د باچاخان او رهبرتحريک خان عبدالولي خان يادونه – ارباب الطاف قادر

متعلقه مضامين

“د ديدار شوق او عامر” – سکندر خان سکندر

د هجري کلېنډر د مياشتو پۀ نومونو کښې پټ رازونه – فضل مومند

غني خان، يوه کتنه – مولانا محمد يوسف بونېرے، کوالالمپور

کله چې پۀ ١٩٨٦ز کښې پۀ کراچۍ کښې عوامي نېشنل پارټي جوړېده نو پۀ دغه ورځو کښې خبر شو چې باچاخان د جي اېم سيد پۀ دعوت هم کراچۍ ته روان دے او بابا به پۀ رېل ګاډي کښې ځي. د پښټون سټوډنټس فېډرېشن ډېرو ملګرو فېصله وکړه چې باچاخان سره به يوځاے پۀ رېل ګاډي کښې ځو،او مونږ به د پارټۍ پۀ کنونشن کښې ګډون کوو. هم داسې وشوه. د پېښور صدر رېلوے سټېشن نه يوځاے باچاخان بابا سره پۀ رېل ګاډي کښې کراچۍ ته لاړو.

د باچاخان د رېل ټکټ د عام کلاس (چې ورته به ئې سېکنډ کلاس وئيلو) ؤ. بابا پۀ سېکنډ کلاس ډبه کښې ناست ؤ او پۀ ډبه کښې ورسره د پي اېس اېف ګڼ ملګري هم موجود وو. پۀ دغه رېل کښې زيات ملګري او مشران د پارټۍ او پي اېس اېف وو. د باچاخان د تګ نه جوړ دا ټول ملک خبر ؤ. پۀ هر رېلوے سټېشن به ډېر تود هرکلے کېدو.

د حاکم علي زرداري پۀ ځاے کښې د پارټۍ کنونشن د څلورو پارټو د ادغام سره وشو. رهبر تحريک خان عبدالولي خان پکښې د پارټۍ مرکزي صدر شو او نوم ئې ورله اے اېن پي کېښودو. د هغې نه پس پۀ هره صوبه کښې د پارټۍ تنظيمونه جوړشو. زمونږ د پښتونخوا صوبې چې تنظيم جوړ شو نو لطيف اپريدے صدر شو. د هغې نه پس د صوبې تنظيم پۀ جنوبي اضلاع کښې د خان عبدالولي خان د دورې لپاره د درېو ضلعو دوره جوړه کړه چې ډېره اسماعيل خان، بنو او کرک پکښې شامل وو. دا پۀ ١٩٨٧ز کښې د ژمي ورځې وې. مونږ د پي اېس اېف درې کسان ميا افتخار حسېن، صدرالدين او زۀ د مشرانو سره پۀ دې دوره کښې شامل وو او د پارټۍ ډېر فعال ملګرے ارباب مجيب الرحمان هم د ځان سره ملګرے کړو. پارټي مو د خپل تګ نه خبر کړه. پۀ دې دوره کښې وړومبۍ عوامي جلسه د ډېره اسماعيل خان پۀ حقنوازپارک کښې وه چې دوه بجې به شروع کېده. د پروګرام مطابق سحر دوخته بلور هاوس ته لاړو. ټول مشران راغلل. د هغۀ ځاے نه خان عبدالولي خان، حاجي غلام احمد بلور، لطيف اپريدے، ارباب همايون خان او څلور کسان مونږ د ډېره اسماعيل خان پۀ لور روان شو. دوه بجو لۀ ډېره اسماعيل خان ته ورسېدو. ډېره عظيم الشانه جلسه وشوه.

د جلسې صدر اسلم خان اېډوکېټ پۀ ځاے کښې د مشرانو پۀ درناوي کښې مېلمستيا وه. د پښتون اېس اېف د ملګرو پۀ وېنا مونږد مشرانو نه اجازت واخستو او شپې له هغوي سره ګومل پوهنتون ته لاړو. سبا د مشرانو سره يوځاے د بنو پۀ لور را روان شو. بنو ته پۀ را رسېدو سره د بنو د پارټۍ مشرانو د ښار نه بهر پۀ خپل روايتي انداز هرکلے وکړو چې نن هم زما پۀ ياد دي. هغه وخت د پارټۍ د ضلعې صدر عطاء الله جان خان ؤ. د هرکلي وروستو جلوس د هاکي سټېډئيم پۀ لور روان شو چرته چې جلسه وشوه. د مشرانو لپاره پۀ نورنګ کښې د مم خېلو پۀ کلي د مجيدخان پۀ ځاے کښې د شپې بندوبست شوے ؤ. ولې مونږ د PSF ملګرو شپه د صدرالدين سره وکړه چې هغه د دې کلي سره تعلق لري.

پۀ سبا د کرک پۀ لور را روان شو. پۀ سور ډاګ باندې دکرک ضلعې مشرانو د هرکلي تابيا کړې وه. د کرک ضلعې هغه روايتي هرکلے چې راياد کړم نو نن مې هم جذبې ځوانې شي.کرک کښې چې د خان عبدالولي خان اورېدو له څومره خلق راغلي وو هغه د ليدو وړ منظر ؤ. ډېره درنه جلسه وشوه. د جلسې نه وروستو د پارټۍ د ضلعي صدر فاروق خان اېډوکېټ لۀ خوا مختلفو کلو کښې د مشرانو لپاره د تګ ترتيب جوړ شوے ؤ. پۀ هغه ورځ چې دا مشران څومره کلو ته لاړل هغې سره د پارټۍ ورکران ډېر خوشحاله شو. د کرک ضلعې وسعت ما ته پۀ هغه ورځ معلوم شو چې څومره کلو کښې د مشرانو لپاره دوره جوړه شوې وه. د ضلعې پۀ اخر سر کښې پۀ يو کلي کښې د شپې بندوبست شوے ؤ. شپه مو هلته وکړه. ماته يادېږې چې پۀ هغه کلي کښې بجلي نۀ وه. پۀ سبا مو د هغۀ ځاے نه د پېښور پۀ لور سفر شروع کړو.

پۀ دې دوره کښې مونږ سره د لاچۍ نه د PSF يو تن مطيع الله هم ملګرے شوے ؤ. واپس چې راتلو نو هغۀ رهبر تحريک خان عبدالولي خان ته ووئيل چې ما سره به پۀ لاچۍ کښې چايوته ايسارېږئ. دغه د پروګرام حصه نۀ وه، خو ولې ولي خان ووئيل چې دے ډېر اسرار کوي نو خفه کولے ئې نۀ شو. هغه ملګرے هغه د پښتومتل دے چې پۀ “جامو کښې نۀ ځاے کېدو”. هغۀ سره مو پۀ لاچۍ کښې څۀ شېبه دمه وکړه او د هغۀ ځاے نه پېښور ته را روان شو.