Pakhtoon | The Magazine Publishing Since 1928
متعلقه مضامين
1. زما ملګرتيا کښې غمونه او تکليفونه دي، زما لار د ازغو نه ډکه ده، زما ملګرتيا صرف هغه څوک کولے شي چې د خپل ملک او قوم دپاره خپل ځانونه خاورو کښې خاوري کولے شي، پۀ دې لار کښې صدارت، جرنېلي او ممبري نشته او نۀ پۀ دې لار کښې وزارت شته، پۀ دې لار کښې قرباني، تکليفونه او غمونه برداشت کول دي.
2. پۀ ژوند کښې لوے فن دا دے چې لۀ هغه وخت نه استفاده وشي چې پۀ مونږ تېرېږي.
3. زما د لرې برې پښتونخوا لۀ پښتنو سره دومره مينه ده چې زۀ ئې بيان نۀ شم کولے، خپل ملک خپل قام سره وږے تږے او پۀ تکليف کښې خوشحاله يم، پۀ بل ملک کښې پۀ عېش و عشرت کښې نا.
4. چې کوم قوم ته خپله ژبه سپکه شي نو هغه سپک شي او چې خپله ژبه ورځنې ورکه شي نو هغه قام ورک شي. مذهب د نفرت نا بلکې د مينې او محبت علمبردار دے.
5. بې د انقلابي اصلاحاتو دا معاشره پاکېږي نا او د انقلابي اصلاحاتو د نفاذ دپاره انقلابي ذهنيت او انقلابي اراده او اخلاص پکار دے.
6. زۀ يو انقلابي يم، زما د پېژندګلو کوشش وکړئ، زۀ يو انقلابي خدائي خدمتګار يم او زمونږ دا تحريک هم انقلابي دے.
7. ظالمان بهادران نۀ وي، ډېر بزدله او بې ايمانه وي، بهادر سړے پۀ چا هېچرې ظلم نۀ کوي.
8. مشکلاتو کښې مونږ کار شروع کړے ؤ خو زمونږ کار ورځ پۀ ورځ ترقي کوله ځکه چې زمونږ کار د خدائے د مخلوق دپاره ؤ، زمونږ پکښې ذاتي غرض نۀ ؤ بلکې ذاتي مو پکښې نقصان ؤ.
9. زما به همېشه دا کوشش ؤ چې د ښځو د مغزو نه د کمترۍ احساس لرې کړم، ځکه چې پۀ دوي کښې دا احساس خودغرضو او ناپوهو سړو پېدا کړے دے.
10. رښتيني خدائي مذهب خو د مخلوق خدمت دے، مينه ده، محبت دے، انصاف دے، عدالت دے، بردباري او ايمانداري ده چې هغې کښې د خداے د مخلوق ګټه او فائده ده، دا نن چې تاسو وينئ دا سرمايه دارو د خپلو غرضونو د پوره کولو دپاره د مذهب پۀ نوم يوه لوبه جوړه کړې ده، دا نننے مذهب خو د يو کس د عېش و عشرت دپاره دے، د خداے د مخلوق د ارام دپاره نۀ دے.
11. چې څوک غلط کار وکړي هغې ته غلط ووايئ، نۀ سړيتوب، نۀ مذهب، نۀ انسانيت، نۀ شرافت او نۀ اخلاق دا وائي چې مونږ د غلط کار او غلط سړي ملګري شو.
12. ډپلومېسي منافقت دے او زۀ خو منافق نۀ يم چې پۀ خولۀ مې يوه وي او پۀ زړۀ مې بله وي.
13. د تشدد نه نفرت او عدم تشدد نه محبت پېدا کېږي.
14. يو قام هله ترقي کولے شي چې د هغوي سره ښځې اوږه پۀ اوږه لکه د ګاډي د دوېمې پايې روانې شي.
15. د دروغو مزل لنډ وي او تر هغه وخته پورې وي چې رښتيا ښکاره شوي نۀ وي.
16. پښتون يو ژوندے قوم دے، د قوميت او قربانۍ ماده هم پکښې شته خو راويښول غواړي.
17. زۀ هغه خلق نۀ خوښوم چې پۀ زړۀ ئې يوه او پۀ خولۀ بله وي او داسې پارټي يا ډله دنيا کښې چرې نۀ کاميابېږي او کۀ کاميابه شي نو د څو ورځو دپاره.
18. زۀ دا خبره د خپل قوم دپاره خطرناکه ګڼم چې هلکانو لۀ خو دې تعليم ورکړے شي او جينکۍ دې د علم نه محرومې پاتې شي.
19. انقلاب يو سېلاب وي چې راشي نو اودۀ خلق يوسي او ويښ خلق ترې نه فائده وچته کړي.
20. قام هله د چا اثر قبلوي چې اثر واله پکښې پېدا شي.
21. حق څوک چاله ورکوي نا بلکې حق اخستلے کېږي.
22. د زمانې د بدلون سره کۀ قام بدل شي ترقي وکړي، ګنې وروستو پاتې شي.
23. د جنګ پۀ وخت کښې اسونه نۀ تيارېږي.
24. پښتانۀ ډېر ښۀ قام دے، دوي پۀ افسانو او قيصو ډېر نۀ پوهېږي، هر ښۀ کار چې پۀ دوي کوې نو ځان ورته نمونه کړه، چې تۀ روان شوې، دوي هم درپسې روانېږي.
25. زمونږ پۀ خلقو کښې دا يو لوے کمے دے چې مونږ همېشه د بل د کمزورو او عېبونو راوښکلو او لټولو پۀ غم او فکر کښې يو او خپلو کمزورو او عېبونو ته فکر نۀ کوو.
26. بل هله خوشحالولے شې چې پۀ ځان تکليف تېر کړې.
27. په خدمت کښې اختلاف نۀ راځي او نۀ کېدے شي، اختلاف همېشه پۀ ذاتياتو کښې وي.
28. مونږ لۀ د چا نه نفرت کول نۀ دي پکار، پکار ده چې هر چاسره ښۀ سلوک وکړو.
29. د هر سړي عزت پۀ خپل لاس کښې دے او کۀ هر سړے خپل خواهشات او ضروريات قابو کړي نو همېشه به پۀ ارام، خوشحاله او عزت مند وي.
30. د کوم قام ښځې چې بېدارې شي او د ملک د ازادۍ دپاره ملا وتړي نو هغه قام څوک غلام ساتلے نۀ شي.
31. ما دې خپل بدنصيب قام ته کتل چې اول خو د دوي د خدمت څوک نۀ وي او کۀ څوک يو نيم پېدا هم شي نو څوک د خدمت موقع نۀ ورکوي.
32. څوک چې د خدائے دپاره د قام خدمت کوي نو د هغۀ مخه څوک نۀ شي بندولے.
33. کۀ پښتون ،پښتون شي نو دے څوک غلام کولے نۀ شي.
34. د جذباتو لاره د ابادۍ لاره نۀ ده.
35. زۀ به د عدم تشدد پۀ حق کښې او د تشدد پۀ مخالفت کښې جنګېږم، هر چرته او هر کله چې جنګ وي زۀ به پرې لعنت وايم.
36. کۀ د ظالم او مظلوم مقابله راشي نو مونږ به د مظلوم ملګري يو.
37. پۀ بل د اعتراض نه مخکښې د ځان اصلاح پکار ده.
38. په خپله صفا خبره کوم او د بل نه هم پۀ صفا اورېدلو خوشحالېږم.
39. د يو ملک دپاره ټولو نه ضروري شے امن دے.
40. بې تعليمه خلق د مذهب پۀ نوم ډېر زر دهوکه شي.
41. مونږ پۀ خپله خاوره امن غواړو.
42. د هېچا دپاره خپل اصول پرېښول نۀ دي پکار.
43. مايوسي د خلقو عقيده کمزورې کوي، پۀ هېڅ حال کښې مايوسي نۀ ده پکار.
44. څوک کۀ د ژوند سره مينه لري نو د خپل ملت د ژوند پۀ لاره کښې دې مړ شي.
45. پښتانۀ د هر چاسره ورورولي کوي خو غلامي د ورور هم نۀ قبلوي.
46. په سياست کښې همېشه رښتيني اوسئ ځکه چې ستاسو دوستان پۀ تاسو باور لري او ستاسو پۀ خبرو عمل کوي، دښمنان تاسو ته معتقد نۀ دي، ستاسو هره خبره دروغ ګڼي او د معنٰي برعکس عمل کوي.
47. د سياست هنر فرصت نۀ پېدا کوي بلکې د فرصت نه استفاده او ګټه پورته کوي.
.48 پۀ دنيا کښې دوه قوتونه دي، يو توره او بل تدبير دے، خو تدبير همېشه پۀ توره غالب وي.