د باچاخان سکولونو مشري چې کله نه اېمل ولي خان ته حواله شوې ده، د هغه ورځ نه د باچاخان سکولونو د ستونزو حل کولو ښۀ مثبتې فېصلې شوې دي. چې د ټولو نه لويه ګټوره فېصله پۀ کښې پۀ باچاخان سکولونو کښې انجمن جوړول وو. دې فېصلې سره د سکولونو د مالي مرستې نظام مکمل بدل شو. ځکه چې تراوسه پورې به دا ټول سکولونه د نورو ملکونو پۀ مالي امداد چلېدل. پۀ دې وجه پۀ کښې د وطن د خلقو څۀ قسمه دلچسپي نۀ وه. عامو خلقو به وئيل چې د باچاخان سکولونه NGO والا چلوي. او د خلقو خبره هم دروغ نۀ وه ځکه چې د اېن جي او والا خپل اهداف وي او هغه پوره کول غواړي.
خو ولې حقيقت خو د دې نه بدل دے. د باچاخان سکولونو جوړولو مقصد خو د باچاخان ازادو مدرسو پۀ طرز سکولونه جوړول وو چې د قام د بچو تعليمي او سياسي روزنه وکړې شي. چې داسې تعليمي نظام وي چې د خاورې بچي د خپلې خاورې ، د هغې د وسيلو، د خپلو خلقو، د هغوي د ژبو، د هغوي د کلتور،کړۀ وړۀ، ثقافت، کلتور، تاريخ او ادب نه خبر شي.
دا هر څۀ به هغه وخت ممکن وي چې د وطن خلق باچاخان سکولونه خپل وګڼي او انتظام ئې پۀ خپل سر واخلي. هم دغه خبره اېمل ولي خان د پښتونخوا پۀ کچ د پارټۍ ټولو ضلعي تنظيمونو ته کېښوده. چې ترکومه پورې مونږ د هر يو سکول لپاره د باچاخان د ازادو مدرسو پۀ شان انجمن نۀ وي جوړ کړے، دا سکولونه مخ پۀ وړاندې نۀ شي تللے.
انجمن بۀ څۀ کار کوي؟ دا خبره اېمل ولي خان پۀ تفصيل سره د صوبې ټولو د ضلعو تنظيمونو ته کېښوده، ښۀ پۀ تفصيل پرې خبرې وشوې، هر اړخ ته پۀ کښې وکتلے شو، پۀ دې لړ کښې د هر څۀ جاج واخستے شو، ټول امکانات پۀ نظر کښې وساتلے شو او دغه شان د پوره صلاح مشورې نه پس او د دې هلو ځلو پۀ نتيجه کښې د ټولو باچاخان سکولونو لپاره د انجمن جوړولوکار روان کړے شو چې اوس لۀ خېره دوامدار دے.
د خوشحالۍ خبره دا ده چې تېرکال پۀ ٢٠٢٠ز کښې د اکتوبر پۀ مياشت کښې د باچاخان سکول چارسدې لپاره انجمن جوړشو. بيا ورپسې د دسمبر پۀ مياشت کښې د باچاخان سکول سوات لپاره انجمن جوړشو. دې دواړو انجمنو خپل کار شروع کړے دے او پۀ سکولونو کښې بدلون پۀ نظر ښکاري. د سکولونو مالي مشکلات هم حل شو او د سکولونو نصابي سرګرمۍ هم مخ پۀ وړاندې روانې شوې. استاذان هم ډېر خوشحاله شو او ورسره د سکولونو ماشومان هم پراعتماده شو چې اوس به استاذان د تنخواه د نۀ ملاوېدو پۀ وجه سکولونه نۀ پرېږدي. بلکې ماشومانو سره به اوس محنت ډېر کوي ځکه چې مسئلې هوارې شوې اواستاذ ته اوس خپله تنخواه پۀ وخت ملاوېږي. د استاذ د تنخواه نه علاوه د سکول ټول انتظام چلولو کښې هغوي د سکول انتظاميې سره پوره مرسته کوي ځکه چې د انجمن دفتر پۀ سکول کښې وي.
اېمل ولي خان چې د انجمن جوړولو د پاره د باچاخان سکول صوابۍ ته را ورسېدو نو د باچاخان سکول ماشومانو ورته تود هرکلے وکړو. دا ډېره تاريخي ورځ وه ځکه چې دا هغه صوابۍ ده چې د لوے بابا فخر افغان باچاخان دوېم کور ؤ، چې بابا به دلته راتلو نو خلقو لۀ د خوشالۍ نه خوب نۀ ورتللو، هر ځاے به خوشالۍ وې او ټول خلق بۀ د بابا پۀ طمع وو ۔ نن پۀ هغه صوابۍ کښې د لوے بابا کړوسے او د بابا د نظريې، فلسفې او سياست وارث اېمل ولي خان د درنو او خوږو پښتنو پۀ خاوره د پښتنو د بچو د روښانه راتلونکي لپاره د بابا پۀ دوېم کور کښې ناست ؤ۔ پۀ پنډال کښې ورسره د انجمن ممبران هم ناست وو. د سکول ماشومانو ملي ترانه ووئيله. بيا اېمل ولي خان د سکول ټولو کلاسونوته لاړو او ماشومانو سره ئې د سکول پۀ باره کښې ډېرې خبرې وکړې. ماشومان ورته ډېر خوشحاله شو ځکه چې د پښتنو د بچو غمخوار ئې پۀ منځ کښې ولاړ ؤ ۔ د سکول د دورې پۀ مهال اېمل ولي خان د ماشومانو سره د تعليم پۀ اړه خبرې وکړې او زده کوونکونه ئې ډېر تپوسونه وکړل. دا ډېره د خوشالۍ خبره ده چې ټولو ماشومانو د صوبائي صدر د پوښتنو سم سم جوابونه ورکړل ځکه چې دا ګلالي بچي د باچاخان پۀ هغه سکولونو کښې تربيت کېږي چرته چې ماشومانو ته سم تاريخ او سم سبق ښودلے کېږي ۔ دې سکولونو کښې نۀ خو پروپېګنډه کېږي او نۀ تاريخ مسخ کول شي.
د چارسدې او سوات نه پس د باچاخان سکول صوابۍ د پاره د ٢٠٢١ز د فرورۍ پۀ اتمه نېټه د اېمل ولي خان پۀ مشرۍ کښې انجمن جوړشو. د انجمن د ممبرانو شمېر ٣٤ دے. اجلاس ته د خپلې وېنا پۀ وخت اېمل ولي خان ووئيل چې باچاخان سکولونه پۀ ٢٠٠٧ز کښې جوړ شوي دي خو ولې لۀ بده مرغه مونږ تراوسه پورې دا سوچ پۀ ځان کښې پۀ مجموعي توګه پېدا نۀ کړے شو چې دا سکولونو خپل او د خپلو بچو وګڼو. هغه ووئيل چې زما تاسو ټولو د صوابۍ مشرانو ته دا خواست دے چې باچاخان سکول خپل وګڼئ. دې ماشومانو ته داسې تعليمي ماحول ورکړئ چې کوم د مالداره بچي ته ملاو دے. هغۀ ووئيل چې نن ډېره زياته د خوشحالۍ خبره دا ده چې مونږ دا دے د يوکال نه هم پۀ کمه موده کښې د درېم باچاخان سکول د پاره انجمن جوړوو. وئيل ئې چې مونږ داسې نصاب جوړول غواړو چې د باچاخان سکولونو ماشومان د عملي ژوند پۀ هر يو اړخ کښې کامياب وي. کۀ چرې مونږ نصاب داسې ځاے ته ورسولو چې د باچاخان سکولونو د ماشومانو پۀ تعليمي نظام کښې نوم پېدا کړو نو بيا به د وطن سرمايه دار خلق هم تاسو سره پۀ باچاخان سکولونو کښې خپل ماشومان داخلوي.
دوي غونډې ته په خپله وېنا کښې ووئيل چې د صوابۍ خلق خو خوش قسمته دي چې تاسو ته د زېدې مشرانو ٣٠ کناله ځمکه پۀ تحفه کښې درکړې ده. انشاء الله زما اراده ده چې پۀ هغه ځاے کښې به “باچاخان ايجوکېشن کمپلېکس” جوړوو. اېمل ولي خان ووئيل چې دا کمپلېکس به لۀ خېره پۀ ټوله پښتونخوا کښې يوه داسې تعليمي اداره وي چې خلق به تاسو ته سفارشونه کوي چې پۀ دې اداره کښې راله ماشومان داخل کړئ.
لۀ دې وروستو اېمل ولي خان هاوس اوپن کړو او ټولو ممبرانو ته ئې بلنه ورکړه چې پۀ دې حقله خپل رائې ورکړي. ډېر خوندور بحث پرې وشو او ډېرې ګټورې مشورې مخې ته راغلې . اېمل ولي خان ورته ووئيل کۀ ستاسو سکول سره تړون برقرار پاتې شو نو دا ټولې مشورې بۀ عملي کوو.
د اجلاس دوران کښې اېمل ولي خان اعلان وکړو چې دې انجمن نه به اوس مونږ د بورډ ممبرانو لپاره د پنځۀ کسانو انتخاب کوو کوم چې به سکول سره پۀ رابطه کښې وي او هغوي به تاسو پۀ راتلونکو غونډو کښې خبر ساتي. بلکې د بورډ دفتر به پۀ سکول کښې وي. هم دغه شان د بورډ د ممبرانو لپاره انتخاب وشو ۔ پۀ دې غونډه کښې ټولو ممبرانو خپله چنده هم ورکړه.اېمل ولي خان ورته ووئيل چې تاسو له پکاردي چې خپلې د زکات روپۍ باچاخان سکول لۀ ورکوئ بلکې صفا ئې ورته ووئيل چې دا زما مخې ته کوم کسان ناست دي پۀ تاسو چې د کال څومره زکات فرض دے هغه دې سکول ته راوړئ. د بورډ ممبران چې کوم جوړکړے شول د هغوي تفصيل څۀ داسې دے ۔ ۔ ۔
صدر: وارث خان، سېکتر هدايت الله،فنانس سېکترنورالحسن
ممتاز ربي خان او ملک مهدي ورسره د بورډ ممبران شول
د باچاخان سکول پابېنۍ صوابۍ د سکول د انجمن پۀ بورډ کښې داسې ممبران راغلل چې د هغوي د تعليم پۀ مېدان کښې ډېره لويه تجربه ده. پۀ دې اميد سره چې دوي به باچاخان سکول لۀ ښۀ پوره وخت ورکوي. د سکول استاذانو لۀ بۀ ډېر لوے عزت ورکوي. د هغوي د جائزو مسئلو د حل کولو د پاره به پوره هلې ځلې کوي. دې سره به د سکول ماشومانو سره هم داسې نزدې اړيکې ساتي چې هغوي د استاذانو نه څومره مطمئن دي، او ايا د تعليم معيار د ماشومانو مخ پۀ وړاندې روان دے او کۀ نا. د ماشومانو مور او پلار سره به هم دا بورډ غونډې کوي تر څو معلومه کړے شي چې هغوي د استاذ او د سکول نصاب او ټولو هلوځلو ته پۀ کوم نظر ګوري. او بيا خپل دغه نظرونه د انجمن پۀ غونډو کښې ټولو ممبرانو سره شريک کړي. او د دې ټول هر څۀ پۀ رڼا کښې پۀ انجمن کښې داسې مثبتې فېصلې وکړي چې پۀ هغه کمزورو باندې قابو وموندے شي اودا مسئلې د باچاخان ټرسټ اېجوکېشنل فاونډېشن دفتر ته هم پۀ تحريري صورت کښې را واستوي.
زۀ اميد لرم چې کۀ مونږ ټول پۀ شريکه يو بل سره همکاري وکړو نوهغه ورځ لرې نۀ ده چې د باچاخان سکولونو ستونزې بۀ حل شي. د علاقې د خلقو باور بۀ وګټو. کۀ دې کښې مونږ کامياب شو نو د باچاخان سکولونو هدف بۀ پوره شي او د پښتون قام راتلونکے نسل به د نړۍ د قومونو د سيالۍ جوګه شي. دې سره سره بۀ د لوے بابا د خپل وريت پيت او وروستو پاتې قام د پرمختګ او ترقۍ خوب هم پوره شي ۔ کۀ د دې قام د روښانه سباوون خوب چا سل کلونه مخکېښې ليدلے ؤ نو هغه صرف او صرف زمونږ لوے بابا فخر افغان باچاخان دے ۔ باچاخان خپل ځان هېر کړے ؤ، خپل بچي ئې هېر کړي وو، خپل مال حال او جائيداد ئې هېر کړے ؤ خو د خپل قام د روښانه مستقبل لپاره ئې ځان هرې سختې ته نيولے ؤ ۔ راځئ چې پۀ شريکه د بابا خوب پوره کړو.