Pakhtoon | The Magazine Publishing Since 1928
متعلقه مضامين
پۀ درېمه جولایۍ نولس سوه دوه اویایم د ‘پښتون زلمي’ د سپریم کمانډر پۀ حېث رابللې شوې جرګې ته شوې وېنا بیا وروستو د دې کتابګوټي/ پمفلټ صورت کښې چاپ کړې شوه. هاغه وخت ‘نېشنل عوامي پارټي’ صوبه کښې د اتحادي حکومت برخه وه. مارشل ذهن او جاګیردار زړۀ لرونکي مرکزي حکومت سره د هاغه زمانې د حالاتو رڼا کښې د سپریم کمانډر پښتون زلمي ته دا وېنا د رهبرِ تحریک د دیارلسم تلین پۀ مناسبت د یادګیرنې پۀ توګه وړاندې کولې شي.
د دې پمفلټ پۀ شاپاڼه دا لیکنه لوستې شي،
قیمت ۲۵ پېسې
قرېش ګل اٰفس سېکرټري
پۀ شاهین برقي پرېس پېښور کښې چاپ کړو
او د سرحد نېشنل عوامي پارټۍ دفتر نه ئې خور کړو.
د یاد کتابګوټي پرانسته د ارواښاد اجمل خټک بابا دې څو کرښو نه کېږي:
پۀ درېمه جولائي کال 1972 د خان عبدالولي خان سپریم کمانډر پښتون زلمي پۀ هدایت یو مشاورتي جرګه راوبللې شوه. دا تاریخي جرګه سېدو شریف عقبه کښې پۀ جومات کښې کښېناسته. ولي خان ورسره د تنظیم پۀ حقله ضروري خبرې وکړې او زلمو د خپل نوي تنظیم د پاره ملا وتړله. د ولي خان دغه خبرې دې پمفلټ کښې پېش کوو.
دې جرګه کښې د ټولې صوبې د نهه ضلعو او ملاکنډ نه یو یو مشر خدائي خدمتګار او دوه دوه زلمي رابللے شوي وو.
د دې نه مخکښې د پښتون زلمي کنونشن پۀ څلور ویشتمه جولایۍ 1970 پۀ شاهي باغ پېښور کښې شوے ؤ. هغې کنونشن کښې د دې صوبې د زلمو تنظیمونه پۀ خپله خوښه یو ځاے شو او یو مشترک تنظیم د پاره ئې ‘پښتون زلمے’ نوم غوره کړو او خان عبدالولي خان ئې سپریم کمانډر مقرر کړو. اجمل خټک
پښتنو زلمیو بیا لاسونه سرۀ کړۀ
لکه باز منګولې سرې کاندي پۀ ښکار
زلمو مست شئ!
مشرانو او زلمو!
ډېرې ورځې وشوې چې مونږ د دې تنظيم بنياد اېښے دے ولې منځ کښې داسې اهمې قومي مسئلې پېښې شوې چې مونږ د دې تنظيم سرته رسولو ته فارغ نۀ شو.
اول انتخابات راغلل بيا د انتخاباتو نه پس بحران را پېدا شو، ورپسې جنګ راغلو او د مرګ او د ژوند کشمکش راپېدا شو.
اول داسې حالات وو چې مونږ خپل تنظيم ته وزګار نۀ شو. سره ددې چې د حالاتود خرابېدو سره سره يو منظم مشکل پکار ؤ. او د ګړ بړ مقابله کښې ځان تيارول ضروري وو. خو مونږ بوخت وو کومو خلقو چې د پاکستان ورانولو اراده کړې وه هغوي دلته هم لګيا وو او کوشش ئې کولو چې د خپلو مخالفينو نه ځان خلاص کړي او دا ملک لکه د غوړې نمړۍ د حلقه تېر کړي. خو نېشنل عوامي پارټۍ ورته حلوا کښې هډوکے شوهې پۀ مرۍ کښې ئې ونښتو؛ اوس ئې نۀ تېرولے شي او نۀ ئې غورځولے شي.
د نېپ او اسلامي لوري پۀ اتحاد او استقلال دومره کار وشو چې هغه مارشل لاء لاړه، اسمبلي بحال شوه، صوبو کښې حکومتونه جوړ شول او حالات بدل شول. اوس مونږ خپل تنظيم ته توجه ورکولے شو.
دې حالاتو کښې نن ستاسو دوه حېثيتونه دي. يو دا چې تاسو يو سياسي تنظيم يئ او د خلقو سياسي تربيت به کوئ. بل دا چې پۀ دې صوبه او بلوچستان کښې تاسو حکومتي پارټي يئ.
د سياسي تنظيم پۀ حېثيت ستاسو کار نسبتاً اسان ؤ خو د حکومتي پارټۍ پۀ حېثيت ستاسو کار ګران دے ځکه چې د سياسي تنظيم پۀ طور به تاسو د خلقو مشکلات او مطالبې نورو ته پېش کولے او د حکومتي پارټۍ پۀ حېثيت دغه مشکلات او مطالبې اوس ستاسو د پارټۍ او حکومت ذمه واري ده. تاسو به کوشش کوئ چې خپل سياسي حېثيت او د حکومتي پارټۍ حېثيت قائم وساتئ او دا کار ګران دے.
چې يوې پارټۍ سره حکومت وي نو ډېر کسان اقتدار پسې پارټۍ ته راننوځي. دغه کسان خپلو اغراضو پسې راغلي وي چې اغراض ئې نۀ پوره کېږي نو بيا پارټي او د پارټۍ حکومت پسې خبرې کوي او دغه شان نقصان پېدا کوي. ستاسو کار مشکل ځکه دے چې دغه اړخ ته به هم توجه ورکوئ.
پۀ دې کښې به تاسو هله کاميابېږئ چې خپل تنظيم وکړئ. د نېپ د تنظيم ذمه وار د اے اين پي مشران دي. تاسو د پښتون زلمي رضا کاربه د خپل تنظيم کولو د پاره ملا تړئ.
مونږ کښې هم غلط فهمۍ دي. مونږ پښتون زلمے هم لکه د اے اېن پي غوندې يو جماعت ګڼو چې د دې به پۀ هره سطح الېکشن وي، مقابلې به وي اپيل او د اپيل د پاسه اپيل به وي، داسې نۀ ده؛ دا يو رضا کار تنظيم دے. د دې کمانډران او سالاران به زۀ مقرروم، د کلي نه واخله تر صوبې پۀ هره سطح د کمانډر او سالار تقرري زما کار دے او دا کار به زۀ کوم.
زۀ تاسو خپل سپريم کمانډر مقرر کړے يم او زما د فېصلې د پاسه بل چا ته د اپيل حق نشته ځکه زما کار مشکل دے.
ولې زۀ تاسو ته تسلي درکوم چې تاسو پۀ خپله مينه او رضا سپريم کمانډر مقرر کړے يم. خو زۀ ځان ستاسو غوندې ستاسو يوکارکن ګڼم. ما ته هر څوک رارسېدلے شئ او زۀ به خپله خبره د قران ټکے نۀ ګڼم. د هر چا خپله خبره چې وي، حق لري چې ما ته ئې راورسوئ. زۀ چې فېصله کوم نو د ټول قوم د مفادو پۀ رڼا کښې به ئې کوم.
دا غونډه د کمانډرانو غونډه نۀ ده، دې کښې د نمائندګۍ سوال هم نشته دے دا کوم کسان چې دلته راغلي دي دا ما درې درې کسان د تحصيل پۀ سر رابللي دي. زۀ دوي ته خپل کار حواله کوم. د دې معنٰي دا نۀ ده چې دلته څوک راغلے دے خو هغه مشر دے او کۀ څوک نۀ دے راغلے هغه مشر نۀ دے. کمانډران او سالاران به زۀ وروستو مقرروم دا صرف يو مشاورتي غونډه ده. تاسو چې د دې ځاے نۀ لاړ شئ نو ټول کمانډران پۀ دې پوهه کړئ، او کۀ د چا غلط فهمي پېدا شوي وي هغه لرې کړئ.
ددې غونډې د رابللو غرض څۀ دے؟ زما زړۀ غواړي چې هرکلي ته ورشم. خو زۀ وزګار نۀ يم. تاسو خپله پوهېږئ چې زمونږ د سياست تقاضا ده چې زۀ پنجاب ته هم لاړ شم، سندهـ ته هم لاړ شم. نو ځکه ما سره دومره وخت نشته چې تاسو سره في الحال کلي پۀ کلي وګرځم نو تاسو مې د هر تحصيل نه درې درې کسان را وبللئ. يو مشر تجربه کار خدائي خدمتګار ورسره دوه زلمي. زۀ غواړم چې زما پۀ ځاے تاسو خپل خپل تحصيل کښې کلي پۀ کلي وګرځئ او زما کار وکړئ.
ستاسو کار به څۀ وي؟
- تر اوسه چې د پښتون زلمي کوم فهرستونه دفتر ته رارسېدلي دي هغه نا مکمل دي. ستاسو وړومبے کار به دا وي چې تاسو دا درې کسان به خپله علاقه کښې ګرځئ. هرکلي ته به ورځئ او ګورئ به چې هر کمانډر سره شل زلمي پوره دي او دغه شان هرکلي کښې څو کمانډرۍ دي دا کمانډران به نوټ کوئ.
- ډېر داسې کلي دي چې هلته د يوې نه زياتې کمانډرۍ دي. داسې کلو کښې به تاسو د هغۀ کلي ټولو کمانډرانو کښې د يو کمانډر اعلٰي سفارش کوئ. چې د کلي کمانډر شي. ستاسو دې سفارش باندې به زۀ غور کوم. زۀ پابند نۀ يم چې خامخا دا سفارش ومنم. تاسو به هېڅ کمانډر ته دا خبره نۀ څرګندوئ چې تاسو د چا سفارش کړے دے.
- دغه شان به تاسو د هر تحصيل د ټولو کلو د کمانډرانو فهرست او هرکلي د پاره د کمانډر اعلٰي سفارش ما ته تحريري پېش کړئ. د هغې نه پس به زۀ د کمانډرانو تصديق وکړم او د کلي د پاره به د کماندر اعلٰي تقرري وکړے او د هغې نه پس به زۀ د تحصيل يا تپې ، ضلع او صوبې د پاره کمانډران او سالاران مقرروم.
- دا کار به تاسو تر يو دېرشمې جولايۍ 1972 ختموئ او ما ته به تر دغه تاريخ پورې دغه هرڅۀ د کلو د کمانډرانو فهرست او د کلي د پاره د کمانډر اعلٰي سفارش رارسوئ. کۀ چا تر دغه تاريخه خپل کار ونۀ کړے شو نو هغه به خپل کار کښې ناکامياب حسابېږي.
د اے اېن پي او پښتون زلمي به څۀ تعلق وي؟
- پښتون زلمے د اے اېن پي رضا کار دے د کلي کمانډر به د کلي د صدر سره د تحصيل کمانډر به د تحصيل د صدر سره د ضلع سالار به د ضلعې د صدر سره او د صوبې سالار به د صوبې د صدر سره تعلق ساتي.
پښتون زلمے د عوامي نېشنل پارټۍ ممبر کېدے شي خو عهدېدار کېدے نۀ شي.- دا زلمے به د اے اېن پي د تحصيل، ضلعې او صوبې د جرګو ممبر کېږي هم نۀ.
دا ضروري نۀ ده چې هر “زلمے” دې د اے اېن پي ممبر وي.
هدايات:
- کمانډران به مسلسل نور زلمي د ځان سره ملګري کوي او نوې کمانډرۍ به جوړوي. تاسو به کوشش کوئ چې هېڅ زلمے د تنظيم نه بهر پاتې نۀ شي.
- د دې تنظيم دروازې به هېچا ته نۀ بندوئ چې څوک راځي ډېر پۀ خوشحالۍ به ئې اخلئ.
3: تاسو به د خپل حکومت سره د امن قائم ساتلو او تعميري پروګرامونه سر ته رسولو د پاره هر وخت تيار اوسئ. تاسو ځان ښۀ منظم کړئ ځکه چې تاسو د امن يو قوت يئ.
د پښتون زلمي عمر:
پښتون زلمي د پاره د عمر قېد نشته. يعني دا پۀ عمر نۀ ده، پۀ زړۀ ده. د هر چا چې زړۀ زلمے دے هغه پښتون زلمے کېدے شي.
دپښتون زلمي وردي:
في الحال د پښتون زلمي نخښه سره ټوپۍ ده. پيپلز پارټۍ خپلو رضا کارو ته وردي جوړه کړې ده، مونږ د دې معلومات کوو نو کېدے شي چې ستاسو د پاره څۀ وردي مقرر کړو.
زلمو! تاسو به ځان پۀ دې خبره پوهه کړئ چې زما ذهن کښې د پښتون زلمي تصور څۀ دے؟
زلمو! ستاسو هغه مشران چا چې د پېرنګي خلاف د غېرت پۀ څادر خپله ملا تړلې وه او ستاسو د ازادۍ او د قامولۍ جنډه ئې جګه نيولې وه. عمر د هغوي ملا کږه کړې او لاسونه ئې کمزوري کړل، د دوي د مستۍ ورځې لاړې؛ اوس ستاسو د مستۍ دور دے او ستاسو د مستۍ ورځې دي. دوي تاسو له ستاسو خاوره، ستاسو عزت، ستاسو ناموس او ستاسو ازادي وګټله او د هغې نه پس بيا د هر غاصب او اٰمر سره وجنګېدل. د دوي ملا کږې شوې خو سرونه ئې تر اوسه لا خم نۀ دي، زۀ اوس د دوي پۀ ژوند ستاسو تنظيم د دې د پاره کوم چې د دوي ضعيفو لاسونو کښې کومه جنډه ټېنګه نيولې ده، دا جنډه د پرېوتو نه مخکښې تاسو مضبوطه ونيسئ او کومه ازادي، عزت او ناموس چې تاسو له دوي ګټلے دے، هغه سمبال کړئ. د دوي کار دے چې خپله تجربه تاسو ته درکړي او ستاسو فرض دي چې هغې نه کار واخلئ. د نوي جوش، نوې ولولې او نوو ارادو سره راپاڅئ او دا د سوونو کالو راسې شاړ پروت وطن د ځان د پاره او د راتلونکي نسلونو د پاره ګل وګلزار کړئ.
زلمو! زمونږ دا صوبه پسمانده نۀ ده، پۀ پس انداخته ده يعني خپله وروستو نۀ ده پاتې شوې وروستو غورځولے شوې ده. مونږ پينځويشت کاله وروستو غورځولے شوي يو او اوس به دغه منزل کوو او نورو ته به ځان رسوو. دا به څنګه کوو، د دې د پاره به د خپل سياست رخ بدلوو. يعني اول زمونږ د قبضې اخستلو جنګ ؤ او اوس مو چې قبضه واخسته نو د پټي د ابادولو د پاره د خوارۍ او جدوجهد وخت دے؛ اوس به مونږ دا ثابتوو چې مونږ پۀ رښتيا د قوم خادمان يو او مونږ کۀ حکومت ته تلي يو نو هم دې د پاره چې خدمت وکړو. دا خپل پټے مو د غاصبانو نه بچ کړو او اوس به دا د سوونو کالو راسې شاړ پټے ابادوو. د دې ابادي اے زلميو! ستاسو ذمه واري ده.
“تاسو او خدائي خدمتګارو کښې يو اصولي فرق دے؛ هغه دا چې خدائي خدمتګار ته دا سبق ورکړے شوے دے چې کۀ څوک پۀ يو مخ څپېړه درکړي نو بل مخ ورته ونيسئ او کۀ څوک درته کنځل وکړي نو تاسو پرې صبر وکړئ او مونږ وايو چې کۀ څوک زمونږ ګرېوان ته لاس وراچوي نو مونږ به دغه لاس خپل ګرېوان ته نۀ پرېږدو او کۀ څوک ئې پۀ زور اچوي نو هغه لاس به ئې ماتوو.”