Pakhtoon | The Magazine Publishing Since 1928
متعلقه مضامين
ضمني انتخابات او حکمران رژیم
پۀ ضمني انتخابات کښې د عوامي نېشنل پارټۍ او د اپوزیشن جماعتونو د اتحاد د امیدوارانو د کامیابېدو شرح چې د تېرو عامو انتخاباتو سره متقابل کړو نو پۀ تېرو انتخاباتو کښې د ادارو لۀ خوا د ټګۍ ټورۍ کولو او پۀ انتخابي نتیجو د اثر اندار کېدو الزامونه رښتیا ثابت شول. د پاکستان تحریک انصاف د جعلي مېنډېټ پرده هم دې نتیجو سره وشلېده. د دې مفروضې حقیقت نه هم انکار نۀ شي کېدے چې ګنې پنځوس ورځني حکومت کښې د پي ټي اٰئي ټولې لاپې دروغ وختې او اولس د پي ټي اٰئي پۀ ضد خپله رایه استعمال کړه ـــ خو ایا د پي ټي اٰئي تېر پینځۀ کلنه کارکردګي اولس لیدلې نۀ وه؟ بې شکه لیدلې ئې هم وه او د پي ټي اٰئي ټوله تبدیلي ئې هم مسترد کړې وه خو د پاکستان زورورو د خپلو پالیسیو مخ پۀ وړاندې بوتلو د پاره یو ربړ سټامپ حکومت غوښتلو او دغه اٰپشن د عمران خان غوندې سړي نه بغېر ممکن نۀ ؤ چې د کټ سر ته یوه خبره کوي او د کټ پیاړمې ته بله خبره کوي. عمران خان نن هم نفسیاتي طور پۀ کنټېنر ناست دے او کۀ څۀ وخت هم د پاکستان زورورو وغوښتله نو داسې بلها اخلاقي او مالي کېسونه شته چې د وزارت عظمٰي کرسۍ خو څۀ چې ورپسې به د کنټېنر نه هم چورلټ راکوز کړے شي.
پېښور نه د شهید هارون بلور د مېرمن ثمر بلور بریالیتوب د دهشت ګرد بیانیې شکست دے. دې سره دا خبره پۀ ډاګه شوه چې کۀ پاکستان کښې د زورورو ادارو او محکمو دننه د دهشت ګردۍ د بیانیې پټه خولۀ مرستیال هم ناست دي خو اولس د دغه بیانیې نه وېزاره دے. هارون بلور د خپل پلار شهید بشیر بلور او د عوامي نېشنل پارټۍ د یوولس سوه نه د زیاتو شهیدانو پۀ لار شهید کړے شوے ؤ او اولس د ریاست د پراپېګنډې مقابل د شهیدانو د وینې سره ودرېد. د پښتنو پۀ خاوره د امن ضمانت هم دا رویه ده چې کله مونږ هر شهید خپله وینه وګڼو او د دغه وینې پۀ ننګ ودرېږو.
مونږ د اپوزیشن جماعتونو مننه کوو چې د مېرمن ثمر بلور مقابله کښې ئې خپل امیدواران دستبردار کړل. دا وخت هم د پاکستان د اسټېبلشمنټ تقسیم شوے ذهنیت مخې ته ودرېدو او د دغه کنفیوژن لۀ مخه ئې د مېرمن ثمر بلور مقابله کښې خپل کس ودرولو )مونږ پوره ذمه وارۍ سره دا خبره کوو چې د مېرمن ثمر بلور مقابله کښې ولاړ کاندید د اسټېبلشمنټ ؤ(. د وزیر اعليٰ ضلع کښې دوه صوبائي حلقې او د ګورنر د حلقې بائیللو نه ثابتېږي چې تبدیلي سره د خپلو دعوو پۀ څو ورځو کښې ډانډت شوه.
پۀ خېبر پښتونخوا کښې د تحریک انصاف حکومت د پښتونخوا د اولس د رایې سره د خیانت نتیجه ده. اسمبلۍ کښې د سیاسي ګوندونو دا ذمه واري جوړېږي چې پۀ بهرپور انداز کښې د حکومت نګراني وکړي او د هرې داسې فېصلې مزاحمت وکړي چې د صوبې د لا مالیاتي، مدني او انتظامي زوال سبب جوړېږي. راروان اتم اېن اېف سي اېوارډ د پاره باید کلکولېشنز وشي. د پاکستان تحریک انصاف دا بهانه اوس نۀ چلېږي چې ګنې مرکز کښې مخالف حکومت دے او ځکه د خېبر پښتونخوا حقوق او واجبات لاس ته راوړل ګران دي. اسمبلۍ کښې د عوامي نېشنل پارټۍ د پارلېماني لیډر وېنا نه څرګندېږي چې اسمبلۍ کښې د ګوند نمائندګان پۀ زړۀ ورۍ سره د خپل انتخابي منشور مطابق د صوبې د مسئلو حل کولو د پاره خپل پارلېماني کردار ادا کوي. د دغه نمائندګانو پۀ اسمبلۍ کښې شوي تقریرونه او وړاندې کړي قراردادونه ښائي چې دا یو درځن پۀ حکومتي سرونو درانۀ دي. مونږ د خېبر پښتونخوا نوو منتخب شوو غږونو ته پۀ اسمبلۍ کښې تګ باندې مبارکي وایو او هیله ترې لرو چې هغوي به خپل مثبت کردار ادا کوي.
د پاکستان متعلقه خبرونو کښې د پاکستان انتشار
د نېب او عدالت ډانګورۍ د ریاستي عدلیې، سیاسي احتساب کمېشن او پالیسي ساز فوځ د وزیراعظم پۀ شا پوره استحکام سره ولاړې دي ـــ د پاکپتن د ډي پي او او د اسلام اباد د اٰئي جي پۀ حواله ښاغلي چیف جسټس د دې ریا کوشش وکړو چې ګنې زۀ قلار نۀ یم ناست، خو پۀ تېر حکومت کښې چې څنګه معزول شوے وزیر اعظم او د هغۀ د کابینې غړي او وزیران عدالت ته رابللے کېدل، هغه نۀ تکرارېږي، بلکې بني ګاله ریګولرائز کولو کښې هم فقط فلمي ډائیلاګونه وچلېدل. البته بیا هم ښاغلي جسټس شوکت صدیقي د خپل خطاب قیمت وصول کړو او دې سره فرق واضح شو چې یو څوک څۀ خبره کوي نو عدالتي فېصلې انحصار د خبرې پۀ نوعیت وي. د اېوي شکارف پۀ رپورټ د اسرائیلي جهاز پاکستان کښې د کوزېدو د خبر هم د اسامه بن لادن د موجودګۍ د خبر غوندې تردید وکړے شو. شهباز شریف ګرفتار کړے شو. د نواز شریف سزا معطل کړې شوه. اٰصف زرداري حکومت ته د پینځۀ کالو د پاره د تعاون وړاندیز وکړو. انګلېنډ کښې ډي جي اٰئي اېس پي اٰر ووئیل چې انتخابات راڼۀ او ډاګیز وو او هغوي پکښې مداخلت نۀ دے کړے. د جمال خشوګي پۀ مرګ خو د پاکستان لۀ خوا د خبرې نۀ کولو وجه معلومه ده. سعودي عرب حکومت درې اربه روپۍ ورکړې، درې اربه ئې ورله ډېپازټ کښې کېښودې، د درې اربو تېل به پۀ مؤخر ادائیګۍ ورکوي. دوبۍ هم د مرستې وړاندیز کړے دے. چین ته روان دے. اٰئي اېم سره خبره نزدې ده ــــ پۀ روزانه بنیاد چې د شپږ اربه روپیو د کرپشن خبره کېدله، هغه شپږ اربه اوس چرته ځي؟ پۀ سوېس بېنکونو کښې چې دوه سوه اربه ډالرې وې، هغه ډالرو پسې ولې دورې نۀ کېږي او نوې قرضې غوښتلې کېږي؟ د ‘اېف ټي اے اېف’ پۀ نزد لا پاکستان د ګڼکپ ریاستونو فهرست نه وتلو د پاره اقدامات نۀ دي اخستي. د سلمان تاثیر کلیزه او د اٰسیه بي بي د مقدمې فېصله غبرګ راروان دي.
پېښور کښې د پوهنتون دننه پۀ طالب علمانو بد ترین تشدد، مقدمې او د صوبائي حکومت سر زوري. د صوبائي حکومت سره بې د دې بل څۀ خبر نشته چې د هر خالي پۀ ورځ د ګورنر هاوس د سېلګرو تصویرونه جاري کړي. ‘فاټا ټرېبونل’ کښې د ځوړندو کېسونو حل څۀ دے؟ صوبائي بجټ کښې نوې ضلعې ولې نظر انداز کړې شوې؟ د صوبو برخې نه درې فیصده کټوتي ولې کېږي؟ د صوبې د ورځ پۀ ورځ زیاتېدونکي ‘تهرو فارورډ’ باوجود ولې د سیاسي مقاصدو د پاره د نوو منصوبو اعلانونه کېږي؟ پۀ نوې شاملو شوو ضلعو کښې سول انتظامیې ته ولې لاره نۀ هوارولې کېږي؟ وزیر اعليٰ ولې پۀ ډانګ ډولۍ سوات نه ګاډي ته وخېژولے شو؟ نور خبرونه به پرېږدو!!!
د اپوزیشن ګوندونو د اٰل پارټيز کانفرنس رابللو د پاره مولانا فضل الرحمان د خپلو رابطو سلسله کښې ولي باغ ته راتلو سره د رائیونډ او بلاول هاوس دوره هم کړې ده. نزدې ده چې دغه کانفرنس وشي او د اپوزیشن ګوندونو یوه شریکه تګلاره هم مخې ته راشي. ملک نور د زورورو قوتونو پۀ لاسونو کښې د یرغمال پرېښودو پۀ ځاے باید سیاسي ګوندونه یو غوڅ اقدام پورته کړي. د ملک خارجه پالیسي ګاڼه او داخلي پالیسي ړنده ده. ریاست د اداره جاتي مفادو پۀ نتیجه کښې اولس د بد امنۍ، ګرانۍ او سپکاوي سره مخ کړے دے.
د پاکستان متعلقه خبرونو کښې د پاکستان ټول انتشار پۀ نظر راځي. د یوې حادثې پۀ خبر د بلې حادثې د خبر خاورې بادولې کېږي خو دا کله هم نۀ تسلیمېږي چې اوس باید د حادثو مونډ ویستلو د پاره سنجیده ګامونه د یوې متفقه جامع منصوبه بندۍ پس وشي. دلته نېشنل اېکشن پلان پۀ فوځي عدالتونو کښې د پهانسۍ د سزا توثیق پورې راکونج شي ــــ دلته معاشي او اقتصادي پالیسۍ د خېراتونو او قرضونو د راغونډولو د صلاحیت پورې راغونډې شي او دلته د هر سیاسي فشار منځ نه وړو د پاره د انتهاپسندۍ او دهشتګردۍ د واقعاتو فلم وچلولے شي. سیاسي ګوندونه ځانونه د پړ کولو پۀ ځاے باید د غېر سیاسي قوتونو د مداخلت مخه ونیسي.