باچاخان ټرسټ اېجوکېشن فاونډېشن د نوي سحر پۀ تلاش – ډاکټر سهېل خان

د باچاخان ټرسټ جوړول د سل کلن قامي تحريک هغه مرام ؤ چې بنسټ ئې د جولائۍ مياشت دوه زره درې کښې کېښودل شو. د انجمن اصلاح الافاغنه اولني فعاليت د تعليم او تربيت سره تړون لرلو. د کومې د مخه چې انجمن يوسل څلور ازاد سکولونه بېلا بېلو سيموکښې جوړ کړل. هم دغه وجه وه چې باچاخان ټرسټ هم د باچاخان متبادل تعليمي نظريې/ماډل پۀ رڼا کښې فېصله وکړه چې د باچاخان ماډل هائي سکولونه بېلا بېلو سيموکښې جوړکړي. د باچاخان ټرسټ شق اووم سب شق څوارلسم لاندې د “باچاخان ټرسټ اېجوکېشنل فاونډيشن” بنياد پۀ کال 2009ز کښې کېښودل شو. او تر دې دمه دغې فاونډيشن 17 باچا خان سکولونه جوړکړل. پۀ دې 17 باچا خان سکولونو کښې څوارلس پښتونخواه او درې بلوچستان کښې دي. د اېجوکېشن فاونډېشن مشري تردې دمه محمد رضا او ډاکټر خادم حسېن صېب ترسره کړه. او خپله خوله او زړۀ چاودنه ئې دې قامي تحريک او قامي مبارزې د پاره د تعليم د لارې ورکړه. پۀ دېرشم مۍ 2020 د فاونډېشن زوړ بورډ اف ډائرېکټرز تحليل کړے شو او نوے بورډ اف ډائرېکټرز جوړېدو نه پس اولني اجلاس کښې ځينې مهمې فېصلې وشوې چې لنډه خاکه ئې داسې ده.

– د زوړ اېم ډي د استعفٰي نه پس د نوي اېم ډي د تقررۍ فېصله

– د باچاخان سکولونو چلولو د پاره د باچاخان ماډل دجوړولو منظوري

– پۀ هره ضلع کښې د باچاخان تعليمي ماډل رڼا کښې د انجمن اصلاح الافاغنه پۀ طرز د شلو ممبرانو انجمن جوړول

– د باچاخان تعليمي ماډل رڼا کښې د اېجوکېشن فاونډېشن د پاره نوي قواعد و ضوابط جوړول

– دباچاخان تعليمي نظام سکولونو چلولو د پاره جامع پاليسي او پلان جوړول.

– د باچاخان سکولونو انتظامي امورو، نصاب، امتحاني جائزې او هم نصابي هلو ځلو نوې سرګرمۍ کول.

– د خېراتي ادارې پۀ توګه د باچاخان ټرسټ اېجوکېشن فاونډېشن مخ ښکاره کول.

– د باچاخان سکولونو مالي ستونزې هوارول.

– فاونډېشن ته عطيه شوې زمکو باندې خپل سکولونو جوړولو د پاره منصوبه بندي کول.

– د باچاخان ماډل سکولونو سټېټس د سېکنډري نه هائير سېکنډري ته اړول.

د دغه ټولو مقاصدو د پاره به يوه بشپړه پاليسي او پلان د جولائۍ مياشت کښې جوړ کړے شي چې د قانوني ټيم د جائزې نه پس به بورډ اف ډائرېکټرز ته منظورۍ د پاره پېش کړے شي. دغه رنګ د اګست د مياشت نه وروستو به پۀ دغه پاليسۍ او پلان باندې عملي کار شروع کېدو ابتدا وشي.

دا مهال د باچاخان سکولونو تفصيل دا دے:

1. باچاخان هائي سکول نسته روډ،چارسده

2. باچاخان هائي سکول هيرو شاه، ملاکنډ

3. باچاخان هائي سکول توته کان، ملاکنډ

4. باچاخان هائي سکول مينګوره، سوات

5. باچاخان هائي سکول ګنديګار، دير اپر

6. باچاخان هائي سکول چترال

7. باچاخان هائي سکول پائينۍ، صوابۍ

8. باچاخان هائي سکول نوتيه، پېښور

9. باچاخان هائي سکول متهرا، پېښور

10. باچاخان هائي سکول کوهاټ

11. باچاخان هائي سکول کرک

12. باچاخان هائي سکول ټل

13. باچاخان هائي سکول هوسۍ، مردان

دې سکولونو کښې د زده کوونکو تعداد دوه زره يوسل دے. د استاذانو تعداد يوسل پنځلس دے. د استاذانو ماهانه تنخوا او د سکول کرايه اتلس لکهـ روپۍ ده. دا هر څۀ ډېر مهم، تاريخي او وخت لوے ضرورت دے خو له بده مرغه باچاخان ټرسټ اېجوکېشن فاونډېشن د پاره دا مهال دا ټولې خرچې سر ته رسول يوه لويه ستونزه ده. کۀ د نړۍ پۀ کچ د دې سکولونو پۀ اهميت خبره کوو نو لکه د نمر روښانه ده چې اهميت ئې صرف زيات نه بلکې ډېر زيات دے ځکه چې دا سکولونه پۀ شعوري توګه ماشومان روزي او چې د تعليم کومه سمه لار ده، پۀ هغې ئې د تعليم پۀ کاليو سمبالوي ۔

د قامي تحريک دا قامي کار او د غريبانانو او يتيمانانو ماشومانو فکري روزنه کول او هغوي د سماجي ژوند د پاره تيارول غټ مرام دے.قامي کارونه قامي سوچ او عمل غواړي . مونږ اميد لرو چې د قامي تحريک مينه وال به دا بوج پۀ شريکه وچتوي.

کۀ دې منزل ته رسولے نۀ شي

ټوپ کړه درياب ته سفينه ماته کړه

چې د اشنا مخ پۀ کښې نۀ ښکارېږي

دغه بېکاره ائينه ماته کړه

مينه او درد چې پۀ کښې نۀ وي د بل

ځيګر دې وشلوه سينه ما ته کړه

دا هم ولولئ

د ضم شوو ضلعو غونډه – ډاکټر سهېل خان

اتلسمه فروري، 2020 خوشحال بابا وئيلي دي: هوښيار هغه دے چې سخت جنګونه تر خېره …

ځواب دلته پرېږدئ

ستاسو برېښناليک به نه خپريږي.