پښتون مجله – اېمل ولي خان ډائرېکټر، باچا خان ټرسټ

متعلقه مضامين

“د ديدار شوق او عامر” – سکندر خان سکندر

د هجري کلېنډر د مياشتو پۀ نومونو کښې پټ رازونه – فضل مومند

غني خان، يوه کتنه – مولانا محمد يوسف بونېرے، کوالالمپور

دا ډېره د خوشحالۍ او فخر خبره ده چې ‘پښتون’ پۀ خدائي خدمتګارو خصوصي نمبر وباسي.

خدائي خدمتګار تحریک زمونږ د قامي تاریخ هغه ځلنده پاڼه ده چې دې دانه وانه او ځان نه ورک قام ته ئې خپل شناخت هم وښودلو، د اولس د خدمت لاره ئې هم ورته زوته کړه او د عدم تشدد بیانیه ئې هم ورکړه – د پېرنګي سامراج خلاف د ازادۍ مبارزه چې پۀ کوم spirit سره خدائي خدمتګارو شروع کړې وه او بیا پرې هر ازمائش او کړاو ته د عدم تشدد د نۀ ماتېدونکې عقیده سره روان وو، د هغې مثال شاید کۀ د تحریکونو تاریخ کښې مونږ ووینو.

د پښتون قام پۀ حقله چې پېرنګيانو کومه خاکه دنیا ته وړاندې کړې وه او د دوي کوم وائلنټ، جنګیالے او جاهل تصویر ئې دنیا ته ښودلو، خدائي خدمتګارانو هغه بیانیه غلطه ثابته کړه. خدائي خدمتګارو د فخرِ افغان بابا پۀ مشرۍ او رهبرۍ کښې دنیا باندې دا حقیقت ومنلو چې د قبائلي نفسیاتو لرونکے، د غلامۍ پۀ زنځیرونو کښې بند پۀ بند راګېر قام د علم، زغم او همت پۀ زور د یو داسې طاقت سره وجنګېدو چې پۀ سلطنت کښې ئې نمر نۀ ډوبېدو. زۀ چې اوس هم کله د خدائي خدمتګارانو د سختیو نه د ډک ژوند داستانونه لولم یا چا نه اورم نو هم مې زړۀ دړدېږي او هم مې سر د فخر نه اوچتېږي.

زمونږ د نن سیاست او د عوامي نېشنل پارټۍ بیانیه د دغه قامي تحریک تسلسل دے. عدم تشدد، جمهوریت پسندي، روښان فکري، مساوات، برداشت او د قام پرستۍ نظریه زمونږ د پارټۍ د سیاست بنیادي اجزاء او مقاصد دي. مونږ کۀ د صوبائي خود مختارۍ خبره کوو، مونږ کۀ د اتلسم ائیني ترمیم د ختمولو پۀ ضد د مزاحمت خبره کوو، مونږ کۀ د نوو ضلعو )پخوانۍ فاټا( عملاً پښتونخوا سره د ادغام مطالبه کوو او کۀ مونږ د دې ریاست واکدارانو ته پۀ نېشنل اېکشن پلان د عمل کولو او خپلو ګاونډي ملکونو سره پۀ راستۍ د امن او ورورولۍ د تعلق د قائمولو موقف لرو نو د دې ټولو خبرو پۀ شا هم د دغه قامي تحریک د سلو کالو جدوجهد پروت دے.

باچا خان مرکز کښې د ‘خدائي خدمتګار لرغنتون )میوزیم(‘ د پرانستلو فېصله هم پۀ دې نیت شوې ده چې مونږ د خپلو جرړو سره خپلې رشتې پۀ هر صورت کښې محفوظې کړو. دې لړ کښې د باچا خان ټرسټ لۀ خوا جوړه شوې کمېټي دې هم دغسې خپل کوششونه جاري وساتي او کۀ کوم ځاے کښې هم زما ضرورت پېښېږي نو زۀ به د ټرسټ د ډائرېکټر نۀ بلکې د دغه کمېټۍ د یو عام ممبر پۀ شان حاضر یم او د خپلې برخې کار به سر ته رسوم.

تل دې وي خدائي خدمتګاري

تل دې وي پښتونولي

تل دې وي عوامي نېشنل پارټي

اېمل ولي خان

ډائرېکټر، باچا خان ټرسټ