لانجه مار وزيراعظم

متعلقه مضامين

” اېبسلوټلي يس؟ ” – سلطان خان ټکر

پاکستان او نړيوال پير

د منګي غاړه مې شنه . . . – سلطان خان ټکر

د فواد چوهدري وېنا ده چې پۀ دنيا کښې پۀ انټلېجنس شخصياتو باندې دومره اخبرې اترې نۀ کېږي کومې چې پاکستان کښې پۀ ميډيا کېږي، چې د هغې د وجې نۀ د انټلېجنس سربراه نوم “هاوس هولډ نېم” شي يعنې د هر کور بنده ئې پېژنې او تبصرې پرې کوي۔ فواد چوهدري دا ټول تور پۀ ميډيا لګوي، چې دا هر څۀ د ميډيا پۀ شرارت کېږي، دا ولې داسې کېږي؟ ځکه چې پۀ پاکستان کښې کلېرېټي نشته۔ پۀ ټوله دنيا کښې داسې کنټرورسي د تبادلو پۀ صورت کښې نۀ وي، کومه چې پۀ پاکستان کښې ده، نو بيا فواد چوهدري الزام ولې پۀ ميډيا اچوي۔ يو خوا فواد چوهدري د ائي اېس ائي د سربراه نوې تقررۍ د چاے پۀ پيالۍ کښې د طوفان ټوله ذمه دارۍ پۀ ميډيا اچوي او بيا هم دغې يوه سا کښې دا وائي چې څومره زر دا مسئله حل شوه نو ښۀ به وي يعنې فواد چوهدري پۀ خپله بل چا ته مخاطب دے چې څومره زر وشوه نو ښۀ به وي يعنې نۀ ئې بيا د چاے پۀ پيالۍ کښې طوفان ګڼي بلکې يو سنګينه مسئله ئې بولي، چې مسئله وې نو ميډيا به پرې بيا خبر خا مخا ورکوي، سياستدان او صحافيان به بيا تبصرې هم کوي، ځکه چې دا پۀ بېن الاقوامي توګه باندې يو منلے شوے حقيقت دے چې چرته خبر وي، نو بيا پۀ خبر يو نظر هم وي۔ پۀ دنيا کښې چې څومره دا سې قسمه ادارې دي، نو هغه داسې کردارونه هم نۀ کوي، کوم چې پۀ پاکستان کښې کېږي۔ پۀ خوا کښې کۀ مونږ پۀ خپل ګاونډي ملک نظر واچو، نو دغلته خفيه ادارې داسې پوليټېکل رول نۀ ادا کوي، کوم چې پۀ پاکستان کښې ادا کوي۔ کله هم او چرته هم پۀ هندوستان کښې سياسي منېجمنټ نۀ کېږي، نۀ چرته سياسي ډلې ئې جوړ کړې دي۔ نۀ دا الزامات چرته لګېدلې دي چې پۀ الېکشن او الېکشن ټرېبيونل اثر انداز شوي دي۔ نۀ چرته د سياستدانانو سره خفيه ملاقاتونه شوي دي۔ نۀ چرته پۀ امريکه کښې داسې ښکاري، کومې چې دلته داسې اوپنلي ښکاري، دلته خو وزيراعظم صېب پۀ جار وائي چې پۀ تاريخ کښې چرته هم اسټبلشمنټ پۀ يوه صحفه نۀ دے پاتې شوے، کوم چې اوس دے، اسټبلشمنټ د حکومت د ائيني احکامتو تابع وي، چې جمهوري حکومت د چا هم وي، د يوې صفحې د نعرې مطلب شو چې مخکې اسټبلشمنټ د ائين نه باغي ؤ۔ د دهرنې پۀ دوران کښې به هره ورځ عمران خان وئيل چې نن به د امپائر ګوته اوچتېږي۔ د دې مطلب خو د عمران خان پۀ نزد دا اقرار ؤ چې د وزيراعظم اتار چړهاو د عوامو نۀ بلکې د بل چا کار دے، د بدقسمتۍ نه يوه ورځ هم عمران خان ته “شټ اپ” کال نۀ ؤ راغلے، چې دا پۀ مونږ الزام ولې لګوې۔ نۀ چرته پۀ يو ملک کښې چرته د ادارې يو سربراه داسې وئيلي دي چې فلانکے سياسي جماعت ما جوړ کړے ؤ لکه حميد ګل به چې وې چې ائي جے ائي ما جوړه کړې ده، نو بيا فواد چوهدري پۀ کوم بنياد ولې ګيله کوي چې پۀ يو ملک کښې هم د انټلېجنس سربراه نوم هاوس هولډ نۀ وي، کوم چې پۀ پاکستان کښې دے۔ نن چې وړه لېلو ( مريم ) پۀ خپلو جلسو کښې د ائي اېس ائي د سربراه د پاره کومه لهجه استعمالوي، يقينا چې دا زمونږ د پاره د شرم او د افسوس مقام دے چې د ملک د ټولونه پۀ يو مقدس اداره باندې داسې اټېکونه کېږي، کۀ چرې زمونږ ادارو پۀ سياست کښې انوالمنټ نۀ کولو، نو داسې اټېکونه به عوامو نۀ برداشت کول، مرسته خو وړې لېلو سره سوال نۀ پيدا کېدو چې کړې به ئې وه او نۀ به وړې لېلو داسې اوتې بوتې وئيلې وې، د افسوس مقام دا هم دے چې د دې ادارې د داسې کردار له کبله نن نواز شريف (بحثيت هائي مقام ) هم دے ځکه چې بقول د شيخ رشيد، نواز شريف همېشه د چار نمبر ګېټ مزې خوړلې دي۔ بقول فواد چوهدري دا حساس معاملات دي، پۀ دې هاوس هولډ بحث نۀ دے پکار۔ مان ليا چې دا حساس معامله ده، بلکې يقينا چې حساس معامله ده، پۀ کابينه کښې پۀ دې باندې بحث کول به مناسب وګڼم، خو عمران خان له خپل جماعت ته پۀ دې باندې بريفنګ ورکول ماته نامناسبه خبره ښکاري چې وزيراعظم داسې کوي، نو بيا د فواد چوهدري پۀ ميډيا دا الزام ولې دے چې دا د چايو پۀ پيالۍ کښې يو طوفان دے چې د ميډيا د وجې نه دے۔ وزير اعظم پۀ ښکاره خپل جماعت ته وائي چې زۀ غواړم چې د افغانستان د مسئلې د وجې نه فېض حميد زۀ شپږ مياشتې نور برقرار وساتم، خو زما د مرضۍ نه خلاف فېصلې کېږې، حالانکې پۀ ملک کښې ادارې اهم دي، افراد نۀ دي۔ پۀ دې ملک کښې د سول سپرېمېسي نعرې نن سبا د وړې لېلو ابا جي هم وهي، عمران خان هم ځان د جمهوريت علمبردار ګڼي، ښۀ به وه کۀ وزيراعظم يو قدم نور هم مخکې تلے وے، چې د انټرويو پۀ ځاے ئې وئيلے وې چې دا نومونه به پارلېماني کمېټۍ ته پېش کولے شي، لکه څنګه چې د ملک د اهم عهدو د تقررۍ د پاره د امريکې کانګرس کوي، نو د شفافيت او سول سپرېمېسي دعوا به نوره هم مستحکم وه او د عوامو مرسته به هم د خان پۀ شا وه، فواد چوهدري له دې ته هم کتل پکار دي چې دنيا کښې داسې هم کېږي۔ د فواد چوهدرې الزام پۀ ميډيا باندي لګول سراسر بې بنياد دے، دا د پي ټي ائي د حکومت د اهليت فقدان دے، کار ترې د سره کېږې نه او د الزام د توپو مخ ئې بيا ميډيا طرف ته وي، د پي پي پي پۀ دور کښې د کياني صېب پۀ ملازمت کښې توسيع شوې وه، چا ته پته هم نۀ وه لګېدلې۔ دلته چې د صدر کوم کار وي، د هغې سمري هم وزيراعظم جاري کوي، نو بيا ئې لوبه خود بخود د تماشو وي، د موجوده ارمي چيف د ملازمت د توسيع معامله ئې بيا ځکه د سپريم کورټ د فېصلې نه بغير کولې هم نۀ شوه۔ د پاکستان ميډيا څۀ کوې چې ټوله دنيا ئې راته بيا پۀ تماشه کړې وه۔ د توسيع ملازمت دا معامله دومره د تماشو شوه چې بيا د پاکستان د ائين پۀ کان کښې دا نقطه هم رابرڅېره شوه چې پۀ ائين کښې خو د ارمې چيف د مدت ملازمت د سره تعين نشته۔ بيا د سپريم کورټ پۀ حکم باندې د مدت ملازمت تعين وشو۔ بيا وروستو د توسيع معامله حل شوه۔ چونکې پۀ ائين کښې د مدت ملازمت تعين نۀ و يعنې يو ائينې خلا وه، اپوزيشن د ائيني خلا د پوره کولو د پاره د مدت ملازمت تعين د ائيني مرستې پۀ صورت کښې وکړو، نه چې دا مرسته ئې کړې وه چې موجوده ارمي چيف له دې توسيع ورکړې شي، بلکې دا معامله ئې د وزيراعظم پۀ اختيار کښې پرېښوده يعنې وزير اعظم کۀ غواړي، نو کولے شي۔ بيا وروستو دواړو ډلو يعنې پي ټي ائي حکومت او پي اېم اېل ډرامه بازي شروع کړه، فېصل واډا پۀ يو ټاک شو کښې بوټ پۀ مېز کېښودلو چې پي اېم اېل ” رينګتے رينګتے ” بوټ له ووټ ورکړو او د پي اېم اېل مشر دا ډرامه وکړه چې زما د مرضۍ خلاف پارټۍ فېصله وکړه، خو نون ليګ پۀ دې نافرمانۍ هيچا ته شو کاز نوټس جاري نۀ کړو او عمران خان دا پروپېګنډه وکړه چې ارمې چيف ته پۀ اتفاق رايه سره توسيع ورکړې شوه، حالانکې وزير اعظم ته ائيني اختيار مېلاو شو چې داسې کولے شي، کۀ وزيراعظم کښې حوصله وي چې افراد ناګزير نۀ وي بلکې ادارې ناګزير وي، نو وزيراعظم انکار کولے شو، خو د مهربانۍ چترۍ څوک لرې کوي۔ راته ښکاري چې وزيراعظم اوس هم پۀ ډي چوک کښې ولاړ دے، نۀ سمري جوړول ورځي او نۀ دستخط کولے شي، نۀ بيا به طوفان خا مخا حقيقي وي، نۀ چې د چايو پۀ پيالۍ کښې به وي۔ وزيراعظم هم پۀ جار چغې وهي چې مونږ مثالي طور باندې پۀ يو صفحه يو، وړه لېلو هم بې لګامه لګيا ده، مهربانه صحافيان هم نن اعتراف کوي چې پۀ عمران خان باندې د اسټبلشمنټ ډېر احسانات دي يعنې داسې پېټرن د قوم مخې ته پۀ ډاګه ښکاري چې اسټبلشمنټ پۀ سياست کښې مکمل ککړ دے۔ د دې تنازعې د پېدائش سره د ملک فضا هم څۀ بدله شوې ده، ناڅاپه يو ځل بيا لبېک ډلې مېدان ته راوتې ده، قاف ليګ هم د عمران خان خلاف د ګيلو ډالباش سپړدلے دے، مقبول صديقي اف اېم کيو اېم هم پۀ ترنم سره لګيا دے چې “هم پرېشان هېن بلکې واقعې پرېشان هېن”۔ د بلوچستان تبديلي هم د يو خاموش طوفان څرګندونه کوي يعنې يو پېج ماتېدو پله روان دے- پۀ ائين کښې هم څۀ واضحه نۀ ښکاري چې اخر د ټرانسفر طريقه څۀ ده، پۀ ائين کښې مکمل وضاحت پکار دے بلکې د سويلين بالادستۍ د پاره د اپر پوسټونو کۀ پۀ هره اداره کښې وي د پارلېمانې کمېټۍ پۀ لاس کښې پکار دے۔ د څۀ رېټائرډ جرنېلانو دا خيال دے چې پۀ ارمې کښې د پوسټنګ او پروموشن اختيار د ادارې سربراه سره پکار دے ځکه چې هغه رائټ مېن فار دي رائټ جاب ښۀ پېژني، کۀ داسې وي او يقينا چې داسې ده، بيا اعتراض نۀ دے پکار، خو سوال دا دے چې دا حق د هرې ادارې د پاره پکار دے يعنې يو فوجې افسر له د رېټائرمنټ نه پس نورو ادارو ته د “باس” پۀ روپ کښې تلل نۀ دي پکار۔