د اقتدار پۀ محلاتو کښې روان ښکاره پټ پټونے – سلطان خان ټکر

متعلقه مضامين

” اېبسلوټلي يس؟ ” – سلطان خان ټکر

لانجه مار وزيراعظم

پاکستان او نړيوال پير

د شهباز شريف د بهر ملک پۀ تلو باندې حکومت دومره پرېشانه ولې ؤ چې د شهباز شريف د مخنيوي لپاره کله د اي سي اېل،کله تور لسټ او کله پي اېن ائي لسټ سرودونه د قوم غوږونو واورېدل. ايا د حکومت دا پرېشاني پۀ دې وجه وه چې پۀ شهباز شريف د کرپشن ډېر غټ تورونه دي او کۀ چرته شهباز شريف بهر لاړو نو ممکن ده چي بيا ملک ته لکه د غټ مياجان واپس را نۀ شي او کۀ نه حکومت پۀ دې وجه لکه د خټکي زيړ ؤ چه هسې نه وړوکے ميا جان د غټ مداري ميا جان لالا سره څۀ نوے دم درود و نۀ کړي او پوره بيانيه بدله کړي او د پي اېم اېل اېن دا خاصا هم ده چې “پۍ دې وي چې د څۀ هم وي”، يعنې پۀ هره طريقه دې وي خو چې اقتدار وي. نو کۀ چرې شهباز شريف لالاجان پۀ خپله بيانيه بدلولو مجبورکړو نو بيا خو هر څۀ ضرب صفر مساوي صفر به وي. يعنې عمران خان به بيا د ګوډې اسپې کوچوان وي. ځکه چې اوسه پورې به دا بحث کېدو چې بندو کمرو والو ته صرف عمران خان منظور دے او د ۲۰۱۸ د ټاکنو نه دا ثابته هم ده او زمونږ خان دا چغې۲۰۱۸نه ښۀ پۀ بر بېټ وهي چې خان او پېنډي والا پۀ يو پېج دي. هر څۀ د پېنډۍ ماما پۀ خوښه کېږي باقي دا ټاکنې خو صرف د نورګل تور ګل د پاره د يوې ورځې د سرکس تماشه ده او څۀ د کچکولو د ډکولو والو يعنې د بېروني ماماګانو يوه تقاضه وي . د بېروني نړۍ ماماګان مهذبه خو دي کنه، د رنګ روغن لپاره د انساني حقوقو د تحفظ ټېکه هم دوي سره ده او د جمهوريت شرط د امداد اخستو د پاره ضروري هم وي، خو پۀ هر ځاے کښې د اسې شرط لازمي هم نۀ ګڼي. مضمون رانه پړے وشلولو، خبره مې د شريف فېملي کوله او بيم مې د بېن الاقوامي ګڼ ګپانو وغږولو. يعنې عمران خان سرودونه کوي چې زۀ د پېنډۍ ماما خوريے يم. پي پي پي خو پۀ ميډيا دومره بدنامه ده لکه څومره چې ډارلنګ مني ده. ماما جان خو د دې خورزې نه لرې لرې تښتي اګرچې کله نا کله ئې د خپل مقصد لپاره استعمالوي. لکه څنګه چې مو د نوازشريف وخت کښې ليدلي وو چې پي پي پي او عمران خان لکه د ورور خور د بلوچستان حکومت پۀ تبديلۍ کښې د دوي مشترکه کارونه بې وسه قوم ليدلي وو او بيا مو د ۲۰۱۸ سېنېټ ټاکنو کښې د دوي مشترکه لوبه هم ليدلې وه. خو د دې هر څۀ باوجود د ۲۰۱۸ټاکنو کښي پي پي پي توره هم شوه. اوس د ځوانانو خان لکه د مرتضٰي خان د اسپې لتې وهل شروع کړې دي .د لتې وهلو وخت کښې دا خيال هم نۀ کوي چې د ا خو مې د پېنډۍ ماما جي ؤ. عمران خو پۀ هر ځاے لکه د کم عقل شېخ چلي دا سردونه وهي چې زۀ او د پېنډۍ ماما جي مې پۀ يو پيج يو . خو بلخوا کۀ يو طرفه د عمران خان کارنامې سدهوم ته د شين پۀ مثل دي نو بل طرفه ته پۀ بزدار او شاه رنګيلا کښې څۀ فرق نشته . د پېنډۍ ماماجي بار بار پۀ بند کمرو کښې هره مياشت د ځوانانو خان ته وائي چې پۀ لاهور کښې دا ناست ګوډاګے بدل کړه خو دا خبره پۀ غوړ منګي څۀ اثر نۀ کوي. غوړمنګے وائي چې ترڅو زۀ يم تر هغې به بزدار وي. بيا لکه د برق صېب د پردي باغ نه د خټکو پنډ مې پۀ سر کړو . خبره مې د شريف فيملي کوله او ډزې مې پۀ بزدار وکړې. خو ځه مړه چې پۀ غريب ورنۀ شې نو پۀ چا به ورځې . دومره کم عقل هم نۀ يم چې د سوک ځاے نه پېژنم. خو چې کوم ځاے څوک نۀ وي هلته خو پلار پسې هم وئيلے شم لکه څنګه چې د پي ټي ائي وزيران پۀ نجي محفلونو کښې وائي چې لالا (د ځوانانو) مو د ټکې هم نۀ دے، هسې تشه خولۀ ده. پۀ تجربې سره ثابته ده چې غټ ميا جي هم پۀ لته وهلو کښې د ځوانانو د خان نه هم زيات دے .ميا جان لالا چې څومره د پېنډۍ ماماجي نه ونډه خوړلې ده نو دومره بل چا نۀ ده خوړلې . خو چې کله هم موقع راغلې ده نو بيا ئې د پېنډۍ ماماجي لالا ئې د “توکون؟؟؟” ۔ ۔ ۔ لته ورکړې ده. ماماجي ئې پړپوس سخا کړے دے. ډي اېن اے خو ډي اېن اے وي کنه يعنې څنګه ئې جے وي هغې شان ئې مے وي. د ميا جان کوکاري لور د کور نه راوتلو سره د پېنډۍ ماما جي ته ووې چي “نازلي اگئ ميدان مين” . اوس د بندو کمرو لپاره متبادل نۀ ميا جان لالا دے او نۀ نازلي. عمران خان ښۀ پۀ ډاډه زړۀ ځان تر دې دمه د پېنډۍ ماما جي سکه خوريے ګڼي او ماما جي لته ورکول خپل عادت. خو د بابا ادم د وختو متل دے چې شپېلۍ او ستوان برغ نۀ کېږي . خو څۀ به وايو ،زمونږ خان هر وخت ستو څښکلے وي ، د وخت تميز نۀ شي کولے چې پي پي پي هم متبادل نۀ وي . غټ ميا جان هم د بوساړې پۀ سر ناست وي او نازلي هم پۀ خپلو سندرو د ماما جي بلۍ ورانوي نو د خان متبادل بيا خو صرف شهباز شريف کېدے شي. شايد چې عمران خان لکه د خټکي پۀ دې بنياد زيړ دے. خو شهبازشريف پۀ ظاهره دا تاثر ورکوي چې وړوکے مياجان د وزارت اعظمه اميدوار نۀ دے. پۀ دې خو به بحث لږ ساعت پس وکړو اوس به د پي ډي اېم د نخرو لږه تماشه وکړو ځکه چې د اقتدار پۀ محلاتو کښې خو د فضل الرحمان هم څۀ عزت پکار دے . هغه د باجوه ماما خبره کۀ غاړه نۀ ورکوې نو د کفر فتوه ئې پۀ بډه ده، صرف بهرکول غواړي. د وړوکي ميا جان دا عزم ؤ چې د لندن د دورې نه پس د پي ډي اېم پۀ مړې خره کښې څۀ ساه ورپوکي ځکه چې د پي ټي ائي د نااهلۍ پۀ دې دور کښې قوم خو پۀ څۀ مشغولول پکار دي کنه. اخر فضل الرحمان ماما لۀ هم څۀ روزګار پکار دے . کۀ عمران خان يو کروړ نوکرۍ ورکولے شي نو شهباز شريف فضل الرحمان ماما ته د کار وظيفه هم ورکولے شي. خو چې حکومت کله نه د شهبازشريف پۀ بهر تلو کښې خنډان را پورته کړل نو بيا خو شهباز شريف د وخت نه مخکښې د پي ډي اېم د يو کولو شپېلۍ را واخسته . ګورو چې پي پي پي او اے اېن پي ورسره ځي او کنه؟ خو دا به هم ګورو چې پي اېم اېل کښې د پاور تقسيم پۀ کومه طريقه کېږي او پي اېم اېل پۀ کومه بيانيه ځي . يعنې د نازلي او د وړوکي ميا جان سفر د معکوس د لارې دے يعنې چې يو بره وي نو بل به ښکته وي. پۀ شهباز شريف کورنۍ باندې کېسونه ښۀ بې حسابه دي او ښۀ سنګين دي او غټ ميا جان لالا د ثابت جرم باوجود پۀ مزو دے. ريښتيا دي کۀ دروغ خو د عدالت لۀ طرفه تورمخې ښودلے شي کنه . د عدالت د فېصلې احترام هم پۀ ما واجب دے. ځکه چې مفتو کښې د عدالت پۀ دې فېصلې باندې اپوټه بحث کولو باندې خامخا ځان لۀ خټې ولې ګورم. د مشرانو متل دے چې کوم ځاے نۀ ګرېږي هغه مۀ ګروه. خو د دې هرڅۀ باوجود د “نازلي” نه علاوه ميا جان لالا سره د خپل خاندان د لندن پۀ موج مزو کښې دے. تله د ميا جان لالا سره ده . ناپ تول ميا جان د خپلې ګټې نقصان پۀ بنياد باندې کوي. د تاريخ نه دا هم ثابت ده چې د اقتدار پۀ محلونو کښې پلار د زوي او زوے د پلار خيال نۀ کوي نو بيا وړوکے ميان جان پۀ کښې د کوم باغ مولۍ ده چې شهباز شريف به د ميا جان لالا بيانيه بدله کړې شي. وړوکے ميا جان خو د غټ مياجان نوکردے، چې څۀ حکم ورته کېږي هغه به کوي. د نواز شريف دا خيال دے چې دومره پرېشر جوړ شي چې پېنډۍ ماما جي زما سره زما پۀ شرطونو راضي شي چې زۀ شم او يا نازلي پاتې شوه. د شريف خبره نو د شهباز شريف د متبادل پۀ طور داسې هڅې پۀ ماضي کښې هم شوې دي خو هغه هم ناکاميابه شوې دي . شهبازشريف هم څۀ شريف نۀ دے چې ګنې داسې ډراموته تيار نۀ دے خو مسئله دا ده چې د پنجاب وګړي د ميا جان لالا بيم ته غوږ دي، بل چا ته نۀ ږدي.کله چې پي پي پي پي اېم اېل ته ووې چې تر دېرشو مخالف اېم پي اے تيارول زمونږ ذمه واري شوه خو تاسو عدم اعتماد ته تيار شئ . ظاهره خبره ده چي د اپوزېشن سربراه حمزه شريف دے نو وزيراعلٰي جوړېدل د حمزه شريف يقيني وو نو نازلي د “نه” حکم وکړو. يعنې نۀ نواز شريف او نۀ نازلي د اقتدار منتقلۍ ته پۀ خپل کور کښې دننه تياره ده. هغه د تاريخ ډرامې دي خو هغه به قوم ته ښکارېدې او پۀ پټه ده. اوس اوس هم مونږ دا وليدل چې جهانګير ترين د ۳۵ غړو ټوکرۍ پۀ سر ګرځوله خو پۀ بازار کښې خريدار نۀ وو. د سودا اخستو توفيق الله پاک پۀ ننني حالاتو کښې هاوس اف شريف له ورکړے دے خو هاوس اف شريف پۀ دې سودا کښې څۀ دلچسپي وانۀ خسته . حالانکې دا بالکل يوه مفته سودا وه او دا د چا پۀ اشاره هم وه يعنې ګټه پۀ پټو سترګو وه. پۀ ماضي کښې به داسې سودا ګانې ښۀ پۀ اوچتو قيمتونو کېدلې بلکې يو بېنک نيم به هم پۀ داسې سوداګانو اخستو کښې ديواليه کېدو. بلکې د چنګا منګا او د سوات سېلونه به هم کېدل. دا ولې ونۀ شو دا ځکه چې ګټه به بيا د حمزه وه . دې ته نۀ نازلي تياره وه او نۀ د نازلي بابا جان. کۀ د ميا جان لالا او د نازلي د ګوتو داسې نخرې وي نو شايد چې شهباز شريف او حمزه پۀ دې باندې مجبور شي چي غلي پۀ کور شي، کم از کم ځان خو به د نېب ماما جي او اېف ائي اے د ټېل مېل نه بچ کړي خو زما پوخ يقين دے کۀ چرې نوازشريف خپله بيانيه بدله نۀ کړه نو بيا د پېنډۍ ماما جي د پاره عمران خان قبول دے. خو دې سره به شريف فېملي د تاريخ يوه قيصه شي. خو دېخوا پي پي پي هم دا کوشش کوي چې پۀ څۀ طريقه د کراچۍ پۀ ښار کښې اوۀ اتۀ څوکۍ تر لاسه کړي نو بيا به پي پي پي يو کنګ مېکر ګوند نۀ وي بلکې پۀ خپله به کنګ وي کۀ سورلۍ له ئې پي اېم اېل اېن ونيولو او کۀ د ځوانانوګوند پي ټي ائي.