جانبدار ليکوال – ډاکټر سيد ظفرالله بخشالے

متعلقه مضامين

“پۀ جديد نظم د خدائي خدمتګار تحريک اثرات” (پۀ خدائي خدمتګار تحريک شوي سندي کار يوه څېړنه) – ډاکټر سيد ظفرالله بخشالے

پښتو شاعرۍ ته د عربۍ او فارسۍ نه راغلي اصناف؛ يوه تحقيقي او تنقيدي جائزه – ډاکټر سيد ظفر الله بخشالے

انجمن اصلاح الا فاغنه کښې د فضل الرحيم ساقي کردار – ډاکټر سيد ظفرالله بخشالے

ارواښاد سليم راز صېب پۀ کال ۱۹ مارچ ۱۹۳۹ کښې چارسده، دوابه سوکړ کښې د ملک امان الله خان پۀ کور کښې پېدا شوے ؤ. د دوي پلارنۍ ټاټوبے بټګرام علاقه ټيکري ؤ. دوي پۀ قبيله يوسفزو ملکال شاخ سره تعلق لرلو . لومړۍ زده کړې ئې مشن پرائمري سکول بنو نه ترلاسه کړې . لومړے د پښتو ژبې نړیوال کنفرانس بنسټ ایښودونکے او ټول عمري چئيرمېن ؤ او د حکومت لۀ خوا پۀ ۲۰۱۰ کښې ورته صدارتي جایزه هم ورکړل شوه.

ښاغلے سليم راز يو مترقي ليکوال ، شاعر، اديب او کالم نګار ؤ. هغه پۀ خپله نظريه د ژوند تر وروستۍ سلګۍ ولاړ ؤ. د دوي يو مشهوره خبره چې * غېر جانبرداري * منافقت دے چې زۀ غېر جانبدار يم پکار خو دا ده چې يو شاعر ليکوال ، اديب او دغه رنګ هر يو کس د حق مرسته وکړي . يوه بله خاطره چې ما ئې هم هر ځاے حواله ورکړې ده، پۀ مردان کښې ئې د مزدور کسان يو ادبي غونډې صدارت کولو، بلها شاعرانو او ليکوالانو پکښې ګډون کړے ؤ، هر يو شاعر به پۀ دې طرحه شعر وئيلو چې* راپاڅه صنوبره * کله چې دوي راپاڅېدل نو خپله صدراتي وېنا کښې ناستو خلکو ته ئې ووئيل چې نن به هم صنوبر حسېن کاکا جي ، رحمان بابا، خوشحال بابا راپاڅي او ستاسو مشکلات به حل کوي، تاسو لا نن هم مرده پرست يئ او مړو ته ناست يئ. د مۍ پۀ ۱۳، ۱۴، ۲۰۱۷ ،کښې د پښتو ادبي غورځنګ لۀ خوا “درې نومونه درې وياړونه” پۀ نوم ډاکټر صادق ژړک يو دوه ورځنۍ سيمينار راجوړ کړو. د دې سيمينار مشري سليم راز کوله، د پېښور نه زۀ ، ډاکټر نورالبصرا من ، عطامحمد هيله من ، اصف صميم ، نجيب الله پاڅون ، لمر نيازي ، ميا وکيل شاه فقير خېل او ځني نور ملګري وو چې پۀ ټوله لاره مو د راز صېب د ژوند خوږې ترښې قيصې اوريدلې .

ارواښاد سليم راز د انجمن ترقي پسند مصنفين خېبرپښتونخوا صوبې 22 کاله مسلسل عمومي سېکتر او د اکادمي ادبيات پاکستان د بورډ اف ګورنرز غړے هم پاتې شوے. د پاکستان پۀ هره صوبه او علاقه کښې پۀ زرګونو ادبي او علمي مباحثو او دستورو کښې د برخې اخستو او وېنا کولو نه علاوه پۀ افغانستان کښې ئې هم پۀ اهمو کانفرنسونو او سيمينارونو کښې مقالې اورولې دي. د ارواښاد پۀ درجنونو اثار چاپ شوي، چې مشهور پکښې دا دي:

چاپ کتابونه :

1 د زخمونو پسرلے (شاعري) کال 1989

2 تنقيدي کرښې (نثر. تنقيدي مقالې) وړومبے چاپ کال 1999، دوېم چاپ 2000

3 له باړې تر باړه ګلۍ (نثر. رپورتاژ) چاپ کال جنوري 2004

4 زۀ لمحه لمحه قتلېږم (شاعري) چاپ کال 2007، درېم چاپ دسمبر کال 2011

5 پاکستاني ادب 1947 تا 2008 انتخاب شاعري پشتو

6 يقين (نثر_اردو) چاپ کال جنوري 2016

7 پښتو ادب کښې سفرنامه (تحقيق 96-1947) چاپ کال 2015

8 ادب او تنقيدي مسائل (نثر) چاپ کال 2016

9 رحمان بابا ( نثر- يوه فکري مطالعه) چاپ کال 2015

هم دا راز د سليم راز پۀ ژوند او ادبي خدماتو پۀ مختلفو موضوعاتو کتابونه ، مقالې او کالمونه ليکل شوي . د يادولو وړ پۀ کښې د سليم راز ژوند او ادبي خدمات روښان يوسفزے ( اردو) ، راز کي باتين صفدر علی صائم ،د سلیم راز سریزې عبدالحمید زاهد او داسي نور کتابونه شامل دي

اېوارډونه :

1. 2010 کښې صدارتي اېوارډ ورکړے شو.

2. پۀ تنقيدي کرښې کتاب ورته د اکادمي ادبيات پاکستان اسلام اباد لۀ خوا د بهترين کتاب اېوارډ ورکړے شو او داسي نور بلها ادبي اېوارډونه او توصيفي اسناد ورکړي شوي .

سلیم راز لۀ اوږدې ناروغۍ وروسته د مۍ پۀ ۱۷کال ۲۰۲۱ پۀ ۸۲ کلنۍ وفات شو او پۀ چارسده کښې پۀ پلرنۍ هدیره کښې ماسخوتن اتۀ بجې خاورو ته وسپارل شو . د دوي پۀ جنازه کښې د شاعرانو ليکوالانو ، سياسي مشرانو، ژونالستانو ، مخور شخصياتو او هم دا راز د د دوي کورنۍ ګډون وکړو . مونږ هم د فاتحي په مراسمو کښې د ډاکټر سهيل خان پۀ مشرۍ کښې ګډون وکړو. پۀ ياد وفد کښې ډاکټر اسرار، کرم ستار يعقوبي ، عوامي نشنل ګوند مشران سردار حسين بابک، شعېب خان ، روښان يوسفزے، ساجد ټکر (پښتون مجله) ، بلال خان ، حضرت زبېر زبېر او د نورو فرهنګي ، ادبي او سياسي شخصيتونو ګډون وکړو . پۀ دې موقع مو د پښتو څانګې عبدالولي خان پوهنتون مردان د استاذانو شاګردانو، پاڅون مجله ، باچا امام عمومي کتابتون، ديار خان فاونډېشن يعقوبي صوابۍ، پښتو نړیواله مرکې لۀ خوا د ارواښاد سليم راز پۀ قبر د ګلونو څادر خور کړو . د کورنۍ سره مو غم رازي ښکاره کړه او د مغفرت لپاره مو لاس وچت کړو . (ديادو کتابونو حواله د امجد علي خان خادم نه اخستې شوې ده)

الله تعالی دې جنتونه نصیب کړي . امین