Pakhtoon | The Magazine Publishing Since 1928
متعلقه مضامين
بادشاه وزیره یاره! د فرښتو برخې سپېرې دي
فرښتو رب ته ووئیل، ‘دوي’ به زمکه کښې فساد کوي او وینې به تویوي. خداے ورته ووې، زۀ چې پۀ څۀ پوهېږم تاسو پرې نۀ پوهېږئ.
بیا خداے هاروت ماروت زمکې ته د هغوي پۀ لاپه راولېږل، د زمکې ‘زهريٰ’ اسمان ته وختله او هاروت ماروت پۀ زمکه لۀ ژبو ځوړند – بیا د لوط قوم ته فرښتې راولېږلې شوې. د لوط قوم باندې عذاب راغلو – هلته قمر باجوه، عمران خان، قمر باجوه، خادم حسېن رضوي او جسټس جاوېد اقبال لاړل.
د فرښتو او زمکې خبره زړه هم ده او عجیبه هم؛ خو ‘فرښتې’ تل معصوم علامتونه وي – د ګناه او دهاندلۍ نه پاک علامتونه – الٰهي او الوهي علامتونه، نوراني او روحاني علامتونه، سپېځلي اسماني علامتونه.
د هاروت ماروت نه ‘فرښته مومند’ پورې، زمکې سره رشتې د ‘فرښتو’ برخې سپېرې کړې دي –
د خپل دیاړیمار پلار سره د اسلام اباد چک شهزاد کښې د پښتنو وړه معصومه فرښته وزبېښلې شوه، ووژلې شوه. څۀ موده وړاندې اسلام اباد کښې اعظم سواتي د باجوړ ‘فرښته’ پۀ پولیسو لۀ وېښتو راکښلې وه.
بادشاه وزیره یاره! د فرښتو برخې سپېرې دي. بادشاه وزیره یاره! محاصره د ښار کوڅې دي.
بادشاه وزیره یاره! ‘فرښته’ پۀ تله کښې د ‘زېنب’ نه سپکه کېښودې شوه – داسې نۀ وه پکار بادشاه وزیره یاره! دلته چې فرښتو سره څۀ وشول، ښۀ نۀ دي. د شېرین مزاري لور او زېنب سره بېله رویه؛ فرښتې سره بېله رویه – د ‘دخترِ اول’ ټېریان نیازي’ سره بېله رویه او عائشه ګلالۍ سره بېله رویه –
بادشاه وزیره یاره! د اسلام اباد اوږده ترینه محاصره کښې پۀ پارلېمنټ، پي ټي وي او د سرکاري محکمو پۀ هېډ اٰفسونو سره د عدالتِ عظمٰي پۀ ودانۍ حمله کوونکو د پاره استثنٰي – رېډ زون کښې د تحریک ختم نبوت لۀ خوا پۀ سرکاري ودانیو او پولیسو متشددو حملو کوونکو د پاره لفافو کښې د جناح صاحب د ‘پَټُوْ’ د زرو زرو لوټونه – خو بادشاه وزیره یاره! خړ کمر وزیرستان کښې ډزې!!! کمر به خړ ؤ، اوبۀ هم خړې کړې!!!
بادشاه وزیره یاره! تشدد کۀ مظاهرینو کړے هم وي، هر څو کۀ یقیناً چې کړے به ئې نۀ وي، ګولۍ چلول؟ دا کوم جمهوریت دے؟ دا د ‘مرورو’ د دلاسه کولو کوم منطق دے؟ دا د پخلاینې کوم اخلاقیات دي؟ دا کومه پالیسي ده چې یوه ورځ مظاهرین پۀ چېک پوسټ ‘حمله اٰور’ یاد کړے شول، ګولۍ پرې وورولې شوې:
پۀ بله ورځ وژلو شوو او ژوبل کړے شوو ته ‘دیتونه’ او ‘تلافۍ’ ورکړې شوې؟
بادشاه وزیره یاره! پۀ دې منطق دې سر خلاصېږي؟ بادشاه وزیره یاره! د یو ریاست د کنټرول لاندې د یو اخبار دغه دوه سرخۍ وینې؟ بادشاه وزیره یاره! د یو اخبار دغه دوه سرخۍ ګوره او ټوله میډیا پرې نیسه!!! دا څۀ دي؟ دا کومه پالیسي ده؟ دا کوم منطق دے؟ دا د حب الوطنۍ او غدارۍ، دا د تشدد او عدم تشدد، دا د مظاهرې او د مظاهرینو سره د تعامل کوم ریاستي اقدار دي؟ بادشاه وزیره یاره! کوتہ نظر ببیں کہ سخن مختصر گرفت!!!
بادشاه وزیره یاره! بادشاه وزیره یاره! مونږ د باچا خان بچي ازمېښتونو سره مخ – کۀ څۀ وایو نو هائبرډ انقلابیان پېغورونه کوي او کۀ نۀ وایو نو پۀ خاوره مو پۀ یو نوي شکل کښې نوے جنګ مسلط کېږي – بادشاه وزیره یاره! ضروري ده چې د اوبو موجودګۍ کښې دې څوک خامخا خپلې لمنې پلیتوي؟
بادشاه وزیره یاره! د یو چا روزګار دے چې پۀ ‘قبائلي سیمو’ کښې اپرېشنونه وکړي – هغه کۀ د طالب پۀ ضد وي او کۀ د ‘مظلوم’ پۀ ضد – تدبر هم دا دے چې د تشدد اموخته ته به د تشدد جواز نۀ ورکوې.
بادشاه وزیره یاره! د دې خاورې د امن د پاره مونږ خپل سرونه تلي کښې ایښي د قاتلانو د مټو زور مو ګواښلے دے – بادشاه وزیره یاره! مونږ خپلې سینې ټپولې دي او وئیلي مو دي، ‘د دوي خودکش جېکټونه به ختم شي خو زمونږ سینې به ختمې نۀ شي – بادشاه وزیره یاره! د عدم تشدد د مقابلې وسله بل چا سره نشته – د باچا خان د عقیدې کلکه قلعه څوک ړنګولې نۀ شي – دا تک سور بېرغ څوک ټیټولے نۀ شي – دا تک سرۀ نېشنلیان څوک پرځولے نۀ شي – دا عوامي نېشنل پارټي څوک بې لارې کولې نۀ شي.
بادشاه وزیره یاره! زور هسې پېغور شي چې همت ورسره مل نۀ شي.
بادشاه وزیره یاره! د خړو شوو اوبو پۀ دلیل پۀ’خړ کمر’ کښې شوې دغه پېښه باندې د عوامي نېشنل پارټۍ خېبر پښتونخوا کابینې یوه غونډه باچا خان مرکز کښې وشوه او ورپسې پرېس کانفرنس وشو. غونډه کښې پۀ قبائلي ضلعو کښې د فوج، احتساب کمېشن، عدلیې او الېکشن کمېشن لۀ خوا پۀ درغلۍ جوړ شوي صوبائي او مرکزي حکومت ته هماغه د شګو بوجۍ ووئیلې شوه چې فوجي اسټېبلشمنټ پرې خپل ځان د اولس د سترګو نه د پټولو ناکامه کوشش کوي. د خړ کمر پېښه کښې د صوبائي او مرکزي حکومت شرمناک کردار، پۀ دې پېښه مجرمانه خاموشي، بیا د خپلو بادارانو پۀ اشاره نامناسب پراپېګنډه بیانونه، پۀ حقائقو خاورو بادولو کښې د ریاست پۀ اشارو د چغېدونکې او ګډېدونکې میډیا غېر ذمه وارانه خپرونې او د پښتنو د خاورې او وسائلو پۀ بې درېغه لوټ تالان ډاګیزې خبرې پۀ ‘ولي خاني جرأت او لهجه’ وشوې. د نوو ضلعو د انتخاباتو د پاره د امیدوارانو نامې هم اعلان شوې. یاده دې وي بادشاه وزیره یاره! د دغه انتخاباتو ځنډ کښې حکومت سره هغه ‘ازاد اېم اېن اے’ هم کردار لوبولے دے چې د دې کرښو تر لیکلو لا د خړ کمر پېښه کښې د سي ټي ډي تحویل کښې دے!!!
بادشاه وزیر یاره! نوو ضلعو کښې به د انتخاباتو پته هم ولګي او د زورورو نیت به هم تر هغې ښکاره شي.
بادشاه وزیره یاره! سترګې او غوږونه به د څوارلسم جون جرګې ته ونیسو!!!
څوارلسم جون، #پښتون_قومي_جرګه، باچا خان مرکز، پېښور، عوامي نېشنل پارټي.
بادشاه وزیره یاره! د دې خاورې د مسئلو حل یواځې او یواځې یو سنګر، یو تحریک او یوه پارټي ده – عوامي نېشنل پارټي. نوو ضلعو کښې ووټ پۀ اولس د عوامي نېشنل پارټۍ قرض دے. عوامي نېشنل پارټۍ تل خپل منشور کښې دا سیمې خپله برخه بللې ده – پۀ اسمبلۍ کښې د باچا خان د وړومبي تقریر نه د رهبرِ تحریک خان عبدالولي خان تقریر پورې، د ملي مشر اسفندیار ولي خان تقریر نه د اېمل ولي خان دې پرېس کانفرنس پورې – کومې مطالبې چې د پښتنو دي، هغه د عوامي نېشنل پارټۍ د منشور برخه ده.
د دې خاورې دعويٰ – پۀ دې خاوره د امن مطالبه – د دې خاورې پۀ وسائلو د اختیار او فېصلې مبارزه.
بادشاه وزیره یاره! یا خو د جذباتیت پۀ نعرو کښې خوئېدل دي او یا د یو منظم ګوند، د یوې کوټلې عقیدې او پخې او پراخې سیاسي نظریې سره د یو نۀ ماتېدونکي، نۀ ټیټېدونکي او نۀ خرڅېدونکي قیادت لاندې دا جنګ کول دي! د سوشل میډیا ټرنډ او هېشټېګ نه هم یو قدم وړاندې تلل دي. نتیجې ته رسېدل دي. منظم کالکولېټډ سیاسي عمل ته وده ورکول دي.