۍ د سېټهانو د پاره خېبر بېنک ته لنګتۍ کېښودې شوه او هر هغه کوشش وشو چې دا بېنک پۀ ټپو کښېنوي. ډسکو پي ټي اٰئي ته دغه لنګتۍ کښې د دوي اتحادیان یو قامپرست او یو اسلامي اتحادي هم شامل وو. هر وس وشو خو د بېنک ملازمینو دغه منصوبه ناکامه کړه. احتساب عدالت نۀ خو د بېنک د اېم ډي لۀ خوا ورکړي اشتهار باندې غوږ وګرولو او نۀ ئې د ملازمینو لۀ خوا شور ته جواب ورکړو. اوس چې یو ځل بیا تحریک انصاف د اتلسم ائیني بل انتقام اخستو د پاره پۀ صوبه مسلط کړے شو نو لکه د نورو ډېرو ادارو او اثاثو د خېبر بېنک حال هم د یو مېګا سکېنډل صورت کښې مخې ته راغلو.

د احتساب بیورو لۀ خوا د روانې انکوائرۍ ودرولو د پاره د عمران خان لۀ طرفه د نېب کوتک هم استعمال کړے شو خو د پېښور هائيکورټ لۀ خوا نېب وتمبولے شو. انکوائري رپورټ کښې پۀ ډاګه شوي دي چې د خېبر بېنک د پخواني اېم ډي بلال مصطفٰي کنټرېکټ پۀ پینځم مارچ 2013 ختم شوے ؤ. پۀ شپږمه جولایۍ 2013 اشتهار ورکړے شوے چې دوه څلوېښت درخواستونه پرې جمع شوي وو چې څوارلس پکښې منظور کړے شوي وو. دې نه پس پۀ شپاړسم دسمبر د څوارلس امیدوارانو انټروۍ وشوې خو خو ورپسې دا ټول امیدواران مسترد کړے شول او د نوي سره اشتهار وشو. د هغه وخت د وزیر اعليٰ پروېز خټک لۀ خوا منظوره شوې سمرۍ کښې د عهدې د پاره د اهلیت معیار بدل کړے شوے ؤ چې د اېم ډي تقررۍ د پاره د عمر حد زیاتولو سره سره پکښې دغه عهدې د پاره تنخوا د 95 لکهه نه یو کروړ اتۀ شپېتۀ لکهه (16,800,000) روپۍ د کال شوې وه. د بهرتۍ شفاف جوړولو د پاره د وزیر اعليٰ پۀ لېږلې شوې سمرۍ جوړې شوې کمېټۍ اوولس درخواستونه مسترد کړل او اووۀ کسان ئې اهل وګرځول. د خوند خبره پکښې دا وه چې سابق اېم ډي شمس القیوم نا اهل وګرځولے شو. خو بیا پۀ یوولسم ستمبر 2014 صوبائي حکومت د اېم ډي بهرتۍ د پاره یو فهرست مرت کړو چې هغې کښې ئې دغه نا اهل شوے اېم ډي پۀ څلورم نمبر راوستو. د تحقیقاتو مطابق د انټرویو مارک شیټ سپین پروت ؤ خو بیا هم پۀ څلیریشت کښې نا اهل شوي اېم ډي شمس القیوم ته وړومبے نمبر ورکړے شوے ؤ. پۀ وړومبي اکتوبر 2014 د قوانینو خلاف او د کلېرنس غېر موجودګۍ کښې د عمران خان صاف شفاف انصاف کا بول بالا کوونکي وزیر اعليٰ پروېز خټک د اېم ډي د پاره د نا اهل شوي شمس القیوم د تقررۍ اعلامیه جاري کړه. پس ثابت هوا چې د لامبلو د پاره پۀ کروړونو سوئمنګ پول جوړوونکے او د بي اٰر ټي پۀ ذریعه د پېښور بېخ ویستونکے وزیر اعليٰ اوس وزیر دفاع وي نو خداے دې پرې خپلې پردې واچوي.

د بلین ټري سونامي پۀ حواله د شګفته ملک بي بي پورته شوي ګام نه پس باید د خېبر بېنک بچ کولو د پاره هم دغسې د حزب اختلاف یو شریک اواز پورته شي او خېبر بېنک د سونامۍ پۀ لاس تباه کېدو نه بچ کړے شي.

• بلین ټري سونامي:

افرین دې وي پۀ شګفته ملک بي بي چې اسمبلۍ کښې پۀ خپل اکثریت غاوره د فوج، عدلیې او نېب پرکټي تحریک انصاف نه ئې د بلین ټري پراجېکټ د انکوائرۍ پۀ مطالبه لاره کوڅه خطا کړې وه. هر څو کۀ تحریک انصاف د پوندو زور وکړو چې دغه لړ کښې کمېټي جوړه نۀ شي خو پۀ اوچ زور پرې دغه کمېټي جوړه کړې شوه. د بلین ټري پراجېکټ پۀ مختلفو سائټونو د دورې شیډول مخې ته راتلو سره د نا اهله او نالائقه پي ټي اٰئي لۀ خوا د پښو ویستلو کوششونه هم شروع شول. بنو کښې ټاکل شوي سائټونه وکتل شول او دا هر څۀ پۀ میډیا هم راغلل خو هغه نافرمان نشته چې ترجمه ئې وکړي چې دا څۀ دي؟ د احتساب ادارې کوم دي؟ د نا اهله او نالائقه عمران خان هغه احتساب څۀ شو چې وئیل به ئې زۀ به لوټ شوے دولت پرې راوړم؟ کېمرو ولیدل چې ټولې لس کروړه اونې هم نۀ دي نال شوې – شوکت یوسفزے اوس هم وائي چې د کرپشن ثبوت راکړئ!!! هغه نا اهله او نالائقه خو پۀ چین کښې ووئیل چې پینځۀ اربه مو لګولي دي – نور دې خداے خېر کړي. دا خو لا د کاغذ نه لګیا ؤ – دا خو پرې څۀ زور نشته، لا چې درې کاڼي ورته کېږدې!!! د دۀ پرې څۀ خو پۀ خداے د کاڼي پۀ سر به ورته ارب زیات کړي.

اپوزیشن ګوندونه کۀ د دوي صرف دا رګ هم راټینګ کړي او دوه درې دورې نورې وکړي نو اخر به د دې شادوګو ګډوونکي هم پۀ ځان چک ولګوي چې دا مو څۀ د غولو ټوکرۍ پۀ سر ایښې ده؟ دا رګ ئې پرېښودل نۀ دي پکار.

• بي اٰر ټي:

د فوجیانو د یو نیازي د برکته چې څنګه پاکستان پۀ مشرقي او مغربي پاکستان کښې تقسیم پاتې شو، دغه شان پېښور هم د دوي لۀ برکته پۀ مشرقي او مغربي پېښور کښې د بي اٰر ټي پۀ وجه تقسیم دے. د دې خوا خلق د هغې خوا او د هغې خوا خلق ئې د دې خوا غم ښادۍ باندې ستومانه کړي دي. کوم مارکیټونه چې وو، هغه ئې ټپ کړي دي. بي اٰر ټي کښې کله بس نۀ ځي، کله ئې جنګلې تنګې شي، کله ئې څپرونه )شلټرونه( نري باد سره والوځي، کله پکښې د ګېس پائپونه راشي، کله پکښې د اوبو ویستو لاره نۀ وي او کله د وۍ وۍ کنه د برکته بارانونه وي – نۀ داسې کومه ښېره پاتې شوه او نۀ داسې کومه کنځل چې اولس ونۀ کړه. د تحریک انصاف هغه د تبدیلۍ پۀ ډنګ اریان هم چې یو بل ته وګوري نو نوې کنځل پۀ خولۀ نۀ ورځي. د شپږ ویشت اربه روپیو نه شروع شوې منصوبه دوه د پاسه شپږ شلې اربه روپیو ته ورسېده خو دوېم سر ئې نۀ معلومېږي. نن هم کۀ فوج، عدلیه او احتساب د نا اهله او نالائقه عمران خان او د هغۀ د نا اهله او نالائقه پي ټي اٰئي نه لاس واخلي نو پاڅتر مخ به پراتۀ وي.

• دوست ممالک کا پېکج:

پۀ ګرانۍ کښې ورځ پۀ ورځ کېدونکې اضافې اولس دې ته جوړ کړے چې یوه چغه ووهي. د خلقو د بې روزګاره کولو او د روزمره ضرورت د څیزونو نرخونه اسمان ته خېژولو سره کۀ یو خوا دا اندېښنه ده چې پۀ جرائمو کښې به اضافه وشي نو بل طرف د المیه دا ده چې د ریاست پۀ ژبه د دوست ملکونو نه د ‘پېکج’ پۀ نامه کوم قرضونه راوړے کېږي، د دې د واپسۍ به څۀ لار وي. دا خو داسې ده چې راتلونکي نسلونه ګاڼه کېږي. د روزګار وعدې او دعوې به هله وریادې کړې شي چې چړمار پارلېمان ته لاړ خو شي کنه! د اپوزیشن ګوندونو لۀ خوا د پېکجونو پۀ نوم د راوړے شوو او چې لا راوړے کېږي، قرضونو تفصیلات د مخې ته راوړو مطالبه حکومت نه کوي او حکومت پۀ ډډه نۀ اوړي. یو سوال پورته کېږي – دا چې کۀ پۀ پردي ملک کښې د کرپشن د اوچت شوي غږ سره یوه پوره پانامه ډرامه بلکې فلم چلېږي او د هغې نتیجه کښې د الزامونو پۀ بنیاد یو منتخب وزیراعظم نا اهل ګرځول کېږي نو بیا پۀ ملک کښې دننه د مالي او انتظامي بد عنوانیو پۀ حواله ابهامات ولې پرېښودے کېږي؟ حکومت ولې د اپوزیشن پۀ مطالبه د پېکج پۀ نوم د بهرنو ملکونو نه د اخستونکو قرضونو شماریات او شرائط نۀ ښکاره کوي؟ ایا دا پېکجونه او قرضونه هغه چا د پاره اخستل کېږي چې د ریاست پۀ څلورو ستنو کښې د ټولو نه زوروره ستن ده؟ پۀ مختلفو حوالو تېره لسیزه د مزمت نه د مزاحمت پۀ لور تلونکې لسیزه ده – دې کښې نۀ خو د چا د شیروانۍ خیال ساتل کېږي، نۀ د پټکي او نۀ پۀ اوږه د پرتو مېډالونو – ځکه نو د اولس رایې سره ټګي کول، د اولس رایې ته سپک کتل او سیاسي انجینئیرنګ کول ملک یو داسې طرف ته بوتلے شي چې هلته به تنازعات زیات وي – خلق به د ریاست پۀ یوه ستن هم اعتماد نۀ کوي او ظاهره ده چې هر څۀ د اعتماد تر حده دي.

• احتساب:

سره د دې چې د احتساب پۀ نامه ئې شرمونه وشرمول، سره د دې چې کومه صوبه کښې )خېبر پښتونخوا( کښې ئې د تبدیلۍ بنیاد ایښودلو، هر چا پسې به ئې سپکې سپورې وئیلې او د غل غل چغې به ئې وهلې؛ خپله مالي او اخلاقي غل، پۀ تېر وزیر اعليٰ ئې د کرپشنونو الزامونه، د وزیرانو او مشیرانو لۀ خوا ئې پۀ یو بل د کرپشنونو الزامونه، موجوده وزیر اعليٰ ئې بدنام، فضاګټ سکېنډل، حیات اباد فلائي اوور سکېنډل، بي اٰر ټي سکېنډل، بلین ټري سونامي سکېنډل، فوجي کمپنیو له د ټهېکو شکل کښې د بهتې ورکولو سکېنډل، دهشت ګردو له د قلنګونو ورکولو سکېنډل، د بني ګاله د جائیداد سکېنډل، د جهانګیر ترین د بلټ پروف ګاډي سکېنډل، د خور د غلا سکېنډل، د علیم خان سکېنډل، د زلفي بخاري سکېنډل، د مراد سعید سکېنډل، د شېخ رشید سکېنډل، د پنجاب د وزیر اعليٰ سکېنډل، د وزیر اعلاګانو د اختیاراتو سکېنډل، د ګورنرانو سکېنډل، د ترجمې واله سکېنډل، د چوهدري سرور سکېنډل، د ټېریان سکېنډل، د اېم کیو اېم سره د ‘پارټنرشپ’ سکېنډل – د سکېنډلونو مور پي ټي اٰئي – د سکېنډلونو زوے عمران خان – خو د پېښور احتساب کمېشن تاله پروت دے – نېب ډبنګے بدمعاش دے، خلق پرې وېروي – عدالت یوه غېر اعلانیه ‘استثنٰي’ ورکړې ده – د Slip of tongue د نوې ټېکنالوژي پۀ ذریعه ایران کښې د ترهګرۍ د پېښې ذمه خپله اخلي او دلته بیا توتقل ووائي – د اخلاقي ګراوټ حد دا چې ‘صاحبه’ ووائي او بیا توتقل ووائي – د دروغو حد دا چې لس کروړه اونو ته پاکستان کښې یو ارب وائي او چین کښې پینځۀ اربه – د بې شرمۍ انتها دا چې خاور مانیکا له وزارت نۀ ورکوي – د قربانۍ بې قدري دا چې د خپلو ورکرانو پۀ ځاے لوټې راټولوي – د نا اهلۍ ثبوت ئې دا چې خپله نا اهل یو نا اهل راخلي او د هغۀ پۀ ځاے بل نا اهل کابینه کښې د ادل بدل پۀ ځاے کښینوي – د جرأت د نیشتوالي حد ئې دا چې د پارلېمنټ یو هاوس کښې هم حاضري نۀ شي کولې – بیا هم چې کلکې سترګې دومره چې د احتساب خبرې کوي!!! لکه پۀ دۀ، غپور او میرا کښې هېڅ فرق نشته – خبرونو کښې ځان اِن ساتلو د پاره نور څۀ لري؟ هلکه هر څۀ چې وایې، وایه! خو د یو انتظامي، مالي، اخلاقي او سیاسي نا اهله، نالائقه، بد دیانته او پۀ هره خبره کښې اکاټ باټ کښې د غل راتلونکي پۀ حېث د احتساب نامه هم پۀ خولۀ مۀ اخله.

رښتیا! د ډېمونو هغه فنډ رېزنګ – رښتیا! هغه موبائل کارډ کښې به چې پېسې د زرداري او نواز شریف جېبونو له تلې – رښتیا! تۀ پۀ رښتیا او حیا څۀ کوې؟ پرېږده ئې.

• نېشنل اېکشن پلان:

پاکستان ګرے لسټ کښې دے – د هند سره د تاو تریخوالي نه پس وزیر اعظم ترخونو کښې لاسونه ورکړي وو او د هغۀ پالشیانو د نوبل پرائز د پاره د هغۀ نوم وړاندې کولو چې دنیا ورته ووې، لږه ساه واخلئ! ځان سپین کړئ! هسې مو خپل خلق ووژۀ او ماران مو هم ساتلي دي – مالي مرستې ئې ورته هم مشروطې کړې – د دنیا سترګو کښې خاورې باد کولو د پاره دا شوشه پرېښودې شوه چې پۀ نېشنل اېکشن پلان به عمل درامد کوو.

لکه د نا اهلۍ او نالائقۍ سره د بې شرمۍ هم انتها ده –

تا چې ووټ پۀ دې اخستو چې طالبانو له به وزارتونه ورکوم، دفترونه ورکوم، مالي مرستې ورسره کوې – عدالت نه ئې د ویستلو د پاره لارې چارې راوباسې – پیره چف وکړي او تۀ ووائې، اوس به ګورو! او نوره کهاته دې د هغې ټپې شکل کښې وي چې:

پۀ خولۀ به جنګ درسره وکړم

د سترګو کونج کښې به منت درته کومه

او بیا دا انتها چې لکه دنیا هم نۀ ویني!!! عالمي برادري نۀ، د هغوي خو خپلې پالیسۍ، خپل مفادات او خپل ضروریات وي – دا اولس چې جنازې ئې پورته کړې دي؛ ستاسو د بغض، د دهشت ګردو سره مینه او هغوي د پاره جاري خدمات او صدقۀ جاریه هغوي نۀ ویني؟؟؟

اکرام الله ګنډاپور د پاره د ریاستي مېډال اعلان او هارون بلور د پاره نۀ، د میا افتخار حسېن د تنکي شهید زوي قاتل د عدالت نه خوشي کولو د پاره کوششونه، د مشال خان شهید پۀ مرګ کښې د سزایافته مجرمانو سیاسي تعلق – دا هر څۀ څرګندوي چې د نېشنل اېکشن پلان پۀ حواله تاسو څومره څۀ کولے شئ! دا هر څۀ څرګندوي چې د خېبر پښتونخوا نوو ضلعو کښې د ائیني اصلاحاتو لاره کښې تاسو ولې د ټال مټول نه کار اخلئ! دا هر څۀ اولس له دا باور ورکوي چې تاسو د هغوي نمائندګان نۀ یئ، تاسو د چا “چاکران” یئ.

 

د ‘اتلسم ائیني ترمیم’ کرېډټ کۀ هر ګوند/ ګوندونه د اخستو دعويٰ کوي، پۀ دې خبره کول ضروري نۀ ګڼو؛ البته دا خبره پۀ ډېره ډاګه او غرور سره کوو چې د عوامي نېشنل پارټۍ نه پرته پۀ فکري، نظریاتي او عملي طور کله هم دا د کوم ګوند مطالبه نۀ ده پاتې شوې. د پراخه جمهوري سیناریو تخلیق کولو د پاره پۀ جزوي توګه دې ته د ‘وفاقیت’ نمائنده ګوندونو منشورونو کښې هم ځاے ورکړے دے خو د اختیار لاس ته راتلو سره ئې دغه خبرې لکه د اوسني حکومت د ‘تبدیلۍ’ د دعوې پۀ بډه وهلې دي.

اتلسم ائیني ترمیم د عوامي نېشنل پارټۍ د نعرې ‘خپله خاوره خپل اختیار’ معنون کښې څرګنده ښکاري. د دغه ترمیم د پاره پاکستان دوه ځایه کول روا شوي وو خو دغه اختیار نۀ ؤ منلے شوے. عوامي نېشنل پارټۍ هم د دې نعرې دومره زور وزغمۀ چې د دولس سوه شهیدانو جنازې ئې پورته کړې. نن هم پۀ هره حواله عوامي نېشنل پارټي محاصره کښې ده – د ریاستي او غېر ریاستي عناصرو خواګانې سړې نۀ دي. د اتلسم ائیني ترمیم د راتلو نه پس یوه اوږده موده ژوره ساه راکښلې شوې وه. سازشونه وبڼل شول، واګې راکش کړې شوې، غوږونه تاو کړے شول خو سیاسي ګوندونو پۀ داسې متفقه ائیني جمهوري ترمیم کښې بدلون د پاره د تاریخ مجرمان کېدو ته غاړه کښېنښوده. بیا یوه ګنګوسه د ‘باجوه ډاکټرین’ پۀ نوم وشوشنېدله. دې پسې میډیا، احتساب او ډېمونو والا چیف جسټس یو ځاے شول او پارلېمان ته ئې لنګتۍ کېښوده. د وزیرانو مشیرانو د وزیر اعليٰ پورې پۀ یو بل د کرپشن د کېسونو اٰن دي رېکارډ الزامونو نه ټاک شوز کښې د یو بل ګرېوانونو ته لاس اچولو پورې، د بي اٰر ټي، حیات اباد فلائي اوور، بلین ټري سونامي، خېبر بېنک، پانامه، پارټي فنډز اٰډټ، چندې، پۀ شل کروړه د سوېمنګ فول جوړولو او ‘ټېریان خان’ پورې مالي او اخلاقي کېسونو کښې ګرفتار ‘تبدیلي خېل’ قومِ یوتهـ ته لۀ هره کرپشنه، لۀ هرې ګڼکپۍ او لۀ هرې ټګۍ استثنٰي ورکړې شوه – د نورو ګوندونو نه د احتساب او نېب پۀ لاټۍ او د ‘بوټ’ د لتې پۀ دهمکۍ مرغۍ تحریک انصاف ته هاو کړې شوې – میډیا ائیر ټائم ورته واخستے شو، د مانیټرنګ ایجنسیو رپورټونه ئې حق کښې راوړے شول او اخره کښې د سیاسي انجینئیرنګ پۀ نتیجه کښې د پراخه بې شرمۍ سره دهاندلي وکړې شوه او حکومت تحریک انصاف ته وسپارلے شو.

مونږ ډېر احتیاط سره دې لیکنې د پاره د لفظونو انتخاب کوو او د هر لفظ د ذمه وارۍ د احساس سره استعمالوو.

د دې هر څۀ نتیجه هغه تېره ورځ د یوې بګتۍ صورت کښې مخې ته راغله کله چې نا اهله، نا حلفه، د دهشتګردۍ، نا اهلۍ ټرېډ مارک او پۀ هره حواله پۀ ارټیکل کاټ باټ (Article 61/62) پوره پوره ختونکي عمران خان ووئیل،

اٹھارویں ترمیم کے بعد وفاق دیوالیہ ہو گیا ہے۔

اتلسم ترمیم کښې داسې څۀ دي چې وفاق پۀ دې سره دیوالیه شو؟ دا څو نکتې دلته د لوستونکو پام ته ږدو.

د دې ترمیم سره د 1973 ائین کښې درې اتیا ارټیکلونه بدل شوي دي چې ورسره د جنرل ضیاء د اتم ترمیم او د جنرل مشرف اوولسم ترمیم هم د ډېره حده پورې د منځ نه وړے شوے دے.

مونږ پښتنو ته زمونږ د خاورې د شناخت د اوږدې مطالبې صورت کښې ‘خېبر پښتونخوا’ نوم راکړے شو. دا مطالبه د ‘پښتونخوا’ وه خو چا چې ‘پښتونخوا نۀ زغملو، هغوي ورسره د خپل سوخت سړولو د پاره د ‘خېبر’ نوم اضافي ولګولو. عوامي نېشنل پارټۍ دغه نوم بې د څۀ غږ غوږه ومنلو. ‘خېبر’ یو علامت ؤ – دې ثابتوله چې د ‘خېبر’ پښتونخوا نه انتظامي بېلتون غېر فطري دے او بیا مونږ ولیدل چې اتۀ کاله پس د وفاق زېرِ انتظام ‘خېبر’ پۀ انتظامي توګه د پښتونخوا برخه شوه. لا خو هلته بوټان دي، زر ده چې ائین به هلته هم لاګو شي – د پینځو نه تر د شپاړس کلونو عمر پورې ماشومانو ته لازمي او مفت تعلیم ورکول، دا تعلیم مورنۍ ژبه کښې ورکول )یاده دې وي چې د عوامي نېشنل پارټۍ دور کښې د څۀ تعصب یا د شاونزم نه قطع نظر، پښتو سره نورو ځائي ژبو هندکو، کهوار، سرائیکۍ او کوهستانۍ ته هم د قامي ژبو حېثیت ورکړے ؤ او دې لړ کښې ‘خېبر پښتونخوا ریجنل لېنګوېجز اتهارټي’ هم جوړه کړې شوې وه. څۀ وشو کۀ تبدیلي خېلو پرې د خاورو اړولې کوشش کړے دے، بیا به سور بېرغ نۀ خېژي څۀ( –

د وفاق د مختلفو اکایو )صوبو( تر منځ د وسائلو منصفانه تقسیم یوه بله لاس ته راوړنه ده. د صوبې پۀ امدن کښې د صوبې برخه وټاکلې شوه او صوبه تر یوۀ حده مالي خپلواکۍ پله لاړه. دا ټولو صوبو د پاره شوې فېصله وه – د مالیاتو او سیاسیاتو پوهان دا هم وائي چې د تحریک انصاف حکومت صوبې ته راوستلو د پاره یو مقصد دا هم ؤ چې خېبر پښتونخوا کښې پۀ یو اېړ غېر ترقیاتي منصوبې د مرکز او بهرني بېنکونو نه قرضو باندې روانې کړي او صوبه مالي استقامت ته پرې نۀ ږدي. د شپږ ویشت اربه روپیو د دعوې نه شروع شوې، اتۀ څلوېښت اربو ته رسولې شوې او اوس شپږ شلې اربه ته خېژولې شوې بي اٰر ټي ئې یوه نمونه ده. بیا پۀ صوبه کښې ټولې منصوبې فوجي کمپنیو ته سپارل چې د احتساب محتساب واله چوڼ ونۀ کړے شي، هم د دغه ګمان یقین ته رسولو د پاره یوه نخښه ده.

د دې تر څنګه چې جنرل ضیاء د اسمبلۍ ماتولو د پاره د 58(2B) لاندې اختیارات صدر ته ورکړي وو، هغه ختمېدو نه پس مشرف جرنېل بیا بحال کړي وو؛ اتلسم ائیني ترمیم کښې ورله بیخي سر وچقولے شو. اوس د پارلېمان واګې د وفاق د علامت ګوتو کښې نۀ وي. هاغه مشرف چې هغه ورځ به ئې سوکونه څنډل، خبریالان وائي چې اوس چونچاڼۍ کښې خوئېدلے، خوار د پاکستان خود مختاره (!) عدالت ته پېشۍ له راتلو نه بیا پرېوتے دے. راتلل خو ئې څۀ کوې چې هغه پي اېس اېل مېچونو کښې څنګه خوار خوار ناست ؤ. الله!

دې ترمیم سره صوبې یو شمېر امورو کښې خپلواکه کړې شوې او هغه مختلفې محکمې او ادارې چې اصولاً د صوبو اختیار کښې پکار وې، د مرکز د داړو نه خلاصې کړې شوې. د بجلۍ د پېداوار اختیار پۀ مکمله توګه صوبو ته ورکړے شو. صوبائي قرضې، د اېمرجنسي د نفاذ اختیار )دا کار مخکښې ګورنر او صدر کولے شو، اوس به ئې د صوبې چیف اېګزېکټیو کوي(، مختلفو مدونو کښې قانون سازۍ، د قدرتي زیرمو او قدرتي ګېس او قومي فنانس کمېشن اختیار صوبو تر لاسه کړو.

صدر یواځې د وفاق علامت نۀ ؤ، دۀ سره نورې هم ډېرې ګوتې وې. لغاري د بېنظیرې انکل ؤ، غلام اسحاق د نواز شریف ؤ. بیا چې هغه اس کے پیچهے کله وقهرېدل نو دواړو انکلانو دوه غوټې پارلېمان او جمهوریت له ورکړې وې – اتلسم ترمیم صدر نه دغه ګوتې غوڅې کړې. مخکښې به وزیر اعظم د کابینې فېصلو نه صدر خبرولو او کۀ صدر ته به ‘دغو’ اپروول ورنۀ کړو نو هم صدر دا اختیار لرلو چې دغه قانون نظر ثانۍ د پاره ستون کړي یا ئې غوټ ختم کړي؛ اوس به دغه فېصله د پارلېمان مشترکه اجلاس کوي.

دا چې ډنګډونګے غږېږي چې ‘ اٹھارویں ترمیم کے بعد وفاق دیوالیہ ہو گیا ہے ‘، نو د دې پۀ شا چې مو بلې نه خبر کړو – شپږ ارټیکل – مخکښې به کوم جرنېل تندے کور بوټ کړو او مات به ئې منتخب حکومت کړو، بیا به ورته د ډېمونو د چندو واله غوندې کوم ججان ناست وو، ایسته به ئې د ‘نظریۀِ ضرورت’ تر مخه د مارشل لاء توثیق وکړو – اوس دې وکړي!!! اوس دا سنګین ترینه غداري ده او سزا ئې نېغ پۀ نېغه مرګ دے. دا ټوپک واله فوجیان خواران خو څۀ نه خبر نۀ دي، د دوي خو تربیت دغه ووله او مۀ ووله وي، دغه مشران چې ئې توبه خدایه توبه! بیا خو ئې زور دغه وي چې دوبۍ ته د ملا د دړد پۀ بهانه لاړ شي، هلته ډسکو میسکو کښې ګډ شي او چې د پېشۍ سمن پسې جاري شي نو چنچاڼۍ کښې درز وخوري!!!

اوس نو راځو دې له چې واقعي ملک دیوالیه شوے دے؟

اتلسم ترمیم دې ‘مملکتِ خداداد’ کښې جمهوریت له تحفظ ورکړے دے، د اولس رایې ته ئې حېثیت ورکړے دے، د مارشل لاګانو مخه ئې نیولې ده، صوبو ته ئې اختیار ورکړے دے، د اولس د ټېکسونو پۀ اولس لګولو د پاره ئې اختیار ورکړے دے، د اولس منتخب کړو نمائندګانو ته ئې د قانون سازۍ حق ورکړے دے، پۀ صوبائي وسائلو ئې اولس ته حق ورکړے دے، قامیتونو ته ئې د هغوي پېژندګلو ورکړې ده.

وفاق اتلسم ائیني ترمیم نۀ دے دیوالیه کړے، ټول قام د جنګي اقتصاد عیاشۍ او خود سرۍ دیوالیه کړے دے. پاکستان د اتلسم ائیني ترمیم پۀ وجه ‘ګرے لسټ’ کښې دے؟ دا بي اٰر ټي د اتلسم ائیني ترمیم پۀ وجه نۀ پوره کېږي؟ دا ملک اتلسم ائیني ترمیم دوه نیم زره اربه روپۍ دې څو میاشتو کښې قرضدارے کړو؟ دا قرضې به د عوامو بېنجو نه نۀ وځي؟ دا افغانستان سره د تجارت لارې اتلسم ائیني ترمیم بندې کړې دي؟ دا نوو ضلعو کښې د اساسي قانون د نفاذ لاره کښې اتلسم ائیني ترمیم خنډ دے؟ دا جهانګیر ترین عالمي ادارو او ملکي محکمو کښې سر براهي د اتلسم ائیني ترمیم پۀ وجه کوي؟ هغه ډېمونو واله فنډ اتلسم ائیني ترمیم ته لاړو؟ د ګاونډي ملکونو سره دا تعلقات د اتلسم ائیني ترمیم پۀ وجه خراب دي؟ دا د پي ټي اٰئي د عمران خان، جهانګیر ترین، علیم خان، علیمه خان، زلفې او پروېز خټک وغېره خلاف 43 کرپشن کېسونه اتلسم ائیني ترمیم جوړ کړي دي؟ دا د عمران خان لُور ټیریان او زامن د خپل پلار خوا له راتلو نه اتلسم ائیني ترمیم نیولي دي؟

مړه نو خو نو خو!!!!

دوي ته به سړے څۀ ووائي؟

 

 

ایماندارو!

تش لاس مۀ تېرېږئ!

یه هلکه! جو هغه چې مونږ واړۀ وو او پۀ جومات کښې به پۀ یو خوووږ غږ نعت شروع ؤ،

“ګلونه راوړه د ګلزاره

هاشمي ګل ګل ګل

د مدینې نبي سرداره!

هاشمي ګل ګل ګل”

او بیا به ئې خانه جو نعت پۀ نیمه کښې پرېښود او وې به ئې،

“دا وخت جو علي سېد ماشوم پینځۀ روپۍ امداد وکړو، خدایه! جو علي سېد خپل مور پلار ته صالحه نېک عمله قران خوانه لوےکړې او جو دا پینځۀ روپۍ ئې هغه ځاے کښې پۀ کار راولې جو کوم ځاے چې ئې اړخ لګي.”

او دې پسې به پیته جو بدله شوه،

“یو ګزار بل غواړي

رانړېدلې امریکه ده”

او یه هلکه! هغه کټ خو خانه جو اوس هم کلي کښې د سړک پۀ غاړه پروت وي او یو کاکا ورسره سپینه جهنډه پۀ لاس غږ کوي،

“تش لاس مۀ تېرېږئ ایماندارو!

ایماندارو د خداے کور جوړېږي! جو تش لاس مۀ تېرېږئ!”

او جو سود خورارۀ هم پکښې پۀ دې نیت لسګون ورچال کړي چې ایماندارو کښې به ایسته جو قلارې یاد شم!!!

هغه ورځ مې د تبدیلي سرکار د یو سیګریټانو جوړولو واله وزیر پۀ ټویټر ولیدو جو د انګرېزۍ د “ډان” ورځپاڼې د دیارلسم اګست 1947 د اخبار یوه ټوټه ئې ورکړې وه جو د پاکستانیانو باباے قوم جناح صاحب پکښې جو “سمندر پار پاکستانیانو” ته د چندې د پاره خواست کړے ؤ. جو د قومِ یوتهـ د باباے قوم نوي ورژن چې کله وزیر اعظم کېدو سره اعلان وکړو چې،

“هغه ما د قرضو نۀ اخستو لاپه کړې وه، جو هغه توتقل!!!

او هغه ما چې کومه د بهر پرتو پېسو راوړو بګتۍ ویشتې وې، جو هغه هم توتقل!!!

ملک چلولو د پاره د ټکې کاسیرې درک نۀ لګي، چندې راوړئ چې ملک درله وچلوم خانه جو!”

بس بیا نو جو د سیګریټانو واله دغه ټویټ وکړو او جو پۀ سبا ئې بخښنه وغوښته. بخښنه غوښتل جو دومره لویه خبره نۀ ده، غلطۍ باندې جو بخښنه غوښتل غټ زړۀ غواړي ـــــ مګر دا خو بائي ډیفالټ جو د “یو ټرن ازم” واله دي جو پۀ دوي دومره اثر نۀ کوي.

هلکه جو تا ته به هغه “قرض اتارو او دا ملک سم ډېر سنوارو” واله هغه نعره هم یاده وي کنه!!! خو هغه خو جو د پټواریانو قیصه وه نو جو د پټواریانو قیصه کښې به چخچي نۀ وهو!!! نېغ کار به تبدیلي سرکار سره جو ایسته ساتو!!!

خانه جو زۀ پۀ تا لرې لرې چورله بابا چورله ولې وکړم؟ کۀ هېرېږي دې نۀ نو هغه “تعمیرِ سکول” پروګرام خو به دې جو ایسته یاد وي!!! هغه چې عمران نیازي به جو وئیل چې د خېبر پښتونخوا حکومت به د دهشتګردۍ د لاسه وران شوي سکولونه بیا ودانوي.

جو بیا څۀ وو؟ جو خانه حکومت ایسته درې نیم کروړه روپۍ پۀ اشتهاراتو ور وتپلې او جو ټوله چنده دوه کروړه څلوېښت لکهه روپۍ وشوه. پۀ بله ورځ پسې خانه جو نۀ هغه ‘تعمیرِ سکول’ واله پروګرام ؤ او نۀ ئې جو بیا ایسته هغه وېب سائټ ؤ چې څوک پرې سرکاري اعداد و شمار وګوري.

د دیانت حال خو دا دے چې نورو سیاسي پارتیو کښې ئې جو پۀ کومو خلقو د غلا الزامونه لګول، پي ټي اٰئي کښې ئې ځاے کړل؛ جو عمران خان ته ئې هغه ټولو مالي او اخلاقي کېسونو کښې استثنٰي ورکړه ایسته او جو نور دیانت خو دا دے چې جو خانه کۀ دفاعي بجټ دے او کۀ جو جرنېلان او ججان دي، جو ټول د احتساب نه بالا دي. هغه تېر حکومت کښې جو یو قرارداد پاس شوے ؤ چې د جرنېلانو او ججانو احتساب هم پکار دے. بله ورځ جو څۀ وو چې دغه قاضي القضاة جو د ډېر قهره نور هم سم تک شین شو او جو ایسته د کرپشن ډبلۍ ئې د نواز شریف سر ته راوبغوله.

جو خانه پرون دیسي وه چې ‘تعمیرِ سکول’ د پاره چنده کښې ئې د جېب نه پسې یو کروړ لس لکهه ايښودې وې او دار العلوم حقانیه له ئې جو درې پنځوس کروړه چنده ورکوله.

نن هم جو تش لاس مۀ تېرېږئ ایماندارو! سبا به هسې هم څۀ نۀ وي. دا مال ایسته د غلام رسول د مور د زامنو دے ایماندارو جو!!!

 

 

یو ځل بیا نوے پاکستان جوړ شو او دا ځل څۀ بل شان جوړ شو.

یو ځل چې جوړ شو نو ‘قائداعظم’ ئې ؤ، پۀ دوېمه پېره کښې ئې ‘قائد عوام’ پۀ نصیب ؤ او دا ځل چې بیخي تازه تازه نوے جوړ شو نو ‘وزیراعظم’ ئې پۀ غاړه شو.

هغه د سلیم صافي خبره چې څۀ پۀ زړه، ورسته او ریقړه لاره ئې ‘نیا پاکستان’ جوړ کړو ـــ

یو خوا عمران خان دا وئیل چې ما دوویشت کاله سیاسي مبارزه وکړه خو ځان د پاره ئې دوویشت کسان ‘خپل’ د اسمبلۍ د پاره تیار نۀ کړے شول. هغه مرغۍ چې د ایوب خان نه بهټو سره الوتې وې، بچي ئې د ضیاء نه نواز شریف ته او يحيٰ خان نه بېنظیرې ته پاتې شوي وو ـــ بیا ټول پۀ یو ‘پررررررر’ سره د مشرف پۀ څانګه ناست وو؛ دا ځل د ‘زوړ پاکستان’ نه نوي پاکستان ته اوړېدو د پاره پۀ سوباړي سوارۀ شول.

داسې چیت پیت شان جاج به ئې واخلو!!!

تېر ځل چې خداے انتخاباتو کښې ‘باقي’ پاکستان ته ‘خېر’ کړو او د چېنج قېنج صرف پۀ پښتنو وروتپلے شو نو د خېبر پښتونخوا د نوي کولو لوظ وکړے شو. د صوبې د زوړ حکومتي ګوند اے اېن پي پۀ ضد چې څومره پراپېګنډه د بدعنوانۍ او کرپشن شوې وه، ‘د عمران حکومت’ چې پۀ نورو ګوندونو هم د کرپشن کوم بې درېغه تورونه لګولي وو؛ هغه هر څۀ پۀ خپل ځاے پاتې شول. پوره پینځۀ کاله چغې سورې ووهلې شوې خو کوم دوه درې چنده ‘ازاد’ احتساب کمېشن چې صوبه کښې جوړ کړے شوے ؤ، تېر درې کلونو نه هغه صوبائي کمېشن ته تاله وهلې پرته وه. وجه ئې دا وه چې کمېشن کوم معلومات جمع کول، تېر حکومت کښې څۀ نۀ وو خو د نوي حکومت د وزیراعليٰ نه وزیرانو او وزیرانو نه مشیرانو پورې ټول لګیا ؤ د یو بل خلاف ئې د کرپشن ثبوتونه پېش کول. د دې ایماندارۍ نتیجه دا شوه چې احتساب بند کړے شو.

د ضیاء افریدي خبره به نۀ کوو، یو جسټس رېټائرډ چې د خپل ګوند دننه د بدعنوانۍ ‘تفتیش’ د پاره ورته عمران خان ذمه واري سپارلې وه، هغه جسټس وجیه الدین چې رپورټ پېش کړو نو د غل پۀ ځاے ئې هغه جج صاحب لکه د احتساب کمېشن د سربراه د هغۀ کور ته ولېږلو. نن هم د جسټس وجیه الدین سوخت د هغۀ پۀ بیانونو کښې ښکاري.

څومره ‘چېنج’ چې هم ؤ، د سوشل میډیا پۀ پېجونو خور ؤ. د تعلیم د ‘یکسان نظام’ پۀ نامه چې کوم نصاب د مخکښې نه تیار کړے شوے ؤ او د دهشتګردۍ، انتهاپسندۍ او فرقه واریت پۀ حواله ئې صفر مواد لرل؛ هغه نصاب ئې ټول پۀ ټول انګرېزۍ ژبې ته کړو او د تېر کال د جون پۀ میاشت کښې د شوې سروې تر مخه پکښې د شپږ سوه نه زیات داسې مواد شامل کړے شوي چېې هغه ټولنه کښې دهشتګردۍ، انتهاپسندۍ او فرقه واریت ته لمن وهي.

زۀ کۀ اوس تفصیل کښې ځم نو د پاڼو رېنج به ختم شي خو د چېنج ناهنجاري به ختمه نۀ شي ـــــ د تعلیمي او صحت اېمرجنسۍ سره سره ئې معلومات او خدمات ته د رسایۍ قوانینو پورې هم ملنډې وکړې چې د جمهوري قوتونو پۀ لاس د جوړ شوي اتلسم ائیني ترمیم لاندې ئې د صوبې د اولس قسمت بدلولے شو کۀ چرته صوبه کښې د تبدیلي پۀ ځاے د کوم سنجیده جمهوري ګوند حکومت جوړ شوے ؤ. ‘معلومات تک رسائی کا قانون’ کۀ بیا مکمل توګه باندې غېر فعال ؤ نو لوکل باډیز له د اختیاراتو ورکولو ډُوزې ویشتو نه پس اخره کښې ضلعي حکومتونو سره چې کوم دوه لوے اختیارات یعني د ‘برتهـ سرټیفیکېټ’ او ‘ډیتهـ سرټیفیکېټ’ جاري کولو کوم اختیار ؤ، هغه ئې ترې هم واخستو.

د ‘بیلیون ټري سونامي’ پۀ نامه چې د یو ارب شپاړس کروړه اونو لګولو کوم دغه باد کړے شوي وو، د هغۀ حساب کتاب دا نتیجه راوړه چې د یو ارب شپاړس کروړه پۀ ځاے صرف او صرف ‘دوه کروړه، شپږ اویا لکهه، نولس زره’ اونې لګولې شوې وې ـــــ هر څو کۀ دا عدد هم توثیق غواړي خو بیا هم کۀ مونږ دا تناسب وګورو نو دې نه به ثابت شي کوم ځاے ‘چېنج’ وئیل چې مونږ دوه څلوېښت اونې لګولې دي، هلته یوه اونه لګېدلې وه ــــ یعني 1:42. څوک دې پۀ ایمان ووائي چې د بې ایمانۍ دا تناسب خو کۀ د ملک پۀ دفاعي بجټ کښې وي، وي به؛ ځکه چې اٰډټ او پړتال ئې نۀ کله هم څوک نۀ شي کولے، نور خو قرانګو کۀ دا څوک هم ومني.

حیات اباد کښې ئې یو پُل جوړ کړو ــــ بیخي پرونۍ خبره ده او څۀ ضرورت هم نۀ لري چې سړے پۀ تېر شوي مار پسې هسې پۀ زمکه راکېږدي خو بیا هم، دغه پُل پۀ نظر کښې نۀ ؤ ساتلے شوے. کۀ پُل هډو ساتلے شوے نۀ ؤ نو ولې بي اٰر ټي ته هم د اولس پام نۀ ؤ؟ یوه داسې منصوبه چې د هغې د پاره اوس لګښت اویا اربه نه زیاتېږي او هغه هم پۀ بهرنیو قرضونو!!! یوه داسې منصوبه چې افتتاح د پاره ئې اپرېل کښې لوظ شوے ؤ نن هم ــــــ کۀ دغه ترې هم هېر وو نو دا وړومبي څلور کلونه چې ترې ترقیاتي فنډونه لېپس شوي وو او کۀ دغه وړومبي څلور کلونه ترې هېر وو نو دا نا اهلي څنګه د اولس نه هېرېدې شوه چې پینځم بجټ ئې هډو پېش نۀ کړے شو!!! مالیاتي انتظام داسې چې پۀ پینځۀ کاله کښې یوه ادېله هم مرکز نه وانۀ خستې شوه او صوبه تاریخ کښې پۀ وړومبي ځل پاو کم څلور اربه کهربه روپۍ قرضدارې کړې شوه. ولې؟

د امن و امان پۀ حوالې سره د ټول ملک د اولسونو پۀ نمائندګۍ پۀ وړومبي ځل د دهشتګردۍ مونډ ویستلو د پاره د اٰرمي پبلک سکول د یو سل څلور څلوېښت شهیدانو د وینې توئېدلو نه پس لکه سنجیدګي ښودلې شوه او د نېشنل اېکشن پلان پۀ نامه یوه کوټلې لاره خپله کړې شوې وه. پاکستان خپله ‘قومی دهارا’ کښې دغه پلان پۀ مبینه ‘قومی بیانیه’ جوړ کړے ؤ. چېنج کۀ څۀ بدلون راوستے ؤ نو دا چې دغه بیانیه ئې غوجل ته وویشتله. چېنج داسې کله هم نۀ شول کولې خو لۀ بده مرغه پۀ مرکز کښې ناست مسلم لیګ او اتحادیان پۀ پښتونخوا کښې ناست چېنج او د هغې ټول اتحادیان د طالبنائزېشن حامیان وو. هغوي د دېرش کروړه روپیو پۀ عوض د امن ‘اقدام’ پینځۀ کاله د پاره ګاڼه کړو. دې موده کښې کۀ د دهشتګردۍ خلاف څۀ جنګ شوے ؤ نو د هغې اثرات هم زائل کړے شول او پۀ یو نوي انداز کښې دهشتګردۍ ته د بیا منظم کېدلو موقع ورکړې شوه. تحریک انصاف د ترهګرۍ سره پۀ مرسته او کومک کښې د پخواني متحده مجلس عمل نه ډېر وړاندې لاړل. د اے پي اېس واقعې نه پس هغوي باچاخان پوهنتون باندې برید وکړو او ورپسې ئې پۀ بل کال زرعي پوهنتون کښې پښتانۀ ګلونه ورژول. اقدام؟ یوه سندره جوړه شوه او پۀ دولسمه ورځ عمران خان د نئے پاکستان تکل کښې نوے وادۀ وکړو چې بیا هغه نکاح هم د دهشتګردۍ پۀ ضد د ټوقانچو د اپرېشن انجام ته ورسېدله. دې دووسې پالیسۍ دهشتګرد داسې زړۀ ور کړل، دومره د تیارۍ وخت ئې ورکړو چې کۀ تاسو خپله حافظه لکه راوسپړئ نو د فرورۍ پۀ دیارلسمه پنجاب کښې د اسمبلۍ مخې ته خودکش برید نه دوه ورځې پس پېښور، مومند او شبقدر کښې پۀ یوه ورځ څلور خودکش حملې وشوې چې دې کښې د سلو نه زیات قیمتونه ساه ګانې ووژلې شوې. پۀ شپاړسمه سېهوان شریف او ورپسې چارسده کښې د کچهرو مخې ته درې خودکش ورسېدل. پۀ دوویشتم تاریخ ‘رد الفساد’ شروع کړے شو او بیا قیصه ګواټو له لاړه. اوس چې د انتخابي مهم دوران د شهید هارون بلور، ګنډاپور او رئیساني غوندې ککرۍ ښکار کړې شوې نو د دې پړه هم د مرکزي او صوبائي حکومتونو پۀ سر ده. دې موده کښې امنیتي ادارو د مخکښې نه د ګرفتار شوو مبینه دهشت ګردانو د پوځي عدالتونو د پهانسۍ سلسله وخت پۀ وخت د حملو نه پس کامیابۍ سره جاري ساتلې ده.

د ‘نیا پاکستان’ جوړولو کښې خفیه ادارو هم خپل بهرپور کردار ادا کړو. پۀ اسلام اباد کښې د عمران خان د وړومبۍ جعلي دهرنې او جنرل پاشا د تعلق نه پۀ فېض اباد کښې د لبېک د تحریک دهرنې پورې چې پۀ خاتمه ئې شرکت کوونکو غازیانانِ اسلام ته پۀ دیاړۍ ورکولو هم ثبوتونه موجود دي او نوره قیصه بیا ککړې مرغۍ د تحریک انصاف پنجرې کښې ټومبلو د پاره اوس د تاریخ حصه شوه. پۀ اتلسم ائیني ترمیم کښې د ارټیکل شپږم لاندې د نوي شق اضافې سره چې کله عدالتونو د ائین د ماتولو د اقدام هغه صلاحت بائیلو نو راغلې ‘جوډیشل مارشل لاء’ خپلې داړې او نُوکې تېرې کړې. دې سره الېکشن کمېشن پوره ذمه واري واخسته او د فارمونو بدلولو رابدلولو نه د امیداوارانو د اعلانونو پورې هره چاره پوره بې ایمانۍ سره وکړې شوه چې هر څنګه وي او جمهوریت خوښه قوتونه د انتخابي عمل نه وتمبولے شي. د عمران خان وزیر اعظم کولو د پاره او نوي پاکستان جوړولو د پاره کۀ یو خوا پۀ پاڅتر سپېړه د مېن سټریم سیاسي ګوندونو مخه ووهلې شوه نو بل طرف ته د یو هوښیار خبره چې د جهانګیر ترین ‘نا اهله’ کول هم د نیا پاکستان د پاره لاره سپړدل وو. جهانګیر ترین د انتخاباتو د جنجال نه لرې وساتلے شو چې بیا پۀ دمه ذهن د انجینئیرنګ پۀ څۀ نه څۀ ځاے کښې غلطے شوے وي نو چې پاتې کار ورله هغه خپل جهاز کښې وکړي. د دې یو غټ ثبوت دا هم دے چې هغه د اسفندیار خان خبره ‘کۀ چرته اګۍ هم ماته شي نو چیف جسټس پرې از خود نوټس اخلي خو د دۀ عدالت نا اهل کړے یو بد دیانته سړي د جهاز نه ټانګه جوړه کړې ده او دا ځوان ړق نۀ وهي!!!’ د خداے قدرت ته ګوره چې چیف جسټس د عدالتي ذمه واریو او خپل فرائضِ منصبي پۀ ځاے ډېمونه جوړول د خپل ژوند مقصد ټاکلے ؤ او چې اوس نیا پاکستان جوړ شو نو زر ئې ووئیل چې دا د ججانو کار نۀ دے. فنډونه به ئې هم قائمول.

الېکشن کمېشن نوي پاکستان جوړولو د پاره درې لکهه اویا زره سجیلے جوان غوښتي وو او د نهه اربه روپیو پۀ عوض دغه خدمات لاس ته کړے شول. ټوله خرچه 21 اربه روپۍ ـــــ د الېکشن کمېشن چاپ کړي ووټونه پولنګ د پاره سټېشنونو ته رسول او هلته نه بیا الېکشن کمېشن ته ‘محفوظ’ رسول د پوځ د ځوانانو ‘اٰفیشل’ کار ؤ. اګرچې پوځ یوه ذمه واره اداره ده او هر څۀ اٰفیشل کېږي، البته د قوم د وسیع ترین مفاداتو پۀ وجه غېر رسمي طور د نوي پاکستان جوړولو د پاره هغوي د تحریک انصاف د پاره نۀ صرف دا چې پۀ پولنګ سټېشنونو کښې ووټونه غوښتل بلکې د دې منزل ترلاسه کولو د پاره ئې د نورو سیاسي پارټیانو ټوپۍ، بېج یا بله څۀ نخښه لرونکي کارکنان هم پۀ هر لحاظ بهر او غېر مؤثر ساتلو کښې خپل کردار ادا کولو.

د پولنګ پوره کېدو نه پس چې کومو سیاسي ګوندونو ګټلې وه، ټولو وبائیلله!!! د سلو، د اویا، د پنځوسو کالو کُل وقتي سیاسي ګوندونه د مبیّنه دوویشت کلن سیاسي پلے بوائے مخې ته راوپرځولے شول. سیاسي ګوندونو نتیجې رد کړې. هغوي دې ته د تاریخ د ټولو نه پلیت انتخابات وائي. عالمي مبصر مهم هم وائي چې ـــــ خو کۀ څوک هر څۀ وائي، د انتخاباتو د غېر شفاف کېدو نه پس دې کښې د ټګۍ ټورۍ او دهاندلۍ دې نه لوے ثبوت څۀ کېدے شي چې کوم فارم 45 د ووټونو شمېرلو نه پس د انتخابي امیدوارانو مقرر کړو اېجنټانو ته ورکول وو، هغه فارم تر نن ورځې 30) جولائي( نۀ دے ورکړے شوے. د دې لغړې ټګۍ نور به څۀ لوے ثبوت وي چې پۀ یوه یوه حلقه کښې دوه دوه درې درې ځله اعلان کېږي چې پلانکے وګټي نه وبائیلي، نه وګټي، نه وبائیلي. د دې لغړې ټګۍ به نور څۀ ثبوت وي چې تر دې دمه کومه حلقه هم د نوي پاکستان راسپړدې شوې ده، لاندې ترې هم هاغه زوړ پاکستان پروت وي. د دې لغړې ټګۍ نور به څۀ لوے ثبوت وي چې د موسمیاتو د محکمې مطابق د اګست میاشت به هم د دې نتیجې اورولو راورولو کښې تېږېږي!!! د دې لغړې ټګۍ به نور څۀ لوے ثبوت وي چې پۀ 2002 کښې د مسترد شوو ووټونو د شمېر 75720، د 2008 د 93994 او د 2013 د 102717 پۀ مقابله کښې پۀ دې انتخاباتو کښې 5201384 ووټونه مسترد کړے شوي دي. پۀ یوه یوه حلقه پۀ زرګونو ووټونه مسترد کول او هغه هم د هرې هغه پارټۍ چې نخښه ئې سوباړے نۀ وي. کمال دا دے چې دا ووټونه چترال نه تر بولانه او طور خم نه تر واهګې یو ووټ باندې دوه دوه درې درې مهرونه وهلو باندې مسترد کړے شوي دي!!!

کومه حلقه چې هم پرانستې کېږي، د ‘بن رها هے نیا پاکستان’ د نعرې پۀ تناظر کښې، ‘اینټ سے اینټ بج رها هے نیا پاکستان’ نعره زیات شور سره مخې ته راځي. دا نیا پاکستان جوړولو د پاره هره غېر ائیني، غېر جمهوري او غېر ذمه وار حرکت کوونکي عدلیه، الېکشن کمېشن او پوځ هم پۀ دې پوهه شول چې ‘شمشتۍ غرۀ کښې ښکار نۀ شي کولے.’

سیاسي ګوندونه ټول یو غږ او ګام ولاړ دي. ټول ګوندیز کنفرانس شوے، بل هم وشو او بل به هم وشي. تر دې دمه دا پرېکړه شوې ده چې منتخب شوي ارکان به اسمبلیو ته ځي او حلف به اخلي. ایوان کښې دننه به هم د لغړې ټګۍ پۀ ضد احتجاج کېږي او ایوان نه بهر هم.

نوے پاکستان بس جوړېږي ـــــــ

د جهانګیر ترین جهاز او نېب یو شان لګیا دي، عدلیه هم لګیا ده. سبا بله ورځ به طلال چودهري هم خپل لیډر سره اډیاله کښې وي.

عمران خان به حلف اخلي ــــ مودي به راځي، عامر خان به راځي، کپېل دېو به راځي، سدهو به راځي، د عمران خان درې واړه بچي هم پکار ده چې راشي، خاتونِ اول به هم. )هغه نۀ راځي؟ ښه!(

یوه وړه غوندې تاریخي مسئله بس پاتې ده ــــ چې اوس به چوده اګست د چوده اګست پۀ ورځ کېږي کۀ نه، د شپاړسم دسمبر غوندې به پینځویشتم جولائي ته هم څۀ حېثیت حاصل نۀ وي.

د قائد اعظم پاکستان!

د قائد عوام پاکستان!

د وزیر اعظم پاکستان!

زنده باد دې وي عدلیه، الېکشن کمېشن او پاک فوج.

پائنده باد دې وي ریکاونټنګ!

 

 

مینارِ پاکستان، لاهور ـــ پاک سر زمین شاد باد!!!

لاهور، چرته چې د مرکزي اسمبلۍ دیارلس او د صوبائي اسمبلۍ د پنځویشت حلقو ابادي ژوند کوي ـــ یو کروړ یوولس لکهه شپږویشت زره دوه سوه پینځۀ اتیا ـــ پۀ دغه لاهور کښې د تبدیلي سرکار جلسه او دې کښې نوي یوولس نکات، نه ريښتیا، نوي نکات نۀ، یوولس نوې شتۍ ــــ

د زنده دلانو ښار، مینارِ پاکستان او د تحریک انصاف جلسه کښې چې د پېښور نه کومې قافلې لاهور ته تلې وي، هلته ئې د عمران خان خبرې اورېدلې وي، کندې کپرې او خځلې خځلې پېښور به ئې مخې ته ولاړ وي، خپل ضمیر به ورته څۀ وئیلي وي؟؟؟

عمران خان راتلونکو انتخاباتو د پاره د خپلو یوولس نکاتو اعلان هم پۀ لاهور کښې ځکه مناسب وګڼل چې پېښور کښې دغه اعلان د پاره نۀ ځاے ؤ او نۀ کومه روغه لار ـــ عمران خان به خپله پۀ هیلي کاپټر کښې راغلے ؤ خو لیدو له اورېدو له به ئې څوک پۀ کومه کنده کښې پرېوتل؟

د عمران خان (هم د هغۀ مطابق) یوولس نکتو کښې یکسان تعلیم، صحت، د کرپښن خاتمه، ټېکس نظام کښې بهتري، سرماه کاري، روزګار کښې اضافه، زرعي اېمرجنسي، انصاف، پولیس اصلاحات، مضبوط وفاق او خواتین د پاره جامع پروګرام شامل دي.

د تعلیم حال دا چې هر څۀ ئې پۀ یو چوپ انګرېزۍ ته اړولو سره دا وګڼل چې ګنې ما یکسان نظامِ تعلیم راوستو ــــ وه هلکه! د قاسم، سلمان او مراد سعید خاطر وکړه، پۀ یوه ګېنټه کښې درې پرچې، د وائس چانسلرانو نه بغېر چلېدونکې یونیورسټۍ، د استاذانو بهرتۍ د پاره د پروفېشنل ډګرۍ ختمولو غلطي، تېرو څلورو کلونو نه د استاذانو احتجاجي مظاهرې، نابالغ ایجوکېشن سروس اېکټ، د ‘سیکولر’ جامعه حقانیه د پاره کروړونه او د نورو یونیورسټیو نه سترګې پټول، د کالجونو پرائیوېټائز کولو د پاره د بورډ اٰف ګورنرز چال، فیسونو کښې دوه سوه فیصده اضافه، د پنځوسو نه د کم شمېر لرونکي زر سکولونو بندولو ګام، پېښور یونیورسټي چې 2013 کښې د ملک څلورمه یونیورسټي وه، د تبدیلۍ څپېړې سره دیارلسم نمبر ته تلې ده ـــــ

صحت!!! چې د شوکت خانم هسپتال مثال ورکوې، د لېډي رېډنګ مثال ورکولے شې؟ دا صوبه چې تۀ ئې د “چېنج” شهکار یادوې، دلته چې کومه لویه انساني المیه پۀ مردان کښې شوې وه، د هغې فرانزک لېبارټرۍ له هم دغه لاهور ته ناست وې!!! د ډینګي پۀ ضد د صحت انصاف، تېره میاشت کښې د هسپتالونو دننه د ناقص انتظام پۀ وجه څومره پلارانو خپل بچي غېږ کښې نیولي ستا انصاف ته ښېرې کولې!!! هغه بله ورځ چې چیف جسټس صاحب درله ابره راوسپړده نو د پروېز خټک پۀ خولۀ کښې ولې مالوچ پراتۀ وو؟ دې هسپتال له خو تا امریکې نه د خداے بخښلې شوکت خانم د خور زوے ‘ډېسټنټ ډائرېکټر’ ساتلے کنه!!! د ډاکټرانو احتجاجونه، د ینګ ډاکټرز وریتې چیغې!!!

د کرپشن خاتمه!!! مړه نو!!! احتساب کمېشن کوم دے؟ ستا د کابینې خپل وزیران مشیران پۀ شمول د وزیر اعليٰ ـــ دا هم پرېږده! تا وئیل چې چا پۀ بدعنوانۍ شل ممبران ویستي دي؟ تۀ ما ته ووایه چې بل چا سره شل بدعنوانه وو؟ دا شکر وباسه چې اېمپائر لا ډیسیجن پنډنګ ساتي ګنې باسټهـ ترېساټهـ د پاره د تحریک انصاف مالیاتي کېس، د شوکت خانم د پاره د شوو چندو پړتال، د صوبې وسائل بغېر د څۀ استحقاق نه استعمالول، پُوچه خولۀ، سپکاوے کول، د بني ګاله د زمکې خرد برد، نیازي کمپني، سیتا وائټ، بلېک بېري، د بشريٰ مانیکا خوب!!!

نېکبخته! باسټهـ ترېساټهـ کښې خو لاهو لاهو ئې. مالي څۀ چې پۀ تا خو اخلاقي کېسونه هم دي.

ټېکس نظام کښې بهتري!!! سرمایه کاري!!! روزګار کښې اضافه!!! زرعي اېمرجنسي!!! وه صاحبه! صبر!!! د ضلعي حکومت د سطحې پۀ خبرو کښې راګېره صاحبه! تۀ خو پۀ لاهور کښې د وزیراعظمۍ د پاره وزرې نۀ تلې؟؟؟ خارجه پالیسي؟ داخله پالیسي؟ ګاونډیانو سره تعلقات؟ د صوبو تر منځه د وسائلو د تقسیم څۀ لار ګودر؟ سیاحت د پاره د مالم جبې دننه د زمکو غېر قانوني الاټمنټ، وزیراعليٰ هاوس اولس د پاره پرانستل، صوبه کښې د امن ساتلو د پاره د کومې مؤثرې بیانیې یا عملي اقدام پۀ ځاے د ترهګرۍ سرچینو ته د اصلاحِ نظام پۀ نوم قلنګونه ورکول، شپږ نیمه سوه ډېمونه، اېنډ وټ ناټ اېنډ وټ ناټ!!!

دا شکرونه وباسه چې عوامي نېشنل پارټۍ د خپلې اوږدې مبارزې نه پس د صوبې د پاره مالیاتي ازادي او د وسائلو د استعمال حق ګټلے، پۀ هغې د پاسه دې هم صوبه درې سوه اربه قرضدارې کړه ـــــ بي اٰر ټي د پاره قرضې، سوات اېکسپرېس وے د پاره قرضې، بلین ټریز سونامي کښې څربې څربې شوړې، د بوټي پۀ سر اتلس روپۍ!!! تۀ هم صادق او امین ئې؟؟؟

انصاف!!! هغه موبائل کورټس چې تا یادول کنه!!! څۀ پته ئې لګي؟ وایه نه!!!

پولیس اصلاحات!!! هغه پولیس چې د ترهګرۍ پۀ ضد جنګ ئې مورال اوچت کړے او اخلاقي معیار سینګار کړے ؤ، د اولس باور ؤ پرې، هغه پولیس دې دومره سیاسي کړل چې اخبارونه ډک دي.

مضبوط وفاق!!! د څلورو پنچرونو نه شروع شوې ستا ډانس دهرنا څلور میاشتې پس پۀ څلور د پاسه اووۀ شلې شهیدانو وینې سره غلې شوه، خو د دغه شهیدانو لا څلوېښتي هم نۀ وه شوې چې تا خانه ابادي وکړه!!! بیا دې اسلام اباد لاک ډاون!!! پۀ ټي ويګانو حملې، پارلېمنټ ته کنځلې، د سیاسي اخلاقیاتو جنازه او تۀ او مضبوط وفاق؟؟؟ سه فریقي حکومت!!! شېرپاو بهر، شېرپاو دننه!!! بهر پۀ څۀ؟ جي ټول کرپټ وو!!! بیا دې څنګه راوستل؟ جي ټول کرپټ نۀ وو!!! د خېبر بېنک مسئله؟؟؟ جي هغه پۀ کرپشن چې مو څوک بهر کړي وو، د هغوي مشر مو ورله مشر کړو!!! اوس څۀ شول؟ جي بیا مو رخصت کړل!!! ولې؟ جي مونږ سره اسلام اباد لاک ډاون له نۀ وو تلي!!! جماعت اسلامي خو هم نۀ وو تلي کنه؟ جي نۀ وو تلي خو پۀ هغوي زمونږ د اتحاد اعتماد ؤ!!! اوس جماعت اسلامي؟ جي اعتماد مې پرې نۀ شو کولے نور!!!!

چې ستا پۀ خپله اسمبلۍ کښې شل کسان خرڅېږي، تۀ خپل ممبران پۀ پېسو اخلې، چې ستا وزیران، مشیران او وزیراعليٰ ټول پۀ سنګینو مالي بدعنوانیو کښې ککړ دي، تۀ به مضبوط وفاق جوړوې؟؟؟ د صوبې څلور بجټونه درنه لېپ لاړل، پینځم بجټ د پاره درسره نۀ مطلوبه تعداد شته او نۀ کورم، نو تۀ به وفاق څۀ مضبوط کړې، تۀ به کرپشن څنګه ختم کړې، تۀ به بهر نه سرمایه کاري څۀ راوړې؟

اولس دا حق خو لري چې تپوس درنه وکړي چې کۀ کرپشن بقولِ ستا نشته، کۀ حکومت بقولِ ستا ډېر دیانتدار دے، کۀ بهر نه سرمایه کاري بقولِ ستا راځي، کۀ د وزیرانو پروټوکول ختمولو سره ملیونونه روپۍ میاشت بقولِ ستا بچت کېږي نو دا صوبه دې پۀ تاریخ کښې پۀ وړومبي ځل د ملکي او بېن الاقوامي مالي ادارو سره ګاڼه څنګه کړه؟؟؟ د صوبې خپل امدن، ریوینو، د بجلۍ منافع، د اوبو منافع، تجارت، ادارې!!! دا پېسې چرته لاړې چې تا صوبه د بېن الاقوامي او ملکي ادارو سره ګاڼه کړه؟؟؟

د ښځو د پاره جامع پروګرام!!! فوزیه چوهدري، مراد سعید، د شیرین مزاري لور، رېحام بي بي، عائشه ګلالۍ او داسې نورو تور سرو له عزت ورکول زده کړه. پۀ دومره علمي او عملي ژوند کښې هم د اقتدار پۀ فال د نکاح تر حده تلونکے به جامع پروګرام ولري؟

د بیلین ټري سونامي غږ او دې کښې کرپشن!!!

د درې نیم سوه ډېمونو اعلان!!!

حیات اباد کښې د بابِ پشاور د پاسه د ټرېفک بندېدو تخته!!!

بلدیاتي امیدوارانو له اختیارات ورکول او بیا تروړل!!!

د منږکانو ښکار!!!

خېبر بېنک سکېنډل!!!

اتحادونه پۀ جذباتو جوړول، پۀ دروغو ماتول!!!

د بني ګاله د اخستو سکېنډل، د بني ګاله اوسېدو سکېنډل!!!

جهانګیر ترین او نواز شریف د پاره بېل بېل اخلاقي جواز!!!

د تعلیمي ادارو نه مورچې او چاوڼۍ جوړول!!!

‘ګرین پشاور’ کروړونه خرچ کول او بیا ‘ان ګرین’ کول!!!

‘جنګله بس’ او کندې کپرې پېښور!!!

د ‘معلومات تک رسائی’ نه پسپائي!!!

د احتساب کمېشن معطل کول!!! مړه هغه احتساب کمېشن کښې هم بدعنوانۍ او بې ضابطګۍ!!!

پۀ شل شل بدعنوانانو انصافیانو پینځۀ کاله خاموشي!!!

د سیاسي اخلاقیاتو قتل!!!

تۀ داسې وکړه چې د 11126285 اوسېدونکو لاهوریانو ته د 1970042 اوسېدونکو د پېښور خبرې پۀ مینارِ پاکستان کښې مۀ کوه، ځکه چې میډیا ډېره تېزه ده او پېښور ته کېمرو سترګې نیولې دي. چې دا روانه روژه ووځي نو د ډمامو د ډنګاري پته به ولګي. اولس د جعلي جمهوریت بقولِ ستا، جعلي انتخابات بقولِ ستا، جعلي عدالت بقولِ ستا، جعلي پارلېمنټ بقولِ ستا، جعلي الېکشن کمېشن بقولِ ستا، جعلي نېب بقولِ ستا او جعلي فېصلې بقولِ ستا نه یو قدم وړاندې تلي دي، هغوي اوس د ‘اصل’ جعلي تبدیلۍ نه هم خبر دي. د 2018 انتخابات د پاره ستا دغه یوولس نکتې اصل کښې نوې شتۍ دي.

شوکت خانم هسپتال زنده باد ـــــ لېډي رېډنګ هسپتال مرده باد!!!!!