ارباب مجيب الرحمان او زۀ – الطاف قادر

متعلقه مضامين

“د ديدار شوق او عامر” – سکندر خان سکندر

د هجري کلېنډر د مياشتو پۀ نومونو کښې پټ رازونه – فضل مومند

غني خان، يوه کتنه – مولانا محمد يوسف بونېرے، کوالالمپور

د خليلو د سيمې د برتهکال ارباب مجيب الرحمان چې پۀ شپږ ويشتمه جنورۍ 2018 پۀ حق رسېدلے ؤ، ما سره يو ځاے پۀ “چلډرن نېپ” کښې ؤ، بلکې د چلډرن نېپ مشر ؤ. پۀ خليلو کښې د دې تنظيم سوچ 1970 کښې مجيب خان را ويستے ؤ چې د علاقې د ماشومانو پۀ خپلو کښې رابطه وي او سياسي روزنه هم ورسره پۀ ډېر ښائسته انداز کښې وشي. هم د دغه تنظيم برکت ؤ چې پۀ خليلو کښې داسې ماشومان را پېدا شو چې پۀ زلمي توب کښې هغوي قامي تحريک سره پۀ يو ځاے د بهټو د امريت خلاف پۀ هري پور جېل کښې بندېوان وو. هم دغه د چلډرن نېپ روزنه وه چې مجيب خان وروستو پۀ پښتون سټوډنټس فيډرېشن کښې داسې رول ادا کړو چې تنظيم ورله پۀ اسلاميه کالج کښې د خېبر يونين د صدارت د الېکشن لپاره ټکټ ورکړو. دغه وخت زما يادېږي چې زۀ اسلاميه کالج ته د فرسټ ائير داخلې لپاره لاړم، مجيب خان خپل د الېکشن کېمپېن شروع کړے ؤ.

دا د جون جولائي 1978 ورځې وې. کالج ته داخلو لپاره چې کوم هلکان راتلل، هغوي به ئې پوهول او ورله به ئې فارم ډکولو. کله چې پۀ ستمبر کښې زمونږ د فرسټ ائير کلاسونه شروع شول، د الېکشن کېمپېن هم ښۀ پۀ زور شروع شو. الېکشن پي اېس اېف وګتلو. مجيب خان د خېبر يونين صدر شو او نور د تنظيم ملګري ورسره منتخب شو چې پۀ کښې زمونږ د فرسټ ائير د طرفه مشهور کرکټر ذاکر خان هم الېکشن وګټلو او هغه زمونږ د فرسټ ائير نمائنده شو.

دغه الېکشن ګټلو سره مجيب خان پۀ ټوله صوبه کښې يو ډېر دروند مقام پېدا کړو. پۀ دې وجه چې کله هغه د پېښور پوهنتون پۀ خېبر لاء کالج کښې داخله واخستله نو د پي اېس اېف د ملګرو د ارباب صاحب نه دا توقع وه چې پېښور پوهنتون سره د صوبې ټولو کالجونو سره مکمل رابطه وساتي چې پۀ ټوله صوبه کښې پي اېس اېف يو فعال کردار ادا کړي. پۀ دغه وخت کښې به د مجيب خان پۀ حجره کښې د پي اېس اېف سينئير ملګري را غونډ شو او رهبر تحريک خان عبدالولي خان به ورله راغلو. د سوال جواب به ډېره ښائسته ناسته وشوه. دغه پروګرامونو د تنظيم ملګرو کښې ډېر لوے سياسي شعور پېدا کړو.

پۀ دغه وخت کښې د حکومت د مختلفو ادارو پۀ ايماء د پي اېس اېف ډېر ملګري د قامي تحريک پۀ ضد ودرېدل چې مشر ئې د صوابۍ سجاد خان ؤ. پۀ هغه وخت کښې چې د پېښور پوهنتون د سټوډنټس يونين الېکشن راغلو نو تنظيم ورته ارشد علي يوسفزے ودرولو. سجاد خان ورته پۀ مقابله کښې د خپله طرفه فضل کريم اپريدے ودرولو. سجاد خان چونکې د پي اېس اېف د صوبې صدر هم پاتې ؤ، پۀ پوهنتون کښې انتظاميه هم د هغۀ ملګرې وه او حکومت هم؛ د الېکشن نتيجه چې راغله الېکشن ګټل خو پرېږده زمونږ ووټونه د سجاد خان د اميدوار نه هم کم راغلل. دغه الېکشن پۀ ظاهره خو مونږ بائيلود، خو ملګرو دا عهد وکړو چې اوس به پي اېس اېف پۀ ټوله صوبه کښې جوړوو. دا ذمه واري مجيب خان پۀ سر واخسته. مجيب خان د صوبې صدر شو. د صوبې د ټولو کالجونو دوره ئې وکړه. پۀ پېښور پوهنتون کښې هم ملګرو ډېر ښۀ کار شروع کړو. هغه وخت کښې پۀ صوبه کښې صرف دوه يونيورسټۍ وې: يوه پېښور يونيورسټي او بله پۀ ډي اٰئي خان کښې ګومل پوهنتون ؤ. د مجيب خان پۀ مشرۍ کښې د تنظيمي هلوځلو وجه وه چې کال پس پۀ پېښور پوهنتون کښې چې کله الېکشن کېدو، پي اېس اېف ورته هدايت الله بنګش )چې نن سبا پۀ جرمني کښې دے( ودرولو. نائب صدارت ته ئې نور جهان ولاړه وه )چې پۀ صوابۍ پوهنتون کښې وروستو وائس چانسلره وه(. الېکشن پيپلز والا وګټلو، ولې د الېکشن نه مخکښې دا تاثر ؤ چې الېکشن پي اېس اېف يقيناً ګتلے دے. دغه الېکشن پي اېس اېف را ژوندے کړو. دغه ټوله خواري د مجيب خان او د هغۀ د ملګرو وه.

کله چې مجيب خان عملي سياست ته راووتلو، پۀ نېشنل عوامي پارټۍ کښې ئې خپلې هلې ځلې شروع کړې. وروستو بيا اے اېن پي جوړه شوه. د پارټۍ مشرانو پۀ مجيب خان دومره اعتماد وکړو چې هغه ئې د پېښور ضلعې ارګنائزر جوړکړو. چارسده او نوښار هم د پېښور ضلعې تحصيلونه وو. مجيب خان د ضلعې پۀ درې واړو تحصيلونو پېښور، چارسده او نوښار کښې کلي پۀ کلي تنظيمونه جوړول شروع کړل. ولې دوي يوه ډېره لويه فېصله دا وکړه چې پۀ پېښور کښې د پارټۍ د سيوري لاندې “وړومبے نړيوال باچا خان امن کانفرنس” وکړي. دا 1989 ؤ. دا پۀ هغه کړکيچنو حالاتو کښې ډېره لويه فېصله وه. هر طرف نه د جنګ اواز راتلو. پۀ افغانستان کښې جنګ ګرم ؤ، ولې پښتونخوا ته د افغانستان نه خلق در پۀ در خاورې پۀ سر د جنګ پۀ وجه را روان وو. دوه ورځنے کانفرنس پۀ مۍ کښې پۀ شاهي باغ پېښورکښې وشو. پۀ دغه امن کانفرنس کښې د جيوري د فېصلې مطابق د وړومبي باچا خان امن کانفرنس اېوارډ د هغه وخت د روس صدر ګورباچوف له ورکړے شو. دغه اېوارډ پۀ کانفرنس کښې موجود پاکستان کښې د روس سفير د رهبر تحريک خان عبدالولي خان پۀ لاس واخستو. دې کانفرنس سره د پارټۍ هلې ځلې نورې هم زياتې شوې او ورسره پۀ پارټۍ کښې د مجيب خان مقام ډېر اوچت شو. د کانفرنس اهميت دا ؤ چې د کانفرنس د اخراجاتو لپاره چنده کلي پۀ کلي ټولو ورکرانو کوله. پۀ دې وجه کانفرنس کښې ټولو ورکرانو ډېره زياته دلچسپي اخسته. کانفرنس ته د ټول ملک نه د مختلفو سياسي پارټيو مشران راغلي وو چې پۀ کښې محمودخان اڅکزے هم ؤ.

پۀ پېښور کښې د محمود خان تقرير پۀ وړومبي ځل واورېدے شو. هم دغه کانفرنس نه د مجيب خان د محمود خان سره يو ذاتي تعلق جوړ شو چې وروستو هغه پۀ سياسي تعلق کښې بدل شو او مجيب خان د هغۀ سره پۀ پارټۍ کښې شامل شو. مجيب خان چې څۀ وخت محمودخان سره شاملېدو، هغه وخت د مجيب خان مور او پلار حج ته تللي وو. پلار ئې چې د حج نه راغلو او خبر شو نو د مجيب خان پۀ دې عمل ډېر خفه شو؛ بلکې يوه ورځ ئې محمود خان ته ووئيل چې زۀ پۀ نېشنل پارټۍ کښې يم، زما ورور ارباب سېف الرحمان پۀ نېشنل پارټۍ کښې دے او مونږ ټوله کورنۍ د هغۀ سره ملګري يو او تا سره مجيب خان شامل شوے دے، دا د دۀ ذاتي فېصله ده. اخر هم هغه وشوه، مجيب خان پۀ خپله فېصله پښېمانه شو او واپس اے اېن پي ته راغلو. ځکه خو ورته ملي قائد اسفنديار ولي خان وئيل چې ډېر وخت دې بهر تېر کړو، اوس به زمونږ نه زياته تېزه منډه وهې.

مجيب خان کښې لويه خوبي دا وه چې د ليک لوست ډېر شوقين ؤ. د هغۀ حجره د پي اېس اېف د دور نه را واخله تر اخره پورې همېشه به د مېلمنو نه ډکه وه. هر چا ته به ئې ډېر پۀ خوشحالۍ ستړي مۀ شي کول. لويه خوش قسمتي ئې دا وه چې د هغۀ پلار ارباب عبدالرحمان خان او د هغۀ مور بي بي به د مېلمنو همېشه ډېر خيال ساتلو. د هغۀ د ملګرو او مېلمنو دائره هم ډېره لويه وه چې پۀ هغې کښې د ټولې پښتونخوا، بلوچستان او د افغانستان ملګري به همېشه شامل وو.

د مجيب خان پارټۍ کښې دوباره شموليت سره ملګري ډېر خوشحاله شول. پارټي ورته هم ډېره خوشحاله شوه، ځکه د شموليت پۀ ورځ پۀ مرکزي مجلس عامله کښې د شاملېدو اعلان د سټېج نه وشو او هغۀ د پارټۍ پروګرامونو کښې ډېره دلچسپي اخستله. پۀ خپله علاقه کښې د پارټۍ ډېرو ملګرو ورته پۀ تېرو عامو انتخاباتو کښې د حصې اخستو وېنا وکړه خو هغۀ وئيل چې زۀ پارټۍ ته د ټکټ لپاره نۀ يم راغلے، زۀ به د پارټۍ د ائين او منشور او د پښتون قام د يووالي لپاره به ټول عمر کار کوم.

خو افسوس چې ژوند مجيب خان سره وفا ونۀ کړه او ډېر بې وخته زمونږ نه جدا شو. د هغۀ د جنازې نه او بيا د هغۀ تر څلوېښتمې پورې چې ټول قام هغۀ سره د کوم عقيدت پېرزوئينه وکړه، هغې نه دا ثابته شوه چې د مجيب خان پۀ مرګ ټول وطن ډېر غمژن ؤ، ځکه خو د کوئټې، جلال اباد اوکابل نه علاوه پۀ نورو ښارونو کښې هم د هغۀ د غائبانه جنازې نمونځونه وشول.

کۀ زۀ دا ووايم چې مجيب خان پۀ سياست کښې زما استاذ ؤ نو غلطه به نۀ وي.