Pakhtoon | The Magazine Publishing Since 1928
متعلقه مضامين
د افغانستان د امن سره يوازې د سيمې امن نه بلکې د ټولې نړۍ امن تړلے شوے دے ځکه چې دا يويشتمه پېړۍ ده او پۀ مېدان لکه د پخوا پۀ شان صرف امريکه او روس نۀ دي ولاړ بلکې اوس پۀ دې زغل کښې چين هم رادانګلي دي او لوبه لا زياته خطرناکه شوې ده. مخکښې يوازې د ګاونډي ملکونو خبره وه خو اوس ترکي، انډيا، جرمني، برطانيه او يو شمېر نور ملکونه ښۀ پۀ جار مېدان ته راوتلي دي او هر ملک د خپلو مفادو پۀ غم کښې دے. ځنې ماهرين دا هم وائي چې دا يو فېصله کن وخت دے او پۀ دې کښې به د امن خوښو او د جنګ لمبو ته د لمن وهلو والا ملکونه هم معلوم شي. هم دغه شان پۀ سيمه کښې به د سياسي ګوندونو پټې څهرې هم راښکاره شي. منافقت او درغلي به هم رابرڅېره شي. کۀ وګورو نو د افغان شخړې پۀ اړه زمونږ د حکومتونو څۀ چې د يو شمېر سياسي او مذهبي ګوندونو دريځونه او نظرونه هم وخت پۀ وخت اوړېدلي راوړېدلي بلکې کۀ دا ووايو چې څۀ امريکې وئيلي نو ورپسې زمونږ زياتره حکومتونه او سياسي جماعتونه تلي دي او د هغوي خبره او دريځ ئې خپل کړے دے. خو پۀ دې ټولو حالاتو کښې د ملک يو ګوند داسې هم دے چا چې څلوېښت کاله مخکښې کومه خبره کړې وه نو نن هم پۀ هغه خپله خبره ولاړ دے. ډېر خلک وخوئيدل، بدل شو، د ګوندونو نظرونه او خبرې بدلې شوې خو صرف يو عوامي نېشنل ګوند دے چې مشرانو ئې د افغان شخړې پۀ اړه کوم نظر او دريځ څلوېښت کاله مخکښې لرلو نو نن پرې هم دا ګوند ولاړ دے. د دې ګوند بنياد او اډاڼه پۀ پخو او کلکو کاڼو ده، سل کاله مبارزه، هلې ځلې او سفر لري، د عدم تشدد پۀ کاليو سمباله ده ځکه نو خبره ئې د کاڼي کرښه وي او چې څۀ ئې مشرانو وئيلي دي نو هغه تاريخ ثابت کړي دي. څلوېښت کاله مخکښې ئې هم د امن پلويتوب کولو او نن هم د امن خبره کوي. څلوېښت کاله مخکښې ئې هم جنګ غندلے او مسترد کړے ؤ او نن ترې هم کرکه کوي، څلوېښت کاله مخکښې ئې هم ټوپک د مسئلۍ حل نۀ ؤ ښودلے او نن هم وائي چې ټوپک د مسئلې حل نۀ دے، څلوېښت کاله مخکښې ئې هم افغانستان کښې روان جنګ ته فساد وئيلے ؤ او نن هم ورته فساد وائي، څلوېښت کاله مخکښې هم پۀ افغانستان کښې د جمهوري خلکو ملګرے ؤ او نن هم د جمهوري خلکو پۀ طرف ولاړ دے، څلوېښت کاله مخکښې ئې هم وئيلي وو چې پۀ افغانستان کښې بدامني او جنګ به پاکستان هم ځپي او نن هم وائي چې کۀ افغانستان کښې حالات خراب شو يا خداے مۀ کړه خانه جنګي شروع شوه نو پاکستان به هم لوے زيان سره مخ کېږي، څلوېښت کاله مخکښي ئې هم وئيلي وو چې دا د اسلام نه بلکې د سلام پۀ سپېځلې نامه د لويو قوتونو د مفاداتو جنګ دے او نن هم وائي چې دا د اسلام نه بلکې د لويو ملکونو د ګټو جنګ دے. څلوېښت کاله مخکښې ځنو مخصوص خلکو د دې خبرو لۀ وجې د ګوند پۀ سپېځلي مشرانو پسې پروپېګنډې کړې وې، د غدارۍ تمغې او د کفر فتوې ئې پرې لګولې وې او نن هم ځنې د ډالرو اوږي او د خپلو مفاداتو غلۀ د ګوند مشرانو پسې سپکې تورې وائي. څلوېښت کاله مخکښې چې چا د جنګ اور ته لمن وهلې وه او مالي ګټې ئې ترې پورته کړې وې او پۀ سياسي او هر لحاظ ئې ځان مضبوط کړے دے هغه خلکو ته نن يو ځل بيا د جېبونو ډکولو او خپل غرضي سياست پړقولو موقع پۀ لاس ورغلې ده. هم دا وجه ده چې عوامي نېشنل ګوند کۀ د جنګ خلاف خبره کوي نو هم دا مذهبي او سياسي جماعتونه ئې پر ضد ډنډوره کوي. دا خلک يو ځل بيا د اسلام مقدس او سپېځلے نوم استعمالوي، ساده خلک غولوي او خپل کارونه ترسره کوي. خو د دې خلکو ايمان اوس اولس ته معلوم شوے دے ځکه چې پخوا ميډيا نۀ وه نو د دوي خبرې به پټې پاتې کېدې خو اوس د سوشل ميډيا لۀ وجې د دوي هغه زړې خبرې خلک دوي پسې راوباسي او سوال کوي چې مخکښې مو څۀ وئيل او اوس څۀ وايئ. هم دا خلک دي چې اول ئې پۀ افغانستان کښې د مجاهدينو، بيا د طالبانو ملاتړ کولو. خو د نائن الېون نه پس ئې يو ټرن واخستو او د امريکې پۀ طرف ئې مخ کړو ځکه چې د مفاداتو قبله ئې بدله شوه. بيا لۀ دې وروستو ئې بيانونه د بلها تضاداتو نه ډک دي ځکه چې د سياسي شعور او نظريې نشتوالي لۀ وجې ئې خبرې او دريځ پۀ ځاے نۀ اودرېږي نو چې کراچۍ کښې يو شان خبره وکړي نو لاهور کښې بل شان کوي، چې سوات کښې څۀ وائي هغه پۀ اسلام اباد کښې پۀ خولې نۀ راولي، او چې وزيرستان کښې کومه خبره کوي نو هغه پۀ پېښور کښې نۀ کوي. د دې خلکو او ګوندونو د دورنګۍ او منافقت لۀ وجې دې ملک او د دې خوار غريب اولس ته داسې زيانونه ورسېدل چې ازاله ئې ناممکنه دي خو دوي نن يو ځل بيا د اور لمبو ته لمنې وهي. خو لکه څنګه چې مونږ ووئيل چې عوامي نېشنل ګوند پۀ مېدان څلوېښت کاله مخکښې هم ولاړ ؤ او نن هم ولاړ دے. مخکښې ئې هم د امن، جمهوريت او سياسي مفاهمت خبره کوله او نن ئې هم کوي. فخر افغان باچاخان او رهبر تحريک خان عبدالولي خان چې څلوېښت کاله مخکښې څۀ وئيلي وو هغه څلوېښت کاله پس د دې ملک حکمرانانو او زورورو هم ومنل. نن هم ګوند د خپلو مشرانو پۀ لار روان دے او حق خبره کوي. نن هم د ملي مشر اسفنديار ولي خان پۀ خولۀ دغه خبره ده چې افغانستان کښې امن پۀ پاکستان کښې د امن لپاره ضروري دے. نن پۀ ټول ملک کښې صرف او صرف عوامي نېشنل ګوند او د دې مشران دي چې د افغان کشالې پۀ اړه سپين، صفا، روښانه، څرګنده، واضحه او د مصلحتونو نه پاک دريځ او موقف لري. د مرکزي سينئير نائب صدر امير حېدر خان هوتي نه تر مرکزي سېکرټري جنرل ميا افتخار حسېن پورې او صوبائي صدر اېمل ولي خان نه تر صوبائي عمومي سېکتر سردار حسېن بابک پورې، د کارکن نه تر د پښتون سټوډنټس فېډرېشن پورې د دې ګوند سره تړلے هر سړے نن د امن خبره کوي، د مفاهمت خبره کوي، د سياست خبره کوي او د مسئلې د خبرو لۀ لارې د هواري خبره کوي.
امير حېدر خان هوتي هر ځاے کښې وائي چې افغانستان کښې امن صرف او صرف د مذاکرات لۀ لارې ممکن دے او زياتوي چې جنګ د يوې مسئلې هم حل نۀ دے. دغه شان دا هم وائي بلکې غږ کوي چې د دې کشالې حل دې د سياسي مفاهمت پۀ لار راوويستے شي او ورسره دا هم ښۀ پۀ واضحه ټکيو کښې وائي چې ټوپک د دې مسئلې حل نۀ دے ګنې څلوېښت کاله مخکښې به ئې حل راووتے ؤ. هوتي صېب وائي چې د څلوېښت کلنې جګړې صرف او صرف نقصان رسېدلے او اوس بايد د افغانستان د مستقبل فېصله د افغان اولس پۀ خوښه او مرضۍ وشي.
ميان افتخار حسېن وائي چې امريکه د دې حالاتو ذمه واره ده. وائي چې هغوي پۀ کوم مقصد راغلي وو هغه پوره نۀ شو او واپس ځي. زياتوي چې نۀ خو طالبان ختم شو او نۀ افغان حکومت مضبوط شو. ميا صېب وائي چې مونږ د افغانستان د امن سره يو، افغانستان يو خودمختار ملک دے او مونږ ئې قدر کوو. دغه شان دا هم وائي چې پۀ قطر کښې افغان مذاکراتو کښې افغان حکومت ته برخه نۀ ورکول هم د امريکې غلطي ده. دوي وائي چې عوامي نېشنل ګوند د هرې ترهګرې ډلې مخالفت کوي او هم دا رنګه د افغانستان يوې وسله والې ډلې ته د حواله کولو هم زمونږ ګوند مخالف دے. وائي چې اے اېن پي د انتها پسندۍ مخکښې هم خلاف وه او اوس هم خلاف ده.
هم دغه شان پۀ دې حالاتو کښې صوبائي صدر اېمل ولي خان هم پۀ ښکاره پۀ مېدان ولاړ دے او وائي چې نن خبره د سياست نه بلکې د دې خبرې ده چې څوک کوم طرف ته ولاړ دے. وائي چې افغان حکومت جمهوري حکومت دے او بايد د جمهوريت دفاع وشي. اېمل ولي خان زور راوړي چې مسئله بايد پۀ خبرو اترو هواره کړې شي. دغه شان پۀ ميډيا هم غږ کوي چې د حالاتو سره سم او روغ تصوير وړاندې کړي.
دغه شان سردار حسېن بابک هم هر ځاے ښۀ پۀ چغه وائي چې خبره بايد پۀ خبرې سره سر ته ورسي او لۀ جنګه څنډه وشي. دا هم وائي چې نن ټول جماعتونه د حالاتو پۀ اړه د تذبذب ښکار دي خو يوازې عوامي نېشنل ګوند دے چې ښکاره جاره د اصولي او تاريخي دريځ سره پۀ مېدان ولاړ دے.
دغه شان د عوامي نېشنل ګوند ځوانان، د سوشل ميډيا کارکنان او هر غړے د خپل وس مطابق د امن خبره بدرګه کوي.
د نړۍ زورورو له هم پکار دي چې د امن پۀ لړ کښې خپل کلک رول ولوبوي او د جنګونو لمبو ته د پاې ټکے کېږدي.
مونږ دلته حق بجانب يو چې کۀ څلوېښت کاله مخکښې د عظيم خدائي خدمتګار باچاخان بابا او رهبر تحريک خان عبدالولي خان خبرې او مشورې چا اورېدلې وې او عمل ئې پرې کړے ؤ نو نن به حالات دومره ترينګلي نۀ وو. نن هم موقع شته چې د امن اواز بدرګه کړے شي او د جنګ مونډ وويستے شي. ګنې دوېم صورت کښې خداے مۀ کړه تباهي يو ځل بيا د سيمې مقدر دے.